رواية الملتزمة الصغيرة الفصل الحادي والثلاثون 31 - بقلم سمر ابراهيم

خالد: إيه القرف ده؟ قدامك عشر دقايق تكوني قلعتي القرف ده، مفيش شعرة تظهر منك قدام حد، فاهمة؟ فرح: هي تفرق معاك يعني؟ خالد: طبعاً تفرق، أنتي مراتي يا فرح. فرح: مراتك اللي قبضت تمن شرفها، صح؟ خالد: الكلمة وجعتها أوي. من غير رغي كتير، يلا من قدامي غيري وإلا مفيش فرح، وأخدك كدا على البيت. فرح: وأنا مش عايزة فرح. مش عايزة أشوف عيون الناس ونظرة الاتهام من عيلتي، مش قادرة أتحملها يا خالد.

خالد: فرح، بطلي تشيلي هم كدا. ابتسمي وسيبي الأمور تمشي من غير تفكير، وعد، أنا مش ممكن أعمل ليكي حاجة. فرح: وهو في أكتر من اللي عملته؟ ممكن تريحني وتقولي عملت ليه كدا؟ ومين اللي قالك تعمل كدا؟ والتمن بتاعي كان كام يا خالد؟ أنا حاسة نفسي رخيصة أوي، مش قادرة أشوف نظرات الناس ليا، حرام عليك. خالد: حاضر، اليوم ده يعدي على خير وأحكيلك كل حاجة. بس غيري لبسك ده، وأنتي مش رخيصة يا فرح، أنتي مراتي وتاج راسي، غصب عن أي حد.

فرح: طيب، لحظة أختار فستان غير ده. خالد: ماشي، ادخلي يلا، وأنا جاي معاكي. *** تفاؤل: إيه رأيك؟ فهد: قمر في كل الحالات، أنتي أميرتي يا توتو. تفاؤل: طيب، هو خالد وفرح مش جايين معانا ولا إيه؟ فهد: لا، أويس جاي ليهم هو ومصطفى. يلا أنتي معايا، المصور تحت منتظرنا، وفي مصورة ست زي ما أميرتي طلبت عشان تاخدي راحتك من غير النقاب. تفاؤل: مش حابب أشوف فرح باللبس الأبيض. فهد بحزن: لا، يلا بينا يا تفاؤل.

تفاؤل: كانت منتظراك أنت أو أسد تجوا تاخدوها، مش أويس. فهد: قولت يلا، مش عايزك تزعلي مني في يوم زي ده. تفاؤل: حاضر، آسفة. *** نفس (تكلم نفسها) : شفتي يا بت يا نفس، آخرك. كل واحدة أول ما شافت عريسها سابتني هنا ومشيت. على رأي المثل: العروسة للعريس والجرية للمتاعيس. إيه الهبل ده؟ 🤨 أنا بكلم نفسي، لا وكمان بشرح لنفسي إني بكلم نفسي وبقول أمثال. فتاة: احم، ممكن يا مدام تاخدي الهدوم بتاعت العروستين اللي جم بيهم؟

أنتي معاهم صح؟ نفس: 😲 مدام؟ أنا مدام؟ وبالنسبة للفيونكة دي مش موضحة إني آنسة شيك. ولو مدام ليه؟ ها ليه؟ شايفاني بجر في تلت عيال وأبوهم كل تلت دقايق يتصل يسألني على مكان فردة الشراب السودة. ماااا علينا من كل ده، من صبحية ربنا وأنا أصوت وأغني: عايزة أتجوز، عايزة أتجوز، بس المهر غالي، هي تطلب وأمها تطلب، وأنا على قد حالي. كل ده وفي الآخر تقولي ليا مدام؟ آآآه قلبي. 💔

الفتاة: آسفة وربنا، مقصدش. هي طلعت مني كدا. ده أنتي زي القمر، ما شاء الله عليكي. نفس: بعد إيه؟ خلاص اللي راح راح. وصوتي يا انشراح. الفتاة (تأكل لباناً) : إيه الأوفر ده؟ ما خلاص يا أوختشي، جرى إيه لكل ده؟ الله، بنات آخر زمن. نفس: احم، لا آسفة. أنا بس لقيتها جابت تفاعل، سوقت فيها، وسعت مني، مش عرفت ألمها. لا مؤاخذة يا قطة. الفتاة: حصل خير. شيلي بقى الهدوم بتاعتكم. العروسة التانية قربت تمشي، المصور منتظرها تحت.

نفس خدت شنطتين هدوم بتاعت تفاؤل وفرح، ونزلت. المصور وصحاب البيوتي وأويس واقفين بالكاميرا منتظرين العروسة تنزل. متصلين بخالد، موجهين الكاميرا على السلالم، والكل مستعد. خالد: بسرعة يا فرح، المصور منتظر عند السلم. نفس كان شكلها يضحك وهي شايلة كيس على الكتف ده وكيس على ده،

وبتغني: "هدوم قديمة للبيع، قرب قرب، مين يشتري". وأنصدمت لما شافت الكاميرا متوجهة ليها، وأويس بيضحك على شكلها. ونفس أول ما شافت الكاميرا متوجهة ليها، رمت الشنطتين على الأرض بسرعة بطريقة مضحكة، وعملت نفسها مش واخدة بالها من الكاميرا، ومسكت طرف فستانها برقة، ونزلت تتمختر على السلم كأنها أميرة بفستانها النبيتي الواسع زي البحر، عليه خمار ونقاب وحزام وجزمة كعب عالي، كلهم باللون الأسود. وصلت نهاية السلم، ووقفت قدام الكاميرا.

فرح نزلت هي وخالد، بس الكاميرا على نفس مش راضية تتحرك، خصوصاً إن المصور مركز معاها أوي. أويس: وسعي يا نفس، العروسة جات. نفس: اسكت أنت. وأنت يا عم الحج، صورني وركز على الجزمة دي بميتين جنيه. ليه يا بلد؟ تكونش جزمة سندريلا اللي هتجيب العريس وأنا معرفش. ما علينا، وصور. المصور: ده فيديو مش صور على فكرة يا آنسة، يعني الكلام ده طلع في الفيديو.

نفس: عادي. ركز أنت الكاميرا معايا طول الفرح، وأنا أسرق من النقطة خمسين وأديهم ليك. أي خدمة، أكمني أنا أخت العريس وصاحبة العروسة وصاحبة العروسة التانية، متربيين سوا في بيت واحد. ومعانا العريس التاني بس الحق، فهد ده زي أخويا وأكتر، أكمن يعني خالد أخويا ندل شوية، مش زي فهد. أويس: احكي ليهم عن شبشبك اللي اتقطع وإنتي صغيرة وصلحتيه بمسمار، ومش فضل بعد ما صلحتيه غير شهر واحد بس. نفس: يووه، ليه كدا؟

قلبت عليا المواجع. بس الندل مش بيتقطع وخلاص، لا ده علم عليا. نزلت دم قااااد كدا. هو يومها. أويس شدها لما شاف نظرات الإعجاب من المصور ومركز الكاميرا معاها، وهي بتحكي بعفوية لأنها في الأفراح من السعادة بتتجنن وتعمل تصرفات كتير غلط من غير ما تحس على نفسها. أويس: العروسة ليها ساعة واقفة على السلم. ركز معاها هي يا محترم. نفس بعدت شوية، بأحراج أنه مسك إيدها، وطلعت بره. ركبت عربيته من ورا وهي مضايقة من تصرفه.

فرح لبست فستان محتشم عن اللي فات، وحجاب أبيض وتاج. كانت مخبياهم من قبل لأنها منتظرة خالد يرفض لبسها ده. نزلت هي وخالد، وبعد صور كتير خرجت. كانت نفس وأويس منتظرينهم في العربية. أويس: نفس، اركبي قدام وخليهم هما ورا. فرح لمحت لنفس إنها خايفة تركب جنبه، وخالد لاحظ وسكت، احترم خوفها. نفس: لا، عيب كدا. أنا لازم أكون أخت جوز شاطرة كدا، مش أي كلام. ومش قاعدة غير وسطهم. اركبي يا فرح جمب الشباك، أي خدمة.

فرح: احم، شكراً يا نفس. نفس ركبت وفضلت تغني وترد على نفسها: "أفرح يا عفش الأوضة جايك عروسة موضة، أفرح يا عفش المندرة جايك عروسة منورة. يا خالد يا نوارة، يا كليب دايب في الحارة. يا خالد يا دالع، خليت الشارع ولع." أويس: اسكتي، صوتك معفن. نفس: ملكش فيه. وهيصة وهيصة وهيصة هيصة. عند العريس نأكل ونهيص، عند العروسة نأكل بسبوسة. وقربت من ودن أويس أوي ولولولولولولولولولولولولولولولولولولولوي.

أويس: اسكتي يا مجنونة، الناس بتضحك عليكي. شايفة العروسة ساكتة وكيوت وإزاي قمر؟ مبروك يا بنت عمي. خالد: كيوت إيه يا أخ؟ ما تحترم. نفس قال قمر قال. أويس: فرح بنت عمي، وأقول عليها قمر براحتي، إن كان عاجبك. خالد كان لسه بيتكلم، قطعته نفس: وربنا ما في قمر غير أمك. حتت سكرة كدا طول الفرح، لا ليها في التور ولا العجينة. مش تفاؤل دي بنتها؟

المفروض يعني تفرح كدا. بس هي ومريم عاملين وضع الصامت. مش عارفة أنا ستات العيلة دي مش طالعين شاطرين كدا زيي ليه؟ يوه، ساووها عليا، أنا في شطارتي مفيش مني اتنين. قدرت تغير الموضع بدل الخناقة، مع إنها كانت مضايقة من كلام أويس عن فرح. خالد: نفس، أنا صدعت. بطلي رغي. نفس: جرى إيه يا خويا؟ مش أحسن من مراتك اللي بلعت لسانها دي؟ شكل عروسة؟ أنا فرحانة أكتر منها. خالد بص لفرح اللي راسها على الشباك ومش معاهم خالص.

نفس: خالد، أنت دعيت حد من عيلة بابا وماما؟ نفسي أشوف حد منهم. خالد: أيوه، خالي ومرات خاله وابنهم فارس والبت علياء ومريم وأم كريم جارتنا، وعمك مروان مسافر، جه ابنه نور. نفس: وأخيراً نور حبيبي جه. في اللحظة دي أويس وقف العربية مرة واحدة. فرح راسها جات في قزاز الشباك. فرح: آآآه! إيه؟ فيه إيه؟ خالد بقلق: أنتي كويسة؟ سلامتك يا فرح. مش تحاسب يا عم أنت. نفس: مش تفتح يا عم!

أنا غلطانة لو جبت عربيتي كنت لفيت بالعروسة مصر كلها بدل ما أنت مش عارف تسوق كدا. أويس: مين نور ده؟ وإيه جابه الفرح إن شاء الله؟ نفس: نور ابن عمي، وجاي يأكل ويمشي ويشقط لو في الفرح حد حلو يعني. بس ما أظنش في حد حلو غيري، أنا قمر. أويس: نفس، جرى إيه لدماغك؟ ما تفوقي كدا. أنتي انهبلتي على كبر ولا إيه؟ نفس، ركزي على كلامك، وكله كوم، هزارك مع المصور كوم تاني خالص.

نفس: لا يا أويس بيه، أنا كنت محترمة قبل ما حضرتك تعلمني أصول الاحترام. وأخرهم بالليل، متنساش نفسك وتصرفاتك معايا هي اللي خلتني كدا، على فكرة. أويس: وصلنا. نفس، أنتي خليكي، عايزك في موضوع. خالد: قدامي يا نفس، وودعي الأخ النهاردة آخر يوم تشوفيه. أويس 🤨: قصدك إيه؟ نفس وخالد وفرح نزلوا، وأويس فضل مكانه. برغم إنها مبسوطة، بس عيونها فيها نظرة حزن ودموع محبوسة،

وهي بتقول: "علمتها أصول الاحترام". يعني زعلانة لأنه شافها زعلانة؟ لأنه قرب؟ طيب لو ده مزعلها؟ يعترف ليها؟ يقولها إنها حلاله، وإن ده من حقه، حقه هو وبس، مش نور ومين نور ده كمان؟ هو ناقص يكون ليه عدو يحاربه؟ مش كفاية بيحارب عند نفس وقراراتها الغبية. أما نفس دخلت. شافت بنت لابسة فستان زهري من تحت ومن فوق أصفر، يشبه فستان فلة، وعليه خمار رقيق زهري. نفس: نوووووور! وحشتني يا راجل. نور: راجل في عينك!

ده أنا أجمل منك يا شوال الفحم. نفس: سيبك من النفسنة اللي بينا وتعالي أقولك سر. نور: قولي. نفس: فيه أكل ببلاش وكنز وجاتو وشوية بنات، إنما إيه؟ يخوا العقل. نور: بجد؟ بتعرفي بنات من غيري؟ خيانة! آآه قلبي. 💔 نفس: استنى بس أفهمك يا نور. نور: مش عايز أفهم. أنتي طالق، طالق، طالق. 😤 نفس: هونت عليك؟ طيب وعيالك السبعة؟ أجيب ليهم أكل وشرب وعلاج وبامبرز منين؟

نور: يااااه يا بت وحشتني. وحشني التمثيل الفاشل بتاعنا. ليا كدا تلت سنين مش شفنا بعض. نفس: مش أنتي ندلة ومن أول ما سافرتي إسكندرية نسيتي أصلك وبت عمك لحمك ودمك؟ نور: خلاص، طول ما الحق عليا، بلاش عتاب بقى. اليوم ده مش عادي. ده فيه أكل ببلاش. نفس: هههههه، تعالي أعرفك على صحباتي وصحبات صحباتي وجيران صحبات صحباتي و... نور: بس والله ما أنتي مكملة. تعالي.

سالي والبنات جم عليهم. والفرح بدأ. البنات في نص الجنينة ده، والشباب في النص التاني. العروسين على الكوشة والمعازيم بتبارك ليهم، والأغاني الإسلامية شغالة. والمعازيم كل واحد بيحكي في موضوع مختلف. عند نفس والبنات قاعدين مع بعض: نفس ونور وسالي وتقى ونور بنت خالة أويس ونسرين وشوية بنات تاني من الجيران وصحبات نفس. نفس: بت، أول ما الجاتو ينزل نعمل نفسنا بنات ناس قدام الجارسون. سالي: قصدك إيه؟

لا طبعاً، أحنا وجهة مشرفة الأفراح الراقية دي. ده نص المعازيم رجال أعمال وباش مهندسين ودكاترة مشهورين في البلد. نفس: وأنتي إيه عرفك؟ ها؟ اعترفي، لتكوني شوفتي الأخ. سالي: ها؟ لا طبعاً. أشوفه فين يعني؟ نفس: امممم، نشوف الموضوع ده بعدين. المهم، الجو ده مش عاجبني. تقى: تفتكري فرح ممكن تكمل مع خالد؟ ده فرح شخصيتها قوية وأسد كمان.

نفس: بصي يا حبيبتي، البنات أنواع. تعرفيها من البكاء. البت القوية تنسحب وتبكي بعيد عن الكل. والبت الضعيفة تبكي على كل حاجة عمال على بطال. والبت الذكية تستخدم دموعها في الوقت المناسب، في المكان المناسب، وبكمية مناسبة، زي تفاؤل كدا. نور: وأنتي إيه شخصيتك؟ سالي: لا، دي عانس. نفس: بس ي بت!

تاني حاجة، البت القوية مش بتفرح لكل حاجة، أو مش بتظهر مشاعرها بسهولة. مثلاً، لو قال ليها الفستان ده حلو، تقوله شكراً. أما الضعيفة بجد، ده أنا اشتريته من المول الفلاني بالسعر العلني. ما علينا، أحنا نقوم نبارك للعروسة. سالي: اشطا، يلا بينا. تقى: لحظة، مش قادرة أتحرك بالواد اللي في بطني ده. منك لله يا أسد. عند تفاؤل. فهد: بطلي هبل. مش أنتي قولتي نعمله في الجنينة؟ لو اتحركتي من هنا إيه يعني؟

تفاؤل: مش شايف نفس فرحانة وبتضحك؟ أنا عايزة أروح عندها. هنا ملل. حفظت الكلمات: أهلاً وسهلاً، الله يبارك فيك، الله يبارك فيكي، تسلمي يا مدام. معلش يا فندم، المدام مش بتسلم بغير عليها. هههه 😁 وفي الآخر ضحكة صفرة. فهد: نفس جاتك هي والشلة بتاعته. تفاؤل: وأخيراً. نفس: أنا جيت، نورت البيت. طفي الجاز يا واد. حبة زغريت. تفاؤل: لولولولولولولولولوى. نفس: يـ هبلة، في عروسة تزغرط؟ ها؟ يا فهد، لبسها الشبكة.

فهد: امممم، فرح ممكن تزعل، خلي الشبكة بعدين. نفس مشيت راحت أوضتها هي وسالي. فضلت تدور في دولابها، جابت الطقم اللي لقيته في الهدايا اللي على السرير، كان سلسلة وخاتمين وغوشتين، أدتهم لخالد. خالد: إيه ده؟ نفس: شبكة فرح. يلا لبسها ليها زي البنات. خالد: بس... نفس: أنجز يلا. لولولولولولولولولوى. أويس قرب من نفس وهي بتتفرج على الشبكة: تعالي يا نفس، عايزك. نفس: لا، قولت لا يا أويس. ممكن تبعد؟ الناس عيونها علينا. احترم نفسك.

أويس: كويس، خليهم يعرفوا إنك بتاعتي أنا وبس. نفس: شكلك نسيت القلم يـ أويس. عامر: احم، فيه إيه يا نفس؟ نفس بدموع: عمو، أبعد عني ابنك. أنا... حرام عليك بقى. حل عني، أنا بكرهك. عامر: فيه إيه يا أويس؟ مزعلها ليه؟ أويس: أنا بسأل: جابت الدهب ده من فين؟ يعني مش بتاعها. نفس 🤨: مش أنت جبته ليا يوم عيد ميلادي؟ أويس: لا، أنا جبت ليكي العربية والطقم التاني. نفس: يعني كان فيه حد؟

أنا لقيت الطقم ده على السرير. 🥺 أنا خايفة، فيه حد مرقبني. أويس: بطلي خوف، أنا معاكي. عامر: ما تاخدها بالحضن وأنا واقف. فيه إيه يا أويس؟ نفس: احم، عن إذنكم. *** سالي: عايز إيه يا مصطفى؟ مصطفى: ناوية ترجعي إمتى؟ سالي: مفيش رجوع يا مصطفى. أحنا خلاص موضوعنا انتهى. مصطفى: اسمعي بقى، أنتي مراتي، سوء برضاكي أو غصب عنك، ماشي؟ سالي شافته تعبان، سكتت. مصطفى: سالي، أنا آسف. أنا محتاجك جنبي. قبل ما أموت تكوني معايا.

سالي: بعد الشر عليك يا مصطفى. النهاردة فرح، بلاش زعل. إن شاء الله خير. يلا نرجع للفرح. مصطفى: يعني ده وعد إنك ترجعي قريب؟ سالي ابتسمت ومشيت. *** الفرح خلص والمعازيم معظمهم مشيوا. نفس واقفة بتضحك مع البنات. جات ناحيتها مرات خالها اللي مركزة معاها من أول الفرح. نفس: أهلاً وسهلاً يا فوزية. أخبارك؟ فوزية: يـ بت عيب، ده أنا قد أمك. نفس: مين ضحك عليكي وقالك كدا؟ ده أنتي أصغر مني. شايفة الناس اللي هناك دي؟

تلقيهم بيقولوا علينا: هما دول أخوات. فوزية: هههههه. اضحكي عليا وكلي بعقلي. حلوة. المهم، شفتي فارس ابني؟ اهو عايز يسلم عليكي ومكسوف. تعالي يا فارس، دي نفس بنت خالك. أويس انتبه ليهم وراح ناحيتهم. فارس: عاملة إيه يا نفس؟ نفس: الحمد لله بخير. فارس: مش تقولي حتى، أنت عامل إيه؟ نفس: مفيش داعي للسؤال، طول ما الإجابة معروفة. تمام، الحمد لله. فارس: هههههههههههههههههه. دمك خفيف. نفس (بتفكير) : أبو تقل دمك يا شيخ. طيب عن إذنكم.

فوزية: والله ما حصل. ده أحنا ما صدقنا ضيوفك مشيوا عشان نتكلم معاكي. نفس: خير يا مرات خالي؟ فوزية: فارس ابني طالب إيدك. قولتي؟ نفس: قولـ...... أويس: قالت لا، مش موافقة. نفس: وأنت مالك بيا؟ أويس: 🤨 قصدك إيه؟ نفس: براحتي أوافق أرفض. أنت المتحدث الرسمي بتاعي. أويس: على أوضتك يا نفس. لو شفت وشك هنا تاني، هعمل حاجة مش هتعجبك. نفس: آخرك فاضي. فوزية: وعاملة نفسك محترمة ولبسة نقاب، وأنتي بتلعبي على كل واحد شوية.

نفس: طيب يلا يا حبيبتي، خدي ابنك في إيدك. سكة السلامة. أويس: عدي كام غلطة. نفس: ماشية وسيباها ليك. مخضرة يا أويس؟ افرح بيها. بعد ما الكل مشي، نفس طلعت أوضتها بتعب، بس صدمها كلام فرح. فرح: طبعاً كلكم فاكرين إني أنا الغلطانة، ونفس حبيبت قلبكم، صح؟ بس هي زيها زيي، وهي اللي خططت لكل ده. مريم: قصدك إيه؟

فرح: نفس هي اللي دخلت أخوها الفيلا بحجة إنه ياخدها للدكتور، وهي اللي أدته صور ليا يهددني بيها ويغصبني على الجواز، وأنا وافقت حفاظاً على العيلة. الجد: أنتي كدابة! نفس مستحيل تعمل كدا. وإذا كان صح، تعمل كدا ليه؟ فرح: عايزة تخلص مني زي ما أنا أذيتها زمان وبتنتقم مني، وكمان عايزة الجو يخلي ليها مع أويس. أحمد: اطلعي بره يا فرح، مش عايزين نشوف وشك تاني.

فرح: طيب اسمعوا التسجيل ده الأول. يا بابا. وفتحت تلفونها، وكان تسجيل لنفس وهي بتكلم خالد. نفس: ها يا خالد، قولت إيه؟ خالد: أنتي عايزة إيه؟ نفس: تتجوز فرح. خالد: ممكن ترفض؟ نفس: غصب عنها توافق. خالد: طيب، بكرة أجي أتقدم ليها. نفس: لا طبعاً، تتقدم إيه؟ أكيد عمو أحمد يرفضك. أنت تاخدها عند المأذون وتحط العيلة كلها تحت الأمر الواقع. خالد: ممكن يقتلونا لو عملت كدا.

نفس: لا، هما آخرهم يجوزكم عشان يخبوا الموضوع. أهم حاجة شرف العيلة، لو خبر زي ده اتعرف، الشركة تقع واسم العيلة يدمر. خالد: يعني أنتي متأكدة إننا في أمان؟ نفس: سيب الموضوع ده عليا. المهم، بكرة تجيب المأذون، وسيب جبة فرح عليا. خالد: ماشي، موافق يا نفس. وقفل الخط. فرح: سامع يا جدو؟ حبيبت القلب طلعت إيه؟ الجد: نفس، أنتي قولتي كدا فعلاً؟ الكلام ده صح؟ نفس سكتت. أحمد: اتكلمي يا بت! أنتي يعني أنتي اللي عملتي كدا؟

أويس: براحة يا عمو. نفس أكيد فيه سبب خلاها تقول كدا. بعدين بنتك مش ملاك. عامر: أويس، اطلع فوق. مش عايز أشوف وشك هنا. بتدافع عنها ليه؟ أويس: يعني إيه؟ أنتم مصدقين الكلام ده؟ عامر: بتكسر كلامي؟ قولتلك اطلع فوق. أويس: ماشي، طالع. بس كله إلا نفس، خط أحمر. محدش يقرب منها. الجد: اتكلمي يا نفس. نفس: أقول إيه؟ معنديش حاجة أقولها يا جدو. مريم: يعني أنتي اللي عملتي كدا في بنتي؟ وأنا اعتبرتك أغلى منها وحبيتك. ليه كدا؟

حرام عليكي. الجد: .......