رواية امنة عطاء وقسوة الفصل الرابع عشر 14 - بقلم ريهام علي

تحت بيت مراد عزام. منزل سامح ولسه بيلف عشان يجبله الشنطه. بس كان اتنين راكبين موتوسيكل وواحد منهم موجه مسدس على سامح. مراد: حاسب يا سامح. وجري زقه بعيد. سامح: مراااااااااااااد. ضربوا رصاصه جت في دراع مراد. سامح: جري عليه بسرعه وقال بلهفه. أ.أ.أنت كويس يا مراد.. طمني فيك حاجة. مراد: بألم. لا لا متقلقش الحمد لله دي جت في دراعي بس مفيهاش حاجة. سامح: طب يلا بسرعه نروح المستشفي.

مراد: بألم واضح. ي.ي.ياريت لاني حاسس أننا بنام من الالم. شال سامح وركبه العربيه تاني ومشيوا راحوا للمستشفي. وبدأ الدكتور يعمله الاجراءات الطبيه اللازمة. *** عند نهي وهشام. وصلت نهي عند بيت صحبتها ولسه هشام هيطلع للعماره معاها. نهي: انت رايح فينه. هشام: طالع معاك. نهي: طالع معايا فين انت كمان.. انت عبيط ياله ولا عندك خال اهبل. هشام: يابت لمي نفسك أنا جاي معاكي احرصك، خلي عندك دم.

نهي: اترزع هنا بقولك على ما اطلع احضر عيد ميلادها وانزل.. عقبال ما احضر جنازتك. هشام: عقبال ما نحضر جنازة لسانك يا شيخه. في الوقت ده جت عليهم صاحبة نهي وكانت اسمها دنيا. دنيا: هاي يا نونه.. واقف ليه كده. نهي: بلا كنت طالعه اه. دنيا: بصت لهشام وابتسمت وقالت مش تعرفينا يا نونه مين الجنتل ده. هشام: تسلمي يا مزه.. وبص لنهي وقال شايفه المزز اللي بتفهم، يعني مزه وذكيه مش زيك. نهي: اتلم احسنلك.

ومسكت ايد دنيا وقالت يلا يا دنيا. دنيا: شدتها وقال بس استني بس.. مين ده بجد. نهي: ده البادي جارد بتاعي، خلاص بقى. دنيا: واوووو هو فيه بادي جارد مز وصغير كده.. بيجيبوه منين ده. هشام: ده حجم جديد لسه منزلينه السوق، ولو مشي ان شاء الله فيه دفعه تانيه هتنزل وكلها مزز وصغيرين زيي كده. دنيا: ههههههههه دمك خفيف اوي.. انت اسمك إيه. هشام: اسمي هشام او اتش اللي يعجبك يا عسل. دنيا: اتشرفت بيك يا هشام.. انا دنيا.

هشام: اسم على مسمى. وغمزلها. نهي: اجبلكوا اتنين ليمون ولا حاجة. هشام: باستفزاز. واتنين شاليموه كمان مع الليمون عشان موقعش على نفسي. نهي: طبعا منتا فلاح وجاي من الفلاحين. هشام: احسن من البندر واخلاقهم سفاحين. دنيا: ههههههههههههه الله انتو كوميديان خالص. نهي: ما تخلصي بقا خلينا ننجز. دنيا: بص يا اتش انا هحضر عيد الميلاد وهنزل مع نهي تاني، مش انت هتفضل موجود. هشام: واحتمال لما تطلعي تلاقيني موجود برضه.

دنيا: هههههههه عسل. عسل. نهي: بصل. بصل. هشام: بص لنهي وقال مازوت. مازوت.... يلا بسرعه ومتتاخروش. دنيا: اوكي. باين. نهي: يلا بقا يا دنيا. واخدتها وطلعوا لصحبتهم. *** في بيت مراد عزام. كانت آمنه واقفه في البلكونه سرحانه وطلعت امل تقف معاها. أمل: الجميل سرحان في إيه. آمنه: ابتسمت وقالت أبدا مفيش.. بس حسيت أننا زهقانه فقولت اطلع اشم شوية هوا. أمل: هتضايقي لو غلست عليكي ووقفت معاكي.

آمنه: ابتسمت وقالت بتستاذني من بيتك يا أمل. أمل: وهيبقي بيتك ان شاء الله.. بس انتي تليني دماغك. آمنه: اتنهدت وقالت قولي يارب.. المهم نادر اخباره ايه. أمل: انا مكنتش بكلمه دي دعاء اللي كانت بتكلمني. آمنه: وهيه عامله ايه وحازم وتالا. أمل: تعبانه اوي في بعدك يا أمونه بصراحه.. صدقيني دعاء بتحبك اوي، ويمكن تكون غلطت لما اتفقت معاهم، بس ده من حبها فيكي.

آمنه: مهو اوقات لما تحبي حد بزياده الحب ده بيتقلب ضدك.. يحسسك انك ملكه وبس مينفعش تبعدي عنه. واتنهدت وقالت: بصي يا أمل الحب يعني عطاء، يعني مش ينفع انتي تحبي ومتلاقيش حب مقابل.. هتحسي انها انانيه من الطرف التاني. يعني انتي مثلا لو نادر قالك لازم نعيش مع اهلي.. وانتي ليكي حرية الاختيار رايك هيكون إيه. أمل: هوافق طبعا، ودا لاني بحبه ومستعده اعيش معاه في اي مكان، ولاني كمان عرفاه هيحترمني وهيعملي كرامه مع اي حد.

آمنه: بتحبيه.. يعني عندك مبدأ العطاء، وانتو الاتنين كل واحد فيكم بيعمل حاجة للتاني عشان عارف التاني هيقدرها وهيعمله اضعافها.

لكن أنا للاسف.. أنا عطيت كل حاجة ليهم ومكنتش منتظره منهم حاجة.. أنا كل اللي كنت منتظراه هو راحتهم وبس، أنا لو كنت عايزه اسيبهم واشوف حياتي كنت وافقت على أي حد جالي من بعد جوزي الله يرحمه وآخرهم مراد لما اعترفلي بحبه وطلبني للجواز، لكن أنا موافقتش وأقنعت نفسي اننا ليهم الام والاب بعد ما حماتي اصبحت شبه كفيفه.

يومها مراد قالي كلمة لحد دلوقتي بترن في وداني.. قالي مش كل الحب اللي بنعطيه بناخد مقابله حب، اوقات بناخد مقابله أنانية واستبداد. واتنهدت بوجع وقالت: وللاسف كلامه كان صح جدا. أمل: ان شاء الله كل حاجة هتتحل.. هيه بس لو كاميليا بنت عمتي تبعد عنكو، والله هتبقوا كويسين. آمنه: مرتحتلهاش من اول مرة شوفتها فيها واحساسي طلع صح. حساب واحد جارتنا كانت بتعشقه وبتتمني تراب رجله عشانها.. بس ربنا عوضها بواحد احسن منه مليون مرة.

أمل: وانتي كمان يا أمونه ربنا عوضك بمراد اخويا.. مش عشان أخويا والله بس فعلا مراد كويس اوي وانا حبيتك اوي واتمني توافقي بقا. آمنه: اتنهدت وقالت قولي يارب. *** في المستشفي. كان مراد بدأ يفوق من مفعول البنج.. ولقى سامح قاعد قصاده وبيضحك. مراد: باستغراب. بتضحك على إيه يا اهبل انت.. انت فرحان فيا ولا ايه.

سامح: هههههههه لا ابدا بس مكنتش متخيل انك بتحبها اوي كده.. طول ما انت في البنج بتنادي عليها، ده انا هفضحك قدامها بس استنى. مراد: ابتسم وقال طب بطل سخافة يا خفيف وقولي هينفع نروح ولا لا. سامح: لا مينفعش الدكتور قال لازم يومين على الاقلام. مراد: طب اسمع. انت هتروح البيت عندي بس هتدخل شقة عم ناجي متتلخبطش وخد المفتاح من عندك اهو وروح هاتلي شوية هدوم عشان اغير وحاول متخليش حد يشوفك. سامح: طب هشام مش بيبات فيه.

مراد: أيوا بس بيروح متاخر بيسهر مع آمنه وأمه.. انت إلحق روح دلوقتي. سامح: حاضر.. مش هتاخر عليك. *** عند نهي وهشام. خلصت نهي عيد ميلاد صحبتها ولسه هتمشي ندهتلها دنيا. دنيا: استني يا نونه آجي معاكي اشوف البادي جارد العسل اللي معاكي تاني. نهي: بغيظ. لو عاجبك الفهولك في هديه يا ختي. دنيا: ياريت يا نونه.. عسول اوي يا بختك بيه. نهي: أنا ماشيه اصل انا نفسي بتميع من السهوكه دي. وسابتها ومشيت. نزلت نهي

لهشام وهيه لوحدها وقالت: يلا. هشام: فين دنيا المزه. نهي: اتغاظت منه. وقالت ايه حكايتكم بالظبط هيه تقول عليك عسل وانت تقول مزه ما تتلموا كده. هشام: بتغيري عليا يا بيضه. نهي: بيضه لما تطقش على دماغك.. انت أهبل ياله.. اخلص بقا ويلا بينا نمشي. هشام: يلا يا ختي. واخدها ورجعوا للبيت تاني. دخلت نهي البيت لوحدها وكان هشام واقف على الباب. آمنه: إيه يابني عايز عزومه.. ما تدخله. هشام: لا يا امونه أنا هدخل أنا خليني ارتاح شويه.

آمنه: ماشي يا أتش براحتك. دخل هشام للبيت وهو بيفكر في نهي وبيضحك.. وبقى يقول لنفسه: مفيش مرة اتكلمت معاكي صحيح الا لما بتهزقيني.. بس مش عارف قلبي بيرقص من الفرحه لما بشوفك ليه.. ربنا ما يحرمني من مازوتك. وضحك. *** في بيت صابر. كان صابر قفل بقالته وطلع لبيته ولقى فتون وبدور صاحيين. صابر: لسه صاحيين ليه يا بنات. فتون: كنت بكلم سامح ووصل بالسلامه. صابر: طب الحمد لله يا بنتي.. حمد الله على سلامته.

فتون: الله يسلمك يا بابا، تعرف زميله اللي اسمه مراد عزام. صابر: أيوا اعرفه ده شهد على عقد جوازك.. ماله؟ فتون: اتصاب في دراعه النهارده. صابر: استر يارب.. طب وهو كويس. فتون: آه الحمد لله فاق. صابر: ربنا يحميهم يارب ويسترها معاهم. بدور: بابا كنا عايزين نستاذنك عايزين ننزل القاهره نجيب شوية لبس. صابر: وهو اتمنع اللبس في الشرقيه يا بدور لما تسافري للقاهره. بدور: ل.ل.لا ماهو هيبقي معانا ابراهيم وسامح. صابر: نعم!!

لا طبعا مينفعش. فتون: ليه يا بابا مهو سامح جوزي. صابر: لسه مبقاش جوزك يا بنتي.. لما تدخلي بيته يبقي جوزك، والاستاذ ابراهيم خطيبك وبس فاهمين.. والطلب ده ميتكررش تاني. وسابهم ومشي. فتون: أحنا غلطنا برضو.. قولتلك بلاش. بدور: اسكتي بقا، وفيها إيه يعني.. البلد هنا اللي بتتكلم بس. فتون: خلاص بقا نروح لاي محل هنا وخلاص. بدور: أمري لله. *** في شقة مراد. كان هشام نايم لوحده على السرير بيفكر في نهي وحس بحد بيفتح باب الشقه.

وقف مفزوع واتسحب وفتح الباب فتحه صغيرة يشوف مين بس كان بضهره ودخل لاوضة مراد. هشام: لطم على وشه وقال بصوت واطي.. يا ختاااااي ياختاااااي ياختاااااي، انا مش بتاع اكشن ولا جو الحراميه القذر ده.. واخد نفس عميق وقال لنفسه: اهدي كدا يا اتش واطلع انفخه انت هتبقي ظابط يلا. آه. ورجع جاب المقشه واتسحب ودخل براحة لقاه بيلم هدوم من الدولاب. هشام: لنفسه. ده ايه الحرامي القنوع ده.. بياخد هدوم بس.. بس لا لازم امسكه.

وقرب من سامح وضرب بالمقشه على راسه وسامح طلع سلاحه بسرعة. هشام: غمض عيونه وقال والنبي ما تقتلني ده انا غلبان ويتيم. سامح: ههههههههه يا فار. هشام: فتح نص عين وقال سامح!! انت الحرامي وبتسرق صاحبك. سامح: حرامي مين يا عبيط.. انا جاي اخد غيارات لمراد بيني وبينك انضرب بالنار وهو في المستشفي. هشام: إيه!!! وحصله حاجة. سامح: إيه الغباوه دي بقولك انضرب بالنار هيكون ايه اتلسع. هشام: شوفت مين فينا اللي لمض.. اخلص حصله ايه.

سامح: دراعه اتصاب بس.. بس الحمد لله عدت على خير. هشام: طب انا هاجي معاك. سامح: بلاش لحد يحس انك مش موجود. هشام: لا لا كلهم ناموا اصلا يلا بينا. *** في بيت دعاء وحازم. كانت دعاء بتلعب في تالا ورجع حازم من الشغل. حازم: مساء الخير. دعاء: مساء الخير يا حبيبي. حازم: قرب من دعاء وباس راسها وباس تالا في خدها وقال: طمنوني اخبار يومكم ايه. دعاء: هيكون إيه يعني.. مقضينه من الصاله للبلكونه للاوضه للمطبخ،

واتنهدت وقالت: مفيش جديد في حياتي. حازم: لا يا ستي الجديد جد خلاص.. الف مبروك يا حبيبتي انتي نجحتي. دعاء: ابتسمت وقالت بجد. حازم: عقد حواجبه وقال. غريبه يعني كنت فاكرك هتكوني فرحانه اكتر من كده. دعاء: اتنهدت بوجه وقالت. مفيش حاجة بقت تفرح من يوم ما سابتنا ومشيت يا حازم. حازم: ضمها لحضنه وقال كل حاجة هتتحل ان شاء الله.. المهم قومي انتي وتوته غيروا هدومكم ويلا نطلع نتعشى بره. دعاء: طب ما أنا طبخت.

حازم: خلاص نأجل الفسحة لبكره ونتعشى بره وانا كدا كدا عندي اجازة. دعاء: ربنا يخليك ليا يا حازم. *** أشرق صباح يوم جديد. صحت آمنه من نومها تجهز الفطار وراحت عشان تنادي هشام بس مفتحش ليها. قلقت عليه ودخلت لامل عشان تجيب المفتاح ولسه طالعين يفتحوا الشقه لقوا هشام طالع على السلم. آمنه: كنت فين يا هشام بدري كده. هشام: أحمم.. لا لا ابدا بس كنت بتمشي شوية. آمنه: أنت بتكذب يا هشام.. قولي كنت فين.

هشام: ه.ه.هكون بكذب ليه بس يا أمونه. آمنه: عشان انا اللي مربياك يا قلب أمونه.. انطق وقول فيه إيه، وكنت فين. هشام: مش عارف بس مش مصدقاني ليه. أمل: ما تنطق بقا يا عم انت وريحها. آمنه: أنا مش هتحايل عليك كتير.. وعلت صوتها اكتر وقالت: اخلص وانطق كنت فين. هشام: ك.ك.كنت عند مراد في المستشفي. أمل: بخضه مراد أخويا.. ماله!! آمنه: م.م.ماله مراد.. انطق يا هشام متنقطناش بالكلام.

هشام: أ.أ.أصله انضرب عليه نار امبارح واتصاب في دراعه بس هو....... وصرخ بصوت عالي وقال: آمنه. آمنه سمعت الخبر أغمي عليها. *** في المستشفي. دخلت آمنه لمراد وهيه بتجري عليه وبتعيط. آمنه: طمني عليك انت كويس. مراد: استغرب رد فعلها وقال آه آه كويس.. اهدي انتي بس.

آمنه: بصوت عالي. أهدي إيه وزفت إيه بس على دماغك.. انا مش عارفه انت عاجبك إيه في الشغل الأسود ده يا أخي، أنت إيه.. مش حاسس بالارواح اللي متعلقه في رقابتك، مش عارف تاخد بالك من نفسك لو مش عشانك عشاننا احنا يا أخي. مراد وسامح بصوا لبعض واستغربوا موقف آمنه وخصوصا أن لهفتها ظهرت عليه. في الوقت ده دخل هشام وأمل، وجريت أمل عليه وحضنته وهو بيعيط. أمل: الف سلامه عليك يا حبيبي ان شالله انا مكانك.

مراد: باس راسها وقال بعد الشر عليكي يا حببتي. وبص لهشام وقال برضو قولتلهم. هشام: قفشوني والله. آمنه: قولي الدكتور قالك إيه. مراد لسه هيتكلم بس قطع سامح كلامه وقال: مكدبش عليكي والله يا أم سيف الدكتور قالنا..... وسكت وقال مش عايز أقلقكم بس كويس انها جت على قد كدا. آمنه: بقلق إ.إ.إيه هو قال حاجة خطر ولا إيه يا سامح. سامح غمز لمراد بمعني انه يكمل معاه الفيلم ويشوفوا لهفة آمنه الآخر.

أمل: ما تتكلم يا مراد فيك إيه يا حبيبي تاعبك. سامح: يا جماعه متكتروش الكلام معاه عشان كتر الكلام غلط عليه. آمنه: خلاص خلاص بلاش تتكلم خالص.. المهم انت أكلت. مراد: آه جابولي الفطار من شوية. آمنه: طب روحوا انتو الكل وانا هفضل معاه. سامح: ملوش لازمة وجودك يا أم سيف.. كدا كدا مراد هينام. آمنه: مش مشكلة برضو هفضل جنبه يلا روحوا انتو الكل. أمل: أنا هفضل معاكي يا آمنه.

آمنه: لازم تروحي عشان نهي والاولاد يا أمل.. مينفعش أحنا الاتنين نغيب. هشام كان بيبص لآمنه بإستغراب ومستغرب لهفتها بالشكل ده على مراد.... بص لسامح وهز راسه بمعني إيه ده. مح هز كتفه ببراءة بمعني معرفش. آمنه: يلا بقا متفضلوش تبصوا لبعض كدا. أمل: طب هجيلك تاني أطمن عليك يا مراد. مراد: ماشي يا حببتي. مشي هشام وسامح وأمل وقعدت آمنه مع مراد لوحدهم. آمنه: ابتسمت وقالت حمدالله على سلامتك.

مراد: ابتسم وقال الله يسلمك.. بس اول مرة اعرف اني مهم بالنسبالك كدا. آمنه: عقدت حواجبها وقالت اشمعنا!! مراد: ضحك بتعب وقال.. اول مرة لهفتك عليا تبان عليكي. آمنه استغبت نفسها جدا انها اندفعت بمشاعرها وقامت وقفت وقالت: أحمم أ.أ.أنا لازم امشي. مراد: وهتسيبيني لوحدي كده. آمنه: هلحقهم وابعتهملك.. يلا سلام. ولسه هتمشي فعلا بس مراد تصنع التعب وقال بصوت ضعيف: آ.آ.آمنه استني أنا تعبان.

آمنه وقفت ولاول مرة صراع يدور جواها.. صراع ما بين القلب والعقل. مراد: آمنه أنا آسف بس ارجوكي متسيبينيش. آمنه: اتنهدت وقالت طب هخرج بره شوية وهرجعلك تاني. وسابته ومشيت. مراد: نام على ضهره تاني وقال لنفسه: أنا اللي غبي برضو كان لازم تندفع يا خويا وتقولها الكلمتين دول آهي مشيت وسابتك.... نام بقا بحصرتك، جتني الهم عيل فقري والله. بعد شوية رجعت آمنه بس لقت مراد نايم..

اتنهدت وقالت: سامحني لو ببعد عنك.. بس يمكن خايفه اقرب وانت تعرف اللي فيها تبعد، وخايفه اسيبك كدا متعرفش وتتعلق بيا ولما تعرف وتقرر تبعد أبقي شيلت ذنبك اني وجعتك. واتنهدت بحرقة وقالت يارب.... يارب ريح قلبي بقا واختارلي الخير، وانت عارف إني دايما راضيه ومؤمنه بقضائك يارب. *** مر حوالي اسبوع على حالة مراد.

وكانت حالته اتحسنت تماما، وكانت آمنه بتحاول تزوره وبس.. لكن مكنتش بتفضل معاه كتير.. او تسيبله فرصة يكونوا لوحدهم فيها. وفي يوم كان سامح بس اللي مع مراد.. وخبط الباب ودخل منه معتز وكاميليا. مراد: معتز!!! انت عرفت منين. كاميليا: عرفنا من بابي طبعا.. ليه مكنتش عايزنا نجيلك ولا ايه. مراد: يعني... مكنتش حابب ان حد يتعب معايا. معتز: تعبك راحة يا بوص.. بس قولي عرفتو مين اللي عمل كده.

سامح: لسه هنفرغ الكاميرات اللي حوالين البيت وهنجيبهم ان شاء الله. كاميليا: ان شاء الله تقبضوا عليهم المجرمين دول. مراد: انتو رجعتوا هنا ولا لسه في البلد. كاميليا: تتصور يا مراد زوز مش عايز يسيب البيت.. بيقولي هنبقي كلنا سبناه كده. مراد: بلؤم. كلكو!! ليه فين هشام وحازم. كاميليا: بحزن مصطنع. للاسف سابوا البيت.. كل واحد ساب حاله ومشي يشوف حياته يصح كده.. ومعتز يا حبيبي مقطع نفسه ما بين شغله وانه يراعي الارض.

سامح: بسخرية. لا بيتعب اوى. معتز: احمم.. بقولك يا مراد عملت ايه في موضوع امونه اللي قولتلك عليه. مراد: بغيظ. أمونه!! يعني منين مسرقها ومنين امونه. معتز: عادي بس كمني واخد على كده.. المهم لقيته. مراد: هلاقيه ازاي يعني، انا كنت في مهمة ورجعت اتصبت ملحقتش ادور عليها. سامح: وانتو متاكدين ان هيه اللي اخدت الفلوس دي. كاميليا: مفيش غيرها طبعا اخدهم.. وكملت كلامها بلؤم وقالت لو مش هيه تبقي حد من أخوات معتز.

معتز: بص لكاميليا وقال ل.ل.لا لا أخواتي ميعملوش حاجة زي دي ابدا. مراد: وآمنه اللي تعملها يعني. معتز: م.م.ممكن والله الشيطان شاطر. مراد: لنفسه. والله محد شيطان غير العقربة اللي جنبك دي. سامح: تشرب حاجة يا معتز. معتز: لا لا يا دوب نمشي عشان لسه هنعدي على حمايا وحماتي نشوفهم.. مش محتاج حاجة يا مراد. مراد: بقرف. شكرا. معتز: بعد اذنكم.. واخد كاميليا ومشي. مراد: شايف الوسخ.. بيقول أخواتي لأ، انما آمنه ممكن.

سامح: سيبك من كل الكلام ده.. فيه حاجة لاحظتها من الحية بنت عمتك دي. مراد: إيه. سامح: كاميليا عايزة توصل للكل رسالة أن أخوات معتز ممكن يغلطوا.. واكيد ده لهدف في دماغه. مراد: شوف كاميليا دي تربية سمير الجزمه وصافي عمتي الحربايه، عايزها تطلع إيه يعني. عموما اخرج أنا من هنا بالسلامة وهتكلم انا تاني مع آمنه في حكاية الجواز. سامح: ربنا يهديهالك المرادي. مراد: يارب. ***

مر يومين كمان والكل كان متجمع بمناسبة خروج مراد وكانت آمنه عازمه سامح معاهم. وكانت سهرة جميلة جدا وممتعة بمشاكسات نهي وهشام وخفة دم سامح وشقاوة سيف وعبد الرحمن. بعد ما السهرة خلصت كانت وفاء وهشام وآمنه قاعدين مع بعض لوحدهم بيتكلموا. وفاء: انا عايزة افرد جسمي شوية يا أمونه تعالي معايا دخليني الاوضة. هشام: لا لا خليكي يا أمونه انا هدخلها. وسند هشام أمه ودخلها الاوضة ونيمها على السرير. هشام: ربنا ينجحك يا ابنيه.

هشام: ربنا يخليكي ليا يا أما.. واتنهد وقال أما كنت عايز أسألك على حاجة وجاوبيني عليها بصراحة. وفاء: حاجة إيه يا بنيه. هشام: ................. *** عند آمنه. كانت واقفه في البلكونه وجه مراد عليها وقال: القمر واقف لوحده ليه. آمنه: ابتسمت وقالت انت رايق اوى. مراد: وحد يشوفك ويتعكنن برضو. آمنه: اممم.. عايز إيه. مراد: احمم هو انا باين عليا اني عايز اقولك حاجة. آمنه: امم باين اوى.

مراد: ضحك وقال ماشي.. عموما انا بجدد طلبي ليكي تاني بالجواز وياريت ننجز بقا وتوافقي. آمنه: ليه. مراد: اتنهد وقال.. أنا عايز احميكي انتي والاولاد.. وافقي عشان اكون مطمن عليكو. آمنه: مطمن علينا وتحمينا!! انا مش فاهمه قصدك ما توضحلي. مراد: هقولك........... وحكالها عن اتهام معتز ليها. آمنه: بدموع. وصدقت.

مراد: أنا لو عندي شك 1% مكنتش خليتك هنا.. وعايز اقولك ان معتز قالي الكلام ده قبل ما اسافر، ومع ذلك كنت مأمن على اخواتي معاكي انتي. آمنه: مسحت دموعها وقالت. سيبني شوية لوحدي يا مراد لو سمحت. مراد: اتنهد وقال حاضر.. بس ممكن متزعليش نفسك عشان ضغطك ميعلاش. آمنه: متقلقش عليا أنا كويسه. سابها مراد ومشي وبعد شويه جه عليها هشام لقاها بتعيط. هشام: بتعيطي ليه يا امونه.

آمنه: بعيط على حالي يا هشام.. بعيط على سنين كدابه عشتهم مع أخواتك، كنت بعتبرهم اخواتي وسندي.. لكن السند هو ربنا فعلا وبس. هشام: طب فهميني حصل إيه. آمنه: مسحت دموعها وقالت معتز بيتهمني اني سرقت 50 الف جنيه. هشام: إيه!! اتجنن ده ولا ايه.

آمنه: يعني مش كفاية أنه جرحني في الكلام قدامكم.. وقال لاخوه انت ميت بالنسبالي.. ويتهمك انك حاولت تتهجم على مراته.. يبقي فاضل ايه بقا.. أخوك واطي وخسيس وندل وجبان، وكل الصفات اللي توصف معنى كلمة قذر هي فيه. هشام: بصي فيه حاجة مهمة لازم تعمليها. آمنه: حاجة إيه دي...... وفجاه شهقت وقالت أماااااااااااااااااااااا. بصوا هشام وآمنه لوفاء اللي كانت بتسمع لكلامهم وهيه بتعيط. وفاء: بدموع. ليه خبيتوا عليا الحقيقة.

هشام: هنقولك إيه بس يا أما. وفاء: مسكت إيد آمنه وقالت بتعب واضح.. آمنه يابنتي. انا عارفه انك زعلانه منه عشان اللي عمله معاكي، وانت كمان يا هشام أكيد زعلان منه عشان اتهامه ليك.. بس وصيتي ليكو انكم تسامحوه من قلبكم، وسامحو كمان حازم ودعاء وقولولهم أننا مش زعلانه منهم واننا ميته قلبي راضي عليهم، وقلبي داعي لمعتز ان ربنا يبعد عنه مراته......

وبدات تتكلم بتعب واضح أكتر وقالت م.م.مش هوصيكي على ه.ه.هشام يا أمونه يا بنتي و.و.كمان بوصيكي تتجوزي مراد.. هو اللي هيعرف يحميكي من آلاعيب كاميليا، ويا عالم بكره تخططلك بإيه.. و.و.ولو معتز في يوم فاق لنفسه وطلب منك السماح.. سامحيه و.وحيات غلاوتي عندك سامحيه.. و.و.وانت يا هشام، بوصيك عمرك ما تسيب آمنه ابدا ودايما خليك معاها وواقف جنبها.. و.و.وحاول تحميها من غدرهم.

ولو في يوم معتز ربنا هداه واتغير ابقوا عرفوه أننا ميته وانا راضيه عنه. آمنه: بدموع. متقوليش كدا والنبي، اوعي تسيبيني انتي كمان. هشام: أحنا هننقلك دلوقتي على المستشفي يا أما وهتبقي كويسه.. انا هروح انده لمراد بسرعة. وقام بسرعه ينادي مراد. وفاء: مكنتش اتمني غير اننا اموت في فرشتي وبيتي.. لكن أمر ربنا نفذ، والنبي يا بنتي ادفنوني في البلد عشان..... آمنه: قطعت كلامها وقالت بس.....

بس والنبي متكمليش كلامك ده يا أما، عشان خاطري خليكي معايا. وفضلت تعيط وهيه حضناها. أما وفاء لقطت انفاسها الاخيرة وانتقلت روحها الى الرفيق الاعلي. آمنه: بصرخة. أماااااااااااااااااااااا. *** في اليوم التالي في الشرقيه. كان كل أهل البلد متجمع بحزن ومنتظرين وصول الجثه. ومن ضمنهم دعاء وحازم حضرو بمعرفة من هشام، هو اللي بلغهم وقالهم الخبر وطلب منهم ينزلوا.

وصلت وفاء في العربية الخاصة بيها وكانت وراهم عربية مراد ومعاه آمنه وهشام. محدش ركز معاهم عشان الظروف اللي هما فيها، لكن كاميليا كانت مركزه جداااااا. وبعد وقت من الدفن ومراسم العزاء. كانت دعاء وحازم وكاميليا ومعتز.. وفتون وبدور ونورا مع آمنه ودخل ليهم مراد وهشام. مراد: البقاء لله يا جماعه. حازم: الدوام لله. هشام: يلا بينا يا آمنه عشان نمشي.

حازم: تمشوا ليه يا هشام.. خليكم بقا وتعالو نرجع ونلم شملنا تاني مع بعض.. وبص لآمنه وقال اتكلمي يا امونه وقولي أي حاجة. آمنه: كانت في حالة لا يرثى لها.. غمضت عيونها بوجع وقالت نلم شملنا تاني ازاي يا حازم.. واللي كانت لمانا ماتت خلاص. كاميليا: بلؤم. أممم واضح انها برضو لمت شملكوا على بعض يا آمنه. آمنه: بصتلها وقالت تقصدي إيه.

كاميليا: هفهمك قصدي.. وبصت لمراد وقالت. مش غريبه يعني يا مراد ان آمنه وهشام يرجعوا معاك انت.. انت عرفت مكانهم إزاي، وانت اصلا مكلف بانك تدور عليها ومع ذلك قولت معرفتش اوصلها. هشام: بطلي سمك اللي بتبخيه ده يا كاميليا ولمي لسانك. معتز: وتلم لسانها ليه.. هيه مقالتش حاجة غلط على فكرة، انتو كنتو فين بالظبط لما مراد جايبكم معاه كدا.

آمنه: هتفضل زي ما انت يا معتز ومش هتتغير.. مجرد آله بتتحرك من كلمة من مراتك، بس عموما دي حاجة متخصكوش. كاميليا: متنسيش أنك مرات اخوه ومن حقه يسالك يا امونه. آمنه: ولما أنا مرات أخوه.. ليه بيتهمني أني سرقت منه 50 ألف جنيه. الكل بص لبعضه وسكتوا. حازم: بص لمعتز وقال أنت فعلا متهمها بكده.

كاميليا: سيبك بس من الاتهام دلوقتي.. وبصت لآمنه وقالت عرفتي منين بقا يا أمونه المبلغ اللي معتز متهمك بيه، هههههه دا واضح ان مراد ابن خالي ده شقي وانا معرفش. مراد: اخرسي قطع لسانك. معتز: وتخرس ليه يا مراد.. مش بتقول الحقيقة، وانا اللي من هبلي وغبائي جايلك عشان تقبضلي عليها وحضرتك واخدها عندك.. طب مدام انتي مشتاقة لراجل في حياتك اوى كدا ما كنتي توافقي على أي حد يجيلك بدل ما تمشي مع واحد في الضلمه.

مراد: هجم عليه وقال بتقول إيه يا حيوان يا متخلف انت. معتز: حيوان.. الحيوان ده هو انت يا مراد.. انت اللي مصونتش العيش والملح وماشيلي مع مرات اخويا في الحرام. مراد: بصوت عالي اخررررررررس.... آمنه مراتي على سنة الله ورسوله. الكل بص لبعضه باستغراب، وسكتوا. هشام: مستغربين ليه.. أيواا آمنه مرات مراد. آمنه بصت لمراد وهشام وسكتت. معتز: آاااااه.... طب ويا تري بقا قبل ما تتجوزك يا حضرة الظابط قالتلك على الحقيقة ولا غفلتك.

آمنه دموعها نزلت من اللحظة الصعبة اللي كانت بتتمني متجيش، وخايفه من رد فعل مراد. معتز: مدام سكتت يبقي متعرفش.... بس انا هعرفك بقا واقولك..... قطع كلامه مراد وهو بيقول: آمنه شايلة الرحم، مش كده. معتز وآمنه بصوا لبعض وكانت دقات قلبهم سريعة جدا، وآمنه في دماغها الف سؤال ازاي عرف.

مراد: اتخرست ليه يا معتز.. مش ده اللي عايز تقوله، أنا عارف كل حاجة وآمنه قيلالي من اول ما عرضت عليها طلبي ومخبتش عني حاجة.. آمنه صريحة في علاقتي بيها، زي ما كانت صريحة معاك. لكن الفرق بيني وبينكم أننا قدرت موقفها وصراحتها ومهمنيش حاجة الا هيه، انما انتو عايزين آمنه الروبرت.. اللي مينفعش تتعب ولا تشتكي من الحمل والمسؤولية.

وأنا بحمد ربنا أنه عوضني بيها وعوضها بيا وبحبي عنكم، لانكم متستاهلوش عطاء آمنه، انتو تستحقوا قسوتها وبس.