رواية انا لك انت الفصل التاسع والعشرون 29 - بقلم حبيبة محمد

_بتعملي معايا كدا ليه يا ملك؟ ملك زقته في كتفه بعصبية: _فوق بقا، بطل قرف. سليم سابها وهو بيضحك بدوخان: _خلاص، صعبتي عليا، هسيبك. ملك دخلت أوضتها وقفلت الباب وقعدت على الأرض وهي بتعيط بتوتر وخوف وقالت في نفسها: _استحالة يكون دا اللي أنا حبيته، سليم مكنش كدا، سليم كان بيخاف عليا، استحالة يكون دا سليم. قامت من على الأرض ومسحت دموعها ورمت نفسها على السرير بارتعاش واستغطت بالحاف وهي بتقول بهمس:

_عدت على خير يا ملك، الحمد لله، خلاص محصلش حاجة، كفاية عياط. سليم دخل أوضته ورمى نفسه على السرير من غير حتى ما يقلع هدومه ولا يعمل أي حاجة. في صباح يوم جديد، ملك صحت من النوم بنعاس وغسلت وشها بس ملقتش سليم ولا أمير. اتنهدت بطمئنان وقالت: _كويس إنهم مش موجودين، عشان لو كانوا موجودين مكنتش هخرج من أوضتي أصلاً. نزلت المطبخ عشان تعمل فطار لقت مريم واقفة بتطبخ. _متضايقة ليه على الصبح؟ دا إحنا حتى خدنا الإجازة وفضينالك.

ملك قعدت على الكرسي وسندت إيدها على البوفيه وردت على مريم بهدوء: _انتي لو شفتي اللي حصل امبارح من سليم، كنتي عذرتيني. مريم اتخضت من طريقة كلامها وقعدت قدامها وقالت بتساؤل: _سليم عمل إيه؟ خرج الكلام من بوقها بتوتر والدموع بتتراكم في عينها كل ما تفتكر. وردت على مريم المستنية منها جواب: _كان راجع سكران امبارح و... مريم اتنفضت بخوف: _وايه؟ انطقي؟

_حاولت أجري منه وأهرب، هو مسكني تاني وأنا زقيته وزعقت فيه لحد ما قالي وهو تعبان أصلاً ومش فايق للي بيحصل: "خلاص هسيبك، صعبتي عليا". دخل أوضته وهو مدروخ وأنا دخلت أوضتي وفضلت أعيط من خوف. مريم خبطت بإيدها على البوفيه بعصبية وقالت: _إزاي يحاول يعمل كدا؟ سليم أصلاً مبيشربش المخروب دا خالص. مفيش غير أمير الحيوان اللي خلاه يقرب من الحاجات المقرفة دي. ملك قامت من مكانها وفتحت التلاجة ملقتش فيها أكل خالص فقالت بلامبالاة:

_أهم حاجة إني نفدت من إيد سليم امبارح، أنا عارفة ومتأكدة إنه مكنش في وعيه، بس برضه خوفت منه أوي. يلا اللي حصل حصل. بصت لمريم وقالت: التلاجة مفيهاش أكل خالص؟ أومال انتي بتعملي إيه! _بعمل بطاطس، مفيش غيرها حالياً عشان كلنا الفترة دي مكنش فاضيين ننزل نشتري أكل وكده. ملك خرجت برا المطبخ وطلعت لأوضتها عشان تجيب حاجة تلبسها وقالت لمريم بصوت عالي عشان تسمعها:

_مرييييم، البسي يلا أي حاجة تلاقيها في وشك، هننزل نشتري خضار وكام حاجة للبيت. سليم سايبلك الفيزا صح؟ مريم طلعت على السلم ودخلت أوضتها ولبست البنطلون وهي بتقول لملك: _هو كمان سايبلي فلوس برا الفيزا عشان لو احتجتها في أي حاجة. ملك خرجت برا الأوضة وخرجت شعرها من جوة الجاكيت وقالت لمريم: _يلا، أنا لبست. مريم لبست الشبشب ولمت شعرها كحكة وخرجت مع ملك. ***

أمير روح الفيلا وهو متبهدل والقميص بتاعه مفتوح والجاكيت مرمي على كتفه وحالته حالة. _مفيش حد في أم البيت دا ولا إيه؟ .... طلع لأوضته ورمى نفسه على السرير بتعب وقال: _أحسن برضه، لو حد شاف منظري دا هيمسكني تريقة. قام من على السرير تاني وهو حاسس بجوع نزل يدور على أي أكل في المطبخ. فتح التلاجة ملاقاش فيها حاجة، بس لقي طبق بطاطس محطوط على البوفيه. مسك الطبق وطلع بيه لأوضته وهو بيقول:

_كويس إن حد افتكرني وعملي أكل، أنا شوية كمان وهرجع من كتر البيرة، عايز أخرج من القرف اللي أنا فيه دا بس مش عارف إزاي. *** ملك دخلت المول مع مريم ومسكت العربية بتاعت المول. _هاتيلي شنطة عشان أجيب خيار، مفيش خيار خالص. مريم جابت لملك شنطة ومسكته عشان تشوفه حلو ولا لأ. فـ قالت: _إيه يبنتي دا، الخيار هنا مش حلو؟ ملك حطت الخيار في الشنطة وقالت: _مش نعمة ربنا دي؟ كلي وانتي ساكتة.

مريم راحت الناحية التانية وجابت كيس عشان تحط فيه الطماطم. ملك حطت الخيار في العربية وراحت ناحية مريم وقالت بهمس: _بت، الحاجة هنا غالية أوي، مروحناش ليه سوق الجمعة بدل شغل العيال الفافي اللي إحنا فيه دا. مريم حطت شنطة الطماطم في العربية وقالت لملك: _امشي يا بت، سوق جمعة إيه اللي أنا لسه هروحه دا، وبعدين يا ستي متجيبي اللي انتي عايزاه، هو سليم منعك عن حاجة؟ _مش حكاية منع أو مـمـنـع، كل الحوار إني مش عايزة أغرمكم.

مريم زقت العربية مع ملك وهي بتضحك: _يا ستي امشي الله لا يسيئك، وملكيش دعوة انتي. سليم روح على الفيلا بس ملاقاش ملك ولا مريم. طلع أوضته لقي أمير فاتح أوضته ونايم على السرير بشكل غريب ورامي طبق البطاطس جنبه. دخل أوضة أمير وعدل نومته وشد طبق البطاطس وقال في سره: _معفن طول عمرك، رامي طبق البطاطس جنبك ليه؟ وتلم علي أمنا الحشرات؟ وبعدين إيه دا! جاموسة نايمة؟ نزل حط الطبق في المطبخ واتصل على ملك عشان يطمن عليهم. _ملك مردتش

على اتصاله وقالت لمريم: مش عايزة أكلمه، خايفة منه بطريقة مش هعرف أوصفهالك. مريم اتنهدت بحزن: _انتي عارفة إنه مكنش واعي للي بيعمله، وغير كدا كمان هو سابك زي ما انتي قلتي، يعني حتى محاولش يعمل أي حاجة. _لا والله! انتي بتطبلي لأخوكي يا مريم؟ هو أنا لسه هستناه لما يعمل؟ مريم جابت كام كيس شيبسي وحطته في العربية وقالت: _صدقيني ما بطبله ولا حاجة، أنا بس بحاول أشرحلك الموضوع بطريقة تانية عشان منظلمهوش. ملك خدت

العربية ومشيت من قدامها: _لا شكراً، متشرحيش، أنا اللي شوفت مش انتي. مريم جريت وراها: _استني بس. سليم ملاقاش أي رد منها فـ اتصل على مريم. _أيوه يا سليم، إحنا في المول بنشتري حاجات للبيت. _تمام، ماشي، بس ملك مبتردش عليا ليه لما بتصل؟ مريم ضمت حواجبها باستغراب وقالت: _هو انت مش عارف انت عملت إيه عشان تعمل معاك كدا؟ _عملت إيه يا مريم؟ انتي هتلبسيني مصيبة وأنا قاعد. مريم خرجت إزازة بيبسي من التلاجة

وحطتها في العربية وقالت: _سليم، انت فقدت الذاكرة ولا إيه؟ ما تفوق كدا. سليم قفل في وشها بعصبية ودخل أوضته وريح ضهره على السرير بهمدان وهو بيقول: _بتكلم مع عيلة هبلة، عملت إيه أنا مش فاهم يعني؟ أنا روحت مع أمير امبارح البار وبعد كدا مش فاكر حصل إيه؟؟ هيكون إيه حصل يعني!! ديما كانت قاعدة على السرير في أوضتها وبتعيط بهمس وهي بتبص لصورة مامتها: _الأيام من غيرك وحشة أوي يا ماما.

_متخيلتش أبداً إنك ممكن تمشي وتسيبيني، عارفة إن ضايقتك كتير أوي وقللت أدبي عليكي كتير أويي، حتى اتعلمت حاجات مقرفة وبقيت عدوانية لدرجة إني بقيت بعذب ملك ومريم كل أما أشوفهم، بس هما اللي كانوا بيضايقوني صدقيني. قامت من على السرير وحطت صورة مامتها على الكومود بتاعها وبصت لنفسها في المراية: _صدقيني يا أمي إني مش غلطانة على حاجة عملتها عشان ملك فعلاً متستاهلش، دي مزعلتش عليكي وسابتني ومشيت، تخيلي!

مسحت دموعها وقعدت على الكرسي واتصلت بـ كريم: _رد بقا، رد، هتفضل تتجاهل اتصالاتي لحد إمتى؟ *** ملك وقفت بتعب وقالت: _إحنا كدا جبنا كل حاجة، ناقص إيه تاني؟ مريم اتجهت ناحية العطار وجابت توابل. _عايزة فلفل أسود وشطة وكاري وكمون وكسبرة وحبهان وجوزة الطيب، ونوعي بقا من كله، عايزاك تحطيلي كل التوابل المطلوبة في أي بيت، تمام؟ ملك بصت لمريم باستغراب: _إيه كل ده؟ هتشتري التوابل كلها؟

_أيوه عشان منضطرش ننزل نشتري تاني، هنكون جبنا كله مرة واحدة، روحي بقا هاتي علبتين شوكولاتة ونوعي انتي بقا حاجات حلوة عشان نحلي كمان بالمرة. ملك مسكت العربية واتجهت لقسم الحلويات. حطت علبتين شوكولاتة وأكياس شيبسي كتير وبيبسي وعصاير وبسكويت واندومي ونوتيلا ونوعت بقا حاجات حلوة قد كدا. خرجوا من المول بعد ساعات وهما شايلين في إيدهم شنط كتير ومش عارفين يمشوا بيها. _اطلبي أوبر يا مريم أو وقفي تاكسي، مش هنعرف نمشي كدا.

مريم شاورت لتاكسي جاي من بعيد وحطوا الشنط في التاكسي وركبوا. _العصافرة لو سمحت. مريم بصت لملك بضيق وقالت: _لا عصافرة إيه، إحنا مش هنروح الأول، هنروح نشتري كام طقم كدا. _يا بنتي الدنيا هتليل علينا. مريم رفعت كتفها باستهتار وقالت: _ما تليل، هنتاكل في الشارع مثلا؟ *** مي بتوتر قعدت جمب سيف: _عارفة إني غلطانة بس أنا خلاص يا سيف مبقتش قادرة أستحمل انتقامهم مني.

_هما انتقموا مننا كلنا يا مي، أوعي تكوني فاكرة إني قاعد في مايه البطيخ! لا دا أنا بضرب كل يوم، من أول يوم شوفنا فيه مريم وملك وأنا بضرب كل يوم، بس مع ذلك مبحرمش إني أضايقهم، معرفش بحس بتسلية لما بضايقهم. مي مسكت إيدها ودعكت فيها بخوف: _دا على أساس مثلاً إني مبتهددش بأنهم هيقولوا لأهلي؟ أنا كل يوم بتهدد، أكيد كريم وديما حسابهم كبير أوي مع ملك ومريم. *** ديما خرجت من البيت واتمشت في الشارع وهي بتفتكر مامتها.

_مبقاش ليا حد في الدنيا من بعدك، حتى بابا مسافر ومش عارفة أوصله، عايشة من بعدك وحيدة، حتى المدرسة الحاجة الوحيدة اللي كانت ممكن تسليني راحت مني بسبب ملك ومريم، أنا تدمرت من بعديكي يا أمي، تعرفي إني بعيط كتير أوي بليل عشان بس مش متعودة على غيابك، الأسود اللي أنا لبساه دا مش هقلعه، حزني عليكي مش هيخلص ولا عمره هيخلص، انتي الحاجة الوحيدة اللي كانت مصبراني على الدنيا يا أمي، انتي الحاجة الوحيدة المصبراني على بعد بابا عني وعن قسوته معايا.

حطت إيدها في جيبها وكملت مشي. *** مريم خرجت من البروفة وهي بتلف حوالين نفسها وبتقول لملك: _ها! إيه رأيك؟ _لا لو لبستي واحد غيره هيكون أحلى... ملك خدت سلوبت ودخلت تقيسه وخرجت لمريم: _ها! رأيك؟ _تؤ تؤ، لو لونها أسود هتبقى أشيك. مريم دخلت البروفة وقاست بنطلون جينز وتيشيرت أبيض قصير وخرجت وهي بتبص لنفسها بإعجاب وقالت لملك: _حلو؟ _لا التيشيرت قصير شوية، مش هيبقى حلو عليكي خصوصاً إنك طويلة، انتي عارفة انتي محتاجة إيه؟

مريم رفعت كتفها بتساؤل: _إيه؟ _السلوبتات هتليق عليكي أوي عشان انتي فرعة ورفيعة، هتبقي حلوة عليكي أوي. مريم ضحكت وبصت لنفسها في المراية بإعجاب وقالت: _عندك حق. ديما مسحت دموعها وبصت على بنت بتهزر مع مامتها في محل فقالت بحزن: _يا ريتك كنتي معايا، على الأقل كنا عيشنا الأيام دي مع بعض، مكنتش مصدقة إن غياب الأم بيفرق كدا، بس صدقت لما انتي غيبتي عني يا أمي، أتريني كنت في حماكي طول ما انتي عايشة وأنا مش واخدة بالي!

التفتت عشان تمشي لقت مريم وملك جوه في نفس المحل بيقيسوا لبس ويهزروا. دخلت بعصبية والشر هيطق من عينها وخبطت ملك في كتفها وقالت: _هو انتي معندكيش دم؟ أمك لسه متتية وانتي قاعدة بتهزري وبتشتري لبس؟ ملك ردت عليها ببرود وقالت: _اااه قصدك مامتك؟ نريمان يعني؟ ربنا يرحمها ويصبرك على فراقها، بس معلش عندي سؤال، هو انتي جاية تشتميني ليه إني بهزر عادي بعد وفاة مامتك؟ ديما بعصبية: _عشان دي مامتك انتي كمان ولا نسيتي؟

ضحكت بسخرية وقالت: _نسيت؟ نسيت إيه دي حتة معاشتش معايا حاجة عشان أنساها، أنا مشوفتش نريمان دي غير لما كبرت يا ديما وكمان كنت بحاول أخليها تحبني وتعتبرني بنتها زيك، بس هي موافقتش وبعدتني عنها بكل الطرق تجرحني، وجاية تقوليلي مش زعلانة ليه؟ أنا أصلاً مشوفتهاش غير مرة أو مرتين يا ديما وفي المرة والمرتين دول مسابتليش حتى ذكرى حلوة أفتكرها بيها.!!

بالعكس دي جرحتني أكتر وأكتر وجرحتني جرح عمره ما هيتلم أبداً ولا هيتقفل، من الآخر يا ديما نريمان تبقى أمك انتي وبس، هي عمرها ما كانت أم ليا، انتي جاية تحاسبيني على إيه؟ ديما مسحت دموعها من كلام ملك وقالت: _انتي مبتحسيش أصلاً. مريم ضحكت بسخرية وقالت: _لا يا بت انتي اللي بتحسي وعندك مشاعر، دا انتي دموعك دي منزلتش غير بعد وفاة أمك، كانت فين مشاعرك وإحساسك دي لما كنتي بتذلينا وتهيننا وتضربينا بعد المدرسة؟

كانت فين مشاعرك وضميرك لما كنا هنموت محروقين بسببك؟ هه وترجع تقول انتي مبتحسيش، لا أصلاً عليكي يابت. ديما خرجت برا المحل وهي متعصبة من طريقة كلام مريم معاها وسابتهم هما الاتنين وخرجت وهي بتقول: _مش هقدر أعملكوا أي حاجة بعد النهارده! مش هقدر انتقم منكم زي ما أنا عايزة تاني خلاص، اكتفيت أوي منكم تعذيب أصلاً. *** ملك ومريم روحوا البيت بعد ما اشتروا حاجات قد كدا. قلعت الكوتش من رجلها بتعب وقالت: _اتهد حيلي. مريم قلعت

الشبشب من رجلها وقالت: _شوفتي بقا فايدة الشبشب؟ بتقلعيه على طول بلا وجع دماغ، لسه هلبس كوتش. أمير أول ما سمع صوتهم وطي صوت التليفزيون وقال: _إيه دا؟ انتوا اشتريتوا محلات إسكندرية كلها وجيتوا ولا إيه؟ مريم حطت الشنط على الصالون قدامه وقالت: _لا يا أخويا اشترينا أكل عشان متفضلش تقول أنا اللي بعمل كل حاجة.

ملك شالت الشنط بتاعتها وحطتها على السفرة وسليم خرج من المطبخ وهو ماسك صينية فيها طبق فول وطبق بطاطس وبيض وبيقول وهو مش واخد باله إن مريم وملك موجودين: _أحلى عشا ممكن تاكلوه انهارده. ملك أول ما شافته طلعت تجري على أوضتها من سكات. سليم لاحظ فـ بص لمريم وقال: _هو الموضوع طلع بجد ولا إيه؟ أنا عملت إيه لملك! أنا معرفش ومش فاكر لو كنت عملتلها إيه؟ مريم رفعت كتفها ببرود وقالت: _طب اطلع اسألها، يمكن تفتكر.

سليم بالفعل طلع لأوضة ملك وأمير فتح الشنط عشان يشوف جابوا إيه. مريم زقت إيده وقالت: _اوعى، متخربش في الحاجة. _الاه! مش لازم أعرف جايبين إيه؟ منا فرض من أفرض العيلة برضو؟ مريم دخلت المطبخ وشدت الشنط وهي بتقول: _صبرني يا رب. حطتهم على البوفيه وأمير ما زال بيحاول يعرف فيه إيه في الشنط. فتح الشنط وقال: _شوكولاتة، تمام ماشي. (حطها على البوفيه وكمل تقليب) _توابل، تمام ماشي. (حطها برضو على البوفيه وكمل تقليب) _توابل تاني!

لا كدا مش تمام؟ انتوا روحتوا لميتوا محل العطارة كله وجيتوا ولا إيه؟ مريم ضحكت بسخرية: _هه، خفيف. خرج باقي الشنط أكياس شيبسي وبسكويت وبيبسي ونوتيلا. قال وهو بياخد كيسين شيبسي وكنزتين بيبسي: _أنا هاخد دول. مريم شدت منه كيس الشيبسي والكنز وقالتله: _لا هو كيس واحد، متبقاش طماع. _لا يا شيخة! دا على أساس إنك واخدة كيس واحد؟ انتي واخدة أكياس الشيبسي كلها، ربنا يستر وميطلعش الصبح من أوضتي ألاقيكم 100 كيلو.

فتح بقيت الشنط وخرج منها فراخ ولحمة ولانشون وجبنة وفطير. ربع إيده وقال بتساؤل: _مجبتوش جبنة قريش بالمرة ليه؟ حد قالكم إني بحب الجبنة البيضة؟ مريم حطت الحاجة في الشنطة تاني وقالتله: _والله إحنا أصلاً مش جايبين الجبنة البيضة دي ليك ولا واخدين رأيك في أي حاجة، ومتبهدلش الدنيا تاني عشان أنا تعبت ومش قادرة أقفل الأكياس. _يعني هتحطي الأكل بالشنط بتاعته في التلاجة؟ انتي عبيطة؟ مريم أفأفت بعصبية:

_يوووه، خلاص خرجهم تاني وحطهم في التلاجة، بس حط بترتيب ومتعملش حاجة من غير ما أقولك. *** سليم خبط على الباب ودخل قعد على الكرسي وقال لملك بتساؤل: _ينفع أفهم فيه إيه؟ ملك وقفت في البلكونة وادته ضهرها وهي بتقوله: _يعني انت مش عارف فيه إيه؟ سليم قام وراح وراها ورد عليها باستغراب: _فيه إيه يا ملك؟ أنا مش عارف أنا عملت إيه أصلاً. ملك بعصبية: _سليم، انت كدا وفاكر كل حاجة! سليم جز على سنانه بغيظ وقال:

_أنا مش كداب يا ملك، قوليلي أنا عملت إيه وخلصيني. _انت رجعت امبارح سكران طينة وقربت مني بطريقة غريبة لدرجة إني طلعت أجري منك، ولما انت لقيتني بجري منك سيبتني ودخلت أوضتك. سليم حمحم بخجل وقال: _احمم أنا، مش عارف أقولك إيه! _أنا غلطان بكل المقاييس يا ملك، أنا أسف، بس أنا مكنتش في وعيي. ملك زقته بعصبية وقالت: _وأنا ذنبي إيه إنك مكنتش في وعيك؟ كنت هستناك لما ترجع لوعيك مثلاً؟ مسك إيدها بندم وقال:

_عارف إني غلطان وبعترف، ومش عارف أنا إيه اللي خلاني أشرب وأنا أصلاً مبشربش، أنا أسف يا ملك، أسف، وأنا بعترفلك إني غلطان. *** كان بيرتب الحاجات في التلاجة مع مريم وبيقول: _أنا حطيت الجبن كلها جنب بعض، ها، أعمل إيه تاني؟ _خرج بقا علبة البيض وحط البيض في رف التلاجة. أمير فتح علبة البيض وحطه في الرف بس وقعت منه بيضة من غير قصد. مريم حطت إيدها في وسطها وقالتله: _مش هعصب عليك، بس انت اللي هتلم اللي على الأرض دا.

أمير قام بعصبية وقال: _لا مش همسح حاجة، مش كفاية إني بساعدك. _مساعدتك جاية عليا بخسارة، وحياتك. أمير فتح بقيت الشنط ومردش عليها. _طب مش هتلم اللي على الأرض؟ أمير حرك رأسه بمعنى إنه مش هيلم حاجة وحط اللانشون في الفريزر. ملك رزعت بإيدها جامد على البوفيه وقالت: _انت هتشلني يا أمير؟ هو فيه لانشون بيتحط في الفريزر؟ أمير خرج اللانشون وقالها بضيق: _ما أنا بصراحة معرفش! شوفتيني اتجوزت قبل كدا؟ _إيه علاقة الجواز باللانشون؟

هموت وأفهم؟ اللحمة في الفريزر وقالها: _عشان يعني الجواز بيخلي الواحد فاهم أكتر في مواضيع الأكل دي، لأن من الطبيعي إن الزوج هو اللي بيشتري الأكل لمراته وكدا وبيعمل معاها فـ بيبقى عارف. مريم حطت التوابل في البوفيه وقالتله: _على أساس يعني إني أنا اللي اتجوزت قبل كدا؟ كلامك مش منطقي ومتحاولش تبرر لنفسك الغلط. أمير فتح بقيت الشنط وقالها: _متوجعيش دماغ أمي، وبعدين هي الشنط دي مبتخلصش؟ مريم رفعت كتفها ببرود:

_مش انت اللي عايز تساعدني؟ خلاص استحمل بقا. *** كان نفسها تقوله إنها مسامحاه بس مقدرتش تسامحه بسبب اللي هو عمله. فـ قالتله: _سليم لو سمحت ابعد عني خالص، كفاية خوفي منك، وبعدين كفاية كدب بقا، انت فاكر كل حاجة بس عامل نفسك عبيط. سليم بعصبية: _انتي أول وآخر واحد تتكلم عن الكدب يا ملك، إيه فاكراني عبيط ومش واخد بالي كل الوقت دا إنك بتكدبي عليا انتي ومريم؟ فاكراني عيل قدامك؟ ومش هاخد بالي؟

لا يا ملك، اللي انتي متعرفيهوش إن إني عارف كل حاجة ديما بتعملها معاكي هي وصحابها وعارف كدبكم عليا طول الوقت دا كله.