رواية الماضي الاسود الفصل الثالث عشر 13 - بقلم ايمان

مكملة: فالليلة اللي خد فيها سليم مراته وابنه وساب البيت، جدتك بعتت جابتني. : في إيه يا حاجة؟ بعتي الغفير بتاعكم يجبني على ملي وشي ليه؟ : البت السهتانة قوت قلب ابني عليا وخلته يسبني ويمشي. قال إيه هيعيشوا لوحدهم. : بت مين ويعيشوا لوحدهم إيه؟ هي إيه الحكاية؟ : سليم خد بيت يعيش فيه هو ومراته لوحدهم. بت يا الطاف، أنا عارفة إن عينيكِ على سليم. : إني لأ، لأ.

: ما تكدبيش، أنا عارفة. ولو ساعدتيني، هخليكي تنولي مرادك وسليم يكون من نصيبك. : أساعدك؟ أساعدك إزاي؟ : وفين البت اللي معاه دي لازم يطلقها. : معقول دا بيموت فيها موت؟ ولا ممكن يسبها؟ : أنا بقى هخليه يسبها. : طب إزاي؟ : إحنا هنشككه فيها. هي مش البت دي كان حسين ابن عمها عينه منها؟ : أيوه، بس حسين خلاص اتجوز عديلة بنت خاله. : وعامل إيه يا بت في جوازه؟ مبسوط؟

: لا هو مبسوط ولا حتى عديلة اللي كان يقلع لها عين ويبصلها، بس مش يتجوزها كده مرة واحدة. ليه يا بت يا حسين؟ أصل هو مكنش عاوز يتجوز خالص بعد ما بنت عمه اتجوزت غيره. ومفكرش يتجوز إلا لما لقاها مبسوطة مع جوزها وخلفت منه كمان. فـتجوز عديلة كده زي ما بيقولوا سد خانة وبس. دي بتقول لي إنه لحد النهارده أوقات بيغلط في اسمها ويندهها باسم بنت عمه. لما نفسها هتغمض عنيها وتفتحها تلقاها اختفت من على وش الأرض.

: يعني إنتي اللي مش عاوزة كده يا الطاف بعد ما سابك سليم وتجوز صحبت عمرك؟ : معرفش فيها إيه زيادة عننا عشان الرجالة تموت روحها عليها ومش واخدين بالهم منا خالص. : أنا بقى هخليهم ياخدوا بالهم منكم. بقولك إيه، روحي هاتِ عديلة وتعالي. : أجيبها ليه؟ : لما تيجي هتعرفي كل حاجة. : طب ولو جوزها ما رضيش يخرجها؟ : معرفش، اتصرفي وهاتيها. : ولا صحيح، دا النهاردة جوزها مسافر يجيب بضاعة للمحل بتاعه. : طب يلا روحي هاتيها بسرعة.

: مساء الخير يا حاجة. الطاف قالت لي إنك عاوزاني. : تعالي يا عديلة اقعدي. : اديني قعدت. إيه بقى الموضوع؟ : الموضوع إن إحنا التلاتة متفقين على حاجة واحدة، وهي إن بنت عم جوزك تختفي من على وش الأرض. : يالهوي! إنتوا هـتـقـتـلـوهـا؟ : قتل إيه؟ مين جاب سيرة القتل؟ إحنا مش هنـقـتـل. إحنا هنعمل فيها اللي أشد مرة. : ما تفهموني إيه الحكاية؟ هو في إيه يا الطاف؟ : أنا زيي زيك مش عارفة حاجة.

: هفهمكم. إحنا هـنشكك سليم إن في علاقة بين مراته وحسين، يقوم يطلقها. : أه، هو يطلقها ويرجع لك، وهي ترجع دار عمها قصاد جوزي تاني؟ وتاخده مني؟ : دا مش هيحصل، ولا هتقدر تهوب ناحية جوزك بعد الفضيحة اللي هنعملها لها. عشان ما تثبتش التهمة عليها، دا مش بعيد تسيب البلد وتطفش وتبقى ريحت الكل. : طب أنا إيه المطلوب مني دلوقتي؟ : هقولك. هو مش جوزك بيسافر مرة كل أسبوع يجيب بضاعة للمحل بتاعه؟ : أيوه.

: خلاص. إنتي تقولي هو هيسافر إمتى الأسبوع الجاي. : اه. وبعدين؟ : سليم كل يوم بيروح يسهر في الـ... إيه اسمه ده؟ النادي الثقافي اللي عملوه جديد في البلد. بعد ما يخرج، هو والطاف يروحوا على إنها بتزور صحبتها. وهي بتشرب معاها الشاي أو أي حاجة تخليها تقوم بأي شكل. وتقوم حاطة لها منوم في كوبايتها. : منوم إيه؟ وحـأ'جيبه منين؟ : أنا اللي هـدهولك من عندي. بعد لما تنام، تدخليها أوضتها وتنيميها في سريرها.

: لا، بس استنوا، ناقصنا حاجة. : ناقصنا إيه؟ : عاوزين راجل يشبه حسين من ضهره. : يشبه حسين ليه؟ : أومال هنشكك سليم إزاي؟ : طب هو الراجل ده هيعمل إيه بس؟ أنا مش فاهمة. : بعد ما تنيميها في سريرها، حـتـفـتـحـي للراجل ده وتدخليه. وأول ما يحس بسليم داخل البيت، يجري ينط من شباك أوضة النوم وكأنه كان معاها. بس لازم الراجل ده يكون سريع جداً عشان ما يلحقش سليم يمسكه ويتعرف عليه. وعديلة كمان تجيب لنا جلابية من بتوع جوزها.

: دي حكاية كبيرة أوي وأنا أخاف على جوزي. : بجد خطة جهنمية وما تخرش الميه. وإن كان على اللي يشبه حسين من ضهره، عندي. : عندي؟ بجد؟ طب مين؟ : الواد عوضين جارنا. وهو أبوه وأمه قرش. لو حطينا فايدة أي فلوس، حيعملنا كل اللي إحنا عاوزينه. دا غير إنه سريع زي الطيارة. : كده يبقى كله تمام.