رواية الحياه اليوم الفصل الثاني 2 - بقلم امل صالح

فكر سكوته ده تفكير إنه يتراجع عن اللي في دماغه. كانت هتتكلم تاني وتحاول تفهمه إنها راضية ومش فارق معاها حاجة، لكنه سبقها بالكلام لما رفع راسه ورمى أكتر جملة وجعتها. -أنتِ طالق يا دينا. فاقت من صدمتها على صوت صاحب التاكسي وهو بيقولها إنه وصل للعنوان اللي قالتله عليه. طلعت بيت أهلها وهي سرحانة وعقلها مش قادر يستوعب لحد دلوقتي اللي حصل من دقايق. خبطت على الباب ففتحت لها اختها اللي استغربت وجودها وشكلها.

بصت وراها وسألتها: -فين جمال؟ رفعت راسها وقالت بصوت مبحوح: -طلقني. زعقت أختها بصدمة: -إيــــــه؟!!! شدتها لجوة وقفلت الباب بسرعة. قعدت دينا على كرسي وقصادها على واحد تاني أختها ريناد اللي اتكلمت بصدمة: -طلقك إيه؟ أنتِ بتهزري يا دينا؟؟ الدموع ملت عينها من تاني وهي بترد عليها بحسرة: -والله أبدا، أنا فعلا اتطلقت. -اصدمك أكتر؟ كملت ببسمة وراها وجع كبير: -طلقني عشان مش قادر يصرف عليا، متخيلة يا ريناد!

أنا والله راضية وقولتله إني راضية فهمته إني مش فارق معايا حاجة المهم هو وكان رده.... سكتت لثواني وكملت بعدها: -أنتِ طالق يا دينا. سكتت ريناد أختها مش عارفة ترد تقول إيه، مش قادرة تصدق إن حاجة زي كده حصلت. أخدت نفس طويل واتكلمت: -ماما فوق بتنشر الغسيل وبابا في الشغل، معرفش هتقولي إيه ليهم ولا هتقولي السبب البايخ ده إزاي، أنا بجد مش قادرة أصدق إن جمال يعمل كده؟؟ -واهو عمل.

دخلت الأوضة المشتركة بينها وبين اختها ورمت نفسها على سريرها. انهارت في العياط وهي بتفتكر الـ 3 سنين خطوبة والسنة ونص جواز اللي ضاعوا من عمرها وفي الآخر انتهى الموضوع بطلاق. عدى شهر على اليوم ده، كانت إجراءات الطلاق خلصت وتم بشكل رسمي. مكنتش بتخرج من البيت ولو لإنها حتى تشتري حاجة من تحت البيت. لحد ما قررت ريناد تنزلها غصب. كانوا ماشيين في محل هدوم بالصدفة وقعت عينها على لون تيشيرت رجالي معين.

قربت ومسكته في نفس اللحظة اللي مسكته واحدة تانية. -ممكن تسيبهولي! عارفة إنك شوفتيه الأول بس أنا جوزي بيحب اللون ده وحابة أشتريهوله و... قاطعته دينا ببسمة: -طبعًا خود... قطعت كلامها لما شافته جاي من ورا البنت اللي لفت تكلمه: -جمال لقيت اللون أهو! خش قيسه بقى..