رواية ام نص لسان الفصل الثالث 3 - بقلم حنين عادل

ريم بصدمه: يا رب ما يكونش اللي في بالي. حمام رجال. يبصوا لها اللي واقفين بقرف واستغراب. بتبتسم ابتسامه هبله وبتطلع تجري بتخبط في واحد داخل. بيبصلها من فوق لتحت بقرف. نادر: اومال لو كنتي حلوة بقا كنت عملتي ايه اكتر من كده. ريم: انت بتقول ايه يا استاذ انت. نادر: ههههه كمان لدغة. بيزقها ويدخل وهوا قرفان منها. ريم بتحط ايدها علي دماغها: هوا فهم ايه. دخلت تاني. ريم: انت يا استاذ انت كنت بتقول. عاااا.

بيبصلها بقرف وهيا بتلف وشها وبتطلع تجري. يعدل هدومه وبيغسل ايده وبيبص في المرايه وبيطلع. ريم: نهار اسود ايه اللي عملته ده. بتروح للبنت اللي في الاستقبال. سوزي: خلصت. ريم: ياه راحة. سوزي: بس انتي روحتي حمام الرجال. ريم: ههههه ما انا عرفت انتي كنتي متعمدة. سوزي: واتعمد ليه انا ندهت عليكي عشان اتلخبطت انتي اللي جريتي زي الهبلة. ريم بتخبطها في كتفها بضحك. ريم: جاتك إيه دمك زي العسل. بتمسك سوزي ايدها بألم.

ريم: وجعتك أنا آسفة جدا جدا. بتبص لها سوزي بعصبية. ريم: خلاص قلت آسفة طب ممكن تديني شنطتي وانا كا ريم هاخليكي مش تشوفي وشي تاني خالص. بترمي ليها سوزي الشنطة علي الأرض. بتبتسم ريم وبتتك علي شفايفها وهيا بتضحك ضحكه صفرا. ريم: شكرا يا ذوق. بتوطي ريم تجيب الشنطة وهيا متغاظة منها بتوقع نضارتها. مابتبقاش شايفه حاجة بتلاقي الدنيا مرغوشة. ريم: النضارة فين ياربي هوا انا ناقصة يعني ولا ناقصة ساعدوني يا منعدمين الضمير.

كل اللي واقفين بيتجمعوا حواليها وبيقعدوا يضحكوا وهيا عماله تحسس علي الأرض ومش شايفه حاجة. بتفتح شنطتها وبتطلع الشمسيه بتاعتها. ريم بتفكير: انا هاوريكم يا اوباش. ريم: إيه ده دبانه سامعينها دي اللي بتقرص يا ماما دي بتورم وصعبة اوي خالص. بيبصوا حواليهم يمين وشمال مش بيلاقوا حاجة. ريم: ماتقلقوش انا هاريحكم منها. بتقوم ريم والدنيا مرغوشة وبتقول هنا وبتضرب الناس اللي واقفه ومش بتتفاهم بسرعه ماحدش كان لاحق يمشي.

ريم: ياه اخيرا ماتت يلا العزاء قاصر. محدش شاف نضارتي. بيبعدوا عنها كلهم وفي اللي ماسك ايديه وفي اللي ماسك رجليه وبيدعوا عليها وهيا بتضحك. بتفضل تدور ومش شايفه حاجة لحد مابتشوف جزمه. بتقف ريم. ريم: حاسة ان الدبانة لسه موجودة. ولسه راحت تضرب بيمسك الشمسيه منها وبيمسك ايدها وبيلبسها النضارة. بتكون قريبة جدا منه. بتبص في عينيه وبتسرح وعيونها زي مابتكون بتطلع قلوب. ببصلها ببرود: خلصت. ريم بتوهان: إيه. نادر: خلصتي بحلقة.

ريم بتبعد عنه بخجل. ريم: وانا ابحلق فيك ليه إن شاء الله من حلاوتك ولا طعامتك. نادر: انتي بتقولي ايه. ريم: ليه بتكلم انجلش مش فاهم. نادر: انتي شكلك مجنونه انا غلطان اني ساعدتك اصلا ابعدي يا شيخة بلاش قرف. وبيمشي. ريم: اهو انت. نادر وقف: انتي بتقولي ايه. ريم: هوا انا هاخاف بقول اهو انت. هابيمسكها نادر من ايدها وبيمشي وهيا وراه. ريم: سيبني يابتاع انت سيبني انت هاتعمل ايه. نادر: انت تخرسي خالص.

بتحاول تفك نفسها منه بس مافيش فايدة. بيدخل مكتبه وبيزقها علي الكرسي. ريم: ااه ليه كده يا شبح. نادر: عيدي كده قلتي ايه. ريم: هههههه انت اتعديت لسه اللي جاي تقيل. نادر: يخربيتك عدتين. ريم: احلي عدوي دي ولا إيه المهم انت كنت جايبني هنا ليه. نادر: عشان. ريم: استني معقول هاتخطفني وبعدين نعيش احلي قصه حب. نادر ببرود: لا انا كنت. ريم: استني معقول انت من اعداء بابا وعايز تنتقم منه فيا وتخطفني وتعذبني ونعيش احلي قصه حب.

نادر: لا. انا. ريم: استني. معقول. نادر بعصبية: اخرسي ما اسمعش صوت خالص. ريم: مابراحة علينا يا عم انت ما انا مستنياك تقول ومش بتنطق. نادر: اسكتي خالص إيه الوقعه اللي وقعت نفسي فيها دي. ريم: وقعه عسل صح انت امك داعياك. نادر: داعيه عليا ممكن تسكتي دقيقه وتسيبك من الروايات الهايفة اللي بتقريها دي. ريم: ما اسمحلكش دي روايات جامدة ما تغلطش فيها. نادر: يادي النيلة يازفتة افصلي شوية. ريم: زفتة في عينك يا سافل.

نادر بيكور ايده بعصبية. ريم: مالك انت هاتتحول ولا إيه طيب هاتقلب زومبي ياخسارة كان نفسي تبقي مصاص دماء وتعضني ونعيش العمر مع بعض. نادر: بس بقا افصلي انتي ايه. ريم: قبيظ بجنيه هههههه. بيقرب منها بعصبية. ريم: خلاص. آسفة هوا في ايه. عااااااااا.