رواية الم رحيق الفصل الثامن والعشرون 28 - بقلم سمية عبد السلام

بيت عمر عمر: قمر ياخواتي. ندى: طب يلا اطلع بره. عمر ببرأة: مش هساعدك تغيري؟ ندى: لأ شكراً. عمر: طب قليلي هتلبسي إيه؟ ندى: اطلع بره يا عمر. عمر بخبث: مش مهم كده كده مش هنحتاج اللبس في حاجة. ندى وشها احمر وقالت بصوت عالي: اطلع بره. بعد شويه كانوا قاعدين علي سجادة الصلاة وخلصو صلاة وعمر بص على ندى اللي بتفرك في صوابعها. عمر مسك اديها وقال بحنية: متخفيش طول ما أنا معاك، الموضوع مش محتاج القلق ده كله.

ندى بتوتر: اصل أنا خبيت عليك حاجة وانت لازم تعرفها. عمر بقلق: حاجة إيه ياندى؟ ندى بتوتر: أنا..... أنا... بحبك. عمر: !! ندى ضحكت وقالت: هموت مش قادرة، نفسي تشوف شكلك عامل إزاي؟ عمر استوعب اللي حصل وقال: بتعملي فيا مقلب طب وربنا ما أنا سايبك. ندى جريت على بره وعمر جري وراها. عمر: هتروحي مني فين يعني؟ ندى راحت عند السفرة واستخبت وراها وعمر قصادها من الناحية التانية. ندى بهزار: خلاص والنبي مش هعمل كده تاني.

عمر: دانتي قطعتيلي الخلف، قلت البت هتقولي طلعنا إخوات في الرضاعة وأنا معرفش. ندى: والله رحيق اللي قالتلي أعمل كده. عمر: أكيد آدم اللي مسلطها عشان يبوظ الليلة، بس أما أشوفه. ندى جريت وكانت لسه هتدخل الأوضة وعمر مسكها وبعدين شالها. ندى كانت بتصوت. عمر وهو شايلها: لأ لسه بدري على الصويت. ندى: نزلني يا سافل يا قليل الأدب. عمر وهو بيحطها على السرير: حاضر. وبعدين قال: ندى. ندى: إيه؟

عمر برومانسية: أحبك ولا يوجد في القلب سواك. ندى بتفكير: سواك ولا معجون أسنان؟ عمر من الصدمة مردش. ندى: بهزر معاك، وبعدين بصت في عيونه وقالت: أنا كمان بحبك يا من احتليت مدينة قلبي. بعد مرور 6 شهور. في القصر. الكل كان قاعد خايف ومتوتر وشوية ودخل عمر وآدم وحمزة ويوسف. الكل جري عليهم. حمزة: مبارك يا بشمهندسة إيمان. إيمان حمدت ربنا وامها خدتها بالحضن وزغرطت. عمر: أما بقا الدكتورة شهد مصطفي جابت.

شهد جريت على رحيق وحضنتها وفضلوا يعيطوا من الفرحة وسنية زغرطت. فاطمة بحب: حاسبي ياشهد، رحيق أختك حامل. آية بصت على آدم ويوسف وقالت: طب وأنا؟ يوسف بحزن: للأسف يا آية مش هعرف أخلص منك جبتي 98. مبارك يا دكتورة آية. آية جريت حضنت آدم وهي بتعيط: الحمدلله الحمدلله. يوسف بزعل: على فكرة أنا اللي جبت النتيجة والبيه كان قاعد في العربية. آية وهي رايحة تحضنه: خلاص متزعلش. بس آدم مسكها من دراعها: أنا قلت أما تعملوا الفرح الأول.

يوسف وحمزة: واهي النتيجة طلعت، الفرح امتى بقا؟ عمر: مستعجلين على الهم ليه... احم قصدي استنوا شوية وبعدين اتجوزوا. آدم لعمر: شكلك هتبات على الكنبة النهاردة يا حلو. رحيق: اااه. عمر: انتي اللي مقوياها عليا يا مرات أخويا. رحيق بصوت عالي: ااااه. عمر: شفت. آدم: يا عم استنى، مالك يا رحيق حاسة بحاجة؟ رحيق بزعيق: أنا بولد يا غبي انت وهوا. عمر بعد تركيز: ااااه، وبعدين قال بصدمة: إيه؟ احيه بتولدي.

يوسف: يعني بقالنا ست شهور مستنينك تولدي في أي وقت وجاية تولدي يوم نتيجة العيال. رحيق وهي بتصوت أكتر: هوا بمزاجي أشوفك مكاني يا يوسف الكلب. يوسف: احم. آدم: اهدي يا حبيبي. رحيق: منك لله، انت السبب أنا كان مالي ومال ده كله. ندى راحت عندها: اهدي وخدي نفس. رحيق فعلاً عملت كده بس ضربت ندى بالقلم وصوتت: مش قااااادرة هموت. عمر بضحك: والله أحسن حاجة عملتيها ده أنا مقتدرش عليها. ندى: بس أما نروح.

إيمان: سبحان الله الناس بتتوحم على حاجات عادية إلا رحيق كانت بتتوحم على بيض مسلوق. رحيق والوجع بيزيد: خلاص مش قادرة هفقس قصدي هولد. آدم بخوف وقلق عليها: طب المفروض أعمل إيه؟ رحيق بتريقة: هاتلي ميه سخنة، وكملت بعصبية: وديني المستشفى يا غبي. آدم: والله يارحيق لا ظبطك على قلة أدبك دي. فاطمة بزعيق: انتو هتفضلوا ترغوا وتسبوها كده، بسرعة ودوه المستشفى. آدم شال رحيق والكل ماشي وراه. في المستشفى قدام أوضة العمليات.

الممرضة خرجت ومعاها طفل، ولد بسم الله ما شاء الله زي القمر. آدم: هيا عاملة إيه؟ الممرضة بأعجاب: هيا مرات حضرتك؟ آدم بجمود: أمال خطيبتي. هيا عاملة إيه دلوقتي. الممرضة: الحمدلله كويسة وهننقلها أوضة عادية. بس مرات حضرتك دي عنيفة أوي. وحطت إيديها على خدها. وبعدين قالت: مش ناوي تغير؟ يوسف بهزار: طب امشي بدل ما تيجي تديك التاني. آدم خد الولد وأذن في ودنه. وبص لقي حمزه وعمر ويوسف بيبصولوه. آدم: انسوا.

عمر: أنا صاحب عمرك وزي أخوك. آدم: مستحيل. حمزه: أنا بقا عارف إنك بتحبني وهتسميه على اسمي. يوسف: لأ أكيد هيسميه على اسمي أنا جوز أخته برضه. آدم: ولا واحد منكم يا كلاب. وخد الولد وراح عند جده. الجد: بسم الله ماشاء الله. آدم: بعد إذنك يا جدي أنا عايز رحيق اللي تسميه عشان هيا الوحيدة اللي من حقها ده. الجد ابتسم: طول عمري بقول عليك راجل ابن راجل. عند رحيق. كانت حاضنة الطفل وبتبوسه: شبهك أوي يا آدم.

آدم بابتسامة: هتسميه إيه؟ رحيق بنفس الابتسامة: سيف آدم سيف البنهاوي. آدم ابتسم وميل باس راسها: ربنا ما يحرمني منك أبداً يا رحيق الجنة. رحيق ضحكت وقالت: ولا يحرمني منك يا أبو سيف. وبعدين الكل دخل عندهم وكانوا فرحانين بالطفل أوي وخصوصاً عم مصطفي والجد وفاطمة. بعد شهر. فرح إيمان وآية. الشباب كانوا بيرقصوا وإيمان وآية قاعدين في الكوشة. والرجالة الكبيرة قاعدة مع بعض. وسنية وأم إيمان ونعمة ووردة قاعدين مع بعض.

وشهد كانت شايلة سيف وقاعد جنبها رحيق و ندى ودادة فاطمة. ندى: الحقي يا رحيق آدم بيشقط. رحيق بصت كان آدم واقف مع بنت وتقريباً كده نسيت لبسها في البيت. رحيق قامت عشان تروح عندهم. فاطمة: رحيق استهدي بالله. مش عاوزين الفرح يبقلب لعزا. رحيق بخبث: متقلقيش يا دادة أنا بس هرحب بيها. رحيق راحت عند آدم وقالت: مش تعرفنا يا آدم بالضيفة؟ آدم بجدية: دي السكرتيرة الجديدة اسمها جيرمين.

رحيق: خلاص روح أنت عند الشباب وجيرمين هتيجي تقعد معانا. جيرمين: شكراً. أنا مرتاحة كده. رحيق: لأ إزاي دي تيجي دحنا هنروقوكي يا شابة. آدم كان مبسوط من غيرة رحيق وقال: روحي معاها. بعد إذنكم. وسابهم ومشي. رحيق خدتها وراحوا عند ندى وشهد وفاطمة. رحيق خلتها تقعد بينها وبين ندى. رحيق: جيرمين يا جماعة سكرتيرة آدم. فاطمة: وانتي يا نيرمين... جيرمين بغرور: جيرمين يا طنط. جيييرمين.

فاطمة بتريقة: طنط. طب أنا ماشية رايحة عند آية وإيمان يابنات. وبصت لجيرمين بقرف وقالت: بعد إذنك يا تنت (طنط) ندى: جيرمين انتي مخطوبة ولا متجوزة؟ جيرمين: لأ أنا سنجل. ندى: ليه كده مع إنك حلوة يعني؟ جيرمين: كل الرجالة خاينيين. رحيق: محدش قلك جربيهم كلهم. جيرمين: نعم؟! ندى بسرعة: لأ رحيق بتحب تهزر بس. وكملت: بس أكيد مش هتفضلي سنجل على طول؟ جيرمين: أكيد. محدش عارف الخير فين؟ رحيق بجدية: مش في مصر صدقيني دورت كويس.

جيرمين: حضرتك بتهزري وأنا جوايا جرح و... رحيق بمقاطعة: وأنا جوايا ألم. بس مش عارفة قلم جاف ولا رصاص. جيرمين نفخت بضيق. ندى مبسوطة أصلاً بال بيحصل وقالت: خلاص بقا رحيق مش كله بيحب الهزار. رحيق: على فكرة مغيش بني آدم عرفني إلا وحبني. جيرمين: مع احترامي لحضرتك بس أنا محبتكش. رحيق: منا عارفة. أنا قلت بني آدم مش حمير. جيرمين: لأ حضرتك كده كتير. أنا هروح لبشمهندس آدم. رحيق كانت هترد بس ندى قالت: متزعليش منها بتهزر معاك.

رحيق غمزت لندى وقالت: هاتي كوباية العصير اللي عندك دي يا ندى. ندى بابتسامة خبيثة ادت الكوباية لرحيق ورحيق وقعتها على جيرمين. رحيق: معلش مخدتش بالي. جيرمين اتعصبت ووقفت وقالت: لأ انتي قصدك أنتي واحدة قليلة الذوق. رحيق وقفت قصاده: هيا مين دي؟ يابت دانتي شبه عروسة المولد. جيرمين اتعصبت من رحيق ورفعت إيديها عشان تضربها. بس آدم كان ماسكها. آدم فرك صوابعها في إيدها وتقريباً كسر دراعها كله.

آدم بهدوء مخيف: اللي رفعتي إيدك عليها دي تبقى رحيق البنهاوي. مش عايز أشوف خلقتك في القاهرة كلها. رحيق حضنت آدم وقالت: ما يحرمني منك يا أبو العيال. آدم: وانتي بطلي شقاوة شوية. رحيق ببرأة: أنا يا دومي. آدم: يعني أخودك ونمشي من الفرح ولا إيه؟ رحيق: لأ أنت هتروح عند الشباب وأنا وندى هنروح عند إيمان وآية. عند إيمان وآية. إيمان: بااااس رحيق جت. رحيق: في إيه؟ إيمان: آية متوترة أوي. آية بتريقة: ده على أساس إنك فريزر يعني.

إيمان: رحيق انجدينا. رحيق بخبث: هتسمعوا كلامي. ندى: بلاش نصايحك هتودي العيال في داهية. آية: لأ خليها تقولي. إيمان: قولي يا رحيق. رحيق بابتسامة خبيثة: اسمعوا. في البيت عند يوسف. يوسف: خلاص كده؟ آية: لأ لسه ركعتين كمان. يوسف: آية احنا صلينا لحد دلوقتي 8 ركعات وتقريباً ختمنا نص القرآن قرأة، أنا لو بتوب مش هعمل كده. آية: طب... طب هنقول الدعاء. يوسف: فكرة قلناه أربع مرات. آية: نقوله كمان مرة، يبقى خمسة عشان الحسد.

يوسف: حسد إيه؟ أنا مصدقت بقيتي مراتي وأخوك الرخم حل عن سمايا، ده أنا خايف أفتح الحمام ألاقيها موجودة. آية: آدم. يوسف بخضة وبص وراها: فين؟ كانت آية جريت من قدامه. يوسف: من أولها! وجري وراها. بعد خمس دقايق. يوسف بتعب: هو حد قالك إحنا في سباق؟ حرام عليك فرهدتيني وأنا لسه ما عملتش حاجة. آية: امسكني الأول. يوسف مسك قلبه وقال: آآآه. آية راحت عنده وقالت بقلق: مالك يا يوسف؟ يوسف بخبث: وقعتي ومحدش سما عليكي.

آية: كنت بتضحكي عليا؟ لأ، ده غش. يوسف: هو أنا في امتحان؟ تعالي، غلبتيني معاك. وشالها وقال: لازمتها إيه الفرهدة دي من الأول، ضيعنا وقت على الفاضي. زمان حمزة خارب الدنيا. آية بابتسامة: بتحبني يا چو؟ يوسف وهو بيحطها على السرير: بحبك، بس ده أنا بعشقك. آية: بحبك. "وانضم إلى سلسلة العشق عشق جديد." عند حمزة. حمزة: افهم بس، إنتِ واخداني على فين؟ إيمان كانت ماسكة إيده وبعدين خرجته برا وقفلت الأوضة. حمزة: إحنا فينا من كده؟

افتحي الباب. إيمان وهي بتغني: يا أبو ضبورة ونسر وكاب، إيمان بتقولك المعلمة مش محتاجة كتاب. حمزة: افتحي يا إيمي. إيمان: تصبح على خير يا بيبي. وخلعت الإسدال وفضلت بالبيجامة ونامت على السرير. إيمان وهي مغمضة عينيها: منحرمش منك يا رحيق. ولا أنحرم منك يا إيمي. إيمان فتحت عينيها لقت حمزة في وشها، كانت لسه هتصوت، وحمزة قام بتقبيلها وهي استجابت معه. "سلسلة العشق طويلة ولا أظن أنها سوف تنتهي هنا." بعد 5 شهور.

الكل كان قاعد على السفرة في الجنينة، والجد كان قاعد على راس السفرة وقصاده فوزي. الجد: كل سنة وإنتو طيبين ورمضان كريم علينا جميعًا. كلهم ردوا عليه: وإنت طيب وبخير يا حج. من جنب الجد كان قاعد آدم، كان شايل سيف ورحيق جنبه، وجنبها ندى وعمر، وبعدين حمزة وإيمان وآية ويوسف، وقصادهم من الناحية التانية أم إيمان وفاطمة وحسن ومصطفى وسنية وشهد وإبراهيم ووردة، وبعديها نعمة.

آدم: كل سنة وإنتو طيبين، كنت عايز أقول إن رحيق ختمت القرآن حفظ للمرة الثانية. الكل باركلها. يوسف: وأنا كمان عندي خبر حلو. آية: الحمد لله، بعد 5 شهور جواز أنا حامل في الشهر التاني. الكل فرح وباركلها. الجد بابتسامة: وإنتي يا إيمان؟ حمزة: في الخامس يا جدي. آدم: لأ جامد يلا. إيمان اتكسفت وحمزة قال: إحنا مش بنهزر يا ابني. الجد بابتسامة: حبيت أول يوم في رمضان نتجمع ونفطر سوا. مصطفى: ربنا يبارك في عمرك يا حج.

الكل كان مبسوط وفرحان، بس حصل حاجة محدش كان متوقعها، أنا نفسي ما كنتش متوقعاها. ... لسه الحكاية مخلصتش... الأحداث هتفضل سعيدة كده ولا الرواية ليها رأي تاني؟ إيه ممكن يحصل تاني يشقلب كل الأحداث؟ وإيه الحاجة اللي حصلت محدش كان متوقعها؟ طبعًا، إنتو قلتوا ده البارت الأخير، بس أحب أطمنكم لسه بدري، اللي جاي أحلى.