رواية العاشق الفصل التاسع 9 - بقلم سلمي السيد

مراد قال بشر: أنت الي عملت العداوة دي يا أدهم. أدهم ابتسم و سابه و دخل أوضته. مراد فضل باصصله لحد ما قفل الباب و بعدها أفتكر كلامه لما قال لجدو و عمه فتحي: أنا عاوز أتكلم معاكوا. *** **فلاش باك قبل يوم واحد.** جده: خير يا مراد؟

مراد: بص يا جدي، أنا مش هسيب سلمي. أنا فضلت سنتين قافل على مشاعري لحد ما ألاقي وقت مناسب أخرجها. و أنا الي جبت سلمي الشركة عشان تبقي قدام عيني، و عملت عشانها كتير أوي، و ربنا عوض صبري ده و خلاها تحبني. و هي دلوقتي موافقة إني أتقدملها. أنا آسف في الي هقوله يا بابا (عمه) ، بس سواء ماما (مرات عمه)

رفضت أو وافقت أنا مش هتجوز غير سلمي. و محدش يقولي ابن عمك كمان بيحبها ف سيبوها أنتو الاتنين عشان ده مش هيحصل أبدًا. أنا لو جيت في يوم سبت سلمي ف ده هيبقي قسمة و نصيب من عند ربنا و السبب يكون بيني و بينها، لكن إني أتخلي عنها عشان أدهم ف انسوا. فتحي بتنهد: أستغفر الله العظيم يا رب. طب دلوقتي أي موقف أدهم من الحكاية دي؟

الجد محمد: زي ما سمعت يا فتحي، مراد قال بلسانه إن سلمي بتحبه هو و وافقت يتقدملها. أصلًا خناق أدهم كله مع مراد عشان سلمي. ده عاوزها و ده عاوزها. و دلوقتي سلمي عاوزة مراد، يعني سواء مراد أتخلى عن سلمي أو لأ ف سلمي مش هتتجوز أدهم لإنها مش بتحبه. فتحي: يعني أفهم من كلامك إنك موافق إن مراد يتقدم ل سلمي؟ الجد بص لـ

مراد و قال: أيوه موافق. و يشهد عليا ربي إني عمري ما فرقت بين مراد و أدهم. بس أنا وافقت لإن سلمي بتحب مراد و هي خلاص اختارت. ف أنا كده مفضلتش مراد على أدهم. سلمي هي الي اختارت و محدش يقدر يجبرها على حاجة. *** **باك.** مراد بعد ما افتكر الكلام دخل أوضته و طلع تليفونه و فتح الواتس و كتب لـ

سلمي: مش هعرف أرن عليكي دلوقتي عشان الوقت متأخر، و آسف إني ببعت الرسالة في وقت زي ده، بس كان لازم أقولك قبل الصبح. سلمي متجيش الشركة بكرة، و أنا بكرة الصبح هكلمك. بعد ما بعت الرسالة قفل تليفونه و نام. و سلمي كانت ما زالت صاحية مش عارفة تنام من الكلام الي أدهم قاله. قامت بزهق و فتحت التليفون بتاعها و شافت رسالة مراد. قرأتها بس مردتش عليه، و قلقت أكتر من رسالته لكن حاولت تهدي و قامت صلت قيام الليل و بعدها نامت. ***

**تاني يوم الصبح.** نجوي بدموع: يعني يا بابا (حماها) أنت موافق على جواز سلمي من مراد!!! الجد: يا نجوي البنت بتحبه و وافقت إنه يتقدملها. نجوي بدموع: طب و أدهم؟ الجد: يا بنتي سلمي أصلًا مش بتحب أدهم، ف حتى لو مراد مش هيتجوز سلمي ف سلمي استحالة تبقي لأدهم لإنها مش بتحبه، و أدهم لازم يتقبل ده و... قاطعه دخول أدهم و قعد و هو بيقول

بهدوء رعب الكل من جواهم: عادي يا ماما، جدو قالك إن سلمي مش بتحبني. و بالفعل سواء بقت مع مراد أو لأ ف كده كده مش هتبقي معايا. أنا متقبل ده. الجد طبطب على إيد أدهم بحنان و قاله بإبتسامة: و الله العظيم يا أدهم ربنا هيعوضك. و أنا و الله وافقت مش عشان بفرق بينكم لأ والله، البنت كده كده بتحب مراد. أدهم بجمود: عارف. متشلش همي. مراد هيتقدملها امتى؟ نجوي بإستغراب: مش عارفة لسه. هيكلم أخوها الكبير النهارده.

أدهم قال و هو بيقوم: على خير. خرج و سابهم في دوامة تفكير و إنه إزاي بالهدوء ده، واحد زيه على الأقل هيعمل مشاكل. نجوي بدموع و قالت بتعاطفها و مشاعرها كأم: هو إزاي هادي كده!!!! هي ممكن تكون الصدمة مأثرة عليه. أنا خايفة عليه يتعب يا بابا. الجد بفهم: أدهم مش هادي يا نجوي، أدهم بيفكر. بس خلينا منسبقش الأحداث. *** **في الشركة.** مراد كلم سلمي في التليفون و هو بيقول: أنتي كلمتي أدهم امبارح صح؟ سلمي بدموع و قلق: أيوه.

مراد: و رده كان إيه؟ سلمي بتوتر و خوف: عادي، هو تقبل. مراد بعدم تصديق: ماشي. أنتي كويسة؟ سلمي: أيوه الحمد لله. مراد بإبتسامة: طب ابعتيلي رقم أحمد أخوكي. سلمي بإبتسامة و دموع: ماشي.

عدى اليوم بهدوء و مراد كلم أحمد و اتكلموا، و مراد طلب منه معاد و أحمد وافق. و بعد يومين كان مراد و فتحي و نجوي و ميليسا و جدهم محمد رايحين بيت سلمي. أدهم هو كمان لبس و هيروح معاهم و حرفيًا ملامحه بقت مش مفهومة ليهم كلهم. تراكمات غيرته في لحظة، محدش عارف هو حزين و لا غامض و لا ده حقد و لا شر و لا تفكير!!!!

مراد كان واقف قدام المراية و بيلبس ساعة إيده و أدهم دخل في اللحظة دي. مراد بصله في المراية و مهتمش و كمل لمساته الأخيرة في لبسه. أدهم قعد و قال بإستفزاز: أنت صعبان عليا، عارف ليه يا مراد؟ مش عارف أتخيل أنت إزاي مستحمل إنك تكون بتحب واحدة و عارف إن فيه راجل تاني غيرك بيفكر فيها و دايمًا في خياله. مراد كان هادي جدًا على عكس ما أدهم كان متوقع. لف وشه لـ أدهم و هو بيبتسم بكل

برود و رد عليه و هو بيقول: صدقني مش هيبقى أصعب من إحساسك دلوقتي و أنت شايفني رايح أتقدملها و كمان كام يوم هتلبس دبلتي و بعدها بكام شهر هتبقى بإسمي و جوا بيتي. أدهم ضحك ضحكة خفيفة و قام وقف و قال في وش مراد: هتلبس دبلتك آه، لكن تبقى جوا بيتك متوقعش. مراد طبطب على كتف أدهم و هو بيقول بإبتسامة باردة: معلش، الصدمة مؤثرة على كلامك برضه.

مراد سابه و خرج و أدهم خرج بعديه بلحظات. بعد ما جهزوا خرجوا و وصلوا بيت سلمي بعد ساعة، و الي كان في بيتها أحمد أخوها و مامتها و شهد مرات أخوها. سلموا عليهم و سلمي شافت أدهم داخل معاهم. خافت لكن مبينتش ده. دخلوا قعدوا و اتعرفوا على بعض كلهم و كانوا بيتكلموا عادي، لحد ما الموضوع الأساسي اتفتح. مراد اتكلم و قال كل الكلام الي أي بنت في الدنيا دي تتمنى إن الي بتحبه يقوله. و الكلام خلص بموافقة أحمد و مامت سلمي على مراد و قرأوا الفاتحة، و طبعًا قبليها سلمي كانت حكيالهُم عن مراد. و أدهم طول القاعدة مفتحش بوقه بحرف واحد، كان مركز في كلامهم لكن محدش سمع صوته طول القاعدة، و حددوا ميعاد الخطوبة بعد أسبوع.

طول الأسبوع الأمور إلى حد ما هادية، و هدوء أدهم كان موترهم كلهم ما عدا مراد. اللي كان كل همه هو وجود سلمي جانبه و مش فارق معاه أدهم. و في خلال الأسبوع ده رحمة وافقت على يامن، و سالي كلمت باباها على تميم و اتحدد ميعاد لخطوبتهم.

و جه يوم خطوبة سلمي و مراد. الكل كان فرحان و مبسوط. و أدهم رغم غروره و جموده و غموضه و تفكيره الي يكاد يكون شراني بس كان ماسك نفسه من إن دموعه تنزل بالعافية. و جت اللحظة الي مراد هيلبس سلمي فيها الدبلة. مراد مسك إيديها و وشه و الفرحة الي هو فيها مكنتش تتوصف و كذلك سلمي. و لبسها الدبلة. في اللحظة الي سلمي لبست فيها دبلة مراد أدهم غمض عيونه بقهرة، و خرج برا القاعة و سند على السور بإيديه الاتنين و هو باصص للبحر

و دموعه نزلت و قالت بوجع: ليه قلبي يتكسر بالطريقة دي!!! ليه أتوجع كده. ميليسا جت وقفت جانبه و هي بتبصله بإبتسامة و بتقول: معلش، ربنا هيعوضك. أدهم بدموع: محدش حاسس بيا، محدش حاسس بالوجع الي أنا فيه دلوقتي. ميليسا دمعت و ابتسمت و قالت: بس أنا حاسة بيك، أنا عارفة يعني إيه إحساس إنك تحب حد و تتعلق بيه و هو مش بيحبك. أدهم بصلها و قال: حبيتي؟ ميليسا هزت راسها بالإيجاب

و قالت بإبتسامة حزينة: أيوه، بس هو محبنيش. كنت كل يوم استنى يقولها بس مقلهاش. أدهم بتساؤل: طب هو فين دلوقتي؟ ميليسا بدموع و إبتسامة: موجود، و قريب مني أوي كمان، بس المسافة الي بين قلوبنا بعيدة. بمعنى أصح بين قلبه و قلبي. لكن قلبي أنا مش مخلي فيه مسافات بينه و بين قلبه. أدهم: طب ما يمكن بيحبك بس لسه مش مستعد يقولها دلوقتي. ميليسا ضحكت ضحكة خفيفة و قالت بحزن: مستحيل، أصله بيحب واحدة تانية.

أدهم ابتسم لها و قال: و الله مش عارف مين المغفل الي يبقى قدامه واحدة زيك يا ميليسا و ميحبهاش. هو اسمه إيه؟ ميليسا أزدرقت ريقها بصعوبة و توترت و حاولت متبينش ده و قالت بكذب: س… سيف. أدهم ابتسم بحزن و قال: قصتنا متشابهة. ميليسا: نصيحة مني يا أدهم متركزش في حاجة مش بتاعتك، بص حواليك و شوف حياتك أنت. أدهم اتكلم بجدية و قال: قصدك إني أسيب سلمي!!!!! و أرضى خلاص بإنها مع مراد و أشوف حياتي أنا صح!!

ميليسا بجدية: أيوه صح، أرضى بلي ربنا كتبه ليك، سلمي مش بتحبك ف استحالة تكون معاك، سيبها تعيش مع الي بتحبه و…………….. قاطعها أدهم و هو بيقول بحزم: متكمليش كلامك عشان مش هقبله، أنا مش هسيب سلمي، حتى لو دبلة مراد في إيديها. جه يمشي ميليسا مسكته من دراعه و هي بتقول بخوف: أدهم عشان خاطري استنى، حاول تنساها. مراد مش هيتخلي عن سلمي أبدًا، و أنتو كده هتبقوا أعداء، و مش بعيد حد فيكوا يخسر التاني للأبد.

أدهم مردش عليها و سابها و مشي. ميليسا دموعها نزلت و هي بتقول: غبي، و الله العظيم غبي، رايح يجري ورا واحدة مش شيفاه أصلًا و سايب الي بتموت فيه و نفسها تكون معاه. الخطوبة خلصت و سهروا كلهم مع بعض شوية و بعدها كل واحد راح على بيته. ميليسا روحت معاهم و قعدت معاهم و سابتهم بيتكلموا و خرجت برا في الجنينة و كانت مخنوقة من كل حاجة حواليها. قطع تفكيرها صوت أدهم و هو بيقول: واقفة لوحدك ليه؟ ميليسا: عادي.

أدهم بتنهد: أنا آسف معلش، مكنش قصدي أتكلم معاكي بالأسلوب الي أنا اتكلمت بيه. ميليسا بإبتسامة: محصلش حاجة عادي أنا مقدرة. مراد كان بيكلم سلمي في التليفون و شاف ميليسا و هي واقفة مع أدهم في الجنينة تحت. أضايق جدًا من قرب ميليسا و أدهم لبعض و إن المفروض علاقتهم متكونش كده و خصوصًا إنه بيعتبر دايمًا إن أدهم غريب عنها و إنه بالنسبة لها صديق لأهلها و عشرة عمر و ابن عم أخوها في الرضاعة و بس. أدهم: هتباتي معانا النهارده؟

ميليسا: لأ، شوية و مراد هيروحني. أدهم بحيرة: معرفش ليه مراد مبيحبش يسيبك تباتي هنا، مع إن البيت كبير جدًا و أنتي أخته. ميليسا بضحك: بيغير عليا. أدهم بإستغراب: بيغير عليكي من مين؟ هو في غيرنا هنا!! ميليسا ضحكت أكتر و مردتش. أدهم ضحك بذهول: أنتي قصدك بيغير عليكي مني!! ميليسا بضحك: أيوه. أدهم ضحك و خبط كف على كف و هو بيقول: مراد ليه مش مستوعب إنك عندي زيك عنده بالظبط. ميليسا وقفت ضحك

و قالت بإندفاع و تلقائية: لأ بس أنت مش أخويا. أدهم بعقد حاجبيه: إيه؟؟ ميليسا بتوتر: قصدي يعني بالنسبة له هو. أدهم كان لسه هيرد بس قاطعه مراد و هو بيقول: يله يا ميليسا. ميليسا بتنهد: لسه بدري. مراد: لأ معلش يله. أدهم بص لـ ميليسا و بص لـ مراد و قال بلطافة: سيبها تبات معاكوا النهارده متخليهاش تبات في البيت التاني لوحدها و أنا هبات في شقتي. تصبحوا على خير. خرج من البيت من قبل حتى ما مراد ينطق.

مراد بصلها بحدة و قال: و أنتي ما شاء الله بتوزعي ضحكاتك على أي حد كده!!! ميليسا: يا مراد في إيه!!!! مراد بحدة: هو إيه الي في إيه!!! واقفة معاه لوحدكوا ليه دلوقتي و صوت ضحكتك مسمعني فوق ليه؟؟؟ أنا قايلك مليون مرة خلي علاقتك بـ أدهم في الحدود. ميليسا بدموع و صوت عالي: على فكرة أنا متجاوزتش حدودي معاه. مراد بغيره أخوية: و الضحك ده إيه!!!! و وقوفك معاه لوحدكوا ده إيه!!! ميليسا قالت بنرفزة و هي بتربع

إيديها و بتبص قدامها: خلاص يا مراد مش هتتكرر تاني حاضر. سكتوا لحظات و مراد أضايق من نفسه إنه زعلها، ف بصلها بطرف عينه و قال: تاكلي إندومي؟ ميليسا ضحكت و قالت: ماشي. مراد ضحك و خدها في حضنه و هو بيتنهد و بيقول بحنان: على فكرة أنا مش بيبقى قصدي أزعلك، أنا و الله ببقى خايف عليكي بس من نية الي حواليكي. ميليسا خرجت من حضنه و هي بتقول: يا مراد ده أدهم و لا أنت ناسي. مراد: على فكرة بقى ما هي المصيبة إنه أدهم.

ميليسا بإنفعال: لأ يا مراد، أدهم مش وحش كده، أنتو بس اللي عشان مش بتحبوا بعض ف كل واحد فيكم شايف إن التاني مش كويس. مراد بتنهد: ميليسا افهمي، اللي بيني و بين أدهم مش مشاكل صغيرة، دي أكبر مشاكل الواحد ممكن يقابلها، و أنتي متعرفيش الكلام اللي هو بيقوله ليا، ف طبيعي أخاف عليكي منه. مراد بإستغراب: أنتي بتدافعي عنه كده ليه؟؟ ميليسا بتوتر: عادي يا مراد. مراد سكت شوية

و بعدها بصلها و قال بفهم: بلاش يا ميليسا، هو مش شبهك، و متتعلقيش بأحبال مش هقولك دايبة، عشان هي أصلًا مش موجودة.