رواية انا لك انت الفصل الثامن 8 - بقلم حبيبة محمد

أنا معجبة بيك أوي يا سليم. كانت بتتخيل إنها قالت له كل دا، وبعدين رجعت لوعيها. سليم بص لها باستغراب وقال لها: سرحانة في إيه؟ ملك رفعت كتفها وغيرت الموضوع وقالت له: مفيش ولا حاجة. سليم كان لسه هيخرج من الأوضة بس بص لها بندم ورجع قال لها: ملك، أنتِ زعلانة مني؟ ملك قعدت على الكرسي وقالت له: لأ، هزعل منك ليه؟ سليم شد كرسي وقعد جنبها وقال لها: يعني! بسبب إني اتعصبت عليكي النهارده. ملك ابتسمت له ومسكت

إيده وهي بتقول له بطيبة: عمري ما هزعل منك يا سليم عشان أنت حنين أوي عليّا وعمرك ما سيبتني أنام زعلانة حتى. سكتت شوية وبعدين بصت له بحب وقالت: كبرت في نظري أوي لما قلت إنك مش هتمد إيدك على بنت عشان دي مش حركة رجالة. سليم لأول مرة ما يسيبش إيدها زي كل مرة ويغير الموضوع، المرة دي باس إيدها وقال لها بحنية: وأنتِ كبيرة في نظري دايمًا.

سكتت شوية وبعدين قال لها: ليه لما بتحبي تشتري حاجة ما بتطلبيش مني، وأديتك فيزا وبرضو ما بتاخديش منها فلوس؟ ليه يا ملك كدا؟ طبطب على إيدها وقال لها: حبيبتي أنتِ في عيني وخدي اللي أنتِ عايزاه، ما تخافيش، أنتِ مش تقيلة عليّا ولا عمرك تكوني تقيلة عليّا. ملك اتصدمت من كلامه وقامت قالت له بذهول: حبيبتي؟ تقصد إيه بالكلمة؟ سليم ساب إيدها وقال لها: أنا بقول لمريم كدا برضو يا ملك. بعد عنها

وقال لها بعصبية مكتومة: أنتِ بتحاولي توصلي لإيه يا ملك؟ شيلي أي أفكار غريبة في دماغك، ولو كنت بحن عليكي وبعمل أي حاجة من الحاجات دي أو ببوس إيدك حتى؛ كل دا أنا بعمله مع مريم أختي، مش هقولهالك تاني، أنتِ زي أختي بس. خرج من الأوضة وقفل الباب وراه، وهي قعدت على السرير وريحت ضهرها وقالت بلامبالاة: لأ مش زي أخته؛ تصرفاته ما تقولش كدا، هو بيحاول يغير الموضوع مش أكتر؛ بس ليه لو هو بيحبني ما يصارحنيش بالحاجة دي؟

غمضت عينها ونامت. **** في صباح يوم جديد. كانت مريم وملك في المدرسة وسليم في الشركة. المدير طلب ملك في مكتبه؛ ملك استغربت إن المدير بنفسه عايزها. أومأت برأسها للميس بمعنى إنها جاية معاها وقامت من على الديسك وراحت للمدير. لقت سليم قاعد مع المدير وحاطط رجل على رجل وأول ما شافها طفى السيجارة وبص لها ببرود وقال للمدير: ينفع حضرتك تعيد اللي ملك عملته؟ المدير

بص لملك بجدية وقال لها: حضرتك خرجتي من بوابة المدرسة من غير ما تيجي تاخدي مني إذن؛ لكن لما مريم جت تخرج جت خدت مني إذن؛ أنتِ عارفة اللي أنتِ عملتيه دا مصيبة؛ أنا استنيت لما سليم باشا يفضى عشان أحكي له. ملك حطت راسها في الأرض وما كانتش عارفة تتكلم. سليم قام ورفع لها راسها ووقف قدامها وقال لها بهدوء: مش هكتر عليكي قدام المدير بس في البيت هيكون ليّا كلام تاني معاكي يا ملك. سكت شوية وقعد

على الكرسي تاني وقال لها: روحي على فصلك. ملك خرجت من المكتب وهي هتموت من الخوف إن سليم عرف إنها خرجت برا المدرسة من غير ما تقول للمدير أو تاخد إذن وممكن يشك فيها أكتر. سليم قام وسلم على المدير وقال له بابتسامة: أنا آسف جدًا بناءً عن ملك وهي مش هتكرر الحركة دي تاني أكيد. المدير وصله لبرا المكتب وقال له بابتسامة: مفيش أي مشكلة، الخوف الوحيد عليها عشان ملك أمانة للمدرسة.

سليم سلم عليه تكرارًا عشان ينهي الموضوع وقبل ما يخرج من الممر لقى ملك واقفة قدام الفصل وأول ما شافته ندهت عليه بلهفة وقربت منه بهدوء وحطت راسها في الأرض وقالت: أنا آسفة. سليم تجاهل كلامها ومشي وسابها ببرود. ملك غمضت عينها وجزت على سنانها بعصبية وقبل ما تدخل الفصل هدت نفسها ودخلت الفصل تاني. ***** ملك ومريم أول ما روحوا الفيلا. ملك دخلت قعدت على السرير وهي بتاكل ضوافرها بخوف ولسه ما غيرتش هدوم المدرسة.

ومريم كانت خارجة من الشاور ولافة شعرها بالفوطة وراحت تجيب بيجامة ليها من الدولاب وانعكاس المراية خلاها تشوف ملك فلاحظت توترها وقالت لها: إيه حصل لما روحتي للمدير؟ شكلك ما يطمنش. ملك بطلت أكل في ضوافرها وقامت وقفت وهي بتقرب من مريم وبتقول لها بتوتر: فاكرة لما ديما ضايقتني في مرة وأنا زعلت أوي وبوابة المدرسة كانت مفتوحة وطلعت أجري على البيت؟ مريم أومأت برأسها وقالت لها: فاكرة؟ ملك قالت

بحزن وهي بتفتكر اليوم: سليم افتكرني هربت من المدرسة والمدير خد عني انطباع وحش، ولو قلت لسليم على ديمت وصحابها هيحصل مشاكل وأنا مش عايزة كدا. مريم نزلت البيجامة من الدولاب وقعدت على السرير وهي بتفكر في الموضوع وبتقول لها: إيه المشكلة اللي إحنا اتحطينا فيها دي؟ ملك سكتت بحزن وحطت إيدها تحت راسها وبدأت تفكر في حل. مريم خدت البيجامة وقامت من على السرير ودخلت التواليت عشان تغير وهي بتكلم

ملك من جوه وبتقول لها: مفيش حل غير إن لما سليم يكلمك أنتِ تسكتي خالص وما تنطقيش؛ سليم عصبي بلاش تعاندي معاه. ملك خرجت من أوضة مريم عشان تروح تجيب لبس لنفسها من أوضتها ودخلت خدت شاور هي كمان ولبست بيجامتها ودخلت لمريم تاني وقعدت جنبها على السرير وهي بتقول: خايفة أوي من رد فعل سليم؛ هو كان زعلان مني أوي. مريم استغطت وريحت راسها على المخدة وهي بتديها

ضهرها عشان تنام وقالت لها: متخافيش بس أهم حاجة ما تخليهوش يتعصب؛ ونامي يلا. ملك قامت من جنبها وطفت النور وهي بتقول لها: لأ، ما ينفعش أنام، هستناه لحد ما يجي. خرجت وقفلت الباب وأول ما قفلت الباب ولفت لقت سليم طالع على السلم. ملك اتحركت من قدام أوضة مريم وخدت نفس عميق قبل ما يبدأ الخناقة؛ سليم أول ما شافها قدامه ما عبرهاش ولا حتى بص لها، دخل أوضته بس ملك دخلت وراه وقعدت على الكرسي وبهدوء: ينفع أفهم ليه بتعمل كدا؟

سليم قلع الجاكيت وخرج لبس من دولابه وقال لها من غير ما يبص لها: اخرجي برا عشان هغير. ملك وقفت قدامه وقالت له بإصرار: بس أنا عايزة أفهم أنت ليه عملت كدا؟ سليم رمى اللبس على السرير وبص لها بقرف وبعدين قال لها بعصبية: لأ خالص يا ملك، هربتي من المدرسة والله وأعلم هربانة مع مين ومش عايزاني أضايق؛ لو كنت بحن عليكي عشان أنتِ بنت ومحتاجة حنية يبقى ما تسوقيش العبط عليّا يا ملك وتستعبطي وتدوري تهربي من المدرسة.

ملك سكتت زي ما قالت لها مريم عشان ما يتعصبش عليها أكتر. سليم أدى لها ضهره وقال لها وهو متعصب وصوته عالي: بجد مش قادر أبص لمنظرك بعد اللي عملتيه؛ فيه بنت محترمة تعمل كدا أصلًا؟ ولو كان حصلك حاجة وأنتِ برا المدرسة والله وأعلم مع مين كنت أنا هعمل إيه؟ افهمي بقى أنتِ في أمانتي؛ لف وقال لها وهو بيشخط فيها وبيزعق:

مش عارف أقولك إيه يا ملك؛ بس من النهارده أنتِ مش هتشوفي الشارع غير بإذن مني ولما تيجي تروحي المدرسة هجيبلك عربية بسواق توديكي وتجيبك أنتِ ومريم مخصوص. قرب منها وهو بيقول لها بخبث هادي: خرجتي مع مين برا المدرسة؟ ملك كانت ساكتة وما بتنطقش لأنها لو اتكلمت هتعيط من خوفها منه. سليم بلع ريقه بغضب وقال لها بعصبية: لو مامتك وباباكي كانوا عايشين دلوقتي وعرفوا إنك عملتي كدا هيفتخروا بيكي مثلًا؟ قال لها بعصبية وصوت عالي:

ما تنطقي! ملك اتنفضت من صوته وقامت وقفت وهي بتدمع وبتقوله بصوت هادي من خوفها: أنا آسفة مش هعمل كدا تاني. سليم أول ما لقاها بتدمع ما هانتش عليه وحضنها وهو بيقول لها بهدوء: افهمي يا ملك أنا بخاف عليكي بلاش تعملي كدا؛ بلاش تخوفيني عليكي. اللي أنتِ عملتيه دا غلط ومش صح، أنا بخاف عليكي أكتر من نفسي يا ملك؛ كرر الكلمة تاني وقال لها وهو بيبوس راسها: أكتر من نفسي. ملك مسحت دموعها وبعدت

عنه وهي بتقوله بهدوء: أنا مش أختك يا سليم، أنت ليه بتعمل معايا كدا؛ بلاش تقول لي أنتِ زي أختي عشان أفعالك معايا ما تقولش كدا أبدًا؛ عايزة أعرف أنت ليه بتعمل معايا كدا يا سليم؟