رواية ال مخدوع الفصل الرابع 4 - بقلم امل صالح

بص إبراهيم لحمدي اللي قال بسرعة: - كان لازم أعمل كدا لما عرفت إنها... قطع كلامه وكلهم بصوا له بشك. سكت لثواني قبل ما يكمل وهو بيبص بعيد عنهم: - إنها حامل من حد تاني غيرَك. فتحت سارة عينها بصدمة وقفت بسرعة: - أي! انتوا كل واحد فيكم بيفتي على مزاجه. مسكها إبراهيم من كتفها وثبتها بعد حالة هيسترية من الزعيق: - يا سارة والله واثق فيكِ، والله متأكد إنك عمرك ما تعملي كِدا. شدها من إيدها لبيتهم وبص لمامته وحمدي: - تعالوا انتوا كمان. بعد شوية وبعد ما كل واحد حكى اللي عنده، بص إبراهيم لحمدي وقال بتريقة: - يعني الهانم مراتك مفهمة أمي إن سارة اللي عايزة تسقط، ومفهمالك إنها حامل من حد غيري وكلكوا مفهمين سارة إني اللي عايز كِدا. صقف وهو بيبصله: - لأ بجد أحييك على غبائك. بص حمدي للأرض بإحراج وسناء اتنقلت وقعدت جنب سارة وأخذتها في حضنها. بعدت التانية عنها وقالت بعياط: - إزاي صدقتي كدا! إزاي صدقتي إني ممكن أنزل حاجة كلنا نفسنا فيها! وقف حمدي وقال وهو خارج: - أنا رايح لروفيدة. مسك إبراهيم إيد سارة وقال وهو بيضغط عليها: - حمدي.. لف حمدي وهو كمل: - لو حق مراتي مجاش بإيدك هجيبه بإيدي. اتنهد حمدي وخرج. وسناء قالت وهي بتبلع ريقها بقلق: - هو.. هو أنتِ يعني نزلتِ الطفل بجد..! وقفت سارة وشدتها من إيدها الأوضة ووراهم إبراهيم. دخلوا الأوضة وهي شاورت على بقعة الدم وقالت ببرود: - جوابي وصل صح!