رواية اللغز الفصل التاسع 9 - بقلم سالي محمد

أخذني أمجد نتمشى، بس كنت قلقانة على الأولاد، معرفش ليه. هو بلغ الريسبشن إننا خارجين نتمشى، وإنه قفل الباب من بره، وإن الأولاد نايمين وعايز حد يبقى معاهم. وفعلاً جه واحد، وداله فلوس عشان يحرص الأولاد، وخرجنا. روحنا ع البحر، الجو كان جميل جداً والهوا تحفة. فعلاً أحلى وقت نتمشى فيه ع البحر. قولتله: "إيه حكايتك؟ أنا متأكدة إن اللي شوفته مكنش حلم، أنا كنت ف أرض الجن، وإنت أصلاً مش بشر، وإن السلسلة دي بتحميني منهم، صح؟

قالي: "أيوه صح، بس اللي متعرفوش إنَّه مش الشرير اللي ف القصة. أنا آه كنت زمان كدا، بس بسبب حبي ليكي وحبك ليا، أنا أسلمت واتجوزنا وعشنا مع بعض وخلفنا أولادنا، بس دا كان ليه عواقب." قلتله: "عواقب إيه؟ قالي: "ممنوع الجن يحب إنسية، خصوصاً عشيرتنا. أنا ابن ملك من أقوى ملوك الجن السبعة. كنت متخصص ف حاجات كتير عقلك مش هيقدر يصدقها، وماينفعش أحكيها." قلتله: "طب مين ماهينار دي، وليه بتكرهني كدا؟

قالي: "دي بنت عمي، والمفروض إننا نتجوز، وهي بتحبني جداً، لكن أنا حبيتك إنتِ واتغيرت عشانك." قلتله: "طب إيه حصل ليلة المطر، وليه مش فاكرة العشر سنين اللي فاتوا، مع إنِّي ف الصور باينة إنِّي بحبك وإنت بتحبني؟ قالي: "أيوه احنا كدا، بس ماهينار قدرت تمسحلك كل دا. معرفش إزاي، هي خلتك تقلعي السلسلة وتعملي حادث تفقدي فيه ذاكرتك، وترجعي ليوم المطر اللي لقيتك فيه." قلتله: "طب عرفني إيه حصل يوم المطر."

قالي: "القصة طويلة، ودا مش وقت أحكيها. أظن قولتلك هقولك كل حاجة بعد الوقت اللي اتفقنا عليه." قلتله: "انت ليه اخترت وقت قبل ما تحكيلي؟ قالي: "عندي أسبابي، وعارف إنك هتفتكريني ف الوقت دا. وبعدين، إحنا خارجين نتفسح." وجري ع الميه، ومسك شوية رشهم عليا، وفضل يضحك. ضحكته كأنها عدت ع قلبي ع طول. أنا كمان جريت وراه، ومسكت الميه رشيته بيها، وفضلنا نلعب ونضحك.

معرفش عدى وقت قد إيه، لكن تعبنا ونمنا جنب بعض ع الرملة، وعنينا ف عيون بعض، وساكتين. وفجأة قالي: "بحبك." حسيت قلبي نبضاته بتزيد. كنت مبسوطة وأنا بسمعها منه، لكني حاولت أداري فرحتي دي، وبصيت الناحية التانية. قالي: "أكتر حاجة خلتني أحبك، خجلك دا." وقرب مني وحط إيده عليا. قلتله: "مش يلا نرجع؟ ليكون الأولاد صحيوا؟

قالي: "لو صحيوا، كنت عرفت. وبعدين، الأولاد ف بيني وبينهم تواصل، بنسمع بعض ونتكلم حتى لو مش جنب بعض. ارتاحي إنتِ." قلتله: "مش هيحاولوا يأذوهم؟ قالي: "ممكن، بس ولادنا مش عاديين، عندهم قوة يقدروا يحموا نفسهم. ماتقلقيش، أنا موجود لحمايتكم إنتوا. كل حياتي أهم."