رواية العاصفة الفصل الرابع 4 - بقلم سلمي السيد

و قبل ما يقعدوا مكانهم ورد جت و قالت: إيلام، تعالي الملكة فاطمة عوزاكي يله. إيلام بإستغراب: الملكة!! ورد بجدية: أيوه يله قومي. ورد خدت إيلام و راحت بيها على جناح الملكة، إيلام كانت داخلة مخضوضة من إن الملكة طلبتها. دخلت و هي بتبص حواليها و مذهولة من جمال الجناح اللي عمرها ما شافت زيه قبل كده حتى في خيالها. فاطمة كانت واقفة و مديها ضهرها، إيلام وقفت و وطت راسها و هي بتقول: مولاتي الملكة. فاطمة لفت وشها و قالت:

ارفعي وشك. إيلام رفعت وشها و عيونها في عيون فاطمة. فاطمة قالت في ذهنها: شبه مامتها بالظبط، جميلة جداً زيها و كأنها فولة و اتقسمت نصين. كملت بصوت مسموع و قالت: عرفت إن ابني هو اللي جابك على القصر هنا. إيلام هزت راسها بالإيجاب في صمت. فاطمة بتنهد: انتي جيتي منين بالظبط؟؟ إيلام بتوتر: من قرية خارج المملكة، بس قريبة منها، و… إيلام حكت لـ فاطمة كل اللي حصل لحد ما دخلت القصر. فاطمة ردت عليها و قالت

و هي قاصدة تشوف ردة فعلها: تمام، خليكي جاهزة في أي وقت الملك حمزة يطلبك فيه، وارد تبقي جاريته المفضلة، و وارد تبقي أم ابنه أو بنته، و لكن و انتي جارية. إيلام غمضت عيونها و هي بتزدرق ريقها و فتحت عيونها و هي بتقول: أنا استحالة اوافق على حاجة زي كده حتى لو فيها موتي. الملكة هزت راسها بالإيجاب و هي بتقول بجمود: تقدري تمشي دلوقتي. إيلام بصت لـ ورد بغيظ في صمت و أدت التحية لـ فاطمة و خرجت من الجناح و هي بتقول بنرفزة:

هما فاكرين نفسهم إيه دول؟! هو إحنا خدامين عند اللي جابوهم!! ، و أي يخلف من غير ما يتجوز دي ده أي ياربي الناس دي بس، و ااااااه ما تفتح يا عم أنت كنت هتوقعني. قالت آخر جملة دي لما معاذ خبط فيها و هو جاي بسرعة من الجنب و قال: عم!!! ، انتي عبيطة يا بت ولا إيه احترمي نفسك و اعرفي انتي بتتكلمي مع مين. إيلام بإنفعال: في إيه بقى هو أنا كل ما أعمل حاجة لحد يطلع يقولي الكلمتين دول، ده أنت اللي خبطت فيا و…

نورهان كانت جاية بالصدفة و لما شافت زعيق إيلام لـ معاذ شهقت بخضة و جريت عليهم و قالت و هي بتقاطع كلام إيلام: إيلام اسكُتي ده الأمير معاذ، أنا آسفة يا سمو الأمير والله هي متعرفش والله العظيم دي لسه جديدة. إيلام برقت بعيونها و قالت: أمير!!! (وطت راسها بسرعة بإحترام و قالت بتوتر) بعتذر جدًا أنا مكنتش أعرف إنك الأمير. معاذ: و أديكي عرفتي، اتفضلي مشوفكيش قدامي خالص.

إيلام جزت على سنانها من كتر الأوامر اللي بتاخدها و أديتله التحية اللي عبارة عن أنها بتوطي راسها كام سنتيمتر لقدام و بترفع وشها تاني و مشيت. نورهان خافت عليها و بصت لـ معاذ و قالت بخوف: صدقني يا سمو الأمير البنت دي جديدة و متعرفش أي حاجة هنا والله. معاذ بضحك: متخافيش يا نورهان هو انتي شوفتيني هقت*لها ولا إيه!! (كمل بإبتسامة و قال) هي جت إمتى؟؟ نورهان: من يومين. معاذ بإبتسامة: بس قمورة صح؟؟

معاذ بيحب نورهان جدًا و تقريبًا مش بيخبي عليها حاجة و دايمًا بيعتبرها زي أخته الكبيرة. ردت نورهان بتوتر لأن البنت دي حمزة هو اللي جابها و ده معناه إن مينفعش حد يقرب منها ولا يبصلها حتى و قالت: هي جميلة ما شاء الله عليها، بس يا سمو الأمير البنت دي الملك حمزة هو اللي جابها على القصر. معاذ بفهم: دي البنت اللي كان بيتكلم عنها امبارح. نورهان: قصد حضرتك إيه؟؟ معاذ بلا مبالاة:

ولا حاجة، روحي شوفي شغلك و أنا رايح على الديوان عشان حمزة عنده قرارات مهمة هيقولها النهارده. نورهان أدت التحية و قالت: أمرك يا سمو الأمير. في الديوان. كان حمزة قاعد على عرشه و جنبه صف من أهم ناس في الدولة، و هما عثمان و معاذ و عبد الرحمن و ذو الفقار و الوزير خالد و بعض الوزراء. حمزة قال بوقار: بسم الله الرحمن الرحيم نفتتح الديوان.

(شاور بإيده للحارس و الحارس قدم ليه ورقة مختومة بختم الملك حمزة، حمزة خدها من إيد الحارس و قال) ذو الفقار باشا، اتفضل اقرأ القرارات دي. ذو الفقار خدها من إيد حمزة و فتحها و قال بصوت مسموع للكل:

بسم الله الرحمن الرحيم، أنا الملك حمزة ظل الله على الأرض، أنا حاكم بلاد المسلمين و غير المسلمين في مملكتي، أنا من أعطاه الله كل هذه النعم، أحمده و أشكرُه و أستعين به في كل ما أملُك، و لن أعصي الله أبدًا في شعبي و جنودي، لذلك قررتُ إلغاء قانون الإنجاب من الجواري في حين لم تكن زوجته، و أن يجب على كل ملك و كل أمير في المملكة أن يتزوج من الفتاة أولًا ثم ينجب منها ثانيًا، و هذا هو القانون الجديد، و لإننا مسلمون ف يجب أن

نعتز بأحكام و قواعد ديننا، و ليس قوانيين يضعها بشر فقط، ف القانون البشري من غير العقيدة الدينية فيصبح هلاك لصاحبه، لذلك الزنا مُحرم شرعًا و قانونًا من اليوم، و يشهد الله عليَّ أنني لن أمس فتاة لحين أن تكون زوجتي، و كذلك يجب على الأمراء أن يفعلوا هكذا.

ذو الفقار بعد ما أنهى الكلام بص لـ حمزة بإبتسامة و كذلك عثمان و معاذ و كل الموجودين، و أدوه التحية، و بعدها بدأوا في الكلام و المناقشة في أمور تخص المملكة. و بعد انتهاء الديوان الكل مشي يشوف مشاغله اللي داخل القصر و خارج القصر.

حمزة راح على جناحه و هو حاسس بـ راحة نفسية محسهاش قبل كده بعد إلغاء القانون، و صلي ركعتين لله و بعدها إيلام جت في دماغه. فكر فيها شوية و في آخر تفكيره ندى للحراس و هو مبتسم و لما واحد من الحراس دخل حمزة قال بإبتسامة: ابعت لـ الجارية اللي اسمها إيلام تجيلي دلوقتي. الحارس بإحترام: أمرك يا جلالة الملك. ورد كانت عمالة تزعق في الجواري و كانت مضغوطة من كمية الشغل اللي عليها و كانت ماسكة صنية عليها كوباية

عصير و بتقول بإنفعال: ياربي أرحمني منهم يارب، يله انتي و هي شوفوا شغلكوا كويس يا أما و الله لهتصرف معاكم تصرف تاني. إيلام عدت من جنبها و قالت بـ طيبة: أساعدك. ورد تنهدت و قالت: خدي يا إيلام معلش ودي العصير ده لجناح سمو الأمير معاذ لأن ورايا مليون حاجة. ورد سابتها و مشيت حتى نسيت تقولها مكان الجناح فين بسبب انشغالها. إيلام مشيت شوية و هي مش عارفة حاجة و بالصدفة قابلت ذو الفقار باشا. أول ما شافته قالت:

لو سمحت يا عمو ممكن تقولي جناح سمو الأمير معاذ فين؟؟ ذو الفقار ضحك بـ طيبة و بوجه بشوش لايق على سنه الخمسيني و قال: عمو!!! ، من هنا يبنتي أخر جناح على اليمين في الطرقة دي، انتي جديدة هنا صح؟؟ إيلام بإبتسامة: أيوه. ذو الفقار بإبتسامة: إن شاء الله تنبسطي معانا. إيلام بإبتسامة: إن شاء الله.

إيلام مشيت في الاتجاه اللي ذو الفقار قاله و وقفت قدام الجناح و الحراس فتحولها الباب و دخلت، و كان معاذ قاعد و باصص بتركيز في أوراق تخص المملكة. إيلام قالت بتوتر و قلق: اتفضل العصير. معاذ رفع وشه بسرعة لما سمع صوتها و بص لها لحظات و بعدها نزل عيونه و قام حط الأوراق على الترابيزة و قال: شكرًا تقدري تحطيها هنا و تخرجي.

إيلام كانت خايفة جدًا من كونه أمير و هي طولت لسانها عليه. حطت العصير و كانت متوترة جدًا. و هي بترجع بضهرها و موطية وشها في الأرض داست على فستانها و اتكعبلت و كانت هتقع بس معاذ مسكها بسرعة و كان قريب منها. إيلام توترها و خوفها و خضتها زادوا أكتر و خصوصًا إن معاذ مسبهاش و كان ما زال على وضعه و هو باصصلها. بس هي بعدت بسرعة و بتقول بإزدراء ريقها و بخوف: آسفة… إن…. أنا لازم أخرج دلوقتي.

خرجت بسرعة و تقريبًا كانت بتجري من توترها و فجأة ظهر عبد الرحمن قدامها و اللي سنه ٣٤ سنة و راحت إيلام صرخت لما شافته لإنها اتخضت من ظهوره المفاجأ. عبد الرحمن اتخض من صرختها و قال: في إيه شوفتي عفريت؟؟ إيلام بدموع و سرعة في كلامها: معلش أنا آسفة والله، و شكلك أمير أنت كمان زيهم أنا تعبت والله تعبت و مبقتش فاهمة حاجة. عبد الرحمن بضحك: أهدي يا ماما أهدي مفيش حاجة، أنا مش أمير أنا عبد الرحمن الوزير الأول للمملكة. إيلام

بإزدراء ريقها قالت بدموع: ماشي. عبد الرحمن بتساؤل: كنتي بتجري ليه في حاجة حصلت معاكي؟؟ إيلام بدموع و توتر: لأ، أنا بس كنت بودي العصير لسمو الأمير معاذ و خرجت علطول. عبد الرحمن بعقد حاجبيه: هو انتي مين اللي جابك على القصر هنا؟؟ إيلام بتوتر و دموع: حمزة. اااءء قصدي الملك حمزة هو اللي جابني. عبد الرحمن تنهد: طب هو محدش قالك هنا إن مينفعش تدخلي جناح أي أمير بصفتك جارية هتخدمه عشان الملك هو اللي جايبك؟؟ إيلام بعدم فهم:

مش فاهمة. عبد الرحمن: يعني أقصد أنتي في خدمة الملك و بس، و غلط عليكي و على أي أمير إنك تخدميه، لإنك بالبلدي كده محطوطة في قايمة حِرم الملك. إيلام مفهمتش و قالت بتلقائية: حِرم مين أنا مش مراته. عبد الرحمن مسح بإيده على وشه و هو بيقول: ياربي أفهمها إزاي دي، بصي ياا…… إيلام: إيلام. عبد الرحمن: بصي يا إيلام، حمزة ده يبقى الملك، عارفة يعني إيه الملك؟!

، يعني ملك البلاد دي كلها، و هو اللي جابك هنا بإيده و بنفسه، و ده معناه إنك تحت أوامره هو و بس، خدمته هو و بس، تنفيذ أوامره هو و بس، طبعًا بجانب سماع كلام الملكات و احترام الأمراء فقط لا غير، يعني دخولك جناح الأمير معاذ غلط. إيلام بدموع: مكنتش أعرف، ورد هي اللي قالتلي أروح أديله العصير. عبد الرحمن بتفاهم: معلش ورد ممكن تكون انشغلت و نسيت تقولك، المهم إنك عرفتي. و هي واقفة بتتكلم معاه جه الحارس و قال:

إيلام، الملك عاوزك. عبد الرحمن بإبتسامة: روحي. إيلام مشيت من قدام عبد الرحمن و راحت لجناح حمزة و لكن كانت داخلة مبسوطة إنها هتشوفه. دخلت و أدته التحية بإبتسامة و رفعت وشها و قالت: جلالتك طلبتني. حمزة بإبتسامة: أيوه طلبتك، تعالي اقعدي. كانوا الاتنين قاعدين على كنبة في تراس الجناح (تراس بمعنى بلكونة بس حجمها كأنها أوضة) ، و المنظر قدامهم كان المملكة بكل ما فيها من بيوت و قصور و شجر و مناظر مبهجة. بص لها

و قالها عن قصد إنه يعرفها: انهارده لغيت قانون الخلفة من الجواري و حطيت مكانه إن الملك لازم يتجوز عشان يخلف، سواء ملك أو أمير. إيلام بإنبساط: كويس أوي والله، ده الصح أصلًا، أصلنا مش عبيد عندكوا يعني عشان تعملوا كده، و والله حتى لو عبيد مينفعش بردو. حمزة كان مبتسم ليها و قال: أكيد. بعد ما إيلام خرجت من جناح معاذ هو فكر فيها، لكن حاول يمنع تفكيره و قال في ذهنه: مينفعش يا معاذ. في جنينة القصر. عثمان بهمس و إبتسامة: قمر.

قمر جت بسرعة ليه و هي بتقوله: لو الملكة إيمان شافتني و أنا واقفة بتكلم معاك و الله مش بعيد تموتني. عثمان بإبتسامة: سيبي ماما عليا أنا هتصرف، المهم عاوز أقولك حاجة. قمر بإبتسامة: قول سمعاك. عثمان بإبتسامة: طبعًا انتي عارفة إني بحبك. قمر بإبتسامة: عارفة. عثمان بإبتسامة: و هتجوزك في خلال شهر على ما أظبط مع ماما. قمر بصدمة: تتجوزني؟؟!!! عثمان: أيوه، حمزة حط قانون جديد و مسموح للأمير يتجوز جارية عادي. قمر بتوتر:

طب و مامتك هتوافق؟؟ عثمان بإبتسامة: ملكيش دعوة أنا هتصرف معاها متخافيش. بعد ربع ساعة في جناح أحد الأمراء (يا ترى عثمان و لا معاذ 🙂) الوزير خالد: يا سمو الأمير لازم ننجز في موضوع الاغتيال، الملك زي ما انت سمعت إنهارده أعلن بالجواز، و قريب جدًا هتلاقيه متجوز و لو جاب ولد يبقى الفرصة هتبقى صعبة أكتر علينا. الأمير اتنهد بضيق و قال:

عارف عارف، بس المشكلة إن حمزة حاليًا مش في دماغه يخرج برا القصر، ده غير إننا لازم نحسب لكل الاحتمالات، و خبر موت حمزة هينتشر إزاي، و إيه رد فعل الشعب و هيعوزوا مين اللي يستلم العرش أنا و لا الأمير……. أخويا، أنا مش عاوز المملكة تنهار يا خالد. حمزة بإبتسامة إعجاب: إيلام انتي حبيتي قبل كده؟؟ إيلام سكتت لحظات و قالت بتوتر: لأ. حمزة بتفكير: تفتكري حد ممكن يحب حد في أقل من أسبوع؟! إيلام بتلقائية: ده هبل يا جلالة الملك.

حمزة: نعم!!! إيلام بتوتر: أقصد يعني مش عارفة، لأ هو قصدي يعني إنه ممكن مش حب لكن إعجاب. حمزة ابتسم و قال بعفوية: أنا معجب بيكي جدًا يا إيلام. إيلام برقت عيونها و اتوترة و قالت: ح..حض…حضرتك مع………. قاطعها حمزة و هو بيكتم ضحكته على ريأكشناتها و قال: عادي على فكرة، هو أنا قولت حاجة غلط؟؟ إيلام بإزدراء ريقها: ل…لأ، بس انت ملك و أنا جارية ف إزاي. حمزة ابتسم و قال:

مش شرط الملك أو الأمير يحب سلطانة و يخليها ملكة، ممكن تبقي جارية في نظره بمقام مليون سلطانة و ملكة. إيلام ابتسمت و قلبها لأول مرة يدق و يرتبك من وجودها مع حمزة، و قالت بضحكة خفيفة: بس أظن مامتك الملكة فاطمة مش طيقاني. حمزة بإبتسامة:

أولًا مليش دعوة برأي حد فيكي المهم أنا شايفك إيه، ثانيًا عشان تبقي عارفة معلومة زي دي و هي إن الملكة فاطمة مرات عمي مش أمي، لكن هي اللي ربتني و بتحبني جدًا و بقولها يا ماما، هي غالية عندي أوي. إيلام بإبتسامة: ربنا يحفظهالك. حمزة بإبتسامة: يارب. و بعد قعدتهم بوقت إيلام قامت و خرجت برا الجناح و كانت مبسوطة أوي. وصلت أوضتها و قمر كانت قاعدة مستنياها و قالت: ما بدري يا هانم كنتي فين ده كله؟؟

إيلام كانت حاسة بألم شديد في ضهرها و كتفها بس قالت بإبتسامة: كنت مع الملك حمزة، (كملت بألم) بس بقولك إيه يا قمر أنا ضهري واجعني أوي و مش عارفة أعمل إيه و كتافي بتألمني جدًا. قمر قعدت ورا إيلام و فتحت سوستة الفستان و حطت على إيديها المرهم و لما مسكت الفستان من فوق و نزلته شهقت بصدمة و هي بتقول: العلامة دي بتعمل إيه على كتفك؟؟ إيلام عقدت حاجبيها و قالت: يا جماعة في إيه ليه كلكوا بتتخضوا لما بتشوفوها كده!!!! قمر بصدمة:

إيلام انتي عارفة العلامة دي معناها إيه؟؟؟ إيلام بلا مبالاة: لأ معرفش. قمر قامت وقفت بصدمة و هي بتقولها: العلامة دي مش بتكون على كتف حد غير أفراد الأسرة الحاكمة و بس، و اللي بيعملها هو الملك اللي بيبقى ماسك الحكم في الوقت اللي طفل من أفراد العيلة يتولد فيه. إيلام بعدم تصديق و ذهول: انتوا بتقولوا إيه لاء طبعًا، ممكن تكون شبهها بس مش أكتر. قمر:

يا حبيبتي شبهها إيه بس، دي علامة مميزة جدًا و ضد التقليد، دي علامة واحدة بس، انتي عارفة ده معناه إيه؟؟ إيلام بذهول: إيه؟؟ قمر: إنك سلطانة و تبقي فرد من أفراد الأسرة الحاكمة.