رواية امتلاك أبدي الفصل الثالث 3 - بقلم مصطفى محسن

ساميه بصت للباب بخوف وقالت: "يمكن في حد مش عايزك تعرفي الموضوع." هدى جسمها برد وقالت: "تقصدي مين؟ ساميه خدت نفس عميق وقفلت الباب وقالت: "لازم نتكلم في مكان أمان." هدى قالت لها: "إحنا في الشغل، مافيش امان اكتر من كده." ساميه بصت يمين وشمال بخوف وقالت بصوت واطي: "اللي هقوله مش موضوع سهل." هدى اتعصبت وقالت بصوت متوتر: "اتكلمي، انا اعصابي مش مستحمله."

ساميه قربت منها وقالت: "الست اللي شفتها مع ساره اسمها نعيمه، ودي مصيبه كبيره." هدى قالت بخوف: "ازاي ومين هي دي؟ ساميه قالت: "الست دي من منطقتي القديمه، وكانت بتخرب بيوت الناس بالأعمال. من 11 سنه كان في واحده جارتنا كانت عايشه هي وجوزها في امان وكانوا دايما مبسوطين وما حدش كان بيسمع عنهم اي حاجه، فجاه مره واحده زوجها طلقها بدون اي سبب."

"وبعد فتره كان في ناس بتعمل حمله نظافه للمقابر من الأعمال ولقوا وصور مدفونه في المقابر، ومن ضمن الصور دي كانت صوره جارتي وجوزها وكان مكتوب على الصوره فراق ومصايب وعدم ارتياح وامتلاك أبدي، وكل الناس اتهموا نعيمه علشان هي الوحيده اللي كانت بتروح المقابر كتير." هدى قالت بصوت مهزوز: "ما يمكن الناس ظالمينها." ساميه قالت لها: "لا الناس مش ظالمينها، لانها كانت تعرف دجالين كتير وكنا بنشوفهم واقفين معاها."

هدى قالت لها: "الست دي كانت عايزه ايه من ساره." ساميه اتنهدت وقالت: "انا كنت في السوق سمعت صوت ضحكه عاليه، بصيت لقيت ساره واقفه مع نعيمه، قربت علشان اسلم على ساره سمعت نعيمه بتقول لها: 'بعد اللي عملتيه مستحيل قلبه يميل لأي حد حتى أمه'. ولما دخلت وسلمت على ساره... ساره توترت جامد." "وقالت لي: 'ازيك يا طنط ساميه؟

قلت لها: 'الحمد لله يا حبيبتي'، وبعدها بثواني نعمه اختفت من جنبي، انا ماكنتش عايز اقول لك يا هدى بس كده الموضوع ما ينفعش يتسكت عليه." هدى حطت ايديها على بقها وفضلت ساكته لثواني. وبعدين قالت: "معنى كده ان ساره عملت عمل لكريم." ساميه هزت راسها وقالت لها: "اكيد، وهو ده سبب تغييره معاكي." هدى قالت لها: "وانا اعمل ايه دلوقتي يا ساميه؟

ساميه اتنهدت وقالت: "بلاش تقولي لكريم ولا تواجهي ساره دلوقتي، حاولي تقربي من كريم اكتر بس بعيد عن ساره." هدى قامت لمت الشنطه وخرجت روحت شقتها وقعدت تتفكر ازاي تتكلم مع كريم بدون ساره ما تكون موجوده. مسكت الموبايل واتصلت على كريم وقالت له: "ازيك يا حبيبي، انت فين؟ قال لها: "انا في الشغل يا امي." قالت له: "عدي عليا النهارده عشان انت واحشني قوي." كريم قال لها: "لو خلصت بدري هعدي عليك."

بعدها بثلاث ساعات كريم جه، وشه متغير وتعبان. قعد، والدته قالت: "ساره عامله ايه معاك؟ قال: "كويسين." هدى قالت له: "حاسه انك مش مرتاح وبقيت غريب عني." قال لها: "انا ساعات مش بحس انا بتصرف ازاي، ولما بقعد مع نفسي وافتكر اللي بعمله بندم." وقال: "في واحده قريبه ساره كل ما تيجي شقه بحس ان الشقه كلها اتغيرت." هدى قالت له: "ست مين؟ قال: "واحده غريبه بتلبس اسود في اسود شكلها مش مطمن." والدته قالت له: "ربنا يحفظك يا ابني."

كريم واقف وقرب من والدته وحضنها وقال لها: "ادعي لي يا امي" وخرج. فجاه ساميه اتصلت بهدى وقالت لها: "انا هبعتلك رساله صوتيه على الوتساب مش عاوزه حد يسمعها غيرك." هدى توترت وقالت لها: "خير، في ايه؟ ساميه قالت لها: "هتعرفي لما تسمعيه." هدى لبست السماعات وايديها بتترعش وشغلت التسجيل وسمعت صوت ست كبيره بتقول…