رواية الجميلة و الوحش الفصل الخامس والثلاثون بقلم نونا

مساءً في القصر. الكل قاعدين ومتجمعين. طارق وكرم وفراس، وجنبهم روان ومراد نايم في حضنها. وجنبهم مالك وجنات وحمزة ومريم وليليان. فراس لـ روان: "هاتي أنيمه جوه." روان بصوت واطي: "بس براحة يا فراس، على خاطري. نيمته بالعافية." فراس أخده منها بابتسامة وفضل يبوس في خده. روان خبطته في كتفه: "فراس حرام عليك، هيصحى." فراس ابتسم: "بيوحشني والله، أعمل إيه." روان ابتسمت، وفراس قام يدخل مراد ينام جوه.

آدم وأحلام دخلوا القصر بابتسامة وراحوا لهم. أحلام بابتسامة: "مساء الخير." الكل: "مساء النور." كرم ابتسم: "أهلاً، كنتوا فين كدا؟ وانتوا باين عليكم مبسوطين." فراس طلع من الغرفة بعد ما نيم مراد. آدم بابتسامة: "إحنا لسه راجعين من عند الدكتور.. وأحلام حامل." جنات وروان ابتسموا. الكل بصدمة وفرحة: "إيههه! أحلام بابتسامة: "وفي تلاتة توأم."

الكل انصدم بفرحة أكتر. روان وجنات حطوا إيدهم على فمهم بصدمة وفرحة. هما عارفين إنها حامل بس ميعرفوش إنهم توأم وكمان تلاتة. حمزة ضحك بفرحة: "أنا مش مصدق." طارق قام بابتسامة وفرحة: "انتوا بتتكلموا جد؟ كرم ضحك وقام بفرحة: "أحلام.. بتكلمي جد؟ أحلام هزت راسها بدموع. مالك قام بفرحة وابتسامة حضن آدم وآدم حضنه بابتسامة. كرم راح حضن أحلام بقوة بفرحة: "هبقى جد.. ألف ألف مبروك يا حبيبة قلبي.. فرحتي قلبي والله."

أحلام ابتسمت. وحمزة راح مسح دموع أحلام وحضنها بفرحة: "أنا هبقى خالو.. أنا مش مصدق نفسي.. ألف مبروك يا حبيبة قلبي." أحلام ابتسمت: "الله يبارك فيك يا حبيبي." ليليان راحت حضنت أحلام بفرحة وأحلام حضنتها بابتسامة. وطارق حضن آدم بفرحة: "مبروك يا آدم.. ألف ألف مبروك يا حبيبي." آدم ابتسم: "الله يبارك فيك يا بابا." فراس حضن آدم بابتسامة. روان حضنت أحلام بفرحة وبابتسامة، وبعدين حضنت آدم. روان بفرحة: "مبروك.. ألف ألف مبروك."

مريم راحت لـ أحلام بسرعة حضنتها بفرحة: "ألف ألف مبروك يا روحي." أحلام ابتسمت: "الله يبارك فيكي يا روح قلبي." وجنات حضنت أحلام وباركت لها. وآدم حضن كرم وحمزة وباركوا له. وأحلام حضنت طارق. ودا كان أحلى يوم وأحلى خبر عدى عليهم كلهم، والكل كان فرحان بحمل أحلام. مساءً في غرفة آدم وأحلام. أحلام طلعت من الحمام بعد ما غيرت هدومها لبنطلون بيجامة وتوب كات أبيض، وواقفة قدام المراية بتعمل شعرها كعكة عشوائية.

آدم طلع من الدريسنج بعد ما غير هدومه وراح حضن أحلام من ضهرها وباس رقبتها، وأحلام ابتسمت. آدم: "أنا مش مصدق نفسي.. هيبقي عندنا بيبي.. مش بس واحد، لأ تلاتة.. أنا الدنيا مش سيعاني دلوقتي." أحلام ابتسمت بحب: "أنا مبسوطة عشان أنت مبسوط." آدم لف أحلام وبقت بصاله وحاوط وسطها بإيده وقربها منه.

آدم بص في عيونها بحب: "طبعًا مبسوط.. أنا طاير من الفرحة.. مش بس عشان هخلف.. عشان هبقى عندي عيال منك إنتي.. إنتي أغلى حاجة عندي وأحلى حاجة حصلت في حياتي.. أنا عايش عشانك." وباس شفايفها، وأحلام دمعت وحضنته بقوة، وآدم باس راسها. أحلام: "أنا فرحانة عشان أنا عيالي هيبقى عندهم أحن وأجمل أب في الدنيا." آدم ابتسم وباس راسها ورقبتها. بعد شهر. في القصر. ع المغرب.

آدم رجع من الشغل وكان قاعد في الصالون. طارق وروان طلعت من الغرفة وهي شايلة مراد. آدم: "مساء الخير يا بابا." طارق بابتسامة: "مساء الفل يا حبيبي.. حمد لله على السلامة." آدم: "الله يسلمك." وباس راس مراد وروان ابتسمت. آدم: "أحلام فين؟ روان: "كنت تحت من شوية، دورت على بطيخ في التلاجة بس ملقتش واتضايقت وطلعت الأوضة تاني." طارق ابتسم: "شكلها بتتوحم." آدم ابتسم: "بجد؟

إزاي ما تقولش أو حد فيكم يقولي.. ومبعتوش حد يجبلها على طول ليه؟ طارق: "نها راحت والله المكان اللي جنبنا بس كان خلصان." آدم بسباستعجال: "طيب أنا طالع و نص ساعة وجاي." وطلع بره القصر بسرعة وركب عربيته. بعد نص ساعة. أحلام نزلت من غرفتها بعد ما غيرت هدومها لبنطلون قطن رصاصي وتيشيرت بنص أبيض، وراحت لـ طارق وروان اللي مراد قاعد في حضنها. أحلام: "هو آدم لسه مرجعش؟ طارق: "رجع بس قال هعمل حاجة وهرجع."

روان: "زمانه على وصول، متقلقيش." أحلام ابتسمت وباس خد مراد اللي في حضن مامته. روان ابتسمت. فجأة بودي جارد دخل وحط قفص برقوق. وبودي جارد تاني حط جنبه خوخ، وواحد تاني حط قفص فاكهة تانية، وفضلوا يدخلوا أقاص فاكهة كتير في وسط دهشة أحلام، وحطوا على الأرض بطيخ كتير. أحلام بصدمة: "إيه دا؟ في إيه؟ روان ابتسمت: "إيه دا؟ إيه كل الفاكهة دي.. أحلام بصي في بطيخ! طارق ابتسم. آدم دخل: "بس خلاص.. حطوهم هنا."

البودي جارد: "عن إذن حضرتكم." ومشيوا. الخدم بدأوا يدخلوا الفاكهة دي المطبخ، وآدم قال لهم يقطعوا بطيخ لـ أحلام بسرعة. مراد نزل من حضن روان وراح عند قفص البرقوق وخد واحدة. آدم باس راسه: "اغسله الأول.. متاكلوش كدا." طارق ابتسم: "اغسليله يا روان." روان: "حاضر.. تعالي يا روح قلبي." وشالت مراد. وراحوا المطبخ. آدم راح لـ أحلام. آدم: "كان في بطيخ أصفر برضو بس قولت دا مش هيعجبك."

أحلام ضحكت وبصتله بحب: "انت جبت كل دا بعد ما قالولك إني عايزة بطيخ؟ آدم عدل لها شعرها وباس راسها: "إزاي يبقى نفسك في حاجة ومتتقوليش.. مهما كان الوقت اللي بتتوحمي فيه، عرفيني نفسك في إيه وأنا هجبهولك على طول.. اتفقنا؟ أحلام بابتسامة هزت راسها بـ "أهو". آدم باس إيدها. بعد أسبوعين. في القصر. أحلام قاعدة في غرفتها على السرير بترسم تصاميم. آدم دخل الغرفة بعد ما رجع من الشغل. أحلام ابتسمت: "حمد لله على السلامة."

آدم راح وباس راسها. آدم: "الله يسلمك.. اتغديتي وخدتي الدوا؟ أحلام: "أيوا." آدم موبايله رن وكنسل. آدم: "هدخل أغير هدومي." أحلام بصت على موبايله بشك. أحلام: "مين بيتصل؟ آدم: "لأ دا من الشغل، متشغليش بالك." موبايله رن تاني وآدم كنسل وكان هيدخل يغير هدومه. أحلام: "واخد الموبايل معاك ليه الدريسنج طالما هتغير هدومك؟ آدم لف لها. أحلام: "وريني كدا يا آدم مين بيتصل." آدم: "نعم؟

أحلام بغضب: "لو هو فعلاً من الشغل وريني.. دا لو مش مخبي حاجة يعني." آدم بيحاول يسيطر على نفسه عشان ما يتعصبش عليها. آدم: "وطي صوتك." أحلام بعصبية: "لأ يا آدم مش هوطي صوتي.. أنت مش عايز توريني مين بيتصل بيك ليه؟ مش فاهمة.. أنت مخبي حاجة صح؟ آدم بغضب فتح الموبايل ووراهولها، وكان فعلاً كل المكالمات من الشغل. وأحلام مش عارفة هي شكت فيه كدا إزاي وهي عارفة إن عمره ما يخونها، بس تقريباً دي هرمونات الحمل.

أحلام دمعت ومسكت إيد آدم: "أنا آسفة يا حبيبي.. أنا بس.." آدم سحب إيده من إيدها وطلع برا الغرفة وزرع الباب. وأحلام دمعت. بعد شوية في غرفة المكتب بتاعة آدم. آدم قاعد على الكنبة بتعب وخلع الجاكيت يرتاح. أحلام دخلت الغرفة وبصت له بحزن، واتضايقت من نفسها إنها اتخانقت معاه وهو مرضيش يتعصب عليها عشان نفسيتها والحمل.. مع إنه راجع من الشغل عايز يرتاح، بس.. أحلام راحت لها. أحلام بحزن: "آدم.. أنا آسفة." آدم: "أحلام.."

قعدت جنبه ومسكت إيده. آدم: "متزعليش مني عشان خاطري عشان عليت صوتي وشكيت فيك.. والله مش هعمل كدا تاني.. تعالي ارتاح في أوضتنا يلا." آدم سحب إيده من إيدها: "أنا مرتاح هنا." أحلام عيطت، وآدم مقدرش يستحمل يشوف دموعها ومهانتش عليه. آدم حاوط وسطها بإيده وقربها لحضنه ومسح لها دموعها. آدم: "بتعيطي لي دلوقتي؟ أحلام بدموع: "عشان أنت زعلان مني.. اتعصب عليا وزعقلي براحتك بس متزعلش مني كدا."

آدم دمعت: "أنا زعلان منك.. ينفع اللي إنتي عملتيه دا؟ أحلام دمعت: "أنا آسفة.. أنا خوفت تكون واحدة اللي بتكلمك وبتقرب منك.. خوفت تبقى بتخوني." آدم بص في عيونها ورجع خصلة من شعرها ورا ودنها وباس راسها. آدم: "وأنا معقولة أعمل حاجة زي دي؟ أخونك؟ أنا عمري حتى ما أفكر أعمل كدا.. إنتي حبيبتي ومراتي وروحي.. وبموت فيكي.. حتى لو خلفنا 10 عيال مش تلاتة بس عمري ما أزهق منك ولا أفكر أخونك."

أحلام بدموع: "أنا أصلاً مش عارفة إزاي شكيت فيك.. كله من هرمونات الحمل دي." آدم بيمسح لها دموعها: "خلاص كفاية دموع.. أنا مش زعلان منك." وباس راسها. أحلام ابتسمت: "بجد يا آدم؟ آدم باس خدها وشفايفها: "بجد يا روح آدم." أحلام بابتسامة حضنته بقوة، وآدم ابتسم وباس راسها ورقبتها. أحلام: "أنا بحبك أوي.. ربنا يخليك ليا." آدم باس راسها: "وأنا بعشقك." عدى تلت شهور.

أحلام بطنها بتكبر، وعرفوا جنس البيبي وهما تلت بنات. وأحلام كل يوم بتعذب آدم معاها بسبب هرمونات الحمل، وآدم متقبل دا بصدر رحب وبيعرف يهديها ويتعامل مع هرموناتها، وبيعملها كل اللي هي عايزاه وكل طلباتها مجابة. عصراً. في غرفة أحلام. أحلام قاعدة على الكنبة بترسم تصاميم وقرفانة وزهقانه بسبب هرمونات الحمل. آدم دخل الغرفة وهو في إيده طبق جمبري صغير من اللي أحلام بتحبه.

آدم بابتسامة: "أحلام.. بصي جبت لك إيه.. يلا عشان تاكلي.. إنتي متغديتيش لسه." وقعد جنبها على الكنبة. أحلام بطنها وجعتها: "لأ لأ يا آدم مليش نفس.. ابعده عني عشان خاطري.. ريحته قلبت معدتي." آدم: "إزاي بس دا إنتي بتحبيه.. جربي واحدة بس وهيعجبك والله." وكان هيأكلها. أحلام بصت على الجمبري اللي في إيده ومسكت إيده. أحلام بصدمة: "إيه دا يا آدم؟ آدم: "جمبري!

أحلام بصدمة دمعت: "دا جمبري صغير.. جمبري لسه صغير.. أنت ليه قتلت الجمبري الصغير وطبخّته؟ مش حرام عليكم؟ آدم بصدمة: "قتلته! أحلام بزعل: "أيوا.. أنت ليه قتلته وعايز تأكلهولي كمان؟ إزاي توافق إنهم يقتلوا الجمبري الصغير دا ويطبخوه؟ أنت من إمتى بقيت كدا؟ وقامت ومشيت من قدامه. آدم بص على الجمبري بصدمة. آدم: "استنى طيب."

وقام بسرعة وحط طبق الجمبري على الطربيزة وراح لـ أحلام اللي قعدت على السرير وبتعيط وقعد جنبها وخدها في حضنه. آدم مسح لها دموعها: "لأ لأ خلاص متعيطيش.. أنا آسف والله العظيم.. أنا عارف إنك بتحبي الجمبري فجبتلك.. مقصدش أزعلك والله." وباس راسها وبيملس على شعرها. أحلام طلعت من حضنه بدموع: "أنت جايبلي جمبري لسه صغير خالص خالص.. واضح من شكله إنه لسه صغير يعني حرام.. مامتهم هتعمل إيه من غيرهم دلوقتي؟

آدم: "بس إنتي كان نفسك في لحمة خروف الأسبوع اللي فات وكلناها.. كان طعمه حلو.. وكان عنده أم برضو." أحلام دمعت: "أيوه صح.. أنت بتفكرني كمان؟ آدم ضحك وخدها في حضنه وبيملس على شعرها بحنان: "خلاص تعالي.. أنا آسف." وباس راسها. أحلام مسحت دموعها بحزن. آدم: "حقك عليا أنا آسف.. أنا فعلاً غلطت.. مكنش ينفع أجيب جمبري لسه صغير كدا." وطلعها من حضنه ومسح لها دموعها وباس راسها وخدها.

آدم: "أنا هقول لهم يعملوا لك أي حاجة تانية.. اتفقنا؟ أحلام: "بس حاجة مفهاش أطفال صغيرة." آدم ابتسم: "حاضر من عنيا.. أطلب لك بيتزا.. بس مش هخليهم يحطوا عليها فراخ ولا لحمة ولا أي حاجة." أحلام هزت راسها: "أيوا." آدم بابتسامة باس إيدها الاتنين وحضنها، وأحلام حضنته بقوة. بعد 4 شهور. في يوم ولادة أحلام. في المستشفى. أحلام في أوضة العمليات بتولد. وآدم رايح جاي بخوف وتوتر ومرعوب على أحلام وحاسس قلبه هيخرج من مكانه.

وقاعد قدام الأوضة طارق اللي ماسك إيد مراد اللي بيلعب جنبه. وكرم وحمزة ومريم ومالك جنبهم. طارق: "متقلقش يا حبيبي.. إن شاء الله مراتك والبنات هيبقوا زي الفل ويقوموا بالسلامة." آدم اتنهد بقلق: "يارب.. يارب." مالك: "أيوا والله متقلقش.. هتقوم لك بالسلامة إن شاء الله." آدم: "يارب.. أنا مش عايز أي حاجة تاني من الدنيا." كرم بقلق: "يارب." حمزة: "أنا هموت وأشوف ولاد اختي.. يارب يقومهم بالسلامة." مريم ابتسمت: "يارب."

وفراس وروان وجنات راحوا لهم جابوا لبس لـ أحلام من القصر، وفراس كان بيوصلهم. روان: "هاا.. أحلام خرجت؟ جنات: "ولدت؟ مالك: "لأ لسه مطلعوش." فجأة آدم سمع صوت عياط طفل، بعدين صوت تاني، وبعدين صوت تالت. آدم دمع بفرحة. والكل فرح. فراس حضن آدم بفرحة: "مبروك يا أخويا." طارق قام حضن آدم بابتسامة وباس راسه، وآدم اتنهد براحة وفرحة. ومالك وروان حضنوا آدم بابتسامة. وكرم وحمزة كمان.

باب العمليات اتفتح، والدكتور خرج وفي إيده بيبي، ومعاه ممرضتين كل واحدة في إيدها بيبي. آدم راح له بسرعة. آدم: "أحلام.. أحلام كويسة؟ الدكتور بابتسامة: "متقلقش.. زي الفل." آدم لما شاف عياله قلبه دق بسرعة بفرحة ومش مصدق نفسه ودمع. الدكتور أعطى آدم الطفلة بابتسامة، وآدم ابتسم وشالها منه وبص عليها بابتسامة وفرحة، وكانت نايمة وباس راسها براحة.

والممرضة شالت طارق طفلة، والممرضة التانية شالت كرم طفلة، وكرم وطارق مش مصدقين نفسهم إنهم شايلين أحفادهم. وآدم بص على عياله التانيين بابتسامة وباسهم. وحمزة ومريم ومالك وجنات وروان وفراس بيبصوا على الأطفال بابتسامة ومش مصدقين قد إيه هما حلوين. آدم بص للدكتور: "أحلام بخير صح؟ كويسة؟ الدكتور ابتسم: "متقلقش.. بخير.. هنطلعها الأوضة العادية دلوقتي." بعد نص ساعة. في غرفة أحلام.

أحلام نايمة على السرير وآدم جمبها بيملس على شعرها بحنان وابتسامة. وموجود في الغرفة كرم ومريم وحمزة، كل واحد فيهم شايل طفلة. أحلام بدأت تفوق وبصت على آدم. أحلام: "آدم." آدم ابتسم وباس راسها: "ألف حمد لله على سلامتك يا عيون آدم." أحلام ابتسمت بتعب: "الله يسلمك." وافتكرت هي فين. أحلام بقلق: "عيالي فين؟ آدم بابتسامة: "اهدي متخافيش.. هما زي الفل." كرم ابتسم: "ألف حمد لله على سلامتك يا حبيبتي."

واعطى أحلام أول طفلة، وأحلام شالتها بدموع وابتسامة ومش مصدقة نفسها، وشمّت ريحتها وباست خدها براحة. ومريم ابتسمت وقربت منها توريها تاني طفلة، وأحلام بابتسامة باست راسها. آدم أخذ من حمزة تالت طفلة، وآدم قربها لـ أحلام، وأحلام باستها بابتسامة. حمزة ابتسم: "بصي دي عيونها خضرا زي عيونك بالظبط." مريم ابتسمت. وأحلام بتبص على بناتها ومش مصدقة نفسها، وبصت لـ آدم بدموع، وآدم بص لها بحب وباس راسها وحضنها. بعد كام يوم. في القصر.

رجعوا القصر بعد ما أحلام بقت كويسة. كرم شايل أول طفلة اتولدت، عيونها بني وشعرها بني. وأحلام شايلة تاني طفلة، عيونها خضرا وشعرها بني فاتح زي أحلام بالظبط. وآدم شايل آخر طفلة اتولدت، شعرها بني غامق مايل للأسود، عيونها بني غامق مايل لأسود زي آدم بالظبط. آدم قعد أحلام على الكنبة براحة. طارق بابتسامة: "ألف حمد لله على سلامتك يا روح قلبي." أحلام ابتسمت: "الله يسلمك يا أونكل." مالك ابتسم: "حمد لله على سلامتك يا أحلام."

أحلام ابتسمت: "الله يسلمك." مالك ابتسم: "وريني كدا أشيلها." واخد من كرم الطفلة اللي معاه، وكرم أدهاله بابتسامة، ومالك بص لها وابتسم، وبص لـ جنات وجنات ابتسمت. فراس: "طب إيه دا؟ أنا عايز أشيلها.. أشمعنى إنت؟ حمزة: "بس يا حبيبي أنت وهو بالدور.. براحة على بنات أختي." مريم ابتسمت. مراد باصص على الطفلة اللي آدم شايلها. مراد: "أشيلها." آدم ابتسم: "عايز تشيلها؟ روان: "لأ يا حبيبي أنت لسه صغير."

آدم: "مقدرش أزعلك.. تعالي اقعد." مراد قعد على الكنبة، وآدم شال الطفلة لـ مراد براحة، وطبعاً آدم مسبهاش من إيده وواخد باله كويس، ومراد ابتسم. مراد: "لسه نونه صغيرة." آدم ابتسم: "ما إنت نونه برضو." مراد: "سمي دي ميرا (نسمي دي ميرا) أحلام ابتسمت: "والله ما أنا مزعلاك يا مراد.. هنسميها ميرا خلاص." آدم ابتسم وباس راس مراد واخد ميرا منه وشالها. فراس ابتسم. روان ابتسمت بحماس: "هتسموا الباقي إيه بقى؟

مريم ابتسمت: "أيوا صح.. هتسموهم إيه؟ آدم باس راس أحلام: "أحلام هي اللي تختار." أحلام ابتسمت. عدى 4 شهور. كانوا أصعب 4 شهور عدوا على أحلام وآدم.. قلة نوم وإرهاق.. شبهه مبيناموش. الأطفال بتصحي كتير في نص الليل، طفلة تنام التانية تعيط وتصحي، فـ تصحي الباقي. الطفلة دي تسكت.. غيرها تعيط وهكذا.

وقلقهم المستمر وخوفهم من أقل حاجة على البنات وخايفين يشلوهم غلط أو يعملوا أي حاجة غلط، بس طارق وكرم وروان دايماً بيطمنوهم إن كل دا طبيعي وميقلقوش. أحلام جالها شبهه اكتئاب ما بعد الولادة وديماً قلقانة وخايفة تكون أم فاشلة، وآدم جنبها وبيطمنها وسايب شغله ومتفرغ ليها وللبنات لحد ما يعدوا المرحلة دي. وأحلام بتطمن من وجوده جنبها.

بس على الرغم من كل دا.. التلت بنات دول أحلى حاجة حصلت في حياة آدم وأحلام، والدنيا مش سيعاهم من الفرحة. في القصر. في غرفة آدم. آدم بيبص بابتسامة على أول طفلة اللي نايمة في سريرها (فريدة) آدم باس خدها. الدادة رحمة (اللي في آخر التلاتينات اللي آدم جايبها تساعدهم) شالت تاني طفلة (رولا) الطفلة التالتة (ميرا) عيطت، وآدم خدها براحة من سريرها وبيسكتها قبل ما تصحي فريدة. آدم بصوت واطي: "بس بس بس يا حبيبتي."

الدادة رحمة بصوت واطي: "هروح أحضر لها التيتا لـ رولا في المطبخ." آدم بص على رولا اللي رحمة شيلاها وبتبص لـ آدم ببراءة بعيونها الخضرا اللي نسخة من عيون أحلام. آدم بابتسامة وباس راسها: "ماشي.. روحي." ورحمة مشيت. أحلام في الحمام. عملت اختبار حمل. أحلام ماسكة اختبار الحمل بصدمة ودموع وحطت إيدها على فمها: "لأ.. أكيد لأ." وطلعت من الحمام. وميرا نامت في حضن آدم، وآدم باس راسها ونيمها على السرير. آدم راح لـ أحلام اللي بتعيط.

آدم بلهفة مسك وشها بإيده: "مالك؟ إيه اللي حصل.. بتعيطي ليه؟ أحلام بدموع: "آدم.. أنا حامل." آدم ابتسم بصدمة وفرحة: "بتتكلمي جد؟ أحلام دموع: "أنت مبسوط؟ دي مصيبة.. إزاي مبسوط؟ آدم بابتسامة وفرحة حضنها: "طبعاً مبسوط.. مصيبة إيه؟ بس هو فيه إيه أحلى من إن البيت يتملي بعيال زي القمر وشبهك؟ أحلام بدموع: "بس كدا كتير أوي.. هناخد بالنا منهم إزاي؟ هو أنا لحقت؟ لسه والده من 4 شهور.. لسه عيالنا مكملتش سنة يا آدم."

آدم طلعها من حضنه ومسح لها دموعها وباس راسها وخدها. آدم: "هناخد بالنا منهم كلهم وهنربيهم أحسن تربية سوا.. أنا جنبك ومش هسيبك ولا لحظة وهساعدك نعدي أي مرحلة صعبة سوا.. حتى لو هضطر ما أروحش الشغل خالص.. يولع الشغل.. أهم حاجة عندي انتوا.. وفي بابا يساعدنا وعمي كرم وروان خلفت قبل كدا وعندها خبرة.. وفي دادة رحمة كمان.. ولو عايزني أجيب لك دادة كمان أو أكتر.. هعمل كدا.. أهم حاجة راحتك." أحلام ابتسمت بحب.

آدم بابتسامة: "أنا الدنيا مش سيعاني.. والله أنا كدا هبقى عندي الـ 4 عيال اللي نفسي فيهم." أحلام بصتله في عينه: "يعني مش هتزهق مننا.. ومن دوشة البيت والعيال؟ آدم قرب منها: "إيه الكلام دا.. أكيد لاء طبعاً يا روح قلبي.. عمري ما أزهق منكم.. انتوا حياتي كلها وعيلتي وكل حاجة ليا." وباس شفايفها. أحلام بابتسامة حضنته، وآدم حضنها بقوة وباس راسها. عدى سنتين. حمزة ومريم سافروا دبي بعد ما حمزة جاله فرصة شغل حلوة في دبي.

وكرم وليليان عايشين مع آدم وأحلام، وأوقات بيروحوا زيادة لـ حمزة هناك. في القصر. بعد العصر. طارق شايل فريدة وبيلعب معاهم، وفريدة بتسرح شعر دقن طارق. طارق ابتسم: "سرحيلي هنا." وشاور على شعره. فريدة: "استنى." وبدأت تسرح له، وطارق ضحك وحضنها. وكرم قاعد وجنبه رولا بتلعب معاه وبتأكله بالأطباق اللعبة اللي معاها. رولا: "طعمه حلو يا تتو." كرم ابتسم: "دا طعمه حلو أوي يا روح جدو." وحضنها.

أحلام نزلت على السلم وشايلة ياسين اللي عنده سنة، وليليان نازلة معاها. أحلام بصت على فريدة ورولا بابتسامة اللي بيلعبوا مع جدهم. أحلام بابتسامة: "العيال دي معذباكم؟ طارق بابتسامة: "لأ دول يعملوا اللي هما عايزينه.. حبايب جدهم." أحلام ابتسمت. كرم ابتسم: "هاتي هاتي الواد ياسين دا." أحلام ابتسمت وأدته لـ كرم. ودخلت المطبخ. وبعد شوية ياسين عيط، وليليان شالته من كرم تدخله لمامته المطبخ. في الجنينة.

ميرا قاعدة بتلعب في الجنينة مع مراد اللي بقى عنده 4 سنين وشوية. والخادمة قاعدة على الطربيزة جنبهم بتاخد بالها منهم. ميرا عايزة تحط توكة لعبة في شعر مراد. مراد: "لأ دي لعب بنات.. أنا ولد." ميرا بزعل: "مرادددد." مراد ابتسم: "طيب خلاص حطيها.. بس هشيلها على طول." ميرا ابتسمت وحطت له التوكة. آدم دخل القصر بعد ما رجع من الشغل. ميرا بابتسامة قامت وجريت على آدم. ميرا: "بابيييي." آدم بابتسامة شالها من الأرض. آدم: "روح قلبي."

وباس راسها وخدها، وميرا حضنته. وادم راح لـ مراد وباس راسه. آدم: "إزيك يا مراد؟ مراد ابتسم: "الحمد لله يا خالو." آدم: "تعالوا يلا ندخل جوه." ودخلوا القصر وآدم شايل ميرا. وراح الصالون. فريدة ورولا لما شافوا آدم راحوا له بسرعة بابتسامة: "بابيييي." آدم ابتسم ونزل لمستواهم وحضنهم بابتسامة. طارق: "شوف العيال أول ما شافوا باباهم.. معبروناش وجروا عليه إزاي.. ولا كأنهم كانوا بيلعبوا معانا." كرم ابتسم: "ربنا يخليه ليهم ديماً."

طارق ابتسم: "يارب." آدم بيبوس راس فريدة اللي بتحضنه. ميرا: "بابي.. رولا ضربتني الصبح على إيدي (ضربتني) وورته إيدها، وآدم مسك إيدها وباسها. رولا: "لأ بص.. هي اللي سدت شعري الأول." آدم: "كدا ينفع؟ مش أنا قايل لكم كدا عيب.. وانتوا إخوات مينفعش تزعلوا من بعض." ميرا: "هي.. هي اللي بدأت على فكرة يا بابي." آدم: "طب يلا.. بسي أختك رولا وصالحيها عشان أجيب لك تشيز كيك النهاردة." ميرا بابتسامة: "بجد؟

آدم ابتسم وباس خدها: "أيوا بجد.. يلا." ميرا باست خد رولا، ورولا باستها. وميرا وفريدة ومراد جروا يلعبوا في الصالون التاني. وأحلام طلعت من المطبخ وراحت الصالون التاني وهي شايلة ياسين، وفي إيدها طبق أكل للبنات. في الصالون عند آدم. رولا بصت لـ آدم بحذر: "وأنا عايزة بيتزا اتنين (اتنين) آدم ضحك وباس راسها: "من عنيا.. هجبلك النهاردة." رولا بابتسامة راحت الصالون التاني لأخواتها. آدم قام: "عاملين إيه؟ كرم ابتسم: "الحمد لله."

طارق: "إحنا زي الفل يا حبيبي." آدم: "أحلام فين؟ كرم: "في الصالون بتأكل البنات." في الصالون عند أحلام. فريدة ورولا وميرا ومراد قاعدين على الأرض بيلعبوا. وأحلام قاعدة على ركبتها معاهم عشان تاكل رولا. ميرا وفريدة أكلوا قبلها، بس رولا لسه رافضة. رولا هزت راسها: "لأ لأ مش عايزة دي." أحلام باست إيدها: "يلا بقى يا رولا متعذبنيش.. إنتي مكلتيش حاجة من وقت الفطار.. يلا يا روح ماما." رولا هزت راسها بـ "لأ".

ليليان دخلت الصالون: "هاتي ياسين.. هوديه لـ دادة رحمة بتجهز له التيتا." أحلام باست راس ياسين وأدته لـ ليليان، وليليان باسّته بابتسامة. آدم دخل الصالون، وأحلام تجاهلته بزعل. آدم بابتسامة أخد ياسين من ليليان وباس راسه. آدم: "ياسو.. روح قلبي." ورفعه لفوق، وبيكلمه بابتسامة وياسين ضحك له. وادم باس راسه وخده بابتسامة، وأعطاه لـ ليليان تاني، وباس راس ليليان، وليليان ابتسمت وطلعت برا الصالون.

آدم ابتسم وبص لـ أحلام اللي بتتجاهله بزعل، وباس راسها. وأحلام بتحاول تأكل رولا ورافضة. آدم: "رولا.. إحنا اتفقنا على إيه؟ كلي يلا عشان أجيب لك البيتزا بليل." رولا فتحت فمها، وأحلام أكلتها، وآدم باس خدها. آدم: "شطورة." دادة رحمة دخلت الصالون بابتسامة: "يلا يا بنات.. وقت شرب اللبن.. جهزتهولكم بيبرد برا.. يلا يا مراد." الكل قام. دادة رحمة أخذت الطبق من أحلام: "عنك أنا يا هانم.. هأكل رولا."

أحلام أدتها الطبق، ودادة رحمة طلعت مع الأطفال. أحلام قامت وكانت هتمشي. آدم مسك دراعها وقربها لحضنه. آدم: "هي.. روح قلبي لسه خصماني؟ أحلام بصتله: "ليه؟ هو إنت عملت حاجة عشان أخاصمك؟ آدم قرب منها وحاوط وسطها بإيده وقربها منه. أحلام بخجل: "آدم.. ابعد لحد يجي يشوفنا.. فجأة لو سمحت." آدم باصص في عيونها: "ميهمنيش حد.. إنتي.. حقك عليا أنا آسف إني عليت صوتي في التليفون النهارده." وباس راسها وخدها.

أحلام بزعل بصت في الأرض: "لأ.. مش هسامحك عشان تبقى تزعق لي تاني.. وأنا خلاص اتأكدت إنك بقيت بتحب عيالك أكتر مني." آدم مسك دقنها خلاها تبص له: "معقولة الكلام دا.. أنا أحب عيالنا أكتر منك؟ دا إنتي روحي.. وأغلى حاجة عندي ومقدرش أعيش من غيرك.. وإنتي اللي جبتيلي أحلى حاجة حصلت لي في حياتي.. ولادنا.. كل واحد فيكم له غلاوة مختلفة في قلبي.. ومقدرش أعيش من غيركم." أحلام ابتسمت: "بجد يا آدم؟ آدم باس شفايفها: "بجد يا عيون آدم."

أحلام ابتسمت: "هتفضل تحبني كدا على طول.. مهما يعدي وقت؟ آدم بص لها بحب: "والله حتى لو عدى 30 سنة.. هفضل أحبك كل يوم أكتر من اليوم اللي قبله." أحلام ابتسمت بحب، وآدم باس شفايفها، وأحلام حضنته. آدم: "عشان أصالحك.. إيه رأيك نتعشى سوا برا النهاردة؟ أحلام طلعت من حضنه وحاوطت رقبته بذراعها وابتسمت. أحلام: "بجد؟ آدم قرب منها وابتسم: "بجد." أحلام بابتسامة: "ماشي.. موافقة." آدم قرب منها وباسها. في الصالون التاني.

الأولاد قاعدين على الأرض بيشربوا اللبن، ودادة رحمة قاعدة على الأرض معاهم، وعلى رجلها ياسين. فراس وروان جم من برا بعد ما كانوا في مشوار وسايبين مراد يلعب هنا. فراس وروان: "السلام عليكم." طارق وكرم: "وعليكم السلام." فراس: "ابني فين؟ ابني وحشني.. ودّيتوه فين؟ طارق ابتسم: "بيشرب اللبن مع ولاد خاله هناك أهو." روان ابتسمت، وفراس راح باس راس مراد وحضنه، ومراد ابتسم، وفراس باس فريدة ورولا وميرا.

آدم وأحلام طلعوا من الصالون التاني. وفجأة مالك وجنات دخلوا القصر وهما ماسكين إيد بعض بابتسامة. مالك بابتسامة وفرحة: "مساء الخير." الكل: "مساء النور." آدم ابتسم: "مالك فرحان كدا ليه؟ مالك بفرحة: "جنات حامل." الكل بفرحة: "بجد؟ أحلام وروان راحوا حضنوا جنات بابتسامة وفرحة وباركوا لها. وآدم وفراس راحوا حضنوا مالك وباركوله. آدم بابتسامة: "مبروك يا حبيبي." فراس بابتسامة: "ألف ألف مبروك.. فرحتنا."

مالك بابتسامة: "الله يبارك فيكم." وطارق بابتسامة راح حضن مالك وجنات: "ألف ألف مبروك يا حبايبي.. فرحتوا قلبي." وكرم بارك لهم بابتسامة. والكل قعدوا يباركوا لهم ويتكلموا معاهم إنهم فرحانين لهم. ليليان راحت لهم وهي بتكلم حمزة فيديو كول. والكل سلم عليه وعرف خبر حمل جنات وفرح لمالك جداً. فريدة راحت لـ آدم. وادم شالها في حضنه بابتسامة وباس راسها. ورولا وميرا راحوا لـ آدم. آدم وكل واحد قعد جنبه من ناحية، وآدم خدحم في حضنه.

ومراد راح لـ فراس وروان، وفراس شاله. وياسين عيط، والدادة رحمة أعطته لـ أحلام، وأحلام خدتها منها بابتسامة ونيمته في حضنها وبدأ يسكت، وباست راسه وخده. آدم ابتسم وباس راس ياسين ومسك إيد أحلام وباسها، وأحلام ابتسمت. آدم بص على عيلته اللي قاعدين مبسوطين، وبيحمد ربنا وبيدعي يفضلوا مبسوطين كدة ديماً. وانتهى البارت وانهى الجزء ده. اعملوا لايك واكتبولي كومنت برأيكم وانتظروا إن شاء الله الجزء التاني قريب هيعجبكم جداً.