رواية انا وهو وامة الفصل الخامس 5 - بقلم امل صالح

أومال فين جوزك يابت؟ بصوا الاتنين لبعض. وهو قال: -سندس هتطلق يا ماما. وقف أبوهم قصادها وضربها كف على وشها، رغم إنها منطقتش. للمرة التانية على التوالي تتضرب بدون ذنب أو سبب. قام حسام وقف بسرعة قصاد باباه وقال بصدمة من اللي عمله: -بابا! زعق أبوه: -أوعى كدا لما أشوف اللي الهانم عملته. تخليها توصل للطلاق؟ مهو سامي هيعمل إيه مثلاً! سندس عينها دمعت وقامت وقفت قصاد حسام اللي كان يعتبر حاميها من أبوها، وقالت:

-ضربني من غير سبب يا بابا، المفروض تسمعني! -أسمعك! أسمعك إيه يا أم أسمعك! هو الكلام ده في أي يتسمع! أنتِ تقومي تاخدي بعضك وترجعي حالاً بيت جوزك. هي ناقصة فضايح! مش كفاية متجوزك وأنتِ أم 26 سنة. حسام مكنش مستوعب كلام أبوه بالمرة، كان مفكر إنه هيقف مع أخته ويروح على الأقل يكسر إيد اللي ضرب بنته، لكن رد فعله صدمته. قال حسام وهو بيزعق المرة دي هو: -يعني إيه يعني 26 سنة! بعدين فين الفضايح في الطلاق!

هتعيش غصب عنها معاه يعني ولا إيه! مَـ تتكلمي يا أمي! قالها وهو بيبص لأمه اللي ساكتة من ساعة ما سمعت إن بنتها هتطلق. رفعت راسها مع نداء حسام ليها ومنطقتش. وأبوها رجع يزعق تاني: -مقولت أوعى يا حسام! خليني أربيها من جديد الـ*** دي. بعدين ما أمك أهي. قالها وهو بيشاور على مراته اللي باصة للأرض، قبل ما يرجع يكمل: -كنتِ بتشوفيني وأنا بضربها ولا لأ! شفتيها سابت البيت في مرة ولا قالت هتطلق! لف لمراته وقال: -بقولك إيه!

عقليها البت دي لأحسن أفشفشها في إيدي. حسام مسك إيد أخته وقال وهو بيشدها معاه: -أنا هتصرف أنا، بما إنك يا أبوها مش هتعمل حاجة. قال كلامه بتريقة وخدها وخرج وهو سامع تهديدات أبوه: -البت دي لو اتطلقت بمساعدِك يا حسام، لا أنت ابني ولا أنا أعرفك. وابقى ساعدها بقى يا سبع. مهتمش لكلامه وخدها ومشى. كانت ساكتة معاه طول الوقت وهو سايق العربية بعصبية. ركن عربيته تحت بيته ونزل وهي وراه. فتح بالمفتاح ودخل.

استقبلته مراته اللي بسمتها اتلاشت لما شافت سندس. والدم غِلى في عروقها أكتر لما قال: -سندس هتقعد معانا شوية يا نيرة، عندها مشكلة هحلها. بعدين لو هي حابة تقعد في بيتها تبقى تروح. بصت لسندس اللي حست بعدم راحة في نظراتها، وقالت وهي بتجز على سنانها: -طبعًا، تنوري يا حبيبة قلبي.