رواية اللغز الفصل الخامس 5 - بقلم سالي محمد

أمجد اتلبك لما سألته ليه أهلك خاصموك بسبب زواجنا. توه على الموضوع وقالي: "إيه هو تحقيق ولا إيه؟ أنا تعبانة وهنام. اطفي النور." ما رديت عليه ولا طفيت النور أصلاً. ما كنتش قادرة أنام وحسيت بيه هو كمان ما نامش. قمت أدخل الحمام حسيت كأن فيه نفس حد معايا في الحمام. فضلت أبص في كل ناحية ما لقيتش حد خالص، بس النفس بيقرب عليا وأنا مش شايفة. وحسيت كأن حد حضني من ورا. صرخت بأعلى صوتي: "آآآه!

" وصرخت أكتر لما لقيت واحد شكله مرعب، وحش ضخم بقرون كبيرة. أغمي عليا. معرفش إيه حصل. صحيت على الصبح كنت في السرير وأمجد ماسك إيدي وقاعد على الكرسي قدام السرير. كنت مفزوعة أول ما افتكرت اللي شوفته في الحمام. صرخت تاني. أمجد لقيتُه بيقولي بخضة: "إيه؟ انتي صرختي ليه تاني؟ قولتله: "شفت في الحمام وحش ضخم حضني وأغمي عليا." قالي: "إيه الكلام ده؟ ما كانش فيه حد في الحمام. كنتي لوحدك."

قولتله: "لا والله أنا شوفته وحسيت بيه كمان. دا كان عنده قرون كبيرة كأنه شيطان." قالي: "لا لا مش شيطان، تلاقيها بتتهيألك." حسيت هو عارف اللي أنا شوفته بس بيكذبني. معرفش ليه. قولتله: "أمجد أنت بتكذبني ليه؟ أنت كأنك قاصد تعمل إيه؟ إيه البيت ده مريب؟ ليه؟ افهم بس إيه يا ابن الناس فهمني." لقيت وشه أحمر وقالي بغضب: "إيه ابن الناس دي؟

الكلمة دي بتعصبني. بقولك إيه أنا زهقت. البيت قدامك عايزة تمشي الباب مفتوح. أنا تعبت معاكي بجد. إيه دا؟ ١٢ سنة وأنا بحاول عشان تحبيني؟ أنا تعبت حقيقي تعبت." قولتله: "أنت ليه بتزعق كدا؟ أنا فعلاً همشي. أنا أصلاً عارفة إن ده مش مكاني ولا ده بيتي ولا أنا سمر يا أخي. أنا عارفة إنك مخبي حاجة. هو أنت أصلاً بني آدم زيي ولا جنسك إيه؟ وليه كلمة ابن ناس زعلتك كدا؟ ما تقولي هو ده من الفضاء مثلاً ولا جن؟

ما تحاولش تقنعني إن اللي كان في الحمام ده مش أنت هي نفس ريحتك. هو اللي شوفته ده شكلك الحقيقي؟ جاوب على أسئلتي بقى. أنا تعبت." تعبت وعيطت بعدها. هو سابني وخرج ومش نطق ولا كلمة. قمت غيرت هدومي وأخدت الموبايل وخرجت من الأوضة أدور على الولاد. ما لقيتهمش ولا لقيته هو كمان. البيت فاضي.

قولت تمام. أنا هاخرج وأشوف أمنية المزيفة دي فين وأحاول أفهم منها. ما كانش معايا ولا جنيه. دخلت أوضة النوم تاني أدور على أي فلوس. لقيت درج التسريحة فيه فلوس. أخدتهم وخرجت أدور على مواصلة. بس برضه حاسة كأن حد بيراقبني. اتأكدت إنه أمجد. واتأكد إنه مدام بيختفي ويتحول كدا يبقى حاجة من الاتنين. إما جن أو فضائي. بس أنا مش بعتقد.