رواية الم البداية الفصل السابع والثلاثون 37 - بقلم فريده احمد

بصت للتليفون وبفضول مسكته وفتحت الرسالة. أول ما شافتها اتصدمت. كانت بوسي باعتاله وبتقوله: "حبيبي مش بترد ليه؟ كلمتك كتير. وبعدين فضلت مستنياك امبارح مجتش ليه؟ ولا انت بقا مبقتش تتبسط معايا؟ طيب تعالي النهاردة وأنا هنسيك اسمك هدلعك... مستنياك اوعا متجيش علشان انتا واحشني موووت." هنا بصدمة وزهول: "بتخوني ياتامر؟ أنا كنت حاسة." تامر خرج من الحمام اتفاجأ بـ هنا اللي ماسكه الفون بتاعه ودموعها نازلة. تامر قرب

منها بسرعة وقالها بقلق: "مالك في إيه؟ تامر بص للفون لاقاه مفتوح على الرسالة. تامر مسح على وشه وهو مش عارف يقولها إيه. أما هنا قامت وقفت بهدوء وأديتله الفون في إيده. ودخلت جوه لبست وطلعت. كل ده وهي لسه مصدومة. هنا لسه بتفتح باب الأوضة علشان تخرج. تامر وقف قدامها وقالها: "رايحة فين ياهنا؟ هنا: "ابعد عني." تامر: "استني بس انتي فاهمه غلط." هنا بصتله جامد وكانت هتصرخ في وشه لكن رجعت تاني وقالت بسخرية: "بجد فاهمه غلط؟

وإيه هو الصح؟ تامر: "دي... دي رسالة اتبعتت بالغلط." قرب منها وحاوط كتفها بأديه وقالها: "أنا بحبك يا هنا صدقيني بحبك." هنا بعدت عنه بعصبية: "بطل كدب بقاا. أنا كنت شاكة من زمان إنك خاين بس دلوقتي اتأكدت. طلقني ياتامر طلقني بقا علشان أنا استحالة أعيش معاك ثانية واحدة بعد النهارده." تامر: "طيب اهدي ممكن وأنا هفهمك." هنا بعصبية: "أهدي إيه وهتفهمي إيه؟ ماهي واضحة زي الشمس." هنا: "مروحتش ليها ليه؟ كانت مستنياك وهتدلعك."

تامر: "انتي فاهمه الموضوع غلط ياهنا. أنا معرفش حاجة عن الرسالة دي." تامر راح مسك تليفونه ومن حظه إن بوسي كانت باعتة الرسالة من أكاونت فيك ولا عليه اسمها ولا صورتها ولا أي بيانات ليه. تامر قرب منها وقالها: "بصي دي رسالة اتبعتت ليا بالغلط. أكيد مش أنا المقصود. وبعدين أنا معرفش مين هي صاحبة الأكونت ده." هنا بعصبية: "وأنتا فاكرني هبلة وهصدقك. انت طول عمرك زبا...

لة ياتامر وبنات ستات وبتحب الرمرمة. أنا هروح عند بابا وياريت تتطلقني بهدوء." تامر: "طلاق إيه بس ياهنا." هنا بعياط قالت: "أيوه هتطلقني ياتامر لأني مش هعيش مع واحد خاين زيك." وفتحت الباب ونزلت تجري. تامر: "هنا استني." نزل وراها. هنا خرجت من الفيلا وهي بتعيط ومنهارة وتامر بيحاول يوقفها. حازم كان خارج ولسه بيتفتح باب عربيته شافهم كده. حازم قفل باب العربية وقرب منهم وهو بيقول: "في إيه؟ مالكم؟

هنا بعياط: "أنا عايزة أطلق ياحازم. خليه يطلقني." حازم: "حصل إيه؟ هنا بعياط: "أنا عايزة أطلق ياحازم مش عايزة أعيش معاه بعد النهارده." حازم: "حصل إيه يعني؟ اتكلمي." وبص لتامر وقاله: "انت عملتلها إيه؟ تامر كان ساكت مش عارف يقول إيه. حازم: "ماتتكلموا." هنا وهي بتعيط: "ال بيه بيخوني." حازم بص لتامر اللي بص في الأرض. حازم رجع وجه كلامه لـ هنا: "وإنتي عرفتي الزاي؟

هنا بشهقات: "لاقيت واحدة بعتالو رسالة وبتقولو مستنياك النهاردة. والظاهر إنو متعود يروحلها دايما." هنا بعياط: "أنا عايزة أطلق مش عايزة أعيش معاه." حازم: "طيب ادخلي جوه." هنا دخلت وهي بتعيط. تامر كان لسه هيتكلم. بس حازم قال: "انت مش قولتلي إنك بطلت الموضوع ده؟ حازم: "بس تمام أنا فعلاً هتطلقها منك ياتامر." تامر بسرعة: "لأ أنا بحبها ومقدرش أعيش من غيرها." حازم: "بتحبها إزاي وانت بتخونها؟ ولا انت خدت على كده؟

تامر اتنهد وقال: "اختك هي اللي خلتني أعمل كده. أنا مش بشوفها ياحازم. معظم الوقت قاعدة عندكم. هي مش قادرة تقتنع إنها خلاص بقت متجوزة والمفروض تبقى في بيتها مع جوزها. أنا برجع البيت مش بلاقيها مستناني. خلتني اتعودت على إنها عايشة معاكم مش عايشة معايا. ده غير بقا طول الوقت خناق ونكد معيشاني فيه." حازم: "وهي بتتخانق معاك ليه؟ ما علشان اللي انتا بتعمله ياتامر." تامر: "ما هي لو اهتمت بيا أنا مكنتش هعمل كده."

تامر خد نفس وقال: "أنا عارف إني غلطان في اللي بعمله. بس هي السبب. هي اللي أدتني الفرصة إني أدور على الاهتمام بره." ......................................... عند شيرين كانت قاعدة على السرير وبتتفرج على صورها هي وأمجد بحزن. شيرين: "عارفه إني غلطت بس انت السبب. انت اللي اضطريتني أعمل كده. أنا مقصرتش معاك في حاجة. ليه تبص بره وانت مش ناقصك حاجة؟ ليه تسمح لنفسك تبص لغيري؟ ...

بس أنا أستاهل. أنا اللي قبلت على نفسي كده من الأول ورضيت وأنا عارفه إنك عينك زايغة." شيرين دموعها نزلت: "بس أنا بحبك. بحبك أوي وزعلانه من نفسي أوي إني حبيت واحد زيك." شيرين فضلت تعيط لحد ما نامت. .............................. مساءً. في شقة ريم. ريم فتحت باب الشقة بالمفتاح ودخلت بعد يوم طويل قضته في شغلها. ريم بصت لاقت دينا قاعدة بتتفرج على التليفزيون. ريم: "مساء الخير." دينا: "دينا مساء الخير. اتأخرتي ليه؟

ريم وهي بتقعد على الكنبة: "داليا مكانتش موجودة في المركز النهارده وأنا اللي شيلت الشغل كله." دينا: "مش بنات بتشتغل؟ ريم: "آه. بس شكلي كنت واحشة الناس. كل اللي يدخل عاوزني أنا اللي أشتغلها بإيدي." دينا: "صحيح بقولك إيه. أنا كنت عايزة أجيلكم. أعمل جلسة تقشير بشرة." ريم: "ريم مالها بشرتك يادينا؟ ما إنتي حلوة أهو يا حبيبتي." وكملت بهزار: "هو في في بشرتك يا قمر انتي؟ دينا ضحكت: "ثبتيني إنتي علشان متعمليش لي."

ريم: "قدامك الصالون كله اهو. روحي اعملي اللي انتي عايزاه." دينا: "خلاص. هو شعري بس. هعمل بروتين." ريم: "ما كانت بشرتك من شوية." دينا: "لأ بشرتي كويسة." ريم ضحكت وقالتلها: "المكان كله تحت أمرك. بس بشرط. أنا مش هعملك حاجة علشان نبقى متفقين." دينا: "أمال مين اللي هيعملي؟ ريم: "في خمسين بنت هناك. اللي تعجبك خليها تعملك." دينا: "لأ إنتي اللي هتعمليلي."

ريم: "إنسي. أنا ماليش غير في الميك أب. عايزاني أحطلك ميك أب معنديش مانع. هتقوليلي بقا بشرة وشعري؟ ابعدي عني." ريم: "هي ماما فين صحيح؟ دينا: "خرجت." ريم: "خرجت راحت فين يعني؟ دينا: "مش عارفه. بس تقريبا راحت تقابل خالك. كان بيكلمها وبعدين خرجت." دينا: "قوليلي صحيح. البت اللي اسمها كاميليا دي شكلها كانت عايزة تولع فينا ليه كده؟ ريم: "أصلك متعرفيش. علشان بتحب حازم. فـ علشان كده مكانتش طايقة نفسها."

دينا بتفهم: "إممم. علشان كده. طب خلي بالك منها بقا. شكلها مش سهلة." ريم: "على نفسها. وبعدين هو أصلاً مش بيحبها." دينا بغمزة: "هو بيحبك إنتي يا جميل." ريم ضحكت وبعدين قالتلها وهي بتحاول تغير الموضوع: "هو انتي عندك عندك امتحان بكرة ولا أنا بيتهيألي؟ دينا: "لأ عندي." ريم: "أمال مش بتذاكري ليه؟ إنتي من لما جيتي مشوفتكيش ماسكة كتاب. هو إنتي بتحلي إزاي؟ نفس أفهم." دينا قالت بضحك: "بالبركة."

ريم قامت وهي داخلة قالت: "هتسقطي إن شاء الله." دينا: "نعم مين دي اللي تسقط؟ وكملت بغرور: "ده أنا بطلع من الأوائل." ريم: "فعلاً. مصدقاكي." ريم دخلت الأوضة وقبل ما تغير مسكت تليفونها ورنت على شيرين تطمن عليها. بس شيرين مكانتش بترد. ريم قلقت وكلمت ندي وقالتلها تروح تشوفها وتطمنها لأنها بيتها قريب من بيت شيرين. ......................................... عند شيرين كانت لسه نايمة لأنها كانت واخدة منوم.

ندي راحت ليها وفضلت تضرب في الجرس لكن مفيش رد. ندي طلعت مفتاح الشقة وفتحت بيه. ودخلت لاقت الشقة هادية. ندي فضلت تنادي عليها لحد ما فتحت أوضة النوم لاقتها نايمة. ندي قعدت جمبها ومشيت إيدها على شعرها بحنان. بصت على في إيديها وهي نايمة كانت صورتها هي وأمجد. ندي خدتها منها واتنهدت بحزن. وفتحت الدرج علشان تشيلها لفت نظرها شريط الحبوب بتاع المنوم اللي هي واخداه. ندي اتنهدت بيأس وبدأت تصحيها.

ندي: "شيرين. ياشيري. اصحي ياحبيبتي." شيرين: "......... ندي: "شيرين. شيرين اصحي يالا." شيرين فتحت عينيها وهي بتقول: "إيه يا أمجد؟ ندي بحزن عليها: "شيرين فوقي. أنا ندي." شيرين قامت اتعدلت: "بتصحيني ليه ياندي؟ سيبني نايمة." ندي: "وإنتي عايزة تفضلي نايمة كده طول عمرك؟ ماينفعش." ومسكت البرشام وقالتلها: "إيه ده؟ ممكن تقوليلي بتاخدي منوم ليه؟ إنتي مش عارفة إنه غلط تاخدي منه كده عمال على بطال؟

شيرين: "لما بنام برتاح ياندي من التفكير." ندي: "ولأمتى هتفضلي كده؟ إنتي ليه سلبية ومش بتفكري في نفسك؟ شيرين: "عايزة إني أعمل إيه يعني؟ ندي: "فكري في نفسك ياشيرين ومتستسلميش للحزن. متاخديش المنوم ده تاني علشان غلط. إنتي دايما كده بتأذي نفسك ومش بيهمك. يعني علشان تعاقبي أمجد عاقبتيه بطريقة غلط؟

وبدل ما تغلطي في حقه بس غلطتي في حق نفسك قبله. حرمتي نفسك من الخلفة زي ما حرمتيه. إنتي غلطتي ياشيرين سواء في حق نفسك أو في حقه." شيرين: "كفاية ياندي أنا مش مستحملة." ندي: "ياحبيبتي أنا بقولك الكلام ده علشان بحبك." ........................... تاني يوم في الصباح. في الجامعة. دينا بعد ما خلصت امتحان وطلعت كانت واقفة بتكلم يارا في الفون وبتقولها: "إنتي فين؟ أنا خلصت وطالعة أهو." يارا قالتلها هي مستنياها فين وبعدين قفلت.

دينا اتحركت علشان تمشي لاقت اللي بيقرب عليها وبيقولها: "ممكن نتعرف؟ دينا بصتله وقالت: "لأ مش ممكن." هو: "ليه بس؟ ده أنا حتى بنات الجامعة كلهم يتمنوا نظرة مني مش يتعرفوا علي." دينا بصتله بقرف وقالت: "بس بقا أنا متمناش ولا عايزة أتعرف على حد." كريم: "ده إحنا هنتصاحب عادي إيه المشكلة." دينا: "وأنا مش بصاحب." وراحت تمشي. راح هو ماسك إيدها. وقالها: "استني بس." دينا بغضب شدت إيدها منه وكانت لسه

هتضربه بالقلم وهي بتقول: "إنت إزاي تمسك إيدي كده ياحيوان؟ لكن هو مسك إيدها اللي رفعتها قبل ما تضربه بغضب وقالها: "إنتي اتجننتي؟ كنتي هتعملي إيه؟ إنتي متعرفيش أنا مين؟ دينا شدت إيدها منه لتاني مرة وقالتله بسخرية: "مين يعني؟ ابن رئيس الجمهورية؟ وسبته ومشيت. وهو قال: "هجيبك بردو." دينا خرجت لاقت يارا ويوسف واقفين مستنيينها. سلمت عليهم ووقفت تهزر معاهم.

خرج كريم وهو متضايق وأول ما لمحها واقفة مع يوسف وبتهزر معاه قرب عليها بسرعة وهو بيقول بسخرية: "ما الآنسة بتتعرف أهو وبتصاحب و بتهزر كمان. أمال عاملة فيها محترمة ليه؟ دينا بغضب: "اخرس ياحيوان." كريم: "اخرس إيه بقا؟ مانتي مقضياها أهو. طب قولي إنك مصاحبة مكانش ليها لازمة النمرة اللي عملتيها جوه دي وإنك مش بتاعت الكلام ده." يوسف بحدة: "كريم اسكت إيه اللي إنت بتقوله ده؟ يارا: "في إيه ياكريم؟ إنت إزاي تكلم دينا كده؟

كريم: "هي اسمها دينا؟ دينا: "هو إنتو تعرفوا الحيوان ده؟ يوسف ضحك وقال: "ده كريم ابن عمي." دينا بصدمة: "إيه؟ ابن عمك؟ يارا: "هو إنتو متعرفوش بعض؟ وبعدين افتكرت وقالت: "آه. إنت مكنتش موجود في عزومة امبارح وماشفتش دينا ولا تعرفها علشان كده." كريم كان مش فاهم حاجة. يوسف: "كريم دي دينا بنت عمتك سحر." دينا: "إيه؟ عمتي سحر مين؟ يارا: "عمتك سحر اللي كانت عايشة بعيد عننا. دي بقا دينا بنتها واخت ريم مرات حازم." كريم: "بجد؟

وبص لدينا وقال: "مش كنتوا تقولوا إن القمر دي بنت عمتي؟ دينا بصتله بقرف. يارا: "اديك عرفت. إيه اللي حصل بقا بينكم جوه؟ كريم وهو بيبص لدينا بإعجاب: "لأ دا كان سوء تفاهم بس خلاص." دينا بصتلهم وقالت: "أنا ماشية." وقبل ما تتحرك كريم قال: "ممكن متزعليش مني؟ دينا مرتدتش عليه وراحت تمشي. كريم قال: "استني لو سمحتي." دينا وقفت بنفاذ صبر. كريم: "ممكن أوصلك؟ دينا: "نعم؟

كريم بسرعة: "عادي يعني بما إننا طلعنا قرايب. وبعدين أنا عايز أسلم على عمتي. كان نفسي أشوفها بس ياخسارة رجعت بعد ما مشيت." كريم: "قولتي إيه؟ دينا: "ماتروح تسلم عليها براحتك. أنا مالي بيك." كريم: "وفيها إيه إني أوصلك في سكتي وأنا رايح؟ يارا: "مفيهاش حاجة يادينا خليه يوصلك." دينا سكتت. كريم: "ها موافقة؟ دينا هزت راسها بهدوء: "اتفضل." ...................................... مساءً. في الفيلا.

كانوا هنا وشهيرة قاعدين وتامر كان بيصالح في هنا. حازم نازل من فوق. تامر: "يلا ياهنا بقا." هنا: "يلا على فين؟ تامر: "تمشي معايا." هنا: "أنا مش هامشي معاك ومش هرجعلك تاني. يا ريت بقا تطلقني بهدوء. يا أما هخلعك." تامر باستغراب: "إيه هتخلعيني؟ هنا بقوة: "آه هخلعك ياتامر. إيه مش مصدقني؟ بجد هعمل كده لو مطلقتنيش. أحسن لك بقا تطلقني بهدوء وأنا شايفة إن ده أحسن ليك."

تامر وهو موجه كلامه لحازم: "شايف اختك وقلة أدبها. يعني لما أقوم آكلها قلمين دلوقتي أبقى عندي حق ولا لأ." حازم: "امشي مع جوزك وبطلي جنان يا هنا. إنتي فاهمه الموضوع غلط. الرسالة أكيد اتبعتت بالغلط زي ما قال." هنا قامت بعصبية وقالتله: "وإنت هتقول إيه يعني؟ ما إنت لازم تدافع عنه. ما إنت ماتفرقش عنه حاجة. طول عمركم بتحبوا الرمرمة. إنتو الاتنين زبا... لة زي بعض."

هنا مكملتش كلامها ومرة واحدة كانت واقعة على الأرض من شدة القلم اللي نزل على وشها من حازم. شهيرة جريت عليها وقومتها وهي بتقول لحازم: "معلش ياحازم هي متقصدش." هنا وهي حاطة إيدها على وشها: "لأ أقصد. أنا مقولتش حاجة غلط. ولا هي الحقيقة بتزعل." شهيرة: "ما تخرسي بقا." حازم بغضب: "أقسم بالله كلمة زيادة وما هيطلع عليكي نهار." شهيرة: "صدقي إننا معرفناش نربيكي. تعالي معايا." وخدتها وطلعت على فوق. تاني يوم في الصباح.

في الجامعة. إنجي كانت خارجة من الجامعة وهي تايهة. فجأة لاقت آدم واقف قدامها. إنجي بحزن: "آدم." آدم مردش عليها واتحرك ناحية عربيته اللي واقفة وركبها. وقبل ما يتحرك إنجي قربت عليه: "آدم. ممكن نتكلم؟ آدم بجمود: "نتكلم في إيه؟ إنجي: "آدم. أنا آسفة." آدم: "أسفة على إيه يا إنجي؟ هات على إيه؟ إنجي: "ممكن بس نتكلم." آدم خد نفس وفتح العربية وقالها: "ارركبي." إنجي ركبت: "أنا آسفة يا آدم بس إحنا فعلاً مش هينفع نكمل مع بعض."

ضحك بسخرية وقال: "ده إنتي كنتي بتلعبي بيا بقا وأنا مش واخد بالي. إيه حنيتي لحبيب القلب؟ آدم: "وأنا اللي كنت مصدقك. مكنتش أعرف إنك زبالة أوي كده. كنت استبن أنا مش كده." إنجي بدموع وبدون وعي قالت: "إنت مش فاهم حاجة. اللي حصل كله غصب عني. أنا خايفة عليك افهم بقا." آدم: "خايفة عليا من إيه؟ ويعني إيه غصب عنك؟ آدم قرب منها وقالها: "ياسين ليه يد في الموضوع ده صح؟ إنجي بخوف هزت راسها برفض وهي بتعيط وقالتله: "لأ."

آدم: "لأ إيه؟ ممكن تفهميني إيه اللي حصل؟ آدم: "أصل لو غصب عنك يبقى مفيش غيره ياسين." إنجي بعياط: "أنا خايفة عليك إنت مش قده. مش هيسيبنا في حالنا. أنا عارفه." آدم: "وإنتي فكراني هخاف منه؟ إنجي: "لازم تخاف." آدم: "يبقى متعرفنيش." وقال في نفسه: "يا أنا يا هو." إنجي وهي بتعيط: "آدم أنا آسفة مش هينفع نكمل مع بعض. ابعد عني علشان متتأذيش بسببي." وفضلت تعيط جامد. آدم: "طيب اهدي. أنا مقدرك ومش زعلان منك." إنجي: "بجد؟

آدم هز راسه وقال: "أيوا. إنتي مالكيش ذنب في حاجة. عارف إنه غصب عنك." آدم: "أنا هروح أجيبلك عصير علشان تهدي." إنجي: "لأ أنا ماشية. السواق مستنيني." آدم: "خمس دقايق هنشرب العصير بس." آدم نزل من العربية وراح جاب اتنين عصير ورجع. فتح باب العربية وركب وقالها: "خدي اشربي." إنجي خدت منه العصير وشربت منه. وبعد ثواني كانت نامت. وادم بص عليها بخبث وهو بيقول: "لما نشوف بقا ياياسين مين فينا اللي هيدوس على التاني ويكسره."

شعل العربية وطلع بيها. يتبع .....