رواية انتقام انثى الفصل السادس عشر 16 - بقلم رشا منصور

مروان…. أول ما دخلت مع عبدالرحمن الأوضة كنت متوقع آخد لمياء ونخرج للفرح، لكن لقيت سناء قالت لازم تتصوروا الأول. وكانت لمياء واقفة بضهرها في آخر الأوضة. روحت أقولها أنا جيت، ولسه ببص لقيت نفسي بقولها: "إنتي حلوة أوي، جميلة فوق الوصف. والفستان كان طويل والطرحة مكنتش عارف أقرب منها." بس مقدرتش، محستش بنفسي إلا وأنا بحضن فيها وبقولها: "إيه رأيك بعد الفرح نسافر شرم ولا الغردقة ونقضي شهر العسل براحتنا بعيد عن الكل؟

وفضلت تبصلي وتضحك وساكتة. قولت لها: "إحنا كتبنا الكتاب خلاص، مكسوفة من إيه بس؟ طب بصي، سيبك منهم وتعالي نزوغ ونهرب من الزحمة دي. أنا مش عاوز حد يشوفك غيري." لمياء…. معرفش مروان ماله، أول ما شافني بقي زي المجنون ومش عاوز يبعد عني. ومش مبطل كلام وفضل ماسك أيدي وعمال يتغزل فيا لدرجة بقيت مكسوفة ومش عارفة أنطق. واللي طالع عليه عاوز ياخدني بعيد عن الكل. عبدالرحمن….

فضلنا أنا وإنجي وسناء بنبص على مروان مستغربين أفعاله، لدرجة إن المصور فضل يصورهم من غير ما ياخدوا بالهم. راحت سناء له وقالت له: "إيه رأيك، مش البلدي يوكل برضه؟ يلا علشان الفرح." وسناء مسكت الطرحة بتاعة إنجي، ومروان كان ماسك لمياء بإيديه الاتنين كأنها هتهرب منه. وخرجنا من البيت والفرقة زفتنا لحد الكوشة، وابتدي الفرح. وسناء فضلت جنب إنجي، وعيالي قعدوا عند السلم اللي تحت الكوشة، وكنت مبسوط أوي وأهل البلد بيسلموا علينا.

ومروان فضل متنح في وش لمياء وماسك إيدها لدرجة إنه مكنش بيسلم على حد. بصيت لـ لمياء وضحكت ودعيت من جوايا إن ربنا يسعدها وإن مروان يسترجل شوية. عمتي إحسان…. قعدت مع حمدية وسعدية على ترابيزة قريبة من العرايس وعيني مليانة بدموع الفرح. ومش مصدقة إني شوفت بتي كبرت وبقت عروسة. وفجأة لقيت جيلان بتقولنا: "خلوا أحمد معاكم علشان عاوزة تروح تقف جنب لمياء، إشمعنى سناء واقفة وأنا لأ؟ ما هو جوزي بيتجوز زي ما جوزها هي كمان."

قولت لها: "ما تتهدي بقى، طب سناء واقفة جنب بتي هي بنت عمتها، لكني إنتي تقربي إيه للعروسة؟ اقسم بالله لو ما قعدتي هنا لاخدك وأدخلك الزريبة تباتي مع البهايم، اقعدي." ولقيت سعدية قالت لها: "صدق من قال، اللي اختشوا ماتوا." وهدان…. كنت فرحان بعيالي، الحمد لله اطمنت عليهم. وكل أهل البلد شايفين مروان وهو طاير من الفرحة مع بتي. وابتدى المطربين والفرقة شغالة. ولقيت بعد ما المطرب حكيم سلم على العرسان ابتدى يغني ويقول:

"الصقفه كله يرقص وع الطبله كله يرقص." وببص لقيت الرجالة قاموا وسابوا الترابيزات وكبير وصغير بيرقص. ولقيت الستات نازلة زغاريط والبنات الصغار عاملين يرقصوا. ولسه بقول أشوف عثمان أخويا فين، لقيته على المسرح بيرقص مع عبد الله ابن إحسان. "بقي كده يا حكيم، مسيبتش حد من الرجالة إلا ورقصتهم. مش ناقص غير إني آخد عكازي وأطلع أرقص أنا كمان." عبدالرحمن…

لقيت شباب البلد جايين ياخدوني من الكوشة علشان أرقص معاهم. خليت سناء قعدت مكاني وروحت. قومت مروان بالعافية، مكنش عاوز يسيب لمياء. ولما قام كان عاوزها ترقص معاه. قولت له: "بناتنا مترقصش وسط الرجالة." ومسكت إيده ورقصنا مع الشباب، وحكيم رقص معانا هو وفرقته. وضرب النار شغال وهيصة والفرحة مش سيعاني. لمياء…. كنت مبسوطة وفرحانة ومكسوفة ومتلخبطة وعمالة أبص على إنجي وسناء وأنا قاعدة لوحدي في الكوشة بعد ما مروان قام يرقص.

شاورت لأمي قولت لها: "تعالي اقعدي معايا." وفضلت تبوس فيا وتصقف للعرسان. وأنا من جوايا لولا وجود الناس كنت قمت رقصت. ولقيت البنات أصحابي وقفوا يتصوروا معايا. وببص لقيت أوباص، فينار والليث. لأ حرام بقي، عاوزة أرقص معاهم، مش قادرة. قولت لأمي: "امسكيني." وببص لقيت عبدالرحمن بص لي، وروحت وطيت وشي وفضلت باصة للأرض. وفجأة لقيته وقف قدامي ومسك إيدي واخدني، واخد إنجي وسناء وخلى أمي وعمتي وكل صحابي البنات معانا.

وهو ومروان وكل رجالة العيلة وأبويا وعمي وحتى العيال عملوا دايرة حوالينا ومنعوا حد يقرب منا. وزي ما يكون ما صدقنا وبقت سناء مش عارفة تمسك طرحتي ولا طرحة إنجي. إحنا نزلنا رقص ومش مبطلين. وصافينار جت رقصت وسطنا. وفجأة شوفت جيلان واقفة عند عبد الرحمن. روحت غمزت لسناء وشاورت لها. راحت جابتها من قفاها وقالت لها: "تعالي ارقصي وافرحي لجوزك."

ووقفت هي معاها ومخلتهاش تقرب مني ولا من إنجي. فضلنا نضحك وعبدالرحمن يبص لسناء وضحك وشاور لها بإيده 👍👍. هو أنا، مش طايقة سناء، لكن منكرش إننا من غيرها مكنش هنعرف نتصرف. مروان…. كنت واقف وفرحان وشايف لمياء بترقص ومبسوطة. مقدرتش أمسك نفسي ودخلت في وسط البنات ومسكت إيد لمياء أرقص معاها على أغنية "بونبونايه ملبسايا". وكلهم يصقفوا لنا. ولقيت جيلان بتحاول تقرب مني. شاورت لها تبعد. وسناء مسكتها وأيدتها لأمي.

أنا بقالي كام يوم حاسس إني مش عاوزها، ولولا أحمد والعيادة وهي هتساعدني وتفتح معمل تحاليل معايا كنت طلقتها. أنا من بعد ما شوفت ضحكة لمياء مع عمتي، وأنا افتكرت كل حاجة من أيام ما كانت طفلة صغيرة وبتكبر وجمالها بيكبر وبيزيد معاها. وانهاردة الجمال ده بقى ملكي ومعنديش استعداد حد يضيع فرحتي دي.

ولأول مرة أحس وأنا مع لمياء بالغيرة. وعاوز أخبيها عن عيون الكل. حسيت بحاجات كنت أسمع عنها، لكن لأول مرة أجربها وأحس بيها. مش عارف ده اللي بيقولوا عليه الحب. أمي حمدية…. كنت فرحانة وأنا شايفه فرحة بتي. ولأول مرة أشوف مروان والفرحة مش سيعاه كده. ربنا يسعدك يابتي يارب. وببص لقيت سعدية ماسكة جيلان ومنعاها تقرب من لمياء. ولقيتها بتبص لي وبتغمزلي بعينها علشان أشوف فرحة مروان مع بتي. عثمان….

كنا واقفين على المسرح وببص لقيت أحمد ولد مروان نام على الكرسي ومحدش معاه والكل مشغول. شاورت للغفير. وقولت له: "خد أحمد ودخله أوضتك وخلي مراتك تاخد بالها منه، إياك تسيبه." وفضلت أتابع جيلان، مفيش لحظة فكرت تبص على ولدها. اللي زي دي محتاجة درس يفوقها. وفي نص الفرح الكل خد استراحة. والسفرجيه نزلوا الأكل على الترابيزات. والعرسان قاموا قعدوا على ترابيزة لوحدهم ياكلوا.

وشوفت سناء قعدت وعيالها معاها بتأكلهم. وسعدية بتشاور ليا علشان أجيب وهدان ونقعد معاهم نأكل. فضلت أتابع جيلان اللي قعدت تأكل ومفكرتش تشوف ولدها فين. ولقيت سعدية بتقولها: سعديه ام مروان…. "هو أحمد فين؟ أول ما قومنا على المسرح مشوفتوش؟ لقيتها قالت: "مش عارفة، تلاقيه جاع راح للطباخ علشان يأكله." بصيت لـ عثمان شاورلي برأسه علشان أسكت. وخلصنا الأكل والفرقة اشتغلت تاني. بس لقيت عبدالرحمن بيشاور لأبوه ولعمه. عبدالرحمن. ..

"شاورت لأبويا وعمي وقولت لهم إحنا هنروح على البيت وإنتوا كملوا الفرح مع الناس. ومتخلوش جيلان دي تقرب من أوضة لمياء. وخلي عمتي تبات النهاردة مع سناء متسبهاش لوحدها، وعبد الله يبات مع عيالي. إياك يا عمي أعرف إن جيلان قربت خطوة من أختي، والله أضر’بها وقدامكم." لقيته قالي: "متخافش، أنا مجهز لها نومتها اللي هترتاح فيها على الآخر." وخدت إنجي وروحنا نوصل لمياء الأول البيت. وبوست راسها وقولت لمروان: "إياك تز’علها." قالي:

"هي في عنيا." وخدت إنجي وروحنا بيت عمتي. وسناء باست إنجي وقالت لنا مبروك. حضنتها وقولتلها: "متناميش لوحدك، عمتي هتفضل معاكي 😙." وأول ما اتقفل باب البيت شيلت إنجي وطلعت أوضتنا. وقولت لها: "اتفضلي يا حب عمري." وساعدتها في شيل الطرحة و……. مروان…. أول ما دخلنا البيت وقفلوا الباب، خدت لمياء وجريت بيها على الأوضة. وفتحت الباب وانحيت لها وقولتلها: "اتفضلي يا مولاتي."

وببص لقيت السرير عليه ورد على شكل قلب. ومحستش بنفسي إلا وأنا بشيلها وبلف بيها الأوضة و….. وهدان… فضلنا سهرانين طول الليل لحد ما الناس مشيت والفرقة كمان. وكلنا دخلنا الدار علشان نرتاح وننام. لقيت عثمان قال لـ جيلان: "تعالي علشان أديكي حقك." وبعد شوية سمعنا….. !!؟ يتبع…