رواية انتقام شمس الفصل الرابع عشر 14 - بقلم زهرة عصام

كل الكل برق من الصدمة وبصوا على شاكر اللي بيبص لأبوه بغضب وقوة. كانت أول من فاق من الصدمة هي زينب، اللي ابتسمت بخبث ووقفت جنب عمها وقالت: "أيوة كدا يا عمو عرفهم كلهم مقامهم واطرد الزبالة اللي دخلت البيت دا من هنا، خلي المكان ينضف بقى ألا بقت ريحته وحشة أوي." شمس بصت ليها بقوة وبعدين بصت لحمزة اللي مسك زينب من دراعها وكان على وشك ضربها وهو بيقول:

"لمي لسانك وإنتي بتتكلمي عنها وإلا وأقسم بالله مش هيحصلك كويس مني يا زينب، أنا حذرتك كتير لكن انتي واضح مفهمتيش تحذيراتي." زينب بلعت ريقها بصعوبة وهي بتبص لحمزة، لكن حاولت إنها تثبت على موقفها وقالت بتبجح: "وإنت مالك إنت إذا كان أبوها وإخواتها راضيين عنها كدا، إيه يدخلك إنت في الكلام ولا عاوز تعمل حامي الحما وعنترة ابن شداد قدام جدك عشان تبقى الحو فينا؟

حمزة اتعصب وكان رفع إيده عليها عشان يضربها، وزينب اتصدمت من رد فعله لأن المعروف عن حمزة إنه عمره ما يمد إيده عليها ولا على أي بنت مهما توصل درجة عصبيته منهم. زينب غمضت عيونها وانتظرت القلم اللي هينزل على وشها، لكن سمعت صوت الكف وصدى صوته في المكان ومحستش بأي ألم. فتحت عيونها ببطء، لقت زين واقف قدامها ظهره ليها ووشه لحمزة اللي بيبصله بعصبية وغضب. زين بص لحمزة بحرج وخجل وقال:

"مهما تعمل يا حمزة هي أختي، عمري ما أرضى ليها الإهانة دي، إنت معاك حق في كل حاجة عاوز تعملها وكل حاجة هتعملها هبقى معاك حق فيها، لكن أنا اللي هتحمل نتيجة أخطائها." وبص لزينب بطرف عينه وقال: "حسابنا لوحدنا يا اللي مبتقدريش حد." حمزة الغضب اتملك منه وضغط على إيده جامد وضرب زين بوكس في وشه وهو بيقول بعصبية: "و هو دا غلطكم إنكم بتدافعوا عنها، سيبوها تتحمل نتيجة اختياراتها وأخطائها يمكن تتعلم منها."

شمس مسكت إيده وهو بص لها بنظرات غضب ونفض إيديها وبص لمروان وطربه بوكس جامد وقعه على الأرض. شمس حطت إيديها على بوقها بشهقة وبصت عليهم بهلع، ومازن جري على مروان يساعده يقف وبيحصوا لحمزة بحذر، اللي انفتح فيهم وقال: "بصوا واتعلموا يمكن تسترجلوا شوية يا شوية نساوين، اتعلموا الرجولة ودافعوا عن أختكم اللي كل ذنبها في الدنيا إن الراجل دا... شاور على شهاب وكمل كلامه: "...

يبقى أبوها وإنتوا تبقوا إخوتها، أنا مش عارف مش عارف أعمل معاكم إيه تاني، كلمتكم بالهداوة لكن برضه محدش سمع ليا، شديت عليكم محدش عمل اعتبار لكلامي." الجد بص له وقال: "حمزة." حمزة قطع كلامه وقال بقله حيلة: "حمزة تعب يا جدي، حمزة نفسه يرتاح، بقى شايل مسؤوليتهم على كتافي وراضي والله لكن هما مش بيشكروا وبيزيدوا عليا وبيضغطوا بالجامد لدرجة إن واحد منهم حاول يقتل أخته وأنا واقف متكتف معرفش حاجة."

مروان بص له بصدمة وبرق، وشمس عقدت حواجبها وبصت ليهم، أما حمزة بص لمروان وقال: "إيه كنت مفكر إن محدش هيعرف بعملتك السودة دي؟ لا يا مروان أنا عارف كل واحد في البيت دا بيفكر إزاي ويقدر يعمل إيه وميعملش إيه." سحبه من هدومه ودفعه وقع قدام رجليين شمس، اللي بدورها أخدت خطوة لورا وبان عرج رجليها من حركتها. حمزة نزل بمستواه جنب مروان وقال:

"بص يا غبي دي أختك اللي لو لقتك بتموت وهتحتاج روحها هتديهالك ومش هتتردد لحظة، لكن إنت عملت إيه عملت إيه حاولت تقتلها." وبص لمازن اللي دموعه غلبته ونزلت بصمت وقال: "وإنت ساعته على كدا يعني مشترك معاه في كل حاجة، عارف ليه عشان سكت، سكت على عملته السودا دي." مازن بدموع: "يعني كنت عاوزني أعمل إيه أقدمه للمحكمة بأيدي دي أخويا يا حمزة." حمزة وقف قدامه بكبرياء وقال بصرامة:

"و دي أختك وبنت ومحتاجة مساعدة تسكت عن حقها عشان شحط لو حد عرف مكانته مش هيقعد ساعة واحدة في القسم." "يا زين ما ربيت يا عمي والله رجالة بشنبات بالاسم فقط." شاكر بص له بغيظ وقال: "ويا ريتها ماتت وريحتنا من قرفها، لكن هي زي القطط بسبع أرواح مش هتموت ولا هنخلص منها في سنتنا دي." بص لشمس وقال: "موتي بقى وريحينا من وقت ما دخلتي القصر وهو قايد نار من تحت راسك." الجد مسكه من إيده بقوة وجذب انتباهه ليه وقال:

"ملكش دعوة بيها كلامك معايا أنا، دي جذمتها برقبتكم كلكم، أمها علمتها اللي عشت عمري كله أحاول أزرعه فيكم لكن محدش منكم طلع زي ما أنا عاوز." شهاب نزع إيده من إيد الجد بقوة خلت الجد يرجع خطوة لورا واستند على عكازة عشان ميقعش، وبص لشهاب بصدمة، اللي بدوره بص له ببرود وقال: "زي ما قولت حضر نفسك عشان تستلم جواب من المحكمة بقضية الحجر." الجد ضحك بصوت عالي وقال: "تحجر على إيه مش لو كنت أمتلك حاجة من الأساس." شهاب باستغراب:

"يعني إيه." الجد فجر القنبلة اللي صدمت الكل، وأولهم شمس، وقال: "يعني كل حاجة دلوقتي باسم شمس شهاب الدغيدي والواصي عليها جوزها حمزة محمود الدغيدي، وريني بقى هتعمل إيه."