رواية الملتزمة الصغيرة الفصل الثاني والعشرون 22 - بقلم سمر ابراهيم

بعد يوم طويل ملئ بالأحداث، جه وقت المسابقة الشهرية. ودي كانت فكرة نفس أنهم كل شهر يكون في مسابقة للعيلة كلها. فيها فقرة مواهب صوت في القرآن والغناء، خصوصاً أن أغلبهم صوتهم حلو. وأسئلة ثقافية ودينية وحوار يختاروا موضوع وكل واحد يتكلم عنه باختصار. نفس: توتو، المكان جاهز. علقتي البالونات؟ تفاؤل: أيوه، الميكرفون تمام، والأماكن كلها نضيفة، والأكل يجنن. أحلى حاجة الحلويات بتاعت طنط صباح، تسلم إيديها.

نفس: جميل أوي. طيب والمفاجأة جاهزة؟ تفاؤل: على أساس مش أنتي اللي مجهزاها بنفسك. نفس: عارفة، بس متوترة. أحلى حاجة القعدة اللي في الجنينة دي. بحبها أوي لما نتجمع هنا تحت ضوء القمر ونسهر للصبح. يلا بقى الشباب وصلوا. أويس: آممممم، مش بطال. المكان حلو والزينة حلوة. البالونات أسود وأبيض راقي. أسد: آممممم، شكل السفرة والأكل مغري أوي. أنا جعان. فهد: أنت همك على بطنك دايماً كدا. مدلوق على الأكل. بس هو إيه ده؟

رومي مع كبسة سعودي وبلح شام ولب سوري. أنتم تقريباً مجمعين العرب كلهم على سفرة واحدة. أنا لازم أدوق من الجامعة العربية دي بقى. نفس: طيب قرب كدا من الأكل قبل ما الكل يجي ونبدأ مع بعض. الجد وصل يمشي براحة بحكم السن: أهلا ي نفس هانم اللي مش سألة عليا اليومين دول. نفس: جدو، أنت الكل في الكل. وآسفة والله غصب عني. المذاكرة وكدا ي كبير. الجد: ربنا يوفقك. ها فين الباقي؟ نصلي العشاء جماعة ونبدأ بعد الأكل. منال: أنا جيت.

نفس: نورة البيت. طفي الجاز ي واد. حبة زغاريت. منال: هههههههه، على اتفقنا الصبح. نفس: اشطا ي دكتور. دا أنتي خلاص بقيتي تتكلمي زيي. من أنا كنت بئية: عامر: لا، أنا مراتي مش زي حد. أويس: مش قدامنا ي بابا. امسك نفسك ي حج وتغزل في السيدة ماما لوحدكم، مش قدامي كدا. عامر: هههه. أفهم أنت غيران على مامتك ولا بتدافع على نفس ولا بتجر كلام معايا؟ إكمني مش معبرك ليا يومين.

أويس: كله في كله. أنا مقدرش على زعلك مني ي حج واللي تقوله أنا راضي بيه. بس بلاش تزعل مني. عامر: أنت اتعلمت التمثيل من نفس وتفاؤل. ههه. بس خلاص مش زعلان. وحقك عليا لأني ضربتك. بس إلا نفس. نفس: ي دكري اللي بيدافع عني ي ناس. بس إيه. أنا بمثل. أنا اااه. قلبي مكنش العشم. ي خسارة الكشري اللي كلته معاك من العربية في الشارع من ورا منال. ي حج. ي خسارة أكل الشوارع اللي بينا. عامر: لسانك دا عايز قصة. مفيش كلمة تخبيها ي بت.

منال: يعني أكلت بجد من الأماكن دي وبعد ما تتعب تقول ي ريتني ما أكلت. عامر بأبتسامة جذابة: خايفة عليا. منال بحب: آمال أخاف على مين ي حج. أويس: جاري شقط ماما من السيد بابا على مرأ ومسمع من الجميع. مصطفى: يراعوا مشاعر الناس اللي مراتها مش موجودة وقلبها ضعيف. نفس: بس خلاص. أنت ي أستاذ عامر راعي ظروف السناجل. وأنتي ي أخت منال مش قدام العيال. الكل ضحك. أحمد: هي مريم فين؟

نفس: أنت كمان حنيت للمزة. طيب لحظة كدا. يلا الكل يستعد لأول مفاجأة في الليلة دي. مريم جات عليهم وهي لابسة نقاب ولبس شرعي كامل وتاج. وكانت زي الأميرة. أحمد: مين دي؟ فين مراتي ي جدعان؟ أنتم غلفتها بعلبة هدايا. ههههه. مريم وهي بتضحك وبتتبكي في نفس الوقت: إيه رأيك؟ انهاردة أنا ختمت القرآن على إيد نفس ولبست النقاب. مبسوطة أوي ي أحمد إني ختمت كتاب الله. عقبال كل نساء وبنات وشباب ورجالة المسلمين.

عمار: اشمعنا الرجالة آخر حاجة يعني. نفس: لأن السيدات أولاً. أحمد باس على جبينها فوق النقاب: دا أجمل يوم في حياتي لأنك سعيدة ي مريم. حقيقي ربنا يحفظك ليا. لما تكوني مبسوطة الدنيا كلها بتحلو. مع أنه نادر ما تنبسطي كدا. مريم: هههههههه. بس خلاص. إذاي يجي النكد والزعل مع القرآن دا طمأنينة وراحة بال. يلا نبدأ. فين فرح بنتي. فرح: أنا هنا. إيه دا؟ مين دي؟ مريم: ههههه. أما رأيك؟

ختمت القرآن ي فرح. عقبال ما أشوفك ملكة متوجة بالنقاب كدا قريب ي حبيبتي وافرح بيكي مع ابن الحلال. فرح تأثرت بكلام مامتها. هي أه مش بتحب اللبس والشكل دا وحاسة أنه مستحيل تلبسه. بس مبسوطة أن دي أول مرة مامتها تكلمها باحترام قدام كل العيلة وتدعي ليها. بصت لباباها اللي رافض يكلمها ومقاطعها من سنين ونزلت رأسها الأرض بخجل: إن شاء الله يا ماما. ربنا يشرح قلبي.

نفس: ها يا أبو حميد، مش ناوي تصفى بقى وتلم شمل العيلة في الليلة القمر دي. فرح بصت ليه بترجّي: أنا أسفة ي بابا. أحمد: خلاص تعالي يفرح في حضن بابا. أنا خلاص سامحتك ي بنتي. عشان خاطر عيون مامتك القمر دي. فرح بحب قربت وحضنته. بس مريم بعدتها عنهم. مريم: في إيه ي بت؟ أنتي خلاص لازم أحضان وتلزيق. المنتقبات غيورات على أزواجهم من كل البنات. الكل ضحك بسعادة.

تفاؤل: وأخيراً ي حماتي انضميتي للشلة بتاعت المنتقبات. عقبال ماما ونكمل نص دسته منتقبات. فرح: وأنا كمان نبقى نص ووحدة على البيعة. منال: طيب يلا نبدأ. "وكملة بصوت واطي" مفهومة حركاتك ي مريم في لفت الأنظار. على رأي المثل اللي ملقيش حد يعبره يجيب نقاب ويفصله. عامر: هههههههه. دي غيرة نسوان بقى. بس أنتي بقيتي تجيبي أمثال وتحرفيها كمان. شكلك بجد بقيتي زي نفس ومنال. منال: أنا مش بغير من حد. دي رافعة هاشتاج -عبروني.

عامر: وأنت ي حبيبتي مش ناوية تاخدي خطوة؟ دا أنا أعملك أحلى حفلة. عايزك ملكتي كدا وتتخبي عن الكل إلا أنا. زيهم. منال: إن شاء الله. نفس: جرى إيه ي منال؟ مش قولنا مش قدام العيال. ما تلمي ابنك ي كبير. عامر: نفس، ابعدي عينك أنتي عننا. بلاش تركزي معانا. نفس: مقبولة منك ي عمو. يلا بقى نبدأ بإيه. أسد: الأكل. فهد: خصوصاً الرومي والكبسة. مصطفى: لا، دا أنت مشفتش المحاشي بقى. دي شكلها يجنن. مين طابخ كل الأكل دا؟ نفس: أنا.

الكل بصوا ليها بسخرية. نفس: أنا عملت الملح ي جماعة. شايفين الفلفل الأسود مع الشطة والكمون والكزبرة عاطين شكل رهيب إزاي في الملاحة. تنسيق ألوان. هذا هو الفن. الكل التفت للملاحة اللي مش ظاهرة من الأساس، وضحك وبدأوا أكل وضحك وكلام. وبعد ما خلصوا بدأت فقرات الحفلة. نفس: أول فقرة تقليد الأصوات في القرآن. مين يبدأ؟ أويس: أنا الأخير. نفس: وأنا بعد الأخير.

الجد: ابدأ ي فهد، وبعده مصطفى، وبعده أسد، وبعده أويس، وبعدها تقى، وبعدها نفس، وبعدها تفاؤل. حد تاني حابب يشارك؟ فهد بدأ يقرأ مثل صوت الشيخ ماهر المعيقلي في آخر آيات في سورة "ق" من أول «وقال قرينه, ربنا ما أطغيته, ولكن كان في ضلـٰل بعيد». مصطفى قرأ زيه هو وأسد بس مش جايبين نفس النغمة.

أويس قرأ آيات من سورة غافر بصوت الشيخ خالد الجليل من أول آية «وقال فرعون ذروني أقتل موسى وليدعُ ربه, إني أخاف أن يبدل دينكم أو أن يظهر في الأرض الفساد». الكل بكى من التأثر، خصوصاً مريم اللي كانت طايرة من فرحتها أنها وأخيراً بعد سنين ختمت كتاب الله زي ولادها وجوزها. وأمنية حياتها فرح ربنا يهديها ويلين قلبها الإيمان. تقى انسحبت بعد صوت أويس لأنها كانت مش قادرة تقرأ من البكاء.

نفس قرأت أول سورة الفجر بصوت الشيخ عبد الباسط عبد الصمد بس كان في حاجات صعبة مش بيقدر يتقنها غير الشيخ. رحمة الله. وتفاؤل قرأت زي أويس بس مش نفس درجة صوته وقوته وجماله وخشوعه. الجد: فتح الله عليكم. أنا صوتي النهارده لأويس. عامر: وأنا أويس. أحمد: أنا نفس. مع أنه أويس جميل، بس نفس صوتها فيه نغمة حلوة أوي وصعب تجيب صوت الشيخ عبد الباسط بسهولة. بس هي أبدعت. منال: صوتي لأويس، حبيب قلبي.

مصطفى: وأنا مش ابنكم ولا إيه ي جماعة؟ حد فيكم لقاني على باب جامع؟ اتقوا الله فيا. نفس: كدا أويس تلاته، وأنا صوت. والباقي زيرو. مريومة، مين يلف ليكي النقاب؟ مريم: نفس طبعاً. نفس: اشطاا. أنا كدا صوتين. مريم: أنا قصدي نفس تلف ليا النقاب. نفس: وصوتك في المقابل. مفيش سحب أصوات. ها ي فرح، صوتك لمين؟ فرح: لأويس طبعاً. نفس: وأنا اللي بقول ربنا هيديكي. "ومثلت طريقة كلامها" لأويس طبعاً. قولي أنتي ي ست تقى.

تقى: صوتي لأسد. أنا مغلوب على أمري. ههه. أسد: إذا كان عاجبك. وأنا صوتي لأسد. مصطفى: وأنا ليا الجنة. فين مراتي تصوت ليا. أنا صوتي لمصطفى. أهي أهي أهي. نفس: وأنا صوتي لأويس. أويس: وأنا صوتي لأويس. وبكدا أكون الفائز بكتساح. نفس: بلاش تفرح أوي. سبتها بمزاجي. مرة على نفسك. إن كان الزمالك أخد الدوري. جات عليك أنت. أويس: هههههههه. دمك خفيف. أحمد: يلا، مسابقة الحفظ. أنا معاكم.

الكل شارك فيها إلا فرح لأنها مش حافظة. وكانت سورة الكهف. واحد يقول آية واللي بعده يقول الآية اللي بعدها لنهاية السورة. الكل كان حافظة تمام. نفس: دلوقتي فقرة الأسئلة. أنا جبت أسئلة صعبة وحلوة. الجد بيقرأ الأسئلة لأنه هو الكبير وكدا:

السؤال الأول: ذكر في القرآن الكريم أن القرآن نزل في ليلة واحدة وهي ليلة القدر من شهر رمضان، بدليل «إنا أنزلنه في ليلة القدر»، و «شهر رمضان الذي أنزل فيه القرءان». وفي الواقع أنه نزل منجماً أي مفرق على النبي صلى الله عليه وسلم في ثلاث وعشرين عام، بدليل « وقرءاناً فرقـٰنه لتقرأه, على الناس على مكثٍ ونزلـٰنه تنزيلا». فهل نزل القرآن مفرق أم مرة واحدة؟ أما كلاهما مع التوضيح؟ فرح: أنا أجاوب. الجد: قولي.

فرح: طيب مش فاهمة السؤال. ممكن توضيح أكتر. نفس: يعني ي فرح، في آيات بتقول أن القرآن نزل مرة وحدة في ليلة القدر. وآيات بتقول أنه نزل على النبي طول مدة حياته من أول البعثة. كل مدة بتنزل عليه جزء من القرآن. إذاي كدا؟ وضحي. هو نزل مرة وحدة ولا نزل مفرق؟ فرح: آممممم. طيب هو ممكن يكون نزل مفرق. بس أول مرة نزل فيها في ليلة القدر وبعد كدا نزل مفرق. نفس: حد عنده إجابات أخرى؟

عامر: أنا عارفها. القرآن نزل مرتين. المرة الأولى نزل من اللوح المحفوظ إلى بيت العزة في السماء الدنيا. ودا نزل مرة وحدة في ليلة القدر المباركة. وبعد كدا نزل مفرق من بيت العزة إلى قلب النبي مفرق في مدة ٢٣ سنة من البعثة حتى وفاته. وفي المرتين نزله جبريل عليه السلام. نفس: برافوووووووو. عندك واحد لعمو عامر الجامد. الجد: السؤال الثاني: من هي أول شهيدة في الإسلام؟

أويس: أنا عارفها. سمية أم عمار من آل ياسر. اللي النبي صلى الله عليه وسلم قال ليهم «لكم الجنة آل ياسر». نفس: واحد كمان لأويس. منال: ربنا يحفظهم. ابني وجوزي. تبارك الله عليهم. مريم: وأنتي إيه أخبارك؟ مفيش حاجة كدا ولا كدا. ولا على رأي المثل القرعة بتتباها بشعر بنت عمها. أحمد: لسه لسان ذي ما هو برضوا. ارحمينا من أمثالك دي. حصة دين ي شيخة. مريم: ههههه. منال: قوليها. الجد:

السؤال الثالث: للنبي صلى الله عليه وسلم العديد من الأعمام. وعمه أبو طالب لديه العديد من الأولاد وكان أفـقرهم في المال. فلماذا هو من تكفل برعاية النبي صلى الله عليه وسلم بعد وفاة جده عبد المطلب دون بقية أعمامه؟ مريم: مش فاهمة السؤال. نفس: أنتي وبنتك. طيب ي ستي بيقولك أن أبو طالب عم النبي هو اللي تكفل برعية النبي لما مات جده. مع أن النبي عنده أعمام كتير وأبو طالب عنده أكتر عيال وأفقر واحد فيهم. اشمعنا هو يربي النبي؟

منال: عشان عنده عيال كتير. فكدا كدا مفيش تأثير. نفس: في حاجة أدق وأهم. مريم: عشان يتربى مع ولاده. نفس: كلهم عندهم أولاد. بس في سبب أقرب. ها، أقرب. أويس: لأنه عمه الشقيق وباقي الأعمام لا. والعم الشقيق أحن من غير الشقيق. نفس: برافوووووووو. جبتها ي أويس. مذاكر سيرة. عامر: كنت عارفها بس مش متأكد. هههههههه. الجد: السؤال الرابع: أول مرضعة للرسول. مريم: ثويبة. الجد: صح. البقاء السريع في الأسئلة الجاية.

السؤال الخامس: أول زوجة للنبي؟ أويس: خديجة بنت خويلد. الجد: برافوو. من هو الصحابي الجليل الذي كانت تستحي منه الملائكة؟ عامر: عثمان بن عفان رضي الله عنه. الجد: صح. كم مرة رأى النبي صلى الله عليه وسلم جبريل عليه السلام بصورة الحقيقة؟ فرح: مرتين. نفس: برافوووووووو. عرفتيها إزاي؟ فرح: قدرات. نفس: بجد. طيب فين المرتين بقى؟ فرح: لا، أنا قولتها بالبركة وطلعت صح. نفس: هههه. حظك. كنت متأكدة. طيب المرتين المذكورين في القرآن.

المرة الأولى: ”ولقد رءاه بالأفق المبين“ سورة التكوير. والمرة الثانية: «ولقد رءاه نزلة أخرى ، عند سدرة المنتهىٰ ، عندها جنة المأوىٰ». الجد: السؤال اللي بعده... فضلوا يسألوا أسئلة كتير. وفي الآخر فاز عامر لأنه جاوب على أكتر أسئلة. وبعدها عملوا مسابقة غناء ونفس فازت فيها لأن صوتها في رقة ونعومة أحلى من أويس بكتير. وبعدها اختاروا موضوع عن يوم القيامة وكل واحد قال حاجة بسيطة عنه.

الجد: يوم القيامة. الشيخ حازم شومان قال لو لحقت تقول إن يوم القيامة جه، يبقى دا مش يوم القيامة. لأن الأحداث فيه بتكون أفظع من أن عقولنا تستوعبها وتستوعب أن دا يوم القيامة. نفس: يوم القيامة، كله يطلع من القبور.

لما ربنا وصف خروجهم قال: «خُشَّعًا أَبْصَارُهُمْ يَخْرُجُونَ مِنَ الْأَجْدَاثِ كَأَنَّهُمْ جَرَادٌ مُّنتَشِرٌ». الشيخ حازم شومان بيقول أن العلماء اكتشفوا أن أنثى الجراد بتحط البيض بتاعها في مكان. لما يخرج من الأرض يخرج كله في نفس اللحظة في نفس الثانية. ودا أدق تشبيه لخروج الناس من الأجداث. والأجداث مش معناها القبر. لأن في ناس بتغرق في البحر، وناس بتتحرق ويتوزع الرماد بتاعها. الأجداث عبارة عن حاجة كدا صغيرة زي خلية في جسم الإنسان ينبت منها.

أسد: يوم القيامة تبدل السماوات غير السماوات، والأرض غير الأرض. الجبال تنهار والبحار تتحول لنار. مريم: يوم القيامة، ربنا كل من تبع سنة النبي صلى الله عليه وسلم من غير تحرف ولا ضلال يشرب من حوض النبي. واللي يشرب منه عمره ما يعطش بعدها أبداً. وبعد كدا لكل نبي حوض يسقي منه صالحين أمته. منال: يوم القيامة نفضل واقفين خامسين ألف سنة ننتظر الحساب. خمسين ألف سنة والشمس فوق رأسه. واللي العرق بتاعه وصل لنص جسمه كله حسب أعماله.

أحمد: يوم القيامة تيجي الجنة بجمالها وكل العيون ليها. وبعدها تيجي النار. مسكينها ملائكة وهي غضبانه وهي كائن حي يغضب على أصحاب المعاصي. ليها شهيق وزفير. أول ما تشوف العصى من بعيد تعمل زفير، عايزة تخليهم يحسوا بحرارة النار. وأول ما تقرب منهم تعمل شهيق عشان تسحبهم ليها. تخليهم يدقوا العذاب بسرعة من غضبها عليهم.

عامر: يوم القيامة المسلمين والمنافقين بس هما اللي بيمشوا على الصراط. أول حاجة يمر النبي وهو بيقول يا رب سلم سلم. ومن بعده أمته. المنافق يقع في النار للأبد. والمسلم يحاسب حسب أعماله. بيكون في خطاطيف بتشد العاصي لتحت. وآخر واحد يطلع منها بعد عنا وعذاب شديد. فاز.

أويس: يوم القيامة كل الشركاء يبقوا مع بعض. مش الأزواج. لا، اللي كانت بتحبه في الدنيا وتسمع ليه. اللي بيحب المغني الفلاني. واللي بيسمع للممثل العلاني. اللي بيشرب خمر وزني. اعمل حساب ليوم الحساب. مصطفى: يوم القيامة بتاخد كتابك. ويا ترى بيمينك ولا بشمالك ولا من وراء ظهرك. يوم القيامة أعمالك توضع على الميزان. وأنت واقف منتظر. يا ترى أنهي كفة تتطب. ومصيرك جنة ولا نار.

فهد: يوم القيامة أهوال. الحامل بتضع حملها. والطفل شعره يشيب. يوم بخمسين ألف سنة نعيشه بكل لحظة فيه. حتى لو مش خايف ومش مستعد ومش عامل حسابك. لا مفر ولا خيار. آخر لحظات صمت وخلوا مع النفس. الكل بيتخيل ويفكر. نفس: وبرغم كل دا، رحمة ربنا واسعة. كل شيء. ربنا رحيم بينا. داخلين الجنة برحمته. الحمد لله أننا مسلمين موحدين بالله. دي شهادة دخولنا الجنة إن شاء الله.

الجد: جدعة أنك اخترتي الموضوع دا ي نفس. كلنا كنا محتاجين نفوق. الأيام اللي فاتت كتير منا غلط. دا يجرح دا ودا يضرب دا ودا يهين دا. بقينا نهون على بعضنا أوي. أويس: حد زعلان مني يقول. نفس: أنا. أنت ضربتني ومش زعلانة. وزعلانة منك ي جدو لأنك لما مصطفى تعب حسستني إني واحدة غريبة عنكم. أويس خرج شكولاتة من أم خمسة جنيه ومدها ليها: وكده زعلانة ولا خلاص. نفس بابتسامة: خلاص. وأنت ي جدو؟ الجد: بجد ي نفس؟ أنا حسستك بكد؟

مع إني وعدتك تكوني واحدة وعمري ما أجرحك. بس خلفت وعدي. نفس: ما بلاش تمثيل ي كبير. وتطلع الشكولاتة. ولا ناوي تضحك عليا بكلامك القمر دا وأنا أضعف وأنسى. الجد ضحك: خدي. أهي ي مستغلة. كنت عارف أنتي مستحيل تعدي حفلة زي دي من غير ما تستنفعي. نفس: مش أنتم اللي بتغلطوا عليا. هو أنا قولتلكم اغلطوا. الله. مصطفى: حد زعلان مني؟ عامر: رجع مراتك ي مصطفى. سالي مستحيل تلاقي زيها.

مصطفى: ادعيلي ي حج أبوها يوافق. أنا أهو بحاول آخد الرضا من حمايا. منال: حد زعلان مني؟ مريم: هههه. وأنتي حد فاكرك أصلاً. أنتي مين. منال: بطلي غيرة ي مريم. عرفاكي إيه حارق رزك. نفس: ما تلموا مراتاتكم ي رجالة. جرى إيه. عامر: خلاص ي منال. يوم واحد من غير خناق. نفس: حد زعلان مني؟ مصطفى: أنتي حرضتي سالي عليا. أويس: وبسببك أبويا علم على خدي. منال: قولتي كلام في العربية زعلني. مريم: ديماً تسخني بيني وبين سلفتي حبيبتي.

الجد: مش سألة عني. فرح: ديماً كسفاني وسط العيلة. عامر: تعبتي مصطفى بكلامك. فهد: ديماً تفتني على تفاؤل ونتخانق بسببك. أسد: أقولك تقى تعبانه تروحي المدرسة وتخليني أوصلك كمان. أحمد: مريم بتسمع كلامك أكتر مني طول الوقت. مع بعض تحفظوا وتتكلموا. وأنا الهانم نسيت أن عندها جوز. بس تالتة ثانوي فرقتكم. تقى: أنا مش لاقية حاجة أقولها. بس زعلانة كدا وخلاص.

نفس: يا لها من شعبية. شكراً يا جماعة. أنا سجلي أبيض. ي فل. مفيش شكوى كدا ولا كدا. كل الحب دا. أنا قلبي ضيف مش حمل حبكم. مصطفى: وكمان بتتريقي عليا. ي له من تنمر بشع. نفس: هههه. مصطفى لو قلبت طائر بريش شكولاتة مفيش. اللي بيدخل لجيب نفس مش بيخرج. ريح نفسك ي بابا. يلا وقت قيام الليل. الجد: أويس، أنت الإمام. صوتك حلو أوي. أويس: احم. ما أنا عارف. لا داعي للمدح والثناء والتصفيق الحار.

الجد: طاب أخلص يلا. بدل ما أعلملك على الخد التاني. أويس: طيب ليه الإهانات قدام البنات بس ي جدو. بريستيجي وكدا. الكل ضحك. وتفاؤل ضحكت زي الفأرة بالضبط. الكل سكت وبيبص لتفاؤل. تفاؤل: في إيه؟ بضحك. وأخيراً الكاميرا توجهت ليا وبقيت مشهورة. بدل ما طول الوقت محدش عبرني. نفس: هو أنتي فاضية تذاكري وتعرفي تجاوبي أو تعرفي تقولي حاجة. طبعاً ما الأخ فهد وأخد عقلك طول الليل يذاكر ليكي. كلام حب.

تفاؤل: منك لله ي نفس. قلعت بشعري ودعيت عليكي دعوة وليه ساعة المغربية. عامر: صح الكلام دا ي فهد؟ فهد: أنا هو هي. يعني مش مراتي ي عمو. نفس: مراتك تخاف على مستقبلها وتشجعها على المذاكرة. أنا غلطانة إني وافقت تكتب عليها قبل ما تخلص دراسة. عامر: نفس. ممكن المايكروفون. أنا أبوها مش أنتي. نفس: احم. اتفضل. خد راحتك في الكلام. عامر: فهد لو سمعتك بتكلمها تاني أو برج المراقبة. نفس هانم سمعتكم. مفيش جواز قبل أربع سنين.

فهد: حاضر ي عمو. اللي تشوفه. "وبص لنفس بتوعد". تفاؤل: تصدقي أنك رخمة والغيرة مالية قلبك.

نفس: لما تيجي لجنة الامتحانات تعرفي أنا عملت كدا ليه. وتيجي تشكريني. عارفة أنك بتحبي فهد من زمان وهو بيحبك. بس لازم تهتمي بدراستك بدل ما تندمي طول العمر زي حماتك. فهد بيكرر نفس غلطة عمو أحمد في شبابه. وأنا مش بغير ي تفاؤل. أنا مبسوطة ليكي. ربنا يوفقك. بس أنتي صحبتي ومش ممكن أخليكي تضيعي مستقبلك. أنا من الأسبوع الجاي ناوية أقفل الأوضة عليا وكدا خلص المواد. مش هطلع منها غير على الامتحانات. بس.

تفاؤل: لا، لسه بدري. دا فاضل خمس شهور على الامتحانات. نفس: براحتك. لو حابة نبدأ مع بعض تعالي. ،،،،،،،،،،،،،،،،،،،،،، سمر إبراهيم. ابتسامة عابرة. الكل صلى الفجر ورجع أوضة ينام. عند مصطفى رن على سالي وهي كانت بتصلي الفجر. قلقت وفتحت التلفون. مصطفى: صليتي الفجر؟ الطرف الآخر: ........ مصطفى: حابة تيجي الشغل من امتى؟ الطرف الآخر: ........ مصطفى: مش حابة تتكلمي معايا؟ عايز أسمع صوتك.

مصطفى: سالي حبيبتي. صوتك وحشاني. ممكن أسمعه قبل ما أنام. خليكي معايا على التلفون. مش عارف أنام من غير ما تكوني جنبي. كريم: طيب ينفع صوتي أنا ي رومنسي؟ مصطفى: احم. عمي أنت. هو دا مش تلفون سالي؟ سالي كاتمة ضحكتها على كسفة مصطفى. كريم: مصطفى، بلاش تحاول. وبنتي جبت ليها شغل معايا في البنك. مصطفى: لا، مراتي مستحيل تشتغل بره ي عمي. مع احترامي. بس سالي مراتي وعلى اسمي. مسمحش أنها تشتغل عند حد. كريم: وأنت كلها يومين وتطلقها.

مصطفى: مين قال. أنا مش هطلق سالي. كريم: بسيطة. ترفع قضية خلع. مصطفى: وتجوزها لمراد بيه. كريم: أجوزها لراجل يحافظ عليها. احترامها من احترامه. سالي بتشاور لباباها يراعي ظروف مصطفى. مصطفى: متشكر ي عمي. بس أنا راجل وأرجل من أي حد. ومراتي هترجع بيتي. وقفل السكة وفضل متعصب. أخد الأدوية لأنه حس بوجع بسيط ونام. بس بعد كام دقيقة تلفونه رن. مصطفى: نعم ي عمي. في حاجة تاني حابب تضيفها؟ سالي: أنت كويس ي مصطفى؟

مصطفى: ههههه. هو الموضوع يهمك. ولا حضرتك متصلة تكملي وصلة الإهانة اللي بدأها باباكي؟ سالي: تصدق إني غلطانة لأني خفت عليك وعلى زعلك.

مصطفى: بحبك ي سالي. أنا بحبك أوي. وآسف على كل حاجة وكل يوم نمتي فيه معيطة بسببي. بس والله بحبك من أول مرة شفتك فيها. عيونك دي مرسومة في قلبي ي سالي. بعشق كل حاجة فيكي. وكنت بعمل كدا لأني كنت عايزك تعيشي حياتك مع حد سليم. بس اكتشفت إني مقدرش أعيش من غيرك. وهكون أناني في حبي. ولو وقفت في وش العالم كله. خصوصاً أبوكي دا. كريم: اتلم ياض أنت. مصطفى: أنتي اتحولتي لصوت أبوكي كدا ليه ي بت.

كريم: لا، أنا أبوها ي حيلتها. وأنتي ي بت هاتي التلفون دا. ولو عرفت أنك كلمتي إيه يعني. مصطفى: استغفر الله العظيم يا رب. يعني كل ما أقول كلمة حلوة يطلع أبوها. كريم: نام ي مصطفى. وقول ي صبح. وأنتي. ولو عرفت أنك كلمتي تاني إيه يعني. سالي: حاضر ي بابا. مصطفى: سلام ي حبيبتي. قصدي ي حبيبي ي عمو. سلام. صح لو سالي حابة تشتغل الشركة مفتوحة ومحتاجين سكرتيرة. غير كدا لا تقعد في البيت. وكل اللي تحتاجه يوصلها.

كريم: بنتي مش محتاجة فلوس منك. كفي أنت نفسك الأول. بس لو حابة تشتغل. أنا مش ممكن أمنعها عن حاجة بتحبها. سالي: ي ريت ي بابا. أنا نفسي أشتغل أوي. كريم: موافق. بس لو عرفت أنك كلمتي في الشغل. مفيش شغل تاني. مفهوم. سالي: مفهوم. مفهوم.