رواية العبقري الفصل الثالث والثلاثون 33 - بقلم مآهي أحمد

يامن كان بيبص على نواه وهو بيدفن وكان بيفتكر كل لحظة حصلت ما بينه وما بين نواه. وهو بينزل لقبره دموعه كانت بتنزل منه غصب عنه. حاول يمسك دموعه بس ما قدرش. ورجالة القائد بينزلوا بيه وبيردموا عليه التراب. تيم كانت واقفة معاهم ويامن كان مربوط في العربية. لفت وشها وبصت وراها ليامن. ويامن هو كمان بص لها. تيم: (وهي بتبص له من بعيد بقت تقول في نفسها) مكنتش أعرف إنك هتحزن عليه بالشكل ده. يامن:

(وهو بيبص لها ومربوط في العربية بقي يقول في نفسه) هتموتي نفسي. موتت نواه ياتيم وممكن أبشع كمان. رجالة القائد بعد ما دفنوا نواه رجعوا يقعدوا في العربية وتيم بقت تسوق. تيم: (وهي سايقة ويامن قاعد جنبها) شايف نظرات الانتقام باينة على وشك ليا يايامن. وده حقك طبعًا. بس انت اللي اضطرتني أعمل كده. يامن: (كان باصص قدامه ومابيردش) تيم كانت بتسوق العربية الجيب المفتوحة وشعرها بيرجع لورا من كتر الهوا. تيم:

(شالت خصلة من خصل شعرها اللي بتيجي على وشها من كتر الهوا وكملت كلامها) فيها إيه يعني أنا مش فاهمة. لما كنت تسمع كلامنا وتعملنا اللي إحنا عايزينه. مكنش حد مات من أهل القرية ولا كمان صاحبك نواه. أنا عايزاك تحط في بالك إن مافيش حد قتل نواه غيرك بسبب عنادك وهروبك مني. الرجالة بصوا كده باستغراب. راحت تيم عدلت كلامها بسرعة. تيم: (بتوتر) ممم... أقصد مننا أنا والقائد. تيم: (كملت كلامها)

ياريتك كنت سمعت كلامنا من زمان. مكانش حصل ده كله. وعلى فكرة انت برضوا اللي في إيدك إذا كانت نايا تعيش ولا هتموت. مع إن أنا عن نفسي أفضل موتها. بس انت برضوا تصرفاتك هي اللي هتقرر. يامن أول ما سمع كده داس على سنانه وحط إيده على رقبة تيم وخنقها. الرجالة اللي ورا بقت تبعد إيده عنها وهي مابقيتش قادرة تتحكم في العربية. والعربية بقت تروح منها شمال ويمين. تيم: ي... يا... ياامن... العربية هتتقلب.

تيم كان في قدامها صخرة. راحت خبطت فيها من الجنب. العربية اتقلبت وكلهم اغموا عليهم وبقوا جوه العربية وهي مقلوبة ودماغهم تحت ورجليهم فوق. *** الجبالي ورجالته وقفوا قدام قرية القائد. وطبعًا كان في رجالة من رجالة القائد واقفين بيحرسوا القرية. الجبالي: هنعمل إيه؟ القائد مش عبيط عشان يسيب القرية من غير حماية. واحد من اللي مع الجبالي: هو أكيد مش عبيط وذكي. بس إحنا هنطلع أذكى منه. الجبالي: إزاي؟

واحد من اللي مع الجبالي: إزاي دي بقي سيبها لي أنا. الراجل أمر رجالة الجبالي إن كل واحد فيهم يدخل القرية بطريقة غير مباشرة. بمعنى مرة واحد يدخل بحجة إنه القائد بيبلغهم رسالة. وده طبعًا محدش هيصدقه فهياخدوه في الزنزانة ويحبسوه لحد ما القائد يرجع ويشوفوا حكايته إيه. والتاني دخل عن طريق إنه بيعرض عليهم صفقة أسلحة جديدة وعايز يوريها للقائد. وهكذا.

وطبعًا مكانوش بيدخلوا ورا بعض. ما بين الراجل والتاني مش أقل من 3 ساعات. لحد ما دخل خمس رجالة من رجالة الجبالي على مدار اليوم. والاتفاق إنهم يقدروا يقتلوا اللي واقفين على البوابة بتاعة القرية ويقدروا يفتحوا البوابة لرجالة الجبالي. وده فعلاً اللي حصل.

واحد من رجالة الجبالي بقي يتسحب بالراحة جدًا لحد ما وصل للي واقفين على البوابة وبيحرسوها بالليل. واداهم طلقة كل واحد في دماغه. ماتوا في ساعتها. وفتحوا البوابة لرجالة الجبالي ودارت بينهم المعركة. *** (في نفس الوقت) الليل ليل على يامن وتيم والعربية لسه مقلوبة بيهم وهما مغمى عليهم. وأخيرًا يامن وتيم ابتدوا يفوقوا. تيم وهي ماسكة دماغها ومش قادرة بتنزل دم. تيم: آآآآه دماغي.

يامن ابتدى يفوق ويزحف بجسمه من العربية لأنه متربط من إيديه. لحد ما أخيرًا طلع رجله من العربية ولسه هيقوم. تيم قامت بسرعة ورفعت عليه المسدس وهو كان لسه نايم على ظهره في الأرض. تيم: أوعى تتحرك من مكانك خطوة تانية. انت فاهم؟ يامن: (بلا مبالاة) أنا لو كنت عايز أهرب كنت هربت. بس لسه الوقت ما جاش. تيم استغربت من كلامه. وقت إيه ده اللي ما جاش؟

وطت بسرعة وقعدت في نفس مستوى قعدته وبقت تربط له إيديه أكتر. وراحت على الرجالة اللي معاها وبقت تفوقهم وتضربهم برجليها. تيم: فوقوا... قوموا بقى. تيم بتبص لاقت واحد فيهم مات. والتاني قام بالعافية وكانت راسه كلها بتجيب دم. تيم: (بعصبية) عجبك كده؟ انت السبب في اللي إحنا فيه دلوقتي. يامن: هاتي سيرتها تاني على لسانك مرة تانية وهيحصل أكتر من كده.

تيم اتعصبت أكتر وبقت تضرب في العربية برجليها عشان تطلع كل الغضب اللي جواها. وبعد ما خلصت ابتدت تهدى. وبقت تفتح اللاسلكي اللي في العربية وتكلم القائد. القائد وقتها كان بره المخبأ في العربية. تيم: قائد انت سامعني؟ العربية اتقلبت بينا وهناخد وقت أكتر عشان نوصل للسجن الكبير. القائد: وإيه اللي قلبتها؟ أكيد يامن. تيم: بالظبط كده. القائد: طيب خلي يامن يسمع دي. القائد جاب نايا وشدها من دراعها وفتح اللاسلكي مرة تانية.

نايا: بتعمل إيه ياحيوان؟ سيبني... سيبني حرام عليك. القائد مسك إيد تيم وجاب السكينة وجرح إيديها جرح كبير. يامن سمعها وهي بتصرخ. نايا: آآآآآه. يامن: (بعدم فهم) في إيه؟ في إيه يانايا؟ عملك إيه؟ انطقي. القائد قرب اللاسلكي من نايا ونايا بقت ماسكة دراعها وبتعيط. يامن: في إيه يانايا انطقي. نايا كانت بتعيط. القائد: الظاهر كده من غير قصد جبت السكينة وفتحتلها إيديها. عملت جرح بسييييييط أوي. يامن: (داس على سنانه)

وربي اللي ما تعرفهوش ما هرحمك. القائد: أنا ممكن ما أكونش أعرفه. بس اللي متأكد منه إني هخليك عند ربك قريب. واللي عايزك تبقي متأكد منه. لو تيم جرالها حاجة وما رجعتش سليمة هي وأبويا. اعرف إنك عمرك ما هتعرف لنايا طريق مرة تانية. (يامن بلع ريقه وبص لتيم واتنهد) يامن: هنشوف... هنشوف ياقائد مين اللي هينفذ كلامه الأول. بس لحد ما ده يحصل. يامن (بتوعد) : أوعي... تلمس... نايا تاني. القائد:

(ضرب بإيده على جبينه وهو ماسك اللاسلكي) آآآآخ... شوفت كنت هنسيني هقولك إيه. المرة اللي جاية لو تيم اشتكت منك مش هجرح نايا في دراعها وبس. المرة اللي جاية هدبح رقبتها وهتحصل صاحبك قريب. (القائد قفل اللاسلكي) ونواه ريأكشنات وشه كلها اتغيرت حرفياً. وبقي بيتنفس بصوت عالي أوي وهو دايس على سنانه وباصص لتيم بغل. تيم: (هزت كتفها كده)

انت اللي جبته لنفسك. مكانش ليها لازمة إنك تقلب العربية. أهو ممكن تعرفني هنوصل للسجن الكبير إزاي؟ يامن: (بضحكة سخرية منها) هنوصل. مش عايزك تقلقي. أكيد هنوصل في الآخر. *** (في نفس الوقت) الجبالي بعد ما دخل قرية القائد ابتدى يستولي عليها. ولأن القائد واخد معظم الرجالة معاه وهو بيدور على يامن ونايا. ساب قريته ضعيفة من غير حماية. وقدر الجبالي يستولي عليها بسهولة.

وقتها كان في واحد من رجالة القائد مسك واحد من رجالة الجبالي وشده ونزل فيه ضرب. واحد من رجالة القائد: انتوا مين؟ وإزاي معاكم الأسلحة دي؟ واحد من رجالة الجبالي: إحنا... إحنا معانا أسلحة عشان القائد هو اللي إدها لنا. واحد من رجالة القائد: إزاي؟ أنا مش فاهم حاجة. واحد من رجالة الجبالي: _واحد من رجالة القائد: رفع عليه المسدس وحطه على راسه. واحد من رجالة الجبالي: لو مانطقتش حالا هفرغ الطلقات دي كلها في دماغك. انطق.

واحد من رجالة الجبالي: القائد والجبالي اتفقوا إنهم يدوروا على نايا ويامن. وكانوا سوا في صف واحد. بس الجبالي خان القائد. وانتهز فرصة إن القائد سايب قريته من غير حماية. وهو متأكد إن محدش ممكن يقرب من قريته عشان مافيش حد معاه أسلحة غيره هو والجبالي. والجبالي ومعاه. بس للأسف الجبالي خانه واستولى على قريته. واحد من رجالة القائد: القائد فين دلوقتي؟ واحد من رجالة الجبالي:

(وهو مرمي في الأرض وشفايفه كلها بتنزل دم من كتر الضرب فيه) في... في البر الغربي. في كهف تحت الأرض بتاع يامن. اللي من رجالة القائد لسه هيموته. راح واحد ضرب عليه نار. سابوه وهرب. ووقتها قرر إنه هايروح للقائد في البر الغربي. *** (في نفس الوقت) تيم: إحنا هنفضل ماشيين كده كتير. يامن: انتي اخرسي خالص وامشي وانتي ساكتة وبس. الراجل اللي معاهم: انت بتقول إيه؟ تيم تتكلم في أي وقت.

تيم: سيبه. خليه يتكلم براحته. هو بيتكلم وبس. لكن الفعل مافيش. إحنا اللي بنعمل وهو في الآخر بيضطر ينفذ. يامن عارف كل شبر في الصحرا حرفياً. وحاطط في كل كهف القوس والسهم بتاعه احتياطي والحبال بتاعته. وابتدي يطلع على الجبل واحدة واحدة. تيم: إحنا هنطلع على الجبل ده ليه؟ يامن: طريق مختصر للسجن الكبير. (رفع حاجبه) ولا انتي مش عايزة توصلي بسرعة؟ تيم: ماشي. بس لو كنت بتلعب بينا كده ولا كده وده طريق مش مختصر. صدقني مش هيحصل.

(ولسه هتكمل) يامن قطعها في الكلام. يامن: انتي عمرك رحتي السجن الكبير قبل كده؟ تيم: محدش يعرف طريق السجن الكبير غيرك. كلنا بنمشي ورا أساطير. عارفين إنه ورا البركان. بس محدش قدر يقرب من البركان قبل كده. يامن: بس أنا قدرت وشوفت السجن الكبير بعيني قبل كده. تيم: طبعًا مش جدك اللي عمله. ومن وقتها البركان قام ومحدش عارف طريق. لكل اللي دخلوه جواه. ولا حد عارف يدخل ولا يطلع. يامن: بس أنا هطلع عشان أنتقم منك.

تيم: وأنا مستنية انتقامك. 😡 تيم ويامن بقوا يطلعوا الجبل والراجل اللي معاهم. ومرة واحدة تيم رجليها اتزحلقت وكانت هتقع وهي بتتسلق الجبل. يامن مسكها من دراعها بسرعة بإيد. والإيد التانية كان ماسك بيها في الجبل. يامن بقي بيبص لها تحت كده. يامن: مش هينفع تموتي دلوقتي. ارفعي نفسك معايا.

تيم بقت ترفع نفسها مع يامن لحد ما طلعها عليه. وبقت ماسكة في الجبل وبقت فوقيه. ويامن كان واخد باله منها لا تقع مرة تانية. لحد ما أخيرًا وصلوا قمة الجبل. بيبصوا من عليه لقوا البركان على بعد يوم منهم مشي. تيم: فعلًا طلع طريق مختصر. يامن: إحنا هنخيم هنا النهاردة. ومن بكرة هنكمل طريقنا. *** (في نفس الوقت) نايا كانت مع القائد ومربوطة من رجليها وماسكة دراعها اللي بينزل دم من جرح القائد ليها.

القائد سحب كرسي وقعد عليه وبقي قدامها ووطى بضهره كده عشان يبقي في مستوى قعدتها. القائد: عجبك حالك ده؟ ينفع اللي بتعمليه فينا وفي نفسك؟ أنا مكنتش أعرف إنك ضعيفة كده. فضلت سنين أدور عليكي ولما لقيتك مكنتش مصدق. فكرت إنك هتكوني معانا مش ضدنا. (قرب منها ومسكها من دراعها بغيظ) القائد: انتي ليه عملتي كده؟ كنا ممكن نبقى ملوك لو كنتي أقنعتي يامن بذكائه إنه يبقى معانا. انتي السبب. نايا: (بخيبة أمل)

أنا معرفش عنكم حاجة. معرفش حتى إني ليا إخوات. كبرت وأنا في القرية على الرعب منكم ومن اللي بتعملوه في الناس الغلابة اللي زينا. أنا بريئة منكم ليوم الدين. وعمري ما هبقى جزء منكم في يوم. أنا ممكن أكون أختكم في الدم. بس يشهد عليا ربي إني بريئة من الدم ده. انتوا إيديكم كلها دم الناس الغلابة اللي ماتت بسببكم. لمجرد إنكم عايزين تحكموا الكون اللي باقي بعد ما النيزك نزل على الأرض ودمرها. القائد

(استغرب إنها عرفت إن كان فيه نيزك أصلًا ونزل على الأرض) نايا: مستغرب ليه؟ أنا يامن حكالي على كل حاجة. وعرفت ليه انتوا بس اللي معاكم أسلحة وبتهددوا بيها الكل. القائد: إحنا معانا أسلحة عشان إحنا أذكياء. نايا: (هزت راسها يمين وشمال)

لأ مش عشان انتوا أذكياء. الحظ لعب معاكم لما لقيتوه مخزن الأسلحة ده تحت الأرض مش أكتر. ومن وقتها وانتوا بتهددوا الغلابة اللي زينا. أنا اتربيت على خوفي منكم وكرهكم. وهفضل أكرهكم لحد اليوم اللي روحي تتخد مني فيه. وأنا مع يامن في كل قرار ياخده. في يوم ومهما حاولت مش هشجعه أبدًا إنه يكون معاكم. عشان كده ريح نفسك من الكلام معايا عشان مش هيفيدك بشيء.

القائد من غيظه راح ضرب نايا حتة قلم على وشها. راسها اتخبطت في الحيطة جابت دم واغمى عليها. القائد قرب منها وبقي يبص عليها. لقي الدم نازل من راسها. القائد: نايا... نايا فوقي. اصحي. نايا: _القائد حط ودنه على قلبها. مالقاش نبض. القائد ابتدى يخاف ويرجع لورا. حط إيده على مناخيرها وحس عليها. لقاها مابتتنفسش. القائد: (بقي يقرب منها ويهزها من دراعاتها) نايا فوقي... نايا مش هينفع تموتي. نايا: _القائد: ناااااااااااااايااااااا.

(في نفس الوقت) يامن كان قاعد فوق الجبل هو وتيم والراجل اللي معاهم. ومرة واحدة حس بنغزة في قلبه. مسك قلبه جامد وهو بيوجعه. يامن: آآآآآه. تيم: في إيه مالك؟ يامن قام وقف وهو حاطط إيده على قلبه. يامن: ناااااااايا 😳😳.