رواية انت دقات قلبي الفصل الثاني 2 - بقلم زينب علي

_اتصدمت لم شافت خطيبها بيبوس صاحبتها قالت بصدمة: انتو بتعملو إيه! بعدت صاحبتها بسرعة عنه وبصت لها بخبث رد خطيبها عليها ببرود: إنتي شايفة إيه؟ وقرب من صاحبتها بكل بجاحة بصت له بنظرة كسرة وخيبة أمل وطلعت تجري الشاب وجه كلامه لصاحبتها وقال: إنتي بعدتي عني ليه؟ قربت صاحبتها منه بمحن وقالت: مقدرش أبعد عنك يا حبيبي، أنا بس اتوترت

قرب منها وقال: لو بس أبويا مكنش غصبني عليها مكنتش بصيت لها أصلاً، وبعدين كدا أو كدا في الحالتين هتعرف حضنت صاحبتها الشاب بخبث وقالت: كويس إنها عرفت دلوقتي، مبقتش مستحملاها في حياتك شدت على حضنه وقالت: بحبك.. "في القاعة" خبطت عهد في نورسين وهي بتعيط نورسين مسكت إيديها وقالت: عهد مالك؟ عهد بعياط: عايزة أطلع من هنا عشان خاطري حضنتها نورسين بهدوء وقالت: حاضر يا حبيبتي، اهدي أخدتها وطلعوا برا القاعة

ونورسين حضنتها جامد وقالت: حصل إيه يا حبيبتي؟ عهد شدت على حضنها: طالما بيحبها خطبني ليه يا نورسين؟ أنا تعبت نورسين طبطبت عليها بحزن عليها: إنتي ليه لسه معاه لحد دلوقتي يا عهد؟ كان لازم تسيبيه من بدري عهد بعدت عنها بعصبية: عشان بحبه يا نورسين، مش عارفة أكرهه، حاولت كتير والله بس قلبي معاه قبل عقلي، حاولت أخليه يحبني بس معرفتش، وهو بيحب إسراء، خطبني ليه؟

أنا افتكرته بطل يحبها بجد، تعبت، مش بيفوت فرصة غير لما يكسرني، بقيت حاسة إني مش كفاية عشان أليق بيه أو أعجبه نورسين: أنا معاه بس هي اللي في قلبه عيطت وقالت: مكنتش أعرف إن الحب بيكسر الواحد للدرجة دي يا نورسين نورسين بصت لها بحزن ومش عارفة تعمل إيه، أخدتها في حضنها وقالت: ششش، كفاية، اهدي وقفت قدامهم عربية بورش ونزل منها شاب وقرب منهم باستغراب وقال: عهد مالك؟

نورسين بصت له بحزن: هنقولك بعدين، خد عهد العربية واستناني، هقول لبابا إني همشي وأجي الشاب بص له ومش فاهم حاجة وقال: حاضر، بس هي بتعيط ليه؟ مين زعلها؟ عهد مشيت تركب العربية وقالت بتعب: زياد بيخوني يا شادي بص له بصدمة وقال: إزاي؟ ردت عليه نورسين وقالت: مش دلوقتي يا شادي، هنروح حتة هادية وهنقولك كل حاجة، لحظة واحدة بس هتسيبهم هتدخل القاعة "على طاولة باسم" رشاد حط إيده على كتف باسم وقال: والله نورتنا يا باشا

خالد فرح إنك جيت والله ابتسم بهدوء وقال: إحنا عندنا كام خالد بس؟ قام باسم يسلم على رشاد وقال: همشي أنا وأبقى قول لخالد إني بقوله ألف مبروك قام رشاد حضنه وقال: يوصل يا باشا، طبعاً بس لسه بدري، خليك رد عليه باسم وقبل ما يقول كلامه قطعت كلامه نورسين وقالت: أنا آسفة إني هقاطع بس يا بابا أنا همشي، عهد معايا عشان متقلقش عليها رد عليها وقال: في حاجة ولا إيه؟ هزت راسها بمعنى لا وبصت لباسم بتكبر ومشيت عض على شفايفه وضحك

ووجه كلامه لرشاد وقال: بنتك الكبيرة رد رشاد بابتسامة: أيوا نور عيني، الدلوعة بتاعتي ابتسم باسم وقال: ربنا يخليهالك، مع السلامة يا أستاذ رشاد ومشي طلع برا القاعة شاف نورسين متعلقة في إيد شاب شد على إيده جامد وبص للشاب بعصبية بصله شادي باستغراب وقرب من ودن نورسين وقال: الراجل ده بيبص كدا ليه؟ لفت نورسين ولقيت باسم في وشها، استغربت هي كمان من منظره بس قالت: استغفر الله شدت شادي من

إيده ناحية العربية وقالت: فكك منه يا ابني، ده يبقى قائد فريق خالد شادي عليها وهو بيركب وقال: واو، شكلك مش طايقة وشه ركبت نورسين ببرود وقالت: دي حقيقة ساق شادي العربية، نورسين بصت ورا على عهد لقتها ساندة على الشباك بهدوء ووشها بهتان تنهدت نورسين وبصت لشادي بقله حيلة وقف العربية قدام البحر ونزلوا كلهم وقعدوا في مكانهم اللي بيقعدوا فيه دايماً، شادي قعد في النص، وعهد على اليمين، ونورسين على الشمال

قاعدين في صمت بيتفرجوا على البحر، بس نامت عهد على كتف شادي وقالت: لأول مرة في حياتي أبقى عايزة أخرج من حياة شخص، هفضل أحبه طول عمري بس مش هسمح إني أكون معاه وهو بيفكر في واحدة غيري شادي حط إيده على رأسها ورأس نورسين وبابتسامة قال: مهما كان قرارك احنا في ضهرك يا عهود كمل كلامه وقال: بس ممكن حد يفهمني حصل إيه؟ ردت نورسين وقالت له كل حاجة حصلت والسبب اللي عهد انهارت بسببه

شد شادي على إيده الاتنين بعصبية عشان مش بيحب حد ييجي على نورسين وعهد، بالنسباله دول أخواته اللي طلع بيهم من الدنيا رد على عهد وقال: إنتي أكيد مش هتقعدي ساكتة، لازم تسيبيه يا عهد بصت عهد على شادي بدموع وقالت: عارفة، أنا هفسخ الخطوبة، كفاية عندي إنه يكون مبسوط، مش عايزة حاجة تانية ردت عليها نورسين وقالت: إحنا جنبك وبنحبك يا عهد بصت لها عهد بهدوء وقالت: هطلع من حياته، وطول ما هو مبسوط معاها أنا مبسوطة عشانه

وجهت نظرها للبحر بهدوء، قرب شادي يحضن نورسين وعهد، وقعدوا يتفرجوا على البحر بهدوء "في الفرح" قرب معاذ من بنت وقرب من ودنها وقال بهدوء: مش هتحني عليا بقى ولا إيه؟ اتخضت البنت وبعدت عنه بسرعة وقالت: إنت عبيط؟ ضحك معاذ وسند على الطاولة وقال بغمزة: لا يا بيبي بصت له بقرف وأدت له ضهرها ولا كأنها موجودة اتعصب معاذ من تجاهلها ليه، قرب منها تاني ولفها ليه وقال: رهف، أنا مش بحب كدا بعدت

إيده وقربت منه أوي وقالت: يبقى ابعد عني، شوفت بسيطة إزاي؟ بصت له شوية وسيبته ومشيت، فصل باصص على مكانها وضرب إيده على الطاولة بعصبية وقال: ميبقاش اسمي معاذ لو مخلتكيش حرم معاذ الألفي بص للجرسون بابتسامة ومشي يروح عند أبوه قرب رشاد من معاذ وقال: العربيات جاهزة عشان هما هيطلعوا دلوقتي معاذ بص له شوية وبعدين استوعب قصد إيه وقال: أيوا يا بابا، العربيات واقفة برا مستنيني بس العريس يطلع مع عروسته طبطب

رشاد على كتف ابنه وقال: تمام يا حبيبي، رن على نورسين اطمن عليها خلص كلامه ومشي "قدام البحر" كانوا قاعدين وعهد نامت على كتف شادي، ونورسين سرحانة بتفكر في باسم وإزاي كان بيبصلها، قطع تفكيرها رنة تليفونها، مسكت التليفون بسرعة عشان مش عايزة تصحي عهد، شافت اللي بيرن عليها لقت أخوها، ردت عليه وقالت: أيوا يا معاذ رد معاذ وقال: إنتي فين يا بابا؟ ردت نورسين: قاعدة مع شادي وعهد شوية وهروح

رد عليها معاذ وقال: خلي بالك على نفسك، عموما إحنا أهو هنوصل العريس بيته ردت نورسين بابتسامة: ماشي يا حبيبي قفلت معاه وقالت لشادي: يلا نقوم نمشي، الجو بقى ساقعة أوي "في عربية باسم" ركن باسم العربية تحت العمارة وهو بيقول في الفون: ورق إيه يا بلال اللي أبص عليه دلوقتي؟ بلال رد وقال: القضية اللي كلمتك عليها امبارح، بس شكلك نسيت نزل باسم من العربية

وقال وهو طالع على السلم: لا منستش، بس أعتقد إنه مش وقته، والمفروض لما أجي، وبعدين ما تمسكها أنت رد بلال وقال: ما انت عارف يا عم إن معايا قضية تانية، ثم دي قضية مخدرات وأنا حد الله بيني وبين المخدرات ضحك باسم وقال: في قضايا القتل بس مش كدا ضحك بلال وقال: طبعاً، المهم زي ما قولتلك رد باسم وهو بيفتح باب الشقة وقال: خلاص أبو الرغي بتاعك، بكرة لما أجي هشوفه، اقفل بقى

قفل باسم في وش بلال السكة ودخل البيت، لقي الأنوار شغالة وسمع صوت حركة جاي من المطبخ قفل الباب بهدوء وحط الفون في جيبه وطلع المسدس وفضل ماشي بالراحة لحد المطبخ أول ما دخل رفع المسدس و....