رواية انا هتجوز عليكي الفصل الأول 1 - بقلم حنين ابراهيم

نهضت بسرعة بعد أن وجدت الساعة تشير إلى 7:45. وردة: يا لهوي الواد هيتأخر على المدرسة. زياد قوم قوم بسرعة إلبس هدومك. زياد بنوم: سيبيني أنام شوية يا ماما. وردة: ياد قوم إنت أساسا متأخر. تركته يلبس بكسل بينما هي تحضر له السندويتش ليأكله. وهي تحمد ربها لأنها تركت تيمور ونغم عند والدتها لأن مدرستهما بعيدة من هنا. ولو أيقظتهما في هذا الوقت كانا سيتأخران عن امتحاناتهما وهذا ما لا ترجوه.

بعد أن غادر زياد، توجهت نحو رضيعها، أرضعته وأبدلت له الحفاضات ليعود للنوم. وردة: أستغل أنا الفرصة وأكمل شغل البيت وأغسل هدوم الواد. ذهبت بسرعة لترى ما وراءها من أعمال لتنهيها. أثناء ذلك رن هاتفها. وردة: ألو أيوة يا ورد. صديقتها: عملتي إيه في اللي قولتلك عليه؟ وردة: فاضلي شوية تعديلات بكرة هخلصها وأبعتلك الفستان. صديقتها: عايزاه يبان إنه من عند أكبر أتليه مش أي كلام.

وردة: عيب عليكي هو أنا بتاعت أي كلام برضو، يلا سلام دلوقتي قبل ما الواد يصحى. صديقتها: الله يعينك يا حبيبتي. أنا مش عارفه إنتي مكنتيش بتاخدي موانع الحمل ليه طالما عارفة الغلب اللي إنتي هتبقي فيه ده. وردة بحزن: منا كنت باخد بس العلاج اللي كنت باخد لضهري هو اللي أبطل مفعوله وحملت. صديقتها: ربنا يجعله بار لك ويعوضك على تعبك معاه خير. وردة بأمل: اللهم امين. أنهت المكالمة وعادت لعملها ليصل زوجها من عمله عند الظهر.

سيد: إنتي بتعملي إيه؟ وردة: يا خي قول السلام عليكم الأول، بغسل الهدوم. سيد: طب عملتي إيه على الغدا؟ وردة: معلش ملحقتش أعمل. على العموم فيه أكل فاضل من عشا امبارح هحطلك منه. سيد بضيق: نعم؟ ملحقتيش؟ ليه بقا إن شاء الله كنتي بتعملي إيه من الصبح؟

وردة بنفس الغضب: بقولك ملحقتيش ما إنت عارف إني امبارح طول الليل قاعدة على المكنة بخيط، و الصبح جري ورا العيال بفطر ده وبرضع ده وبغير لده ومواعين وتنضيف وهدوم وشغل ملوش آخر. إيييه هو إنت مش بتحس؟ سيد بخبث: لا بحس. وعشان صعبتي عليا قررت أتجوز عليكي واحدة تشيل معاكي مسؤولية البيت طالما مش عارفة تشيليها لوحدك.

نظرت له بجمود لثوانٍ ظنت فيها سيد أنها ستخاف من أن يفعلها ويحضر لها ضرة. ليفتح عينيه على وسعهما عندما وجدها تزغرت وتهلل. وردة: لللووووي يا ألف مبروك. ابتلع سيد غصته وقال بحزن: إنتي شايفة إني دي حاجة تفرح؟

وردة بسخرية: طبعًا طالما فتحت بقك يبقى جوزي ربنا كرمه. شايف إنه هيقدر يفتح بيتين يعني مش هلبس من عند أمي وإخواتي تاني. وولادي مش هجيب للكبير وأدي لبسه اللي صغر عليه لأخواته الصغيرين. وكله هيلبس الجديد وأنا مش هشتغل وأقطم ضهري تاني عشان أصرف على البيت عشان جوزي هيعرف يصرف على بيتين. لتدخل أم سيد: في إيه فرح مين النهارده؟ بتزغرتي ليه يا مزغوطة؟ لتتفاجأ بوردة تسحبها من يدها وهي تتكلم

بإنفعال فقد طفح كيلها: ابنك يا عمتو ناوي يتجوز عليا. دخلت إلى غرفتها وأخرجت الحقائب وبدأت

برص الملابس وهي تقول بقهر: مهو البيه فاكر إنه لسا فيه عيلة هبلة هيزقططوا من الفرح أول ما تطلبوا بنتهم زي ما أبويا عمل لما كان فاكر إنه جوز بنته لراجل بنته اللي كانت لسا يا دوبك عيلة بظفاير عندها 15 سنة مش فاهمة حتى معنى الجواز إيه. ورغم كده اتحمل ذل وشحططة وضرب ابنك السكري فيه. بس عشان ولادها. ولما ربنا بلاكم وخسرتوا ورث المرحوم جوزك بسبب استهتار ابنك الشملول قلت يمكن تتعظوا شوية. وجيت على نفسي واشتغلت عشان أصرف على ولادي وعليكم يكش يطمر. وفي الأخير ابنك جاي يقولي هتجوز عليكي عشان إنتي مش حمل تشيلي مسؤولية البيت.

أقفلت الحقيبة وأعطتها لعمتها التي لم تنطق بكلمة إثر خوفها من غضب وردة العارم. وردة بغضب: بناقص منه فاكر نفسه راجل يتزعل عليه. وردة وهي تدفع سيد ووالدته أمامها: مش أنا اللي هروح يا روح أمك. إنت وأمك اللي هتروحوا. مش إنت هتتجوز التانية؟ وأصل الجواز إنك تعدل بين الاثنين. وأنا مستحملة قرفك 14 سنة. خليها تستحملك هي كمان زيهم. مش عايزة ألمح طيفك خلال 14 سنة الجايين. إنت فاهم؟ قالت آخر كلماتها وهي تغلق الباب بوجهيهما.

وردة وهي تتنفس الصعداء: عيلة تجيب الهم. على الجانب الآخر من الباب: سيد: عاجبك كده؟ أم سيد: الله وأنا مالي. سيد: مش إنتي اللي قولتيلي الست ميكسرهاش غير ست زيها. وفهمتيني إني لما أهددها بالضرة هتتعدل في كلامها معايا وترجع تشلني فوق راسها زي الأول. لتلتفت على جارتها وهي تقول بسخرية: هيهيي. الكلام ده لما تكون متجوزة راجل بيعاملها كأنها ملكة. هتخاف تخسره. مش يبقى جوز شربات وعال عليها.

أنهت كلامها وهي تنظر لهما من الأعلى للأسفل بقرف ودخلت إلى منزلها بعد أن خرجت لتطمئن على جارتها لأنها كانت خائفة أن يكون عاد لضربها. لتسعد بما فعلته بزوجها وأمه العقر.