رواية انت نوري الفصل الثاني والأربعون 42 - بقلم شيماء حمادة

فتون: لا مستحيل. إياد: هو أنا هأكلك؟ أنا عايزك في شغل على فكرة. فتون: مش هأطلع بالليل. إياد: بالليل إيه؟ الشمس لسه طالعة. الجامع بيأذن. فتون: شفت، المغرب أذن أهو. إياد بنفاذ صبر: فتون، بطلي شغل العيال ده. فتون: طيب أنت فين؟ إياد: تحت بيتك، انزلي. فتون: ما تطلع، واقف ليه؟ إياد: مش هينفع أطلع وأنتِ ومرات أبوكِ لوحدكم. فتون باستغراب: لا، بابا هنا. إياد: باباكي لسه نازل. فتون: راح فين؟ إياد: وأنا مال أمي هو راح فين؟

ما تنجزي يا فتون، دي شكلها مهمة زفت على دماغي. فتون باستغراب: مهمة؟ مهمة إيه؟ إياد بيجيب آخره: خمس دقايق وتكوني عندي. (ويقفل في وشها) فتون: هو ماله عصبي كده ليه؟ (وتحط حجابها على شعرها وتنزل) *** عند معتز، بيكون سايق العربية وجنبه مليكة اللي باين عليها الوجع. معتز بيوقف العربية قدام بيت محمد راشد. مليكة وهي مش عارفة تتكلم من البنج: شكرًا، تعبتك معايا. معتز بيضحك على شكلها وخدها الورم وطريقة كلامها غصب عنه.

مليكة بتبص له بضيق: بتضحك على إيه؟ معتز وهو مبتسم: لا مفيش، قولي خمسة ستة كده. مليكة: خم... إيه العبط ده، أنا بأقول ليه. معتز: سلام، وسلمي لي على بابا. مليكة بتهز رأسها. بيشغل العربية ويمشي. *** في بيت الدمنهوري، آدم بيطلب إيد جوري لآسر. يحيى: مبدئيًا أنا مش موافق، بس الرأي رأي جوري. آدم باستغراب: ومش موافق ليه؟ يحيى: كده بقى، ابن الكلب بتاع البنات ده يتجوز بنتي! آدم: طيب لاحظ إنك بتشتمني. يحيى: وإيه يعني؟ عندك مانع؟

آدم لسه هيرد، آسر بيقطعه باستعجال: طيب خد رأي جوري يا عمي. يحيى بينادي على جوري اللي بتكون واقفة ورا الباب وهتموت من الفرحة. يحيى: إيه رأيك؟ جوري بخجل: اللي تشوفه يا بابا. يحيى بخبث: تمام، يبقى طلبك مرفوض. فيروز بتدخل بالشاي. آسر بفرحة: زغرطي ونبي يا ماما. فيروز بتمثيل: هو أنا ما قلتلكش؟ آسر بقلق: إيه؟ فيروز: أنتِ وجوري أخوات في الرضاعة. آسر وجوري بصدمة: إيه؟ فيروز بضحك: بهزر بهزر، آدم ما رضيش يخليني أرضعك.

آسر بيرمي بوسة لأبوه. آسر: تسلم لي يا حجوج. الكل بيضحك عليه وفيروز بتزغرط وبيحددوا ميعاد الخطوبة اللي هو كمان أربع أيام. *** ما فيش مبروك لآسر ولا إيه؟