رواية المهندسة نور الفصل الرابع 4 - بقلم وفاء الغرباوي

كانت تستاهل؟ كرر محمود السؤال مرتين منتظر الإجابة، ابتسم صلاح وهز رأسه بالنفي: مش هريحك بالإجابة يا محمود. وقف محمود قدامه، ومسكه من كتفه: لأ رد وقول، كانت تستاهل إنك تسيب أبوك وأمك عشانها؟ قولي! كانت تستاهل إنك تضحي بآخر سنة في كلية الهندسة وتتخرج وتبقى مهندس وتفرح أبوك وأمك اللي كان نفسهم في اليوم ده وبينتظروه بفارغ الصبر؟ رد يا صلاح. رد يا صاحبي. أو يا اللي كنت صاحبي وابن عمتي. نزل صلاح بهدوء إيد محمود:

لأ خليها عليا أنا اللي المفروض أقول كنت صاحبي. وأخويا.. ما كانش ليا إخوات من الأب والأم بس بقيت أخويا.. عايشين سوا. أنا فاكر إنهم كانوا بيحبوك أكتر مني، من يوم وفاة أبوك وأمك وجيت عشت معانا، عمرهم ما فرقوا بينا في المعاملة، حتى لو جم عليا مش بزعل، كنت بتسمع كلامهم وأنا اللي كنت تعبهم. وعمري ما اتضايقت لما كانوا بياخدوك في حضنها لأننا كنا إيد واحدة. كنت أنا عايش حياتي بالطول والعرض وأنت كنت الطبيب اللي جاي على هواهم.

كنا واحد أنا وأنت لغاية من 25 سنة بالظبط. كلمتك عندهم كانت سيف وقطعوا بيه رقبتي وقطعوني منهم.. وقتها بدأت أشك إنك كنت قاصد. فاكر يا.... يا... صاحبي؟ فاكر يا.... يا خويا؟ ومشى صلاح وساب محمود واقف مكانه. يا ترى فعلًا هو اللي غلطان في حق صاحبه وضيع العمر من غيره.. وإنه كان قاصد كده؟ لأ لأ هو عمره ما كان وحش. وجرى وراه: استنى يا صلاح قولي عنوانك فين عايزين نتكلم، نتعاتب. لف صلاح وضحك باستهزاء:

زي ما عرفت إنها بنت الساعي. وجاي وعارف إنها بنتي وجاي تتأكد من حاجة في دماغك أنا عارفها كويس يا ابن عمتي. هتعرف توصل لي تاني. لسه نور بتضرب في زغلولة لحد ما الراجل زهق وقال لهم: يا رب تخلصوا على بعض وأهو نخلص منكم.. أنا ماشي. ردت نور بكل غل عليه: خلصت روحك يا بعيد، أنت مالك.. غور حد قال لك تقف. وكملت زغلولة: اللهي تورماي تايه عن طريقه، يلوشك يا بعيد. روح لحالك. ضحك وقال لها: الطورماي عمره ما بيتوه عن طريقه يا بعيدة.

ضحكت نور قوي وقالت لها: صدقي معاه حق، حتى دعوتك مش نافعة. زعقت زغلول في الراجل: ما تفارقنا يا جدع أنت يابااااي عليك سخيل. تصدقي إني غلطان إني بحوش عنك. وشاور بإيده على نور وقال لها وهو ماشي: خلصي عليها، دي تستاهل قطع لسانها. ووقف تاني: تحبي أساعدك ونرميها في النيل وما حدش ياخد خبر. زغلول وهي رافعة إيديها للسماء: اللهي يقطعوا خبرك من الدنيا كلها قادر يا كريم. يا.... اللي صحيح اسم الكريم إيه؟

عشان الدعوة بس تجوز، مش كل مرة هتروح كده. ضربتها نور في كتفها: هو أنت بتتسايري معاه، اكتمي شوية. منك لله يا زغلول يومي بيضرب بسببك وأنا كنت جاية هربانة من الدنيا بس باين طلع كابوس. وسكتت شوية: هو أنا كنت فين من شوية؟ ردت عليها زغلول وهي حاطة إيدها على رأس نور: نور أنت كويسة مالك.. أنت سخنة؟ أنت مش كنت في الشغل وأنا كنت هفوت عليكي عشان نخرج؟ ضحك الراجل بصوت عالي: يعني أنت اسمك نور مش بكيزة؟

بصراحة أسماء مش لايقة على بعضها خالص. نور وهي مربعة إيديها ووقفت قدام زغلول: تصدق أنا مش هخلي حتة فيك على بعضها. اتكل على الله يا اسمك إيه عشان ما خليش أكبر حتة في كرامتك قد الربع جنيه. اسمي كريم محمود. تحبي الاسم ثلاثي ولا كده كفاية؟ ولما تتكلمي اتكلمي على قدك يا بكيزة. قبل ما نور ترد تليفونها رن ودي الرنة المميزة لباباها. مسكت الفون وما ردتش تفتح عملته صامت ووقفت سرحانة ونسيت الراجل أصلًا وصاحبتها..

لحد ما زغلول قالت لها: نور ردي على باباك.. بيتصل تاني في إيه؟ باين ما كانش كابوس يا ياسمين دي حقيقة.. كويس إني شفتك. ياسمين مين دي؟ قالها كريم باستغراب. ردت نور وهي بتشاور على زغلول: دي ياسمين... وبعدين أنت مالك.. أنت لسه هنا؟ أقول لك احنا هنسيبك لك المكان كله ونمشي. مسكت نور إيد ياسمين ومشيوا فعلًا. زغلول. نادى بيها كريم وهما ماشيين بس ما وقفوش: مش هتقولي ليه مسمياكي زغلول؟

بس ياسمين لايق عليكي أكتر إنما هي بكيزة عليها أحلى. مشيوا البنات وما ردوش عليه. نور كانت مركزة في تليفونها وياسمين قلقانة على نور. أول مرة تشوفها كده. وكريم نفسه يعرف إيه حكايتهم. ****** وصل صلاح البيت وبدأ يرن على نور لكن مش بترد عليه، وقف قدام صورة لواحدة ست بس الصورة دي قديمة بقى لها 15 سنة: أعمل إيه يا نور.. محمود جاي بعد العمر بيقولي تستاهل إنك تسيبنا علشانها. وما يعرفش إنه كان السبب في ده كله ولولا اللي عمله.

ما كانش حاجة حصلت من أصله. يااااه يا نور رغم إن العمر فات بس. كان وحشني محمود وأبويا وأمي. وكان لسه سايبه إمبارح. واتنهد بصوت. أيوه يا نور كنت تستاهلي إني أسيب الدنيا كلها عشانك وعمري ما ندمت على كده. بس كان لازم أحاول أودهم وأسأل عليهم ويعرفوا. مش بأسأل من بعيد لبعيد وأحمد يجيب لي أخبارهم. بس خفت من لومهم ليا في كل مرة. وإني أسمع كلمة عنك وأنت ما لكيش ذنب في أي حاجة. غير إن كنت في حالك. تعاااالي يا نور أنا محتاج لك.