رواية التقاء القلوب الفصل الحادي عشر 11 - بقلم حليمة عدادي

غزال اتصدمت من منظر بيجاد، كان واقع على الأرض ومناخيره نازل منها دم وجسمه بيتشنج. جريت ناحيته بخوف، حطت رأسه على رجلها. غزال بدموع: بيجاد حبيبي إنت سامعني؟ حصلك إيه دا؟ دادة، يادادة تعالي بسرعة. طلعوا كلهم يجروا على صوتها. سليم: إيه اللي بيحصل هنا؟ ماله بيجاد؟ غزال: إعمل حاجة أرجوك، أنا دخلت لقيته واقع ومناخيره بتنزف وجسمه بيتشنج. سلمى: إبعدوا عنه، دا لأنه مأخذش دواءه في ميعاده.

قربت منه سلمى وحطت حبة دواء في بوقه وشربته ميه علشان يبلعها. جسم بيجاد بدأ يهدى تدريجيا. سلمى: بعد شوية هيفوق وهيبقى كويس، سيبوه دلوقتي علشان يرتاح. خرجت سلمى هي وابنها وهي مبتسمة بخبث. غزال: دادة إيه هي الحبوب اللي أخذها بيجاد؟ دادة: مش عارفه يابنتي، بس دي حاجة مش كويسة. غزال: لازم آخذ بيجاد للدكتور وأكشف عليه وأشوف فيه إيه. زينة: أول مايفوق بيجاد هخرجه من الباب الخلفي وخذيه. غزال: أنا هبقى جنبه لحد مايفوق.

خرجت زينة. غزال قعدت جنب بيجاد. غزال: مش عارفه اللي بعمله دا صح ولا غلط، بس اللي أعرفه إني لازم أخرجك من هنا. *** دخلت فريدة ومعاها الجارد. شالوا سعد دخلوه أوضته. فريدة: كلموا الدكتور يجي بسرعة وحطوا البت دي في المخزن. أمل: أنا هقتلك إنتي وهو ياكلاب. فريدة بحده: لو حصله حاجة أنا هدفنك مكانك. أمل: ههههه روحي شوفيه يمكن يكون مات، ابقي إدفنيه وتعالي علشان ابعتك لعنده في جهنم. فريدة قربت منها بغضب وضربتها بالقلم.

فريدة: هخليك تتمني الموت وماتلاقيهوش يابنت الشوارع. الجارد: فريده هانم، الدكتور وصل وأخذته لأوضة سعد بيه. فريدة بعصبية: يلا كل واحد يشوف شغله، مش عايزة حد يسمع باللي حصل وفتحوا عينيكم كويس علشان متهربش. أمل: إبعدوا عني ياكلاب، أنا هقتلكم، إنتوا دمرتوا حياتي. *** بيجاد فتح عينيه وبص على غزال. شافها مغمضة عينيها. بيجاد بهمس: غزال، غزال. غزال فتحت عينيها قامت مفزوعة مسكت إيده. غزال: بيجاد إنت كويس؟ حاسس بحاجة؟

بيجاد: متخافيش، أنا كويس بس تعبت شوية. غزال: قوم معايا يلا، بس من غير صوت، إحنا هنخرج من هنا. بيجاد بفرحة: بجد؟ هنروح عند ملاكي؟ يلابينا. غزال: أنا هنزل للمطبخ وإنت انزل ورايا، لكن من غير ماحد ياخذ باله. بيجاد: حاضر، أنا هعمل كدا، مش هخلي حد ياخذ باله مني. غزال نزلت. وهي نازلة سمعت سليم بيتكلم مع والدته. قربت أكتر علشان تسمع بيقولوا إيه. سليم بعصبية: إنتي قلتي هنخلص منه، لحد إمتى هتفضلي تديله من الحبوب دي؟

سلمى: لو قتلته هيكون في تحقيق وسين وجيم وأنا ماليش مزاج للمشاكل، هفضله أديه من الحبوب دي ويبقى كدا طول عمره. سليم: أتمنى مايحصلش حاجة، وعمي خالد يكشفنا. غزال من الصدمة رجعت لأوضة بيجاد، مسكت إيده ونزلت تجري. زينة: مالك يابنتي؟ حصل إيه؟ غزال: بسرعة يادادة، مافيش وقت، ساعدينا علشان نخرج من هنا. زينة: تعالي وريا، بصي الباب دا هتخرجي منه للشارع. غزال: متشكرة يادادة.

زينة: خذي الفلوس دي خليها معاكي علشان تكشفي عليه، يلا روحوا ربنا معاكم. خرجت غزال وهي خايفة لحد يشوفها. وصلت الشارع وقفت تاكسي. السواق: رايحة فين ياهانم؟ غزال: وصلنا لأقرب مستشفى. *** رحمة: وصلت لحاجة يابني؟ أنا قلقانة على أمل. سيف: لسه ياماما، اديني مستني اتصال من مديرة الملجأ. رحمة: البنوتة دي ماعرفتش حاجة عن أمها. سيف: لا ياماما، مشغولة مع أمل ومقصر في حق بيجاد. سمعوا دق على الباب. سيف: أمل.

وقف جري يفتح الباب شاف قدامه غزال وبيجاد. سيف: بيجاد حبيبي، اتفضلوا ادخلوا نورتوا. رحمة: أهلاً بيك يابني، وحشتني، إزيك. غزال: مش كويس، سلمى وابنها بيخلوه ياخذ حبوب علشان يبقى كدا ومايخفش. سيف: عرفتي دا كله إزاي؟ قصت عليه كل حاجة من وقت مابيجاد وقع في أوضته لحد ما اخذته للمستشفى. سيف: والدكتور قال إيه عن حالة بيجاد؟ غزال: قال إن بيجاد بدأ يتحسن ومفعول الحقن خلص من جسمه، بس قال إنه بيأخذ دوا يخليه يفضل كدا ومايخفش.

سيف: وهتعملي إيه دلوقتي إنتي وبيجاد؟ غزال: هاخذ بنتي وبيجاد وهمشي من هنا، أنا بشكركم. سيف: هتروحوا فين؟ خليكوا قاعدين هنا لحد ماخالد بيه يرجع. غزال: لا، أنا خايفة يلاقوا بيجاد هنا. شالت ملاك ومسكت إيد بيجاد. غزال: متشكرة أوي، اطمنوا بيجاد هيكون معايا بأمان. خرجت بسرعة من غير ما تسمع رد منهم. رحمة بزعل: لاحول ولا قوة إلا بالله، هتعتني بيه إزاي وسط كل الافاعي دول.

سيف: باين إنها بنت قوية، أنا سمحت لها تروح علشان عارف إنهم هيدوروا عليه هنا. رن تليفون سيف. بصله كان رقم غريب. سيف: السلام عليكم، مين معايا؟ المديرة: أنا مديرة الملجأ اللي سبتلي رقمك الصبح. سيف بلهفة: عرفتي حاجة عن العيلة اللي اخذت أمل؟ المديرة: ................... *** دخلت فريدة وهي تبتسم ابتسامة خبيثة. أمل: جوزك الواطي مات علشان ابعتك ليه؟ فريدة: ههههه لسه عايش اطمني، بس عندي ليكي مفاجأة.

أمل: اشكالكم ما تعرفش المفاجأت، اطلعي بره. فريدة: جبتلك الراجل اللي هيخليكي تجيبيلي بنت تانية. أمل بتوتر: إنتي تقصدي إيه؟ إ.. فجأة دخل واحد ضخم البنية وشكله يخوف. فريدة: ههههه بص، إنت اعمل زي ماطلبت منك. وإنتي يا اموله، دا أبو بنتك أو ابنك الجديد. خرجت وهي بتضحك ضحكات شيطانية.