رواية الى زوجي العزيز الفصل الثاني 2 - بقلم منة محمد

بعد توقيعه على ورقة التنازل عن شقته الغالية التي تقع بحي الزمالك، قامت بسحب الورقة ودوى صوت الزغروطة الخاصة بها. نظرت إلى توقيعه بفرحة كبيرة والابتسامة لا تفارق وجهها. شروق: أيوه كده. هوديها للمحامي حالاً يسجلها في الشهر العقاري عشان يوديها بكرة الصبح. كادت أن تنهض ولكن منعها أنس من الوقوف. أنس: اتنيلى اقعدي.. وريني العرايس الأول خلينى أختار. بابتسامة صغيرة وضعت شاشة الهاتف أمامه. شروق: بص دي كده.

لمعت عيناه فور رؤيته للفتاة ونظر لزوجته بفرحة ممزوجة بالحيرة. أنس: ودي مطلقة؟ ولا متجوزتش قبل كده؟ ابتسمت شروق غامزة. شروق: متجوزتش قبل كده. ثم تابعت بجدية. شروق: بس اتخطبت 7 مرات. ضيق عينيه وهو يناظرها بشك. أنس: ودي ما اتجوزتش ليه لحد دلوقتي؟ هزت كتفها ببساطة. شروق: معقدة. تحدث متذمراً. أنس: لا يا شروق إحنا ما اتفقناش على كده. إيه النصب ده. ردت عليه بثقة.

شروق: يا ابني دي معقدة من فكرة الارتباط عموما لأن كان أهلها بيتخانقوا قدامها طول الوقت. بس مش معقدة من الجواز، متقلقش. نظر إلى صورة الفتاة بحقد. أنس: هي حلوة وشكلها محترم بس هتلاقيها خام باين عليها.. وريني حد تاني كده وبعدين هبقى أرجع لها تاني. رفعت إحدى حاجبيها ثم أعادتهما لوضعهما الطبيعي مبتسمة وأعادت التقليب بالصور وأعطته صورة فتاة أخرى. شروق: هاه دي بقى هتدلعك. عود فرنسي وقصيرة وسمرا.

تأمل أنس الفتاة مالياً ثم أردف. أنس: ودي فيها عيوب إيه؟ شروق بجدية: مطلقة مرتين و... قاطعها أنس متذمراً. أنس: ومسكوسة قبل كده في دعارة.. إيه يا شروق هي إما بخمار أو رقاصة! مفيش حاجة وسط كده. أظهرت ابتسامة سخيفة على وجهها وهي تقلب بالصور وأعطته أخرى وهي تبتسم. شروق: يبقى مفيش غير دي. البيست بتاعتي "دعاء" اهو دي بقى أنت عارفها. نظر أنس لها بطرف عينه باستحقار لتقابله هي بالترجي.

شروق: بالله عليك يا أنس ده كان حلم حياتنا إننا نتجوز راجل واحد.. عشان خاطر شروق حبيبتك. قابله أنس بابتسامة سمجة. أنس: حبك برص. انتشلت شروق الهاتف من يده وقالت بعصبية. شروق: معنديش غير دول إذا كان عجبك، أنا كان شرطي واحدة عارفاها وبحبها وبتحبني عشان منتخانقش أنا وهي بعد ما تتجوز. أمسك أنس بيدها قبل أن تقف. أنس: هو انتي قولتي الأولانية دي اسمها إيه؟ أجابت بحماس وابتسامة واسعة.

شروق: سلمى. بس انت برضه هتختار دعاء البيست بتاعتي. تجاهل أنس حديثها ملقياً أسئلته. أنس: وسلمى دي بقى هتوافق عليا ليه؟ أجابت بنفس الحماس. شروق: كانت بتشكر طول الوقت في شخصيتك لما بقعد أحكيلها عليك وكانت بتقولي إنها تتمنى يجيلها واحد زيك كده.. بس انت هتطلب إيد دعاء إمتى؟ أقوم أبشرها؟ تجاهلها أنس وهو يعدل لياقة قميصه بغرور نتيجة مدح عروسته الجديدة له من قبل أن تقابله شخصياً.

أنس: والله البت سلمى دي زود وشكل قلبي انشرح لها.. وهي عندها أخوات بقى؟ ومستواهم المادي والاجتماعي عامل إزاي؟ أجابت شروق بابتسامة بلهاء. شروق: هي البنت الوحيدة على 3 رجالة. حالتهم المادية كويسة زي عيلتي كده. عيلتها معظمها دكاترة وهي دكتورة بطرى بس مش شغالة.. ودعاء برضه دكتورة بطرى. تحمس أنس وأمسك بذراعي شروق بحماس. أنس: أنا خلاص قررت، فتحيها في الموضوع. تحدثت بحماس وابتسامة أوسع. شروق: دعاء على التليفون أصلاً.

رفع أنس إحدى حاجبيه. أنس: دعاء مين أنا قولت سلمى. لوت شفتيها بتذمر. شروق: والله دعاء فرفوشة أكتر كنا هنروشك، بس انت الوش فقر. وضع يده على كتفها ضاماً إياها نحوه. أنس: يا بت. انتي ودعاء صحبتك دي كل يوم تتخانقوا وتشتموا بعض وأنا مش عاوز أبهدلك معايا هجيب لك سلمي! شكلها هادي. ردت عليه شروق بغير اقتناع. شروق: هو انت تعرفها؟ دي عصبية أصلاً! ابتسم أنس ببلاهة. أنس: بس قلبي انفتح لها.

ابتعدت شروق خطوتين بعيداً عنه وضربته على رأسه. شروق: دي راسك اللي هتفتح متستعجلش على قدرك.