رواية الورث الفصل الحادي عشر 11 - بقلم صلاح الديب

انت مين وفين عامر؟ مجهول: أنا اللي هحزنك عليه لو منفذتش اللي إحنا عايزينه. فهد: أيوه، أنتوا مين وعايزين إيه وفين عامر؟ مجهول: متقلقش، هو لسه حي، بس لو منفذتش متلومش غير نفسك. فاسمع الكلام كده وخليك شاطر علشان تاخد ابن عمك سليم. فهد: طب أي المطلوب؟ وإيه علاقة ابن عمي بالموضوع؟

مجهول: كده تعجبني. المطلوب هتجيب عقد الفيلا اللي اشتريتوها ومش هتاخدوا فلوسكم. وبالنسبة لابن عمك، لولاه مكنتوش عرفتوا تاخدوا الفيلا، بس ملحوقة وهترجعوها تاني. فهد: بس كده، أنا عرفت اللي فيها. أنتوا ولاد عم ريم تمام، وابن عمي عندكم. مجهول: برافو عليك. اسمع بقى الكلام علشان تاخد ابن عمك سليم. ساعة وهنرن عليك ألاقي العقد جاهز. ومتěحاولش تبلغ الشرطة علشان متندمش. سلام يا عمي الحبيب. فهد: الوو... الوو... ريم: في إيه؟

حصل إيه؟ وفين عامر ومالهم ولاد عمي؟ فهد: فيه إن ولاد عمك خطفوا عامر وبيهددوني بيه لو مرجعتش ليهم العقد. لا وكمان مش هيدونا فلوسنا. ريم: منهم لله. كلم المحامي يجيب العقد ومش عايزة الفلوس ولا الفيلا. المهم تنقذ عامر، ملوش ذنب.

فهد: باااس لحد كده وكفاية. هما في الأول كانوا بيلعبوا معاكي. المرادي بيلعبوا معايا أنا وابن عمي. أحب أعرفك مين عامر. عامر ظابط حراسات خاصة، وهو أول من علمني الدفاع عن النفس وعنده خبرة كبيرة قوي في التعامل مع اللي زيهم. ريم: أومال اتخطف إزاي؟ وهتعملوا إيه؟ أنا مش مطمنة. فهد: هقولك. قبل ما أبعت عامر ليهم، كنت معرفه كل حاجة والقصة كاملة، وكنا عارفين إن ده ممكن يحصل لو اكتشفوا إن الفيلا هتكون ليكي.

ريم: يعني أنت كنت عارف إن ده ممكن يحصل ومع ذلك خليته يروح؟ طب أهو اتخطف والفيلا والفلوس راحوا علينا. فهد: ممكن تهدي؟ أخلص كلامي. ريم: اتفضل. فهد: أنا زي ما قولتلك، كنت عارف إن ده ممكن يحصل، فاكيد هكون عامل حسابي. وبالفعل رجالتي موجودة هناك حالياً، وكل تحركاتهم مرصودة، هما وبيوتهم، وحتى مكان عامر معروف بالنسبة ليا. ريم: كل ده وأنا آخر من يعلم؟ طب ليه مقلتليش؟ وليه اتفاجئت لما كلموك؟

فهد: كان لازم أخبي عليكي، لأني مكنتش متأكد إن ده ممكن يحصل، ومكنتش عايزك تقلقي. وكنت عارف إنك هتخافي وتلغي الموضوع كله، وأنا مصدقت إنك وافقتي إننا نتخطب. اتفاجئت لما كلموني علشان يصدقوا نفسهم ويفتكروا إنهم مسيطرين علينا. ريم: ده أنت طلعت مش سهل خالص. طب وبعدين هتعمل إيه؟ فهد: هقولك. دلوقتي ولاد عمك مش كلهم متفقين على الموضوع ده، ولا يعرفوا عنه حاجة. ريم: إزاي؟

فهد: اللي ورا الحوار ده ابن عمك الكبير، واللي الفيلا كانت من نَصيبه، وهو اللي فكر وخطط للعملية دي علشان عارف إنك طيبة وهترجعيله الفيلا، وهياخد منك الفلوس، وتبقى الفيلا وحقه معاه. هقولك بس الأول أحب أعرفك على أهم عضو، وهو اللي نفذ خطتي بالحرف الواحد علشان نجيب ابن عمك ده ونوقعه، وأرجعلك حقك. ريم: كمان عضو جديد وخطة؟ أنا مش فاهمة حاجة. أنا حاسة إني معرفكش، وإزاي فكرت وخططت لكل ده وأنا معرفش؟

فهد: ريم، من أول يوم شوفتك فيه وأنا قررت إني أجيبلك حقك، من قبل حتى ما أحبك ولا أتعلق بيكي. ولما لقيتك خايفة عليا وخايفة منهم، محبتش إني أعرفك باللي هعمله، وبدأت أشتغل من وراكي. وأخيراً وقعت أكبرهم، وقريب هجبلك حقك بالكامل. ريم: إزاي وابن عمك مخطوف؟ ومين العصابة الخفية اللي أنا مش عارفاها؟ فهد: هقولك، بس الأول تعالي أعرفك عليه.