رواية الحرمان الفصل الخامس 5 - بقلم غير معروف

لا جبتي بنت قولي الحمد لله. _الحمد لله على كل حال بس أنا الدكتور مأكدلي أنه ولد. مسكت البنت وأنا مش حاسة ناحيتها بأي مشاعر من الأمومة، حتى دي مش شبهي ولا شبه جوزي. لقيت حماتي بتقولي: _سلفتك جابت ولد وبنتها ماتت الله يرحمها ويصبرها، خدي ابن سلفتك أهو شوفيه على ما تفوق.

أخدت الولد في حضني، كان بيعيط جامد وأول ما مسكته سكت خالص. قعدت أبص له لقيته جميل وشكله بريء. روحنا على البيت وأخدت بنتي رضعتها وشكرت ربنا على نعمته وفضله. أنا قعدت 20 سنة ما بخلفش وأخيرًا بقيت أم. عدت السنين في بيت العيلة وسلفتي تصرفاتها مش بتتغير معايا، حتى بعد ما جابت الولد وأنا البنت. على طول مبتحبنيش ومش طيقاني من غير ما أعملها أي حاجة، لكن الولاد كانوا بيلعبوا مع بعض دايمًا وبيحبوا بعض.

وفي يوم البيت كله صحي على صريخ حماتي، كانت بتصحي حمايا ولقيته ما بيصحاش. جوزي وسلفي جريوا جابوا دكتور لكن أمر الله نفذ. _البقاء لله ربنا يصبركم. اتفاجأنا بعد العزا إن حمايا كتب كل حاجة في البيت باسم سلفي زي ما قال لأنه هو اللي جاب الولد. كانت صدمة كبيرة بالنسبالي وطلبت من جوزي إني أروح أعيش في مكان تاني، حتى حماتي مبقتش معايا زي الأول من كتر ما سلفتي بتكرهها فيا.

خدت جوزي وحور بنتي وخدنا شقة إيجار. وأنا ماشية لقيت سليم ابن سلفتي بيعيط وينادي عليا يقولي: _متسيبنيش وتمشي يا طنط أنا عاوز ألعب مع حور وعاوزك تقعدي معانا. = معلش يا حبيبي هبقى أجيلك تاني. قلبي كان بيتقطع عليه وبعتبره زي حور بالظبط بس أنا مليش قعاد معاهم تاني بعد اللي حمايا عمله ده، الله يرحمه بقى ويغفر له على عملته.

اتنقلنا في شقة تانية وقعدت أسبوعين وسلفتي وحماتي مكلمونيش مكالمة واحدة حتى، لكن كان قلبي واكلني على سليم لأنه كان ولد طيب ومؤدب أوي. خدت حور ورحت أبص عليهم لقيت حماتي تعبانة أوي وسلفتي قاعدة وسايباها لوحدها ومعاملتها اتغيرت معاها بعد ما كل حاجة بقت باسم جوزها. أول ما سليم عرف إننا جينا نزل يجري عليا أنا وحور. _وحشتوني أوي أنا قاعد هنا لوحدي ممكن تسيبي حور تقعد معايا هنا. = منا قولتلك يا سليم هبقى أجيلك.

_عارفة يا طنط أنا لما أكبر هتجوز حور عشان أنا بحبها. ضحكت عليه إنه طفل صغير وبيفكر في الكلام ده، بس لقيت مامته بتضربه وتقوله اللي بتقوله ده مستحيل يحصل. _ليه يا بسنت أد كده بتكرهيني مش عاوزة ابنك يتجوز بنتي؟ عملتلك إيه يا بسنت لكل الكره ده؟ = اسكتي أنتي متعرفيش حاجة.

لقيت حماتي خرجت على كلامنا ولسه كانت هتقول حاجة وقعت من طولها، نقلناها على المستشفى. فضلت في غيبوبة أسبوعين وأنا كل يوم بروح أبص عليها وبسيب حور مع بسنت. وفي يوم حماتي فاقت جريت عليها وأنا كل همي أعرف هي كانت عاوزة تقول إيه قبل ما تقع. _أرجوكي يا ماما قوليلي مخبيين إيه عليا كنتي عاوزة تصارحيني بإيه؟ = أنا... أنا يا بنتي خلاص بموت ولازم تعرفي السر اللي مخبينه عليكي. _حور مش بنتي صح؟ = يوم الولادة جبتي ولد و...

فجأة لقيتها قطعت النفس والدكاترة دخلوا، قعدت أقولها اصحي متسيبينيش متعلقة اصحي قوليلي في إيه. لكن الدكتور بقى يردد البقاء لله. جريت على بسنت وأنا كلي غيظ إزاي ضحكت عليا وخدت ابني وحرمتني منه. خبطت على الباب جامد. _افتحي يا بسنت افتحي. فتحتلي الباب. _سليم ابني أنا صح؟ هاتي ابني. = اهدي كده يا كوثر مش بقولك أنتي متعرفيش حاجة. _منا عرفت كل حاجة. = أنا بقى هحكيلك كل حاجة مبقاش فيه حاجة تتخبى.

الولاد بيكبروا ولازم يعرفوا. يوم الولادة أنتي فعلًا جبتي ولد بس نزل ميت وحماتي طلبت مني أديكي بنتي عشان متكسرش بخاطرك وفي المقابل حمايا هيكتب كل حاجة لجوزي. طمعت يا كوثر ووافقت ومكنتش أعرف إنه في يوم ابني هيطلب يتجوز أخته. أيوه يا كوثر أنا طماعة وكنت بغير منك. بس أنتي لازم تعرفي إن سليم وحور ولادي وإخوات ولازم يعيشوا مع بعض ويعرفوا إنهم إخوات.

نزلت وسبتلها العيال من غير ولا كلمة وكل أحلامي اتدمرت في لحظة أعرف إني كنت عايشة في كذبة كبيرة وأنا اللي ابني ميت. وبسنت إزاي تتنازل عن بنتها عشان شوية فلوس؟ حمايا وحماتي راحوا في ثانية والبيت كله بقى بتاع بسنت وحازم. روحت البيت وحكيت لجوزي على اللي حصل بس الغريبة إنه مكنش متفاجئ وكان عارف كل حاجة ومشترك معاهم في الكذبة وكان رده: _خوفنا نكسر بخاطرك يجرالك حاجة. = وهي الحاجات دي فيها كدب وخوف؟

أنتم كلكم كذابين ذنبهم إيه الأطفال دي تشتتوهم كده؟ فضلت في حالة اكتئاب فترة طويلة وفي يوم لقيت الباب بيخبط وبسنت جاية هي وحور وسليم، حسيت إن روحي ردت ليا تاني وهما بيحضنوني. ولقيت بسنت بتقولي:

_أنا مش عارفة أشكرك إزاي على تربية حور، أنا لو عشت عمري كله مكنتش هعرف أربيها التربية دي أدب وأخلاق. أنتي فعلًا أمها الحقيقية. ارجعي البيت يا كوثر أنا لوحدي في البيت معيش حد يونسني، أنا آسفة لو زعلتك في حاجة، أنا اتغيرت والله. ارجعي سليم وحور بيحبوكي أوي ودايمًا بيسألوا عليكي وحازم قالي إنه عمره ما هياكل حق أخوه وهيكتبله نص البيت، أنا مستنياكي.

ضحكتلها وقولتلها إن شاء الله هبقى كويسة وهرجع أكيد إحنا ملناش غير بعض. بعد أسبوع اتفقت مع جوزي إننا نرجع وأنا راضية أعيش وسط حور وسليم حتى لو أنا مش أمهم. لميت حاجتي وأنا نازلة خلاص على السلم فجأة أغمي عليا. حسام جري بيا في المستشفى فوقت على صوت الدكتور وهو بيقول لحسام مبروك المدام حامل. النهاية.