رواية المتمردة الفصل الثاني 2 - بقلم هاجر العفيفي

حازم: هو أنا لحقت أتجوزك عشان أطلقك. ندي بدموع: مش عايزاك ومش طايقاك. حازم: ندي اعقلي بقا وبلاش شغل العيال ده. ندي: هو أنت معندكش دم؟ حازم بغضب: هو أنا عشان ساكتلك تطولي في لسانك؟ أنا لحد دلوقتي ماسك أعصابي عنك، متخلينيش بقا أخرج عن شعوري. ندي بسخرية: عادي، هي عادتك ولا هتشتريها؟ حازم: عايزة إيه يا ندي؟ ندي: أطلق. حازم: مينفعش، الناس تقول إيه؟ أطلقت بعد كتب كتابها بيوم! اهدي بقا وعيشي حياتك وبلاش كلمة طلاق دي تاني.

ندي: أنت بتجبرني على العيشة معاك وأنا مش عايزة. حازم قرب مسك إيدها وهي سحبتها منه، وهو أتنهد وقال: ندي عشان خاطري، فرصة واحدة بس وصدقيني هثبتلك أني اتغيرت وإني إنسان تاني خالص. ندي بصتله وقالت بجمود: لأ. ودخلت الأوضة ورزعت الباب. حازم بنفاذ صبر: يارب. نادية بغيظ: أنا معرفش أنت ليه جوزت البت لحازم ده، مفيش غيره يعني؟ وبعدين أنت عارف إن هي مش طايقاه. جمال بهدوء: أنا جوزتها لحازم لأن هو بيحبها وكمان هيحافظ عليها.

نادية بسخرية: كان حافظ عليها بدل ما يسافر زمان وسابها يوم فرحهم! إزاي تأمن ليه تاني بعد اللي عمله؟ جمال: غلط واتعلم من غلطه، كان عيل طايش. نادية: هو عشان ابن أخوك تبيع بنتك؟ جمال: حافظي على كلامك يا نادية، أنا مبعتش بنتي، أنا جوزتها وأنا عارف أنا بعمل إيه. نادية: وأنا قلبي مش مطمن طول ما بنتي معاه في مكان واحد. جمال: جوزها مش هيأذيها. نادية: حازم أكتر واحد أذاها. جمال: يووه بقا! مش هخلص من الكلام ده؟ أنا هقوم أنام.

نادية: أتهرب، أتهرب، هو ده اللي باخده منك. جمال دخل الأوضة وسابها تتكلم. نادية: يارب ابعد عن بنتي كل الشر، يارب يارب. ملناش غيرك. رقية: إيه يا ملك، أومال فين ندي مجاتش ليه؟ ملك بغيظ: اتجوزت ياختي. رقية باستغراب: اتجوزت؟ ومن غير ما تقولنا؟ ملك بحقد: أكيد طبعًا، هي طول عمرها كده، أنانية، حتى في جوازها استخسرت فينا نفرح ليها. ده أنا معرفش غير لما كتبت الكتاب.

رقية بهدوء: متعرفيش ظروفها إيه، وبعدين ندي مش أنانية، إزاي تقولى على أقرب صديقة ليكي كده؟ ملك بملل: ياست رقية مش ناقصة حكم ومواعظ، بالله عليكي اطلعي من دماغي. رقية بصتلها وقالت: أنا غلطانة إني جيت أسأل. ملك: أيوه وامشي بقا وسيبني. رقية مشيت وسابتها. ملك بسخرية: كل حاجة ندي ندي، كأنها الملكة، حاجة تفقعك. كريم: هو اللي سمعته ده صح؟ ملك بزهق: سمعت إيه؟ كريم: ندي اتجوزت؟

ملك: أيوه اتجوزت واحد خسارة فيها وفي أهلها، مال وجمال، بت محظوظة. كريم بغضب: نعممم! وهي وافقت عشان فلوسه؟ ملك بخبث: أيوه طبعًا، أومال عشان جمال عيونه؟ كريم: هو إيه الهبل ده؟ وبعدين أنا حاولت معاها كذا مرة وهي رفضت نهائي حتى الارتباط. ملك: مانت عارف بقا، هتقولك حرام بقا وبتاع. وبعدين هي كانت متفقة على ابن عمها بقاله فترة. كريم بوعيد: وأنا مش هسيبها تتهني يوم واحد. ملك بخبث: وأنا معاك. كريم باستغراب: وأنتِ إيه مصلحتك؟

ملك: ملكش فيه بقا، المهم هساعدك. ندي خرجت تعمل الغداء وبعدين دخلت الأوضة تصلي وخرجت قعدت ومسكت كتاب وكانت بتقرأ. حازم دخل من باب الشقة قال: مساء الخير. ندي بصتله ومردتش. حازم راح عندها وطلع علبة وكان فيها خاتم شكله رقيق جدًا. حازم بابتسامة: نفسي تقبليه. ندي بسخرية: بمناسبة إيه؟ حازم: أي مناسبة، أني بصالحك، أو بمناسبة كتب كتابنا. ندي: أو عشان تكفر عن غلطك. حازم: أي كان، المهم تسامحيني.

ندي بتنهيدة: محاولاتك كلها فاشلة، أنا مش هكمل في الجوازة دي. حازم: أومال وافقتي تتجوزيني ليه؟ ندي: عشان بابا وعارفة إن هو تعبان والدكتور قال أي زعل هيأثر عليه، لكن مستحيل عشان واقعة فيك مثنى. حازم: ندي عشان خاطري، اعملي اللي أنتِ عايزاه بس تسامحيني ونعيش حياتنا سوا مع بعض. على فكرة دلوقتي أنا بقا ليا فرعين شركة والاتنين شغالين، يعني إن شاء الله لما نجيب أطفال هنضمن مستقبلهم وهنعلمهم وهنربيهم.

وقاطعته ندي وقالت: هو أنا هروح أجيب منك أطفال عشان يتشردوا بعد كده؟ أنت عمرك ما هتكون زوج وأب مسئول، أنت مستهتر. حازم: والدنيا علمتني، وبعدين كفاية بقا يا ندي، أنتِ كبرتي الموضوع فوق اللازم وحرام عليكي اللي بتعمليه فيا ده. وبعدين هو أنتِ مبسوطة إنك بتذلي ليكي كده؟ ندي وقفت وقالت بعصبية: وأنت مستني مني إيه إن أسامح؟ طب وليه اتنازل عن كرامتي زي ما تنازلت عليها أول مرة لما جيت خطبتني من بابا؟

أول مرة وجيت قولتلي إنك بتحبني وهتعيشني أجمل عيشة وأنا صدقتك وبقيت أقف جنبك في أصعب ظروفك، وكنت دايما تشك فيا وتقوللي هو انتي اتأخرتي في الرد ليه؟ هو انتي بتكلمي مين؟ وريني تلفونك بتكلمي مين؟

كنت بعدي كل حاجة عشان بحبك وقولت لما نتجوز هيتغير. واليوم اللي المفروض يكون أجمل أيام في حياة أي بنت خليته أسوأ يوم في حياتي. وأنا لابسة فستان الفرح أشوف رسالة منك إنك سافرت ضروري عشان تشوف مستقبلك وفجأة ألاقي المحضر جايب ورقة طلاقي، تخيل طلاقي يوم فرحي، تخييييل كسرة قلبي وقتها كانت عاملة إزاي؟ تعرف إن فضلت أتعالج من الصدمة سنة كاملة؟

تخيل إن الناس فضلت تتكلم عليا ده. تخيل إن عمري ما دخلت حد حياتي عشان أحفظ قلبي وأصونه عشان اللي يستاهل، وطلعت أنت متستاهلش ده كله، وأنت ابن عمي؟ أومال لو غريب كنت عملت فيا إيه تاني؟ كانت بتتكلم ودموعها بتنزل بغزارة وهو كان ساكت تمامًا وعاجز عن الرد عشان هي عندها حق. ندي مسحت دموعها وقالت: أسوأ حاجة إن بينت ضعفي قدامك، أنت مش مصدر أمان ليا يا حازم ولا عمرك هتكون.

حازم: وأنا مش هيأس إنك تسامحيني. لو عرفتي الحقيقة هتسامحيني؟ ندي بسخرية: مفيش أي مبرر ليك يا حازم. صحيح نسيت أقولك، أنت لو مطلقتنيش بالذوق هخلعك.