رواية الحب الدائم رغم البعد الفصل الثاني والعشرون 22 - بقلم جاسمين محمد

خديجة: دانتي بيئة قوي وقلة أدب وأنا هعرفك هعمل إيه وهعرفك مكانك. وسابتها وطلعت. سارة: يخربيت لسانك، إيه الدبش ده كله. آدم: يابنتي دي هيطلعوا عليها اسم "جعفر" قريب، بس استني. سارة: ده الاسم قليل كمان. جاسمين: اتلموا انتوا الاتنين وافطروا. سارة: حاضر يا باشا. والكل بدأ يفطر وهو عمال يضحك على اللي حصل. فهد وصل الشركة وجاله اتصال من محمد. فهد: صباح الخير، أخبارك إيه؟ محمد: صباح النور، الحمد لله بخير، وأنت؟

فهد: بخير الحمد لله، ها وصلت لحاجة ولا إيه؟ محمد: آه، وكل حاجة هتوصلك دلوقتي على الإيميل. فهد: تمام. وقفل مع محمد وفتح الإيميل بتاعه. فهد: طيب دلوقتي أعرف الحقيقة إزاي؟ مامتها بتقول إنها مش بنتها، وهنا مكتوب إنهم كانوا مسافرين وفجأة جو عليهم بجاسمين دي. أنا هسأل أمها وأخلص. ولا طيب أنا ممكن أعمل تحليل وأشوف لو هي... خديجة دخلت الأوضة بتاعت منى وبعصبية راحت رامية التليفون في الأرض. منى: في إيه يا مصيبة إنتي؟

خديجة: البنت دي أنا لازم أتخلص منها، دي شوية كمان وهتبقى كلمتها هي اللي ماشية في البيت، دي شتمتني. منى: اقعدي طيب بس وافهميني عملتي إيه. خديجة: خدت مكان فهد على السفرة وفهد سكتلها. منى بتعجب: انتي بتهزري؟ فهد سابها قعدت مكانه. خديجة: آه سابها وعادي خالص، أنا لازم أعرف البنت دي عاملة إيه لفهد عشان ساكتلها كده. منى: اهدي بس واحنا هنعرف كل حاجة وفي إيه. خديجة: أنا خلاص قررت، موتها هيكون بكرة. منى: انتي بتقولي إيه؟

موت مين؟ خديجة: موت جاسمين بكرة. منى: انتي بتدمري نفسك كده. خديجة: متخافيش، أنا عارفة أنا بعمل إيه. منى: خديجة فوقي، إنتي ألف واحد يتمناكي، انسي فهد. خديجة: بس أنا ميهمنيش حد غير فهد وهيبقى لي غصب عن الكل. منى: براحتك، بس أنا هبعد وأقف وأتفرج زي الكل عشان أنا عارفة فهد. خديجة: تقفي تتفرجي على بنت أخوكي؟ أمال فين دانتي بنتي وديه الأمومة بتاعتك ولا كان تمثيل من تمثيلك؟

منى: خديجة أنا آه بحبك، بس انتي عارفة إن الحاجة اللي ممكن تجيب لي كلمة من فهد بتجنبها. فهد ميعرفش أبوها ولا أمها لو حد وقف قصاده. خديجة: تمام، أنا هقف قدامه وأشوف إيه اللي هيحصل. منى: براحتك، يلا أروح أفطر، باي. خديجة: باي. سارة: جاسمين، عارفة إنك طيبة أوي، أنا لسه عارفاكي بس ارتحتلك جدا. جاسمين: حبيبتي، وأنا كمان ارتحتلك وحبيتك أوي. سارة: قلبي يا ولا، بقولك صح ممكن أسألك سؤال؟ جاسمين: اسألي يا روحي.

سارة: انتي وفهد ليه مش طايقين بعض وناقر ونقير؟ جاسمين: مش عارفة والله، بس إحنا من ساعة ما اتقابلنا واحنا كدا بنتخانق دايماً. سارة: هو أصلاً مش بيطيق أي بنت. جاسمين: ليه صح؟ هو متجوزش لحد دلوقتي؟ سارة: اللي سمعته ودايماً بيتحكي إن فهد كان بيحب حياة بنت عمو محمد ومستحيل يحب ولا يتجوز حد غيرها. جاسمين: طيب وهي فين دي؟ سارة: معرفش والله، في اللي بيقول إنها اتخطفت، واللي يقول إنها تاهت، وأمي وخديجة بيقولوا دي ماتت.

جاسمين: يالهوي، ده كله وهي من إمتى مختفية؟ سارة: من زمان، يجي 16 سنة. جاسمين: دي أكيد ماتت يابنتي. سارة: فهد وطنط زينب متأكدين إنها عايشة ويقولوا هترجع قريب وعندهم أمل. جاسمين: ممكن. المهم صح، احكيلي انتي عاملة إيه في مدرستك؟ سارة: الحمد لله بخير يا روحي. جاسمين: يارب دايماً يا قلبي، خلي بالك من دراستك، عايزيكي تحققي حلمك. سارة: من عيوني. آدم: بترغوا في إيه؟ جاسمين: بسم الله الرحمن الرحيم. مش تكح حتى يازفت إنت.

آدم: إزغفتي ياحنينة. جاسمين: والله عيل بارد، عايز إيه؟ آدم: يابنتي وربنا ده بيتنا وأنا مديرك في الشغل، فين الاحترام؟ جاسمين: خلصت الأسطوانة، عايز إيه بقى؟ آدم: عبو معرفتك ياشيخة معرفة خر. المهم أمل بعتتلك الورقة دي وبتقولك شوفيها وقوليلها تعمل إيه. جاسمين: ومبعتتهاش ليه؟ وكنت خليتك معاها. آدم: بعتتها من بدري وست الهانم سايبة التليفون وقاعدين بيتكلموا. فاضل كباية شاي صح؟

جاسمين: وانت مالك، اتلم ومش جبت الورق، يلا أمشي بقى. آدم: أروح لم الحق البت المزة اللي جاية تعمل اجتماع مع فهد، وأنا أقول الواد متشيك وحاطط برفان ليه، أثاره عشان هيقابل مزز وراح غمّز لسارة. سارة فهمت: آه، ده دايماً مش سالك الواد ده، وبصراحة هو مزز وأي بت بتعجب بيه. جاسمين: على إيه بلا نيلة. سارة: اتنيلي إنتي وربنا مزز. آدم: والبت اللي جاية النهارده مزز برضه. جاسمين: خلاص عرفنا إنها نيلة مزز، بطل صداع بقى.

آدم: هو أنا كلمتك ولا إيه؟ أنا بتكلم على المزز. جاسمين: هقول لأمل اتلم. آدم: هههه، لأ خلاص والنبي. جاسمين: شاطر، امشي. آدم: حاضر. ومشى خطوتين. جاسمين: آدم. آدم: نعم. جاسمين قربت عليه وبصوت واطي: هي البت مزز مزز؟ آدم: دي صاروخ مش مزز بس. جاسمين: غور من وشي طيب يلا. آدم: وه في إيه يابنت المجنونة؟ إنتي بتتحولي ليه كدا؟ سلام. جاسمين بعد ما آدم مشي، رايحة جاية وعمالة تفكر في فهد والبت. سارة: تعالي نروح لهم.

جاسمين: نروح لمين؟ سارة: لفهد والمزة. يلا يا أختي يلا. جاسمين: وأنا مالي بيهم، مش رايحة. سارة: اخلصي ويلا، أنا هروح عشان أشوفها. جاسمين بعد تفكير: طيب وأنا آجي عشان أشوفها بس برضه. سارة: هههه، ماشي يلا. فهد: أهلاً أهلاً. _أهلاً بيك يا فهد. فهد مد إيده: ازيك يا نيفين؟ نيفين: كويسة. وراحت حضناه. فهد: الحمد لله، اتفضلي. نيفين: أخبارك إيه يا فهد؟ وحشتني جدا. فهد: الحمد لله بخير. نيفين: إيه بتسأل ليه؟

فهد: الشغل بقى، مش فاضي. نيفين: آه. فهد: تعالي نتكلم في الشغل. نيفين: يلا. آدم واقف هو وأمل بيهزروا وشاف جاسمين هي وسارة، عرف إن فكرته نجحت وإن فيه حاجة من ناحية جاسمين لفهد. آدم: إيه اللي جابك؟ جاسمين: جاية أشوف الشغل. آدم: شغل إيه وفهد؟ جاسمين: عندي شغل أسيبه مينفعش. آدم: فعلاً. جاسمين: أمال هو فين صح؟ آدم: فهد آه جه في اجتماع. سارة: آه تمام، أكيد مع المزز صح ياض يا آدم؟ آدم: آه هي.

أمل: دول اديلهم يجي ساعة، مش عارفة إيه الاجتماع ده. عارفة يابت يا جاسمين؟ جاسمين: إيه؟ أمل: دي بنت زي ما بتقولي ملزقة، أول ما جت فهد مد إيده سلم عليها عادي، راحت دي حضناه. جاسمين: حضنته؟ أمل: آه، مش عارفة إيه قلة الأدب دي. آدم: بس وإحنا مالنا، يلا على الشغل. أمل: حاضر، يلا يا جاسمين. جاسمين: يلا. وهي عينها على مكتب فهد. جاسمين بدأت تشتغل وعينها على المكتب، وآدم وسارة واقفين عاملين يتفرجوا عليها وهي متعصبة.

جاسمين: ده مش اجتماع، ده كله. آدم: عادي، فيها إيه؟ جاسمين بتوتر: فيها إن فيه شغل غير الاجتماع لازم يشوفه. آدم: أنا ممكن أشوفه عادي، وريهولي. جاسمين: لأ، هو أنا هدخل أورهوله. آدم: بس... وليه مكملش كلامه؟ جاسمين سابته وراحت عند فهد. جاسمين خبطت على الباب ودخلت قبل ما فهد يقولها ادخلي. فهد: في حاجة اسمها استئذان صح؟ جاسمين: خبطت وانت مردتش، فدخلت. فهد: تستني لما أقولك تدخلي، وإنتي بتعملي إيه هنا أصلاً؟

جاسمين: جاية أشوف الشغل. وهي عينها على نيفين. فهد: شغل إيه؟ إنتي في إجازة. جاسمين: عادي، أمل احتاجتني جيت. نيفين: طيب أنا أسيبكم مدام عندكم شغل. فهد: لأ خليكي، لسه مخلصناش. نيفين: وقت تاني بقى، ورقمي معاك، ابقى رن عليا. فهد: تمام، شرفتينا. نيفين: شكراً. وجت تحضن فهد، جاسمين وقفت بينهم. جاسمين: تمام، باي. فهد: باي. جاسمين وهي بتقلد نيفين: ابقى رن عليا، رقمي معاك. فهد: اتلمي، إيه جابك؟ يلا روحي.

جاسمين: أنا كويسة وهكمل مساعدة أمل. فهد: أمل آدم معاها، وأنا كمان، ولو عاوزنا حاجة نبقى نبعتلك على الإيميل. جاسمين: بس... فهد: على البيت، اخلصي بقى. جاسمين: طيب. فهد خلا جاسمين خارجة وراح شكها بدبوس. جاسمين: آآآه! إيه ده؟ فهد: آسف، ده بتاع البدلة، تعالي أمسحلك الدم. وجاب منديل وبدأ يمسح. جاسمين: بس دي تعويرة صغيرة. فهد: تمام، يلا روحي بقى. جاسمين: حاضر.

فهد بعد ما جاسمين طلعت، رن على الدكتور يبعتله ياخد المنديل عشان يعملوا التحليل. فهد: التحليل أخده إمتى؟ _بكرة إن شاء الله يا أستاذ فهد. فهد: تمام.