رواية الرديف الفصل الثاني 2 - بقلم اسماعيل موسى

أنا شغال عند حضرتك بستاني مش عبد. يعني لما تطلب مني أوقع على حاجة لازم أكون فاهم. مروان بيه رفع إيده. مراته قالت: اهدى يا مروان، خلينا نخلص. عايز تفهم إيه؟ عايز أفهم إيه؟ العقد ده وليه أمضي عليه؟ مروان بيه بفروغ صبر: دا عقد جواز. أنت هتتجوز بنتي وبعد تلت شهور هطلقها. وإيه اللي يجبرني على كده يا مروان بيه؟ هتاخد مبلغ محترم متستحقوش من غير تعب. أنا مش موافق يا مروان بيه، مش هبيع نفسي عشان الفلوس.

مروان بيه ضحك: آه قول كده بقى. أنت بتلف وتدور عايز تزود الفلوس. خلاص هديك ١٠٠٠٠٠ يلا وقع وخلصنا. قلت لحضرتك أنا مش للبيع. مرآة مروان بيه قالت: اخلص قول مبلغ وأنا هكتبه ليك. تنهدت، قلت لحضراتكم أنا مش للبيع. ابنهم رغد كان قاعد، وقف في مكانه وقال: لا دا أنت عايز تتربى بقى. يومين تلاتة في السجن كافيين لكده. مروان بيه صرخ: اسكت يا رعد! اخلص يا ابني وانطق عايز إيه؟

أنا لو مضيت على العقد هيكون عشان أنا عايز كده مش عشان فلوسكم. مخدم ليكم معروف. رعد صرخ: لا بقى أنت زودتها أوي. قلتلك يا بابا دا عيل كلب. تلاقي عايز مليون ولا اتنين. سمعت الكلمة والدم غلى في عروقي. مسكت القلم ومضيت على العقد. أنا مش عايز منكم حاجة. رميت القلم على الترابيزة وخرجت. بعد شوية طلع مروان بيه ورايا. قال: أنت مش هينفع تشتغل في الجنينة دلوقتي. دا مهما كان اسمك جوز بنتي.

مش لازم تظهر خالص غير لما المدة تخلص ومرتبك هيوصلك كل أول شهر. غيرت هدومي وخدت بعضي ومشيت. مكنتش طايق أقعد أصلاً وقرفان من الناحية دي. فضلت أكتر من عشرة أيام على الوضع ده لحد ما تليفوني رن برقم غريب. شوية اتخضيت. رقم فخم. قلت: الو. سمعت صوت نسوي بيرد عليا. ألو. أنا صوفيا الشماخ. بلعت ريقي. أهلاً صوفيا هانم. أنت مهند إلى شغال عندنا في الجنينة؟ أيوه أنا يا صوفيا هانم.

صوفيا: مممم. لو أنت مهند مينفعش تقول لمراتك يا هانم. مش كده ولا إيه؟