رواية العبقري الفصل الثالث والعشرون 23 - بقلم مآهي أحمد

يامن راح السرداب بيبص مالقاش نايا. يامن: نايا؟ يامن بص يمين وشمال حواليه وهو بيدور على نايا في السرداب مالقهاش. بيبص لقي البنت الصغيرة مستخبية ورا عمود وحاطة إيدها على بقها وكاتمة صوت عياطها بالعافية. يامن جرى عليها وشالها، ومن كتر خوفها، يامن كان شوية ويسمع صوت دقات قلبها وهي هتطلع من مكانها. يامن خدها في حضنه وحضنها. يامن: فين نايا؟ البنت: _يامن بقي يهز البنت بإيديه الاتنين من كتافها. يامن: بقولك فين نايا، انطقي.

البنت ابتدت تعيط بس المرة دي بصوت. يامن غمض عينيه وأخد نفس. هو من خضته على نايا محطش في دماغه إنها طفلة، هو عايز يعرف مكان نايا وبس. يامن شال البنت وخدها في حضنه وهو دراعه متصاب وبينزل دم، والبنت هدومها اتبهدلت دم من يامن. طلع ولسه بيفتح باب السرداب عشان يطلع، لقي نايا في وشه وهي بتنهج. نايا: (بنهجة) ومش قادرة تتكلم. نايا: أخيرا.. أخيرا رجعت. يامن خدها في حضنه وكان خايف عليها جداً. يامن: كنتي فين؟

أنا مش قولتلك ماتسبيش المكان. نايا: (بعدت عن حضن يامن وهي بتحط إيديها على جرح وقلبها وقع أول ما شافت الدم نازل منه) نايا: (بخضة وخوف) الدم ده جه منين؟ انت كويس؟ يامن: (دوس على سنانه وهو مضايق) ماتهربيش من سؤالي، كنتي فين؟ نايا: هقولك بعدين، مافيش وقت، لازم نطلع من هنا بسرعة. نايا كانت حاطة كف إيدها على كتف يامن وهي مخضوضة عليه جداً. يامن مسكها وحطها ورا ضهره وبقي ماسك إيديها. وطلعوا من السرداب. نايا: (مدت إيدها)

هات البنت. يامن اداها الطفلة وطلع سهم وحطه في القوس وبقي ماشي ونايا ماشية وراه. وأول ما يشوف حد جاي يضربه بالسهم بسرعة. ويطلع سهم غيره يحطه في القوس لحد ما أخيراً طلعوا من الممر ووصلوا للعربية. نايا أول ما شافت نواه في العربية جريت عليه بسرعة بس لاقته ما بينطقش. نايا بقت مبرقة بصت ليامن وهي متنحة. يامن: (وهو ماسك كتفه) اركبي يانايا، مافيش وقت.

نايا حطت البنت جنب نواه وركبت العربية بسرعة جنب يامن وبقي سايق بأسرع ما عنده بسرعة جداً وكان ماسك كتفه الدم نزل منه كتير. يامن من كتر الدم اللي نزل منه بقي كل شوية وهو سايق خلاص هيفقد وعيه وراسه تنزل لتحت. نايا كانت بتحاول تفوقه. نايا: يامن خللي بالك. يامن وقتها كان بيحاول ما يفقدش تركيزه ويرفع راسه لفوق. نايا بسرعة بقت تمسك الدريكسيون من يامن وبقت تحط إيديها على إيديه وهو سايق. نايا: يامن قدامنا كتير.

يامن: لأ.. لأ مش كتير. يامن العربية كانت بتروح منه شمال ويمين ومبقاش عارف يروح فين. مرة واحدة نايا بتبص لاقت نفسهم قريبين من بيت الست العجوزة اللي كانوا عندها قبل كده وأنقذت يامن من سم العقرب. ولأنها عارفة ومتاكدة إن العجوزة خلاص ماتت والبيت بقي فاضي. نايا: يامن وقف العربية هنا. يامن: (وهو بيفتح عينيه بالعافية) اوقفها هنا فين؟ نايا: عشان خاطري وقفها بسرعة.

يامن حط رجله مرة واحدة على الفرامل، العربية فرملت مرة واحدة والبنت الصغيرة ونايا وحتى نواه وقعوا لقدام من كتر الفرملة. نايا نزلت من العربية بسرعة وراحت على الباب لاقيته مفتوح. رجعت للعربية مرة تانية وابتدت عاصفة تقوم في الصحرا. نايا: يامن لازم تشيل نواه معايا، ارجوك.

يامن نزل من العربية واتغصب على نفسه أكتر وشال نواه على كتفه وهو بينزل دم ومش قادر. ونايا جريت بسرعة تفتح الباب ودخلوه نواه جوه والبنت الصغيرة دخلت معاهم. يامن حط نواه على السرير وبعدها وقع على الأرض. ماحسش بنفسه. نايا: يااااامن؟

يامن كان شايف خيالات قدامه، سامع صوت نايا من بعيد وهي بتحاول تقومه. وبعدها بشوية فتح عينه بالراحة شافها قدامه وهي ماسكة سكينة وبتقطعله التي شيرت بتاعه. كل ده كان شايف خيالات مش أكتر لحد ما نايا اديته قماشة وحطيتها ما بين سنانه. نايا: حط دي ما بين سنانك يا يامن.

يامن حط القماشة ما بين سنانه ونايا حطت السكينة على الجرح وبقت تفحر بالسكينة السخنة في كتف يامن عشان تطلع الرصاصة. من كتر الوجع يامن بقي بيتألم ويعض في القماشة وعروقه كانت هتطلع من رقبته لحد ما أخيراً طلعت الرصاصة. وقتها بس يامن فقد الوعي واغمى عليه ومبقاش حاسس بالدنيا. (بعد سبع ساعات) يامن كان نايم فتح عينيه بالراحة بيبص لقي أمه وأبوه وأخوه حواليه. ضحك وابتسم.

يامن: أنا.. أنا مش مصدق نفسي، انتوا عايشين. انت عايش يابابا.. الأب: أيوه عايشين بس عايشين هنا. (وشاور على قلب يامن) الأم: شايفاك نسيت حقنا.. واللي عملوه فينا زمان يا يامن. يامن: عمري ما نسيت ولا هقدر أنسى في يوم. أخوه: انت عايش عشان تاخد بتارنا من اللي قتلونا، فاهم يايامن؟ يامن: أيوه فاهم.. فاهم.. ماتقلقوش. بس.. بس ماتسبونيش.

يامن بيبص لقي أهله بيبعدوا عنه واحدة واحدة كان بيجري وراهم بس مهما جرى مكانش بيلحقهم. كان بينادي عليهم بأعلى صوته لحد ما بقي بيسمع صوت نايا جاي من بعيد. نايا: يامن فوق يا يامن اصحي. يامن بقي يحرك رقبته شمال ويمين وهو نايم على المخدة. لحد ما قام ونايا كانت قاعدة قدامه ومرة واحدة قام وحضنها. يامن: ماتسيبنيش.. خدوني معاكم. نايا: يامن ده حلم مش أكتر.

يامن ابتدى يفوق صحي لقي دراعه متخيط ومربوط بشاش ومش قادر يحركه. بص لنايا وابتسم. يامن: مش عارف أقولك إيه. خالد جه من وراها بابتسامة. خالد: ماتقولهاش حاجة، هي معملتش حاجة، أنا اللي عملت. يامن: خالد؟