رواية المتعة الحرام الفصل العاشر 10 - بقلم عادل عبدالله

سامي: يا فندم إذا كنت أنا اللي مقدم بلاغ قبله لما اكتشفت غيابها، هكون أنا إزاي السبب في اختفائها؟ الضابط: ممكن تكون أنت عملت البلاغ ده بسرعة بعد جريمتك عشان تبعد عن نفسك الشبهة وتضللنا. سامي: لا يا فندم الكلام ده مش صحيح، أنا عمري ما أعمل كده أبداً، أنا فعلاً معرفش عنها حاجة وهتجنن من قلقي عليها.

الضابط: للأسف أنت مش هتقدر تمشي دلوقتي وهنفتح تحقيق دلوقتي وبعده هتروح النيابة وبعد كده هتعرف إذا كنت هترجع بيتك ولا هتفضل معانا. سامي: إزاي ده يا فندم؟ ده أنا جوزها اللي قدمت البلاغ! أكيد الشاب اللي اسمه وائل ده هو اللي خطفها أو قتلها. الضابط: إحنا بنعمل كل الاحتمالات لحد ما نوصل للحقيقة، يلا يا سامي هنبدأ التحقيق. الضابط: اسمك وسنك وعملك؟ سامي: اسمي سامي، ٣٨ سنة، مدير تسويق.

الضابط: آخر مرة شفت مراتك فيها كانت إمتى؟ سامي: امبارح الصبح قبل ما أخرج من البيت وأروح الشغل. الضابط: هل كلمتها في التليفون بعد خروجك من البيت وذهابك لعملك على مدار اليوم؟ سامي: أيوه. الضابط: كلمتها إمتى بالظبط؟ سامي: كانت حوالي الساعة ١٠ الصبح. الضابط: ده قبل نزولها تقريبًا بنص ساعة. سامي: أيوه تقريبًا. الضابط: اتصلت بيها ليه؟ سامي: اتصلت بيها عادي زي أي حد لما بيكلم مراته. الضابط: قصدي اتكلمتوا في إيه؟

سامي: كنا بنتكلم عن الفلوس ومصروف البيت وهتعمل أكل إيه، كده يعني، كلام عادي زي أي اتنين متجوزين. الضابط: والكلام ده يستاهل إنك ما تصبرش لما تروح البيت وتكلمها فيه! ويخليك تتصل مخصوص تكلمها أثناء الشغل؟ سامي: هو في إيه يا فندم؟!!! أنا بكلم مراتي!! يعني طبيعي أكلمها في أي وقت ونتكلم في أي موضوع. الضابط: أنت خرجت من شغلك إمتى امبارح؟ سامي: خرجت في ميعادي الطبيعي الساعة ٥ بعد العصر. الضابط: مش خرجت خالص أثناء اليوم؟

سامي: مش فاكر، تقريبًا لأ. الضابط: لأ، مفيش حاجة اسمها مش فاكر أو تقريبًا، لازم تفتكر كويس. سامي: لا يا فندم مش خرجت من الشغل إلا في ميعاد خروجي الطبيعي. الضابط: اكتشفت غياب زوجتك إمتى؟ سامي: حوالي الساعة هـ ونص آخر اليوم لما رجعت من الشغل ومش لاقيتها في البيت وعرفت من الأولاد إنها خرجت حوالي الساعة ١٠ ونص أو ١١ الصبح. الضابط: سألت عنها الأهل والأقارب والمعارف؟ سامي: أيوه يا فندم ومش وصلت لأي نتيجة.

الضابط: تظن إن سبب غياب سهام يكون إيه يا سامي؟ سامي: معرفش يا فندم، لكن أعتقد إن اللي اسمه وائل ده له علاقة بغياب مراتي. الضابط: كل حاجة هتبان متخافش. سامي: يعني مسكتوا وائل ده؟ الضابط: يا أستاذ سامي إحنا عارفين إحنا بنعمل إيه كويس، وعمومًا خلال ساعات هيكون وائل هنا في القسم. سامي: طيب وأنا هقعد هنا أعمل إيه؟ الضابط: هتتحجز لحد الصبح لما تروح تتعرض على النيابة. سامي: هدخل الحجز؟ لا طبعًا ده مستحيل!!!

الضابط: مش بمزاجك. ونادى الضابط على العساكر اللي أخذوا سامي ودخلوه الحجز. سامي: بعد إذنك يا فندم ممكن أعمل تليفون عشان أقول لحد يأخد باله من الأولاد لأنهم لوحدهم في البيت؟ الضابط: اتفضل لك مكالمة واحدة فقط. سامي اتصل بعايدة. سامي: أيوه يا عايدة، بالله عليكي تروحي تباتي مع سلمى وسليم النهاردة أو تاخديهم يباتوا عندك. عايدة (بقلق بالغ) : ليه؟ إيه اللي حصل؟ سامي: أنا اتحجزت في قسم الشرطة وهتعرض بكرة على النيابة.

عايدة: إيه!!! بتقول إيه!! ليه إيه اللي حصل؟ سامي: زي ما سمعتي. عايدة: ليه يا سامي؟ سامي: يسري أخو سهام عمل بلاغ بيتهمني إني السبب في اختفاء سهام وبيتهمني إني قتلتها. عايدة: معقول!!!! ده اتجنن ده ولا إيه؟ سامي: المهم خلي بالك من العيال لحد ما أرجع لهم. عايدة: طيب خلاص متقلقش اطمن عليهم، الأولاد هيبقوا معايا. وبعد أقل من ساعتين تم القبض على وائل ودخل عند الضابط. الضابط: اسمك وسنك وعملك؟

وائل: اسمي وائل ٣٦ سنة صاحب ومدير كافيه. الضابط: تعرف سيدة اسمها سهام؟ وائل: لأ معرفهاش. الضابط: اومال كنت مسجون ولسه خارج من السجن ليه يا وائل؟ وائل: أيوه افتكرتها، أيوه يا فندم أعرفها. الضابط: تعرف عنها إيه وحدود علاقتك بيها إيه؟ وائل: يا فندم أنا معرفش إلا إنها سبب المصايب اللي في حياتي. الضابط: تقصد إيه؟

وائل: قصدي إنها واحدة اتعرفت عليها على النت زي ما كتير بيتعرفوا على النت عادي، وبعد فترة الكلام قلب بينا لحب ورومانسية وبعدها اتقابلنا مرة واحدة بس، بعد كده هي كانت عايزة تبعد لكن أنا الصراحة كنت حبتها بجد فحاولت أضغط عليها عشان تكمل معايا لكن للأسف صاحبتها كانت بتسجلني وبسبب كده دخلت السجن لكن خرجت قبل نهاية المدة حسن سير وسلوك. الضابط: قول كل اللي تعرفه عن سهام يا وائل. وائل: يا فندم أنا قولتلك كل حاجة حصلت بالظبط.

الضابط: وحاولت تكلمها بعد خروجك من السجن؟ وائل: الصراحة حاولت يا فندم. الضابط: حاولت تكلمها ليه بقى؟ حب ولا انتقام؟ وائل: لا يا فندم حب طبعًا، أنا مبعرفش أنتقم من حد. الضابط: الستات مليانة الدنيا وأكيد أنت تعرف كتير ولو عايز تتعرف على ستات وبنات تانيين هتتعرف على كتير، ليه حاولت تكلم سهام تحديدًا إلا إذا كان في دماغك إنك تنتقم منها؟

وائل: يا فندم الحب فوق أي حاجة، حتى نسيت إنها السبب إني دخلت السجن بسببها وأديتها عذرها لأني فعلًا بحبها بجد. الضابط: أنت تعرف إن سهام مختفية من امبارح الصبح يعني من أكتر من ٣٦ ساعة؟ وائل: مختفية إزاي يعني؟ الضابط: مختفية يعني مش موجودة في أي مكان أو عند أي حد ممكن تكون موجودة عنده، وكمان جوزها بيتهمك إنك أنت اللي وراء اختفائها وإنك خطفتها أو قتلتها.

وائل: لا يا فندم، سهام لو حصلها حاجة يبقى جوزها هو اللي عملها لما عرف إنها مش بتحبه وبتخونه. الضابط: أنت امبارح كنت فين الصبح من حوالي الساعة ١٠ للساعة ١ الضهر؟ وائل: كنت لسه نايم، لأني بسهر طول الليل في الكافيه وبصحى متأخر بعد الضهر. الضابط: طيب يا وائل أنت هتفضل معانا لبكرة الصبح وبعدها هتتعرض على النيابة تاخد أقوالك.

وائل: يا فندم أنا مليش علاقة بالموضوع ده أكيد جوزها اللي ورا اختفائها ده ويمكن يكون قتلها كمان لما عرف إنها خانته. الضابط: كل حاجة هتبان. بعدها نادي الضابط على العساكر وأخذوا وائل وأدخلوه نفس الحجز اللي موجود فيه سامي.