رواية الاعمى الفصل السابع 7 - بقلم ليلة عادل

يجلس الأب والأم التي تعمل مهندسة معمارية وأخوته ياسمين وكريم، شقيقه الأكبر بأربع سنوات، على السفرة يتناولون الغداء. الأب: أميرة فين؟ الأم: لسه ماجتش. الأب: إنتي مش شايفة إن حياتها كلها بقت في بيت الدكتور ده؟ الأم: ما هو اللي بيشرف على الرسالة بتاعتها، سيبها براحتها. الأب: أنا مش موافق على اللي بيحصل ده. الأم: خالد، سيب أميرة. إحنا ما صدقنا إنها بقت عاقلة، إنت مش شايف إنها اتغيرت؟ الأب: إزاي؟

كريم: بقت تتكلم قليل، بقت هادية وعاقلة كده، تحسها كبرت، بطلت عصبية وصوتها بقى واطي. بصراحة مروان ده علمها الأدب، واضح إنه مسيطر، ههههه. الأم: إنت مشفتش بنتك؟ حتى لبسها الغريب غيرته، تحسها بقت حد تاني. الأب: بس واخدها مننا، يشكر إنه غيرها بس. ياسمين: بابا سيبها ونبي، أول مرة أشوف أميرة فرحانة من قلبها من غير دموع ويأس. الأب: (مش عاجبه كلامهم) واضح إن فيه إجماع. طب لما الهانم تيجي، خليها تجيني. الأم: مش هتكمل أكلك؟

الأب: لا، شبعت. (يتركهم ويخرج) فيلا مروان. داخل المطبخ تقف أميرة أمام البتوجاز تقوم بعمل قهوة وتمسك تليفونها. مروان واقف خلفها، ساند ظهره على الترابيزة ويضع يده في جيبه. أميرة: دكتور، أغنية من 5 حروف لعمر دياب، ماتخفيش، صح؟ مروان: إزاي يعني؟ أميرة: احسبها كده. مروان: احسبيها إنتي كده. أميرة: اه، 6 ههههه. سوري. مروان: (يضع يده على وجهه ويمسح وجهه بغباء)

6. هتشل منك. هبقى أعمى ومشلول والله منك. إنتي ساقطة حساب وإملاء وعربي وكله. أميرة: ليه كده بس؟ مروان: معرفش. عملتي القهوة؟ أميرة: أيوه. مروان: طب يلا نكمل. (أثناء سيرهم) أميرة: طب استنى، هات إيدك كده. على فكرة أنا شطورة، عرفت إنها من 9. مروان: بس، هش. متتكلميش تاني لحد ما نوصل هناك. والله هبدأ أنسى الحساب بسببك. أميرة: ماشي يا دكتور مروان، ماشي.

يدخل مروان وأميرة حديقة الفيلا. كان الجو هادئاً. ماجي وهادي يجلسون على كنبة أمام حمام السباحة. ماجي نائمة على صدر هادي وهو يلعب بشعرها. أول ما يدخلون عليهم، ماجي تتخض. أميرة: (باستغراب) ناس غريبة. مروان: هو إيه اللي غريب؟ أميرة: لا، مفيش. تقوم ماجي مسرعة وتعدل نفسها هي وهادي، ثم تساعد مروان للجلوس وتجلس بجواره. ماجي: إيه يا حبيبي، عملت القهوة خلاص؟ بقيت مدمن قهوة أميرة. مروان: (في سره) هي قهوة بس.

هادي: بصراحة أنا حبيتها من إيدها. مكنتش بشربها، بس لما شربتها منها بقيت مدمن. لو مشربتش منها يوم بقلب زومبي. (نظرات غيرة من مروان وماجي) أميرة: دكتور. مروان: نعم. أميرة: في رحلة كام يوم للسخنة، ممكن نروح؟ ماجي: (بعجرفة) ما تروحي. هو واصي عليكي؟ مروان: لا يا ماجي، بس عندنا رسالة بنحضر لها وشغل. بس مافيش مانع، ممكن تروحي. أميرة: لا، فهمتوا غلط. أنا عايزاك تيجي معايا. مروان: إنسى. أميرة: ليه بس؟

ده فرصة حلوة، حضرتك مش بتخرج غير من أوضتك لأوضة المكتب اللي هي أصلاً جوه أوضتك، للجنينة. وفين وفين لما بتروح المركز. ماجي: (بسعادة) عندها حق. روح وغير جو. أنا متأكدة ميرو هتاخد بالها منك. مروان: إنتي شايفة كده؟ ماجي: أكيد. مروان: هادي، وإنت رأيك إيه؟ يا هادي. (هادي سرحان في أميرة) هادي. هادي: آه، روح. مروان: طب ما تيجي معايا. ماجي: إنت عارف، عندي افتتاح معرض. مروان: وإنت يا هادي؟ هادي: لا، أنا مسحول في الشغل. مروان:

(يستغرب) مسحول؟ هادي: آه والله. طالع عين اللي جابوني. أنا فاكس من الحوار ده. أنا هطير، عندي حوار كده هخلصه. سلام سلام يا مكسرات. أميرة: سلام. ماجي: هادي، استنى. (يقوم هادي وماجي خلفه، وبعد قليل) مروان: (ينظر مروان إلى أميرة) أميرة. أميرة: نعم. مروان: إيه رأيك في هادي؟ أميرة: صايع وشمال. مروان: ههه. إزاي يعني؟

أميرة: معرفش، بس هو كده. وبعدين حوار إنه فضل في إنجلترا 15 سنة ده، شكله مارحش مارينا. ده مش بيتكلم كلمة توحّد ربنا إنجليزي. غير كسرة بوقه، أسلوب كلامه، الكلمات اللي بيستخدمها. مروان: بس بس، إنتي دمرتي الراجل. أميرة: مش صح تحليلي؟ مروان: 100%. ده اللي مخليني هتجنن. أميرة: تتجنن من إيه؟ مروان: لا، سيبك مني. المهم لمبه وزومي جايين. أميرة: آه طبعاً. نفسي يتعرفوا عليك زي ما أنا عرفتك وبحبك. مروان: هههه. نفس الأغنية.

أميرة: ما إنت عارف إني بحبها. مروان: مدمنها، وحياتك. أميرة: (بصوت دخلها) مدمناك إنت وحياتك. فيلا مروان. حديقة الفيلا. مروان يجلس وهو وماجي وهادي يشربون القهوة. هادي: (يضع فنجان القهوة على ترابيزة بنشاط) أنا هطير. عندي مشوار مهم. ماجي: استنى يا هادي، خد مروان معاك. مروان: لا، أنا هستنى منير. ماجي: إنت مش رايح المركز؟ مروان: آه. ماجي: طب متروح مع هادي بدل ما منير ييجي ياخدك وترجعوه تاني المركز.

مروان: مش عايز أتعبُه معايا. يمكن مش في طريقه. هادي: لا يا سطا، في طريقي. مافيش أي تعب. مروان: (يستغرب) سطا؟ ماجي: (بتحاول تلم الموقف) هههه. شكلك أخدت على جو مصر بسرعة يا هادي. هادي: آه طبعاً. مركز مروان. منظر عام للمركز من الخارج، ثم يصل مروان وهو بداخل سيارة هادي. ثم يخرج منها ويساعده هادي للخروج، ثم يقفون أمام السيارة. مروان: شكراً يا هادي، تعبتك. هادي: لا، مفيش حاجة. (ثم يأتي شاب فجأة، يسلم على هادي)

الشاب: أسامة، إزيك؟ إيه يا ابني رجعت إمتى من السعودية؟ هادي: (باستغراب) حضرتك بتكلمني أنا؟ إنت أكيد بتشبه. (ثم يغمز للشاب) الشاب: آسف. هادي: ناس غريبة. مروان: عادي، بتحصل كتير. شكراً. هادي: على إيه؟ تحب أطلعك؟ مروان: شكراً، عارف طريقي. يتركه مروان، ثم يدخل داخل المبنى، ثم يدخل غرفة مكتبه. مكتب مروان. مروان جالس على كرسي المكتب وهو يفكر فيما حدث معه في الخارج بحيرة. ثم تدخل عليه أميرة وتقترب منه وتتحدث.

أميرة: إيه ده، جيت؟ مروان: لا، لسه. أميرة: لا والله، إنت بتقلش. مروان: لازم بقالي سنة أعرفك. أميرة: ههههههه. حضرت الحاجة؟ مروان: آه. فاضل بس أخلص شوية حاجات هنا عشان يبقى مش ورايا حاجة هناك. أميرة: قشطات.