رواية العاشق المخدوع الفصل الرابع 4 - بقلم سولييه نصار

بس أنا ما كنتش عايزة كده، أنا كنت عايزة تتفضح. قالتها ولاء وهي بتشرب سيجارتها بتوتر شديد. خطتها باظت، كانت نفسها رأفت يتجنن ويفضح وسام. كانت نفسها تورّي لأبوها إن وسام مش نقية. كانت نفسها تندم أبوها إنه حب وسام أكتر منها. حتى وهو بيحاول يتواصل مع ولاء وهي رافضة، كانت عارفة إن وسام حاجة تانية خالص. أمها ماتت بحسرتها عشان أبوها سابهم وبقى مع مراته القديمة.

هي تعترف إن تصرفات والدتها كانت غلط، ولكن كان مفروض يديها فرصة تانية، مش يرميهم سنين من غير ما يسأل فيهم. ده حتى ما سألش في بنته ولا كان بيبعتلهم فلوس. اضطرت ولاء وهي عندها ١٣ سنة تشتغل عشان تقدر تصرف على مامتها لأنها كانت مريضة. اتعذبت وتعبت في الوقت اللي وسام كانت بتتمتع بنعيم أبوها. أبوها اللي ما سألش على بنته إلا لما أمها ماتت وكملت واحد وعشرين سنة، جاي يعرض أبوته عليها. كان فين زمان وهي بتتبهدل من وهي طفلة؟

بتشتغل وتتحمل إهانة وأحيانا ضرب من أصحاب الشغل. كان فين لما كانت أحيانا تبات من غير عشا؟ فين لما كانت بتشوف أي بنت ماسكة إيد أبوها ومبسوطة وحاسة بالأمان؟ أبوها عشان غلطة أمها قرر يعاقبها هي. ضحكت ولاء بسخرية وهي بتمسح دموعها. أبوها دمر حياتها، خلى قلبها مليان بالحقد. ورغم إن وسام كويسة جدا معاها، بس هي بتكرهها لأنها حصلت على حب وحماية أبوها وهي لا. عشان كده قررت إنها تدمر سعادتها.

جابتها في يوم عندها وحطت لها في العصير حبوب مخدرة وجابت مروان الشاب اللي بتحبه ولاء وعملوا الفيلم ده. وصوروا وسام. وطبعاً عشان عارفة كل حاجة عنها وعارفة إمتى رأفت هيتقدم لها بالظبط، قدرت تاخد رقم رأفت من وسام من غير ما تحس. وبعتت الصور من رقم خاص قبل الميعاد. افتكرت إن وقتها رأفت هيتعصب ويفضح وسام، لكن للأسف ده بعد بس. ما حاولش يعمل حاجة تاني. "إحنا عندنا الصور دي وممكن ننشرها على النت." مسك مروان إيد ولاء وقال.

بصت له ولاء بتوتر. قلبها وجعها للحظات. الفكرة خوفتها إنها تفضح وسام قدام الكل بالطريقة دي. معرفتش ليه وقتها حست بالنفور من الفكرة، بس الانتقام كان أقوى منها وهي بتبتسم وتقول: "فكرة حلوة أوي." فجأة اتنفضت لما رن الجرس. راحت تفتح الباب بسرعة واتصدمت لما لقت وسام. اتوترت وبعدين افتكرت إن هي اللي طلبت منها تيجي. "يخربيت الحظ." بس حاولت متبينش حاجة لأن كده كده هي مش شافت الصور بتاعتها فمش هتتعرف على مروان. "وحشتيني أوي."

"ملقيتش حد ممكن يفهمني غيرك." حضنت وسام ولاء وهي بتقول وهي بتبكي. حضنتها ولاء وهي بتتنهد وبتحاول تكتم صوت ضميرها وقالت: "وإنتي كمان وحشتيني يا حبيبتي." بعدت وسام فجأة وهي بتشوف مروان. "إنتي عندك ضيوف." قالت بكسوف. ردت ولاء بنبرة حاولت تخليها عادية وقالت: "ده مروان زميلي في الشغل جابلي شوية ملفات." ابتسم مروان وقال: "طيب يا ولاء أنا همشي دلوقتي. فرصة سعيدة يا آنسة." وبعدين مشي.

بصت وسام على الشاب وهو ماشي ولفت نظرها الوشم الكبير اللي على طول دراعه وفي النص حرف W. وبصت لولاء وقالت: "متأكدة إنه مجرد زميل؟! وبعدين ضحكت. مر يومين وأنا متردد إني أكلم وسام. كنت مستني الفرصة المناسبة اللي أكلمها فيها. لحد ما قررت إن كده كفاية، أنا هكلمها بنفسي. وطبعاً ملقيتش إلا نسرين عشان تساعدني في الحكاية دي. واللي طبعاً طلبت منها تجيب وسام للكافيه اللي جنب الشركة من غير ما تقولها إن أنا اللي طلبت كده.

"يا ستي بقالنا ساعة في الكافيه وطفحت كوبيتين عصير مانجا وقولتي يا وسام عايزاكي في موضوع مهم ولحد دلوقتي أنا مش فاهمة إيه الموضوع." قالتها وسام لنسرين بعصبية. فردت نسرين: "إنتي ليه متعصبة كده؟ أنا جبتك تشوفي التصليحات اللي هتتعمل في الكافيه، على فكرة ناويين يوسعوه." بصتلها وسام بصدمة وقالت: "إنتي عبيطة يا نسرين؟ هو ده الموضوع المهم اللي انتي عايزة تكلميني فيه؟! اتوترت نسرين وقالت:

"بصراحة كده رأفت اللي طلب مني أجيبك هنا." "إيه؟!!!! "واضح فعلاً إن سري هيكون في بير معاكي يا أستاذة نسرين." قولتها بسخرية وأنا بقرب منهم. اتوترت وسام وقامت عشان تمشي. مسكت إيديها وقولت: "طيب يا نسرين تقدري تمشي دلوقتي." مشيت نسرين وبصيت لوسام اللي رافضة تبصلي أصلاً وقولت: "مش هاخد من وقتك كتير يا وسام بس لازم أتكلم." بعد دقايق كنت قاعد قدام وسام. برضه كانت رافضة تبصلي بس كنت شايف دموعها اللي بتنزل وبتمسحها بسرعة.

طلعت تليفوني وقولت: "من حقك تعرفي السبب اللي خلاني أسيبك فجأة." بصتلي بكره. فتحت موبايلي وقولت: "الصور دي جاتلي قبل ما أجيلك البيت مباشرة." مسكت وسام الموبايل وعيونها اتوسعت بصدمة وقالت وهي بتشوف الوشم المألوف: "مروان؟!!!!