رواية القديمة تحلى الفصل السادس والعشرون 26 - بقلم نرمين

نهضت من مكانها حتى تفتح الباب. كانت تجلس وحدها بالمنزل كالعادة، ظنت أنها السيدة آمال فقد تواعدا أن تزورها اليوم مساءً. لذلك قامت بتوضيب المنزل بأكمله. تفاجأت ميرنا بياسر أمامها ينظر لها بأسف شديد. تجاهلت ميرنا معنى نظراته رغم أنها تعرف ماهيتها جيدًا وهتفت بصوت جامد: _أفندم يا دكتور ياسر، أقدر أساعد حضرتك في إيه؟ حاول ياسر الخروج من ذلك الجو البارد قائلاً: _طب مش هتقوليلي اتفضل؟

_آسفة، بس زي ما حضرتك عارف أنا لوحدي في البيت، ومليش إلا سمعتي، فمقدرش أدخل حضرتك. حضرتك عاوز إيه؟ زفر ياسر بتعب قائلاً: _جاي أعتذر لك. _عن؟ ثباتها وجمودها ترهقه، فهتف بصوت مهتز: _عن اللي قولته من كام يوم كده. ابتسمت ميرنا بسخرية قائلة: _عن إني لازقة عندكم عشان تبص لي وتتجوزني مثلاً! ولا عن إني كنت مخبية رسالة زمزم عشان عاوزة أمحيها من حياتك وتتجوزني برضو! عن إيه بالظبط يا دكتور؟ وضع كفه على جبينه يضغط عليه قائلاً:

_عن كل كلمة قولتها لك يا ميرنا، عن كل كلمة قولتها لك في ساعة غضب وأنتِ اللي جيتي قدامي من غير ترتيب لكده. _آسفة لتاني مرة يا دكتور، بس أنا مش من أهلك عشان أستحمل إنك تفش غضبك فيا وتسمعني الكلام ده. _عمومًا أنا بكرر أسفي تاني وتالت وعاشر كمان. ماما عاوزة تشوفك. _أهلاً وسهلاً تنور، بيتي هو بيتها، هي اللي ربتني واهتمت بيا بعد موت أهلي. ياسر بضيق:

_ميرنا ماما متعرفش حاجة عن اللي أنا قولته لك، وأنا نزلت اعتذرت لك من نفسي لأني غلطت في حقك. أتمنى إن اللي أنا قولته لك اليوم ده ميغيرش معاملتك مع ماما. واسف كمان مرة على أي كلمة أسأت لك بيها. عن إذنك. وذهب من أمامها. أما هي فأغلقت الباب واستندت إلى ظهره تتنهد بتعب وحيرة، ماذا عليها أن تفعل؟ هل عليها أن تقبل اعتذاره؟ أم تتمسك بعدم الصعود إلى والدته مجددًا؟ *** بغرفة زمزم. تمكنت الطبيبة من إفاقتها من إغمائها.

كانت زمزم توقفت عن البكاء وعادت إلى طبيعتها الساكنة من جديد. اقتربت منها يارا وجلست على طرف الفراش أمامها هاتفية بابتسامة ودودة: _أنا يارا، وأنتِ؟ تجاهلت زمزم حديثها التافه ذاك وهتفت بجدية: _أنتِ مين؟ وعاوزة مني إيه؟ _أنا دكتورة، دكتورة يارا عويس، وأنتِ اسمك إيه؟ تجاهلت زمزم حديثها للمرة الثانية وهتفت: _دكتورة إيه؟ ردت يارا بابتسامة: _نفسية، دكتورة نفسية. _وجاية ليه؟ _جاية عشان أساعدك أكيد.

_بس أنا مش محتاجة مساعدة من حد، شكراً برضو إنك جيتي، بس للأسف أنا مش مريضة عشان تعالجيني أو تساعديني. اتسعت ابتسامة يارا أكثر فقد وجدت طرف الحديث حتى تبدأ معها: _أوكي، خلينا أصحاب، تحكي لي، أحكيلك، يعني، إيه رأيك؟ احتدمت عينا زمزم بغضب وهتفت بصوت حاد: _قولت لأ، قولت لك شكراً، اتفضلي امشي بقى. _بس أنا عاوزة أتعرف عليكي. ربعت زمزم يديها واستندت بظهرها إلى الفراش قائلة ببرود:

_عاوزة تقعدي تحكي اقعدي براحتك، لا هقولك اطلعي برة ولا هعمل حاجة، عشان مش بيتي أصلًا، تمام كده؟ بالخارج. كان وقاص يحاول مع عمه حتى يسمح له بالدخول إليها ورؤيتها. _لا يا وقاص، لا مش هتدخلها، كفاياها كده أوي. وقاص بعناد: _وأنا عاوز أشوفها، بقالها كتير هربانة، ودي مراتي. ناصر بصوت جهوري:

_هطلقها منك يا وقاص، هطلقها ومش هيبقى فيه رابط بينكوا غير القرابة، أنا مش مستغني عن بنتي. وإذا كنت زمان جوزتهالك فكنت مفكرك راجل وهتحافظ عليها. لم يعبأ وقاص بكلام عمه واستدار حتى يصعد إلى غرفتها، ووراءه والده وناصر يحاولان منعه. دلف وقاص إلى الغرفة ونظر إليها ببهوت. لم تكن هي نفس الفتاة التي عاشت معه، تلك شخصًا آخر. اقترب منها بخطوات بطيئة وهتف بصوت متحشرج: _زمزم. لم تكن لتخطئ صوته أبدًا.

انطلقت رأسها كالقذيفة باتجاه الصوت، وبلحظة كانت تعاود البكاء من جديد، ولكن دون صوت هذه المرة. تابعت يارا تعبيراتها بتركيز شديد. من الواضح أنه زوجها الذي أخبرها به ناصر منذ قليل. ظل وقاص يقترب منها ببطء حتى لا ترتعب أكثر، لكنه كان مخطئًا. كل خطوة يخطيها وقاص كانت هي تزحف إلى الوراء مثلها، إلى أن التصقت بالجدار، وكان هو يتابع السير نحوها. هنا صرخت زمزم بقوة قائلة:

_طلعيه، طلعيه برة والنبي، وأنا هعمل لك اللي أنت عاوزه. طلعيه. هنا تحدثت يارا بقوة: _لو سمحت اطلع برة، مينفعش كده. استطاع ناصر وقدري إخراج وقاص من الغرفة بالقوة رغم ممانعته. بعد خروجهم، أغلقت يارا الباب والتفتت عائدة إلى زمزم تحاول تهدئتها. _اهدي، خلاص هو خرج. بعد قليل هدأت زمزم وتوقفت عن البكاء. _الحمد لله هديتي؟ زمزم بصوت باكي: _أيوة هديت، بس أنا مش عاوزة أتكلم عليه. ابتسمت يارا ثم رفعت منكبيها قائلة:

_مقولتش اتكلمي عليه، أي حاجة، قولي أي حاجة تانية اللي ييجي في بالك تتكلمي عليه اتكلمي، حتى لو عاوزة تخرجي من هنا. لمعت عينا زمزم وهتفت بلهفة: _بجد، ممكن تخرجيني من هنا؟ _اممم، طبعًا ممكن أخرجك، مش شرط نقعد هنا. نهضت زمزم من مكانها بسرعة وهتفت: _طيب، أنا، أنا هلبس وننزل، ماشي. أومأت برأسها وخرجت من الغرفة تنتظرها بالخارج. *** لم يستطع ناير السيطرة عليها، فقد خشي أن يأذيها هي وطفله، فتركها على راحتها.

وبالتأكيد لن يتركها. خرجت زهرة من الغرفة وبيدها حقيبتها. وقف ناير أمامها يحاول تهدئتها، وأثناءها عن رأسها: _يا زهرة مش كده، بقول لك اتجوزتها غصب عني، اقعدي ونحل مشاكلنا مع بعض. _دي مش مشكلة يا أستاذ، ده طلاق، طلاق ومن غير رجعة، أنا هروح لبابا وهو بقي يتصرف معاك ويطلقني. _مش هطلق، والله ما هطلق يا زهرة. _هخلعك يا ناير، مش هعيش معاك. وخرجت من المنزل بأكمله تاركة إياه وراءها يحطم كل شيء بالمنزل بغضب أعمى.

بڤيلا ناصر النوساني. دلف إلى غرفة المكتب بعد أن شاهد رحيل زمزم وتلك الطبيبة. تنهد براحة بعض الشيء، فها هي زمزم تبدأ أولى مراحل العلاج النفسي. قطع سيل أفكاره دخول زهرة كالإعصار من الباب. _طلقني من ناير يا بابا، مش عاوزة أعيش معاه تاني. أغمض عينيه بتعب. إنجاب البنات متعب حقًا، قصفوا ظهره إلى نصفين. عندما يتخلص من واحدة تظهر الأخرى بمشكلة جديدة. _إيه اللي حصل يا زهرة؟ عاوزة تطلقي ليه يا ماما؟ زهرة بحدة:

_عشان خاين، كان متجوز عليا بس ربنا كشفه وحد بعت لي الزفت على راسه صورة قسيمة الطلاق. _طب وهو برر موقفه إزاي؟ _هيقول إيه يعني! قال إيه اتجوزها غصب عنه. أمسك ناصر بهاتفه وأشعله وهو يقول: _طيب، أنا هتصل بيه دلوقتي عشان يوضح لنا الموضوع كله، واللي أنتِ عاوزاه أنا هعمله لك. بعد مرور ثلاثة أشهر. تجلس زمزم على طاولة الطعام أمام شقيقتها الوسطى، ويترأس الطاولة والدها. وبجانبهم يجلس عابد وزوجته وأطفاله الاثنان.

_ناوية ترجعي البيت امتى يا زهرة؟ قالها عابد بقوة لزهرة، فهو يعتبرها شقيقته الصغرى هي وزمزم، ولذلك يتحدث معهم بأريحية. _لما يطلقني إن شاء الله هروح عشان آخد حاجتي من البيت. أفلتت ضحكة عالية من تمارا جعلته ينظر إليها بغضب. تذكرت ملازمته لها عندما يدعوها والدها إلى منزله، يلازمها عند جلوسها مع زهرة تحديدًا، خائفًا من استماعها إليه بعقابه بشأن زواجه من أخرى. _آسفة. رمقها عابد بحدة والتفت إلى زهرة مكملاً حديثه:

_حضرتك منعتيه يشوفك، سيادتك منعاه يروح معاكي للدكتورة يطمن على ابنه. ثم إنه اتجوزها غصب عنه، أمه اشتغلت له في الأزرق وتعبانة وهتغضب عليك، يعمل إيه يعني؟ _يقول لي اللي حصل يا عابد، وبعدين أنا مش هرجع له وهطلق منه كمان. ابتسم عابد بسخرية قائلاً: _يا صلاة النبي، وأنتِ مفكرة بقى إنه هيزهق ويطلقك كده عادي صح؟ امتدت يد زهرة إلى كف والدها الذي يحاول قدر استطاعته كتمان ضحكته وهتفت:

_بابا حبيبي هيطلقني منه، ولو مرديش هيخلعه، صح يا بابا؟ أفلتت الضحكة العالية هذه المرة من زمزم، وشاركها جميعًا الضحك بما فيهم عابد والصغيران. _يا بت، يا بت بطلي كذب، ده أنتِ بتتصلي بيه من خط جديد تسمعي صوته. احترمي نفسك بقى. وبعدين هو جه هنا حكى كل حاجة، اتجوزها عشان زن أمه وأنتِ عارفة إنها مبطقكيش أساسًا، وبعدين اللي كان بإيده عمله وأنتِ فاهماني كويس. أمسكت زهرة بالشوكة توجهها ناحية زمزم هاتفة بغيظ:

_أنتِ سوسة أصلاً، أنا مش عارفة إيه اللي بيخليني أنام معاكي في الأوضة، مبتناميش أصلاً. _ربنا حب يوقعك في شر أعمالك وكشفك قدامي. كفاية كده، 3 شهور مش عارف يشوفك. غيره كان طلبك في بيت الطاعة وخلص. تحدث ناصر أخيرًا يحاول خلق حديث معها. تحسنت حالتها النفسية كثيرًا وأصبحت تتقبله بحياتها. سامحته على شيء تقريبًا، لكن ذلك اليوم اللعين لا يزال محفورًا بذاكرتها يأبى النسيان.

_زمزم بتتكلم صح يا زهرة، سامحي بقى، ده جوزك وأبو اللي في بطنك إن شاء الله. لم تلتفت زمزم إليه وتابعت تناول طعامها بصمت تام وشردت بفكرها بعيدًا إلى تلك الرسائل النصية التي يبعث بها وقاص إليها، يعتذر عما اقترفه بحقها، يبعث لها بالورود كل صباح، يأتي إلى المنزل يوميًا حتى يراها، لكنها تختفي من أمامه كالزئبق. لكن اليوم لم يأتِ. تساءلت في نفسها لم؟ هل مل من الاعتذار لها؟ تنهدت بحيرة يتخللها الحزن، واستمعت إلى والدها يقول:

_بكرة خطوبة سيلين يا بنات ولازم هنروح لها.