رواية انتي الترياق الفصل الثاني والعشرون 22 - بقلم هايدي احمد

فتحت غزل عينيها براحة وهي تبص له ومبتسمة. دلوقتي بس فهمت قصده بإنها مش أول مرة. كانت هتحرك إيديها بس رجعت وغمضت عينيها وعملت نفسها نايمة ودفنت راسها في صدره أكتر. ده خلى جاسر لا إرادي يشدد عليها أكتر. ونامت وهي مطمنة إن فيه أمل لعلاقتهم تتحسن، بس محتاجين وقت. تاني يوم صحي جاسر ملقاش غزل جنبه فاستغرب. بص حواليه وبرضه مش موجودة. قام ناحية الحمام وسمع صوت الميه فـ اطمن إنها جوه. وراح يلعب رياضة لعند ما خلصت.

لقاها خارجة، لافة راسها بفوطة. وأول ما شافتـه ابتسمت ابتسامة خفيفة. وهو ضيق عينه بسبب ابتسامتها. وبعدين أخد الفوطة ودخل الحمام. أما غزل راحت تطلع له هدوم الشغل اللي هينزل بيها وقعدت تسرح شعرها. وبعدين لبست هدومها وراحت تشوف داوود عشان الحضانه. دخلت أوضته بعد ما خبطت. لقتـه لسه نايم. فراحت تطلع هدوم المدرسة. وبعدين راحت تصحيه. = داوود .. داوود يلا عشان متتأخرش عن الحضانه.

صحى داوود وهو بيفرك عيونه بنوم وبيبص لها بنص عين. وبعدين راح أخد فوطة ودخل الحمام. ضحكت غزل لأنه زي أبوه بالظبط حتى وهو قايم من النوم. وبعدين راحت تجهز شنطته. = داوود البس هدومك وانزل تحت عشان الفطار بس بسرعة قبل بابا ما يمشي. بعدين خرجت وراحت لأوضتها تشوف جاسر. كان لسه طالع من الحمام وبينشف شعره. بس لفت نظره الهدوم اللي على السرير واستغرب. وبعدين بص لغزل اللي كانت بترتب السرير.

وفضل يتابعها لأنها غريبة النهاردة صاحية بدري وبتاسم ومجهزة له هدومه. ياترى فيه إيه. سابها وراح يصلي ركعتين. وبعدين راح ناحية الدولاب وطلع لبس تاني يلبسه ودخل الحمام. بصت له غزل باستغراب وراحت مسكت الهدوم اللي كانت على السرير. هو ما أخدش ده ليه؟ ذوقي وحش ولا إيه؟ ذوقي إيه، ما هي هدومه وهو اللي اختارها. بعد شوية خرج جاسر وكان لابس قميص وبنطلون وعليه بليزر. وراح يسرح شعره وهو بيبص على غزل بطرف عينه وهي ماسكة الهدوم.

= إيه هتفضلي ماسكاهم كده طول اليوم؟ = ها.. لا. بعدين أخدتهم وراحت تعلقهم في الدولاب ورجعت. = احم.. هما مش عاجبينك قصدي يعني مش... قاطعها جاسر وهو بيبص لها. = مبحبش ألبس على مزاج حد، بلبس على مزاجي أنا. ثم إيه النشاط اللي انتي فيه ده، نشاطك بيجي على السفر ولا إيه؟ = لا أنا أصلاً مبحبش السفر. بصلها جاسر بانتباه. = بحب أخرج آه، بس مبحبش أسافر. بص جاسر قدامه بشرود شوية وبعدين كمل شعره وعدل هدومه وحط برفان.

وبعدين راح ناحية الباب عشان ينزل. بس غزل وقفته. = انت هتيجي امتى؟ لف لها جاسر وهو بيبص لها باستنكار. = قصدي عشان.. العشاء عشان نتعشى كلنا سوي. = لسه معرفش. وبعدين نزل وهي نزلت وراه. وتحت كان قاعد والد جاسر والشغالين بيجهزوا السفرة للفطار. = يا صباح الخير على العرسان. = عرسان إيه، ما خلاص خلصنا. = إزاي بس، ده أنتم مكملتوش شهر لسه، عرسان طبعاً. اقعدي يا بنتي عشان نفطر سوي، هو داوود مصحاش؟

= لا صحي وبيـلبس هدومه زمانه نازل. بصلها جاسر بانتباه لأنها راحت لداوود. وبعدين بدأ يفطر وطبعاً بدأ بالقهوة. وغزل قعدت جنبه وبدأت تاكل لعند ما داوود نزل. وراح باس جده من خده. = صباح الخير يا جدو. = صباح الخير يا حبيب جدو، يلا صبح على بابا وماما. غزل راح داوود لباباه وهو بيبص له بخوف شوية ووقف جنبه وهو بيشرب القهوة. وغزل متابعاه. = احم.. بوس بابا يا داوود. كان جاسر بيشرب القهوة بس وقف وبصلها.

بصت له داوود شوية وبعدين بص لجده وهز له راسه. وقعد يقرب من جاسر عشان يطوله. فـ بص له جاسر شوية وبعدين اتنهد وقرب خده لداوود اللي ابتسم ومسكه من رقبته وباسه من خده. = صباح الخير يا بابا. بصله جاسر شوية وعينه مبتسمة ورجع كمل قهوته. وغزل ابتسمت وبصت لحماها وهز لها راسه. كان داوود رايح يقعد بس جده وقفه. = إيه يا داوود مش هتصبح على ماما غزل؟ يلا صبح عليها. بصله داوود وبعدين من غزل وفضل يبص لي مش عارف يعمل إيه.

فـ ضحكت غزل وقربت خدها ليه وهو باسها وقال بخفوت. = صباح الخير يا غزل. = صباح النور على عيونك. وبعدها قعد داوود وكملوا فطار. واتكلم جاسر شوية في الشغل مع والده. وغزل كانت متابعة داوود وأكله لعند ما جاسر قام وعدل هدومه. = يلا يا داوود عشان نمشي. فرح داوود وقام بسرعة وأخد شنطته وجرى على بره للعربية. = استأذنكم أنا. = لحظة يا جاسر. وقف جاسر وبص له مستني يقول. = خد مراتك معاك. كانت غزل بتاكل وشرقت لما سمعت حماها وبرقت.

= نعممم! أخـدها فين يا سيادة اللواء؟ انت سامع بتقول إيه؟ مسك والده فنجان القهوة يشربه بهدوء ونزله. = أيوه طبعاً، إيه فاكرني خرفت؟ قولتلك خد مراتك معاك. = بابا مستحيل الكلام ده يحصل. أخدها وسط المجرمين والمشبوهين إزاي؟ = الله وانت فين لما هي تبقى وسطهم يا حضرة الضابط؟ عايز تفهمني إنك متقدرش تحميها ولا إيه؟ = أكيد مقولتش كده، وبلاش تلعب في الحتة دي بالذات. بص والده بعيد بخبث ورجع بصله بجد.

= لا أكيد مقصدش اللي فهمته. ثم ده عشان مراتك تغير جو، هتفضل محبوسة في البيت كده؟ = ما إحنا لسه جايين من السفر امبارح، وبعدين يوم ما تخرج تروح القسم. = سفر إيه؟ هو ده سفر برضه؟ وبعدين انت أكيد مش فاضي تخرج، فـ خدها معاك. يلا مش انتي عايزة تخرجي يا غزل يا بنتي؟ = ها. بصلها حماها بمغزى وشدد على كلامه. = ردي، مش عايزة تخرجي وزهقانه؟ = ها.. آه آه. بصلها جاسر برفعة حاجب وتوعد. = تمام أوي.. اتفضلي يا هانم قومي عشان منتأخرش.

شاور لها حماها عشان تقوم فقامت بكسوف شوية. = احم.. هو أنا ممكن أطلع أغي.. = لا ويلا عشان اتأخرنا.. ورايا. لبس نضارته ومشي. ودعت حماها ومشيت وراه بغيظ. (يارب عدّي اليوم ده على خير، هيبتديها من أولها) خرج جاسر وراح ركب العربية وداوود كان ورا. وراحت غزل ركبت مع داوود ورا. وطبعاً داوود كان مبسوط جداً إنهم هيوصلوه. ......................................... …...... …... …..... …......................... = ها ناويه على إيه؟

بصت له مايا وبعدين بصت قدامها. = خلاص مش قدامي غير الحل ده، لازم أخلص منها بشياكة. فاهمني؟ = بس بقولك إيه، الموضوع ده كبير وعايز شغل أكبر. وانتي عارفة جاسر ووصلاته يعني رايحين رايحين. = قولتلك خلاص، متقلقش. الموضوع ده هيبقى من برة برة، فاهمني؟ يعني مش هنتلط فيه. اسمع مني. = أمري لله. المهم قومي يلا نخرج نغير جو ونشوف أصحابك. = مش قادرة من سفر امبارح، اخرج انت. = أوك، ارتاحي انتي. باي.

..................................... ….......................... …..... …............ وصل جاسر وغزل للحضانة ونزلوا داوود. وغزل نزلت معاه عشان تدخله. = رايحة فين؟ سيبيه هو هيدخل. = هوصلـه لجوه وأرجع. مسكت غزل إيده ومشيت. بس هو وقفها وفضل يبصلها. وهي لفت له باستفهام ومش فاهمة هو عايز إيه. بس بص لجاسر وهو في العربية وبعدين رجع بص لغزل. فـ فهمت غزل قصده إنه عايز جاسر يجي معاه.

هزت له راسها وأخدته معاها عشان جاسر ميرفضش قدامه. ورااحت جنب الشباك فنزل جاسر الشباك وبصلها. = إيه رجعتوا ليه؟ = احم انزل ادخل معانا. = نعم.. هي رحلة؟ ما تخلصي دخليه خلينا نمشي اتأخرت. = احم شاورت له غزل على داوود اللي بيبص له. بص له جاسر ولقاه بيبص له برجاء. فاتنهد بقلة حيلة ونزل. وغزل ابتسمت لما شافته نزل. = اتفضلوا يلا. جه يمشي بس وقف لما داوود مسك إيده وهو بيضحك.

بصله جاسر وبص لإيده وبعدين بص لغزل اللي كانت مبسوطة من عملة داوود. وبعدين دخلوا الحضانة. وكان داوود مبسوط جداً إن أصحابه هيشوفوه مع باباه ومامته وإنه عنده زيهم. شافتهم مس لداوود وجاتلهم. = أهلاً وسهلاً بحضراتكم. ازيك يا داوود.. أنتم أهله؟ = أيوه حضرتك. انتي المس بتاعته؟ = أيوه أنا اسمي إيه يا داوود؟ = مس كنزى. = ههه أيوه أنا مس كنزى. وبصراحة ابنكم ما شاء الله عليه ذكي جداً وبيفهم المعلومات كويس جداً.

فـ أنا برشحلكم مدرسة انترناشيونال كويسة جداً يدخلها بعد الحضانة و.. قاطعه جاسر بعملية أحرجتها. = أنا عامل حسابي على الموضوع ده ومجهز له الورق. متتعبيش نفسك. وبعدين بص لغزل بمعنى يلا. = احم.. أوك. نورتوا حضرتك. يلا يا داوود. ودعت غزل داوود وودته للمس بتاعته. وبعدين ركبوا العربية. بس غزل كانت ورا لوحدها وجاسر قدام جنب السواق. أما غزل كانت متوترة من اللي هيحصل.

بعد وقت وصلوا للقسم وده دب الخوف في قلب غزل لأنها أول مرة هتدخل قسم شرطة، لأ وكمان مع جوزها. دخل جاسر بهيبته الطاغية وغزل وراه منكمشة على نفسها. وكل ما يمر على حد يحييه التحية العسكرية بصرامة. وده كان بيخض غزل لعند ما وصل لمكتبه. والعسكري اللي قدام الباب حياه بصوت عالي وهو بيفتح له الباب. وده خض غزل أكتر ولزقت في جاسر من الخضة. وبعدين رجعت ورا بكسوف منه. وجاسر كان بيبص لها بسخرية. = فيه إيه مالك؟

ده إحنا لسه في أول اليوم. انشفي كده. وسابها ودخل المكتب. وهي فضلت واقفة تحذر نفسها عشان تاخد بالها. (اجمدي يا غزل، لسه اليوم طويل) = هتقفي عندك كتير؟ ادخلي. خلصت. دخلت غزل بسرعة وراه وهي بتبص حواليها للمكتب. المكتب كان مقفل وألوانه غامقة وباين من أثاثه إن جاسر اللي مظبطه كده عشان يقعد فيه. دخل جاسر بكل هيبته وقلع النضارة حطها على المكتب وقعد على الكرسي. وغزل كانت لسه بتتفرج على المكتب. = مطولة عندك؟ = ها.. لا لا.

وراحت بسرعة قعدت قدامه على المكتب. = طب اسمعي، أنا عندي كذا قضية دلوقتي. تقعدي هنا في جنب ومسمعش صوتك لعند ما أخلص. ومتتكلميش مع حد فاااهمة؟ = طيب.. أما أشوف آخرتها. = بتقولي إيه؟ = لا مبقولش.. اقعد فين؟ = اقعدي هناك على الكنبة دي. خلي اليوم ده يعدي على خير. = حاضر. راحت غزل تقعد على الكنبة وطلعت تليفونها قعدت تقلب فيه. لعند ما خلص عسكري من بره. = تمام يا فندم. المتهم موجود بره. ادخله سعادتك. = دخله.

كانت غزل بتراقب اللي بيحصل وهي مركزة. دخل العسكري وفي إيده واحد في إيده كلبشات وشكله متبهدل وواضح إنه اللي هنا اللي عاملين فيه كده. راحوا قدام جاسر ووقفوه. = ها يا ابني هتقول ولا عايز تطول معانا هنا وبعدين تترحل على النيابة يتصرفوا معاك؟ = يا فندم أنا قولتلك كل اللي عندي قبل كده. حضرتك ليه مش مصدقني؟ بصله جاسر شوية بضيق وبعدين قعد يتكلم معاه بنبرة تحذيرية وصارمة.

ده غير العسكري كان بيقوم بالواجب معاه وكل شوية يضربه عشان يتكلم. وده كان قدام غزل اللي كانت متعاطفة مع الولد وزعلانة من معاملتهم ليه وحاسة إنه مظلوم. بعد شوية زهق جاسر وقال للعسكري يدخله تاني الحبس. فـ شده العسكري بعنف وأخده. وطلع جاسر سجاير وقعد يدخن. فـ اتجرأت غزل وكلمته. = هو أنتم بتعاملوه كده ليه؟ شكله مظلوم. بصلها جاسر بسخرية على كلامها وبرفعة حاجب. = وايش عرفك بقى؟ جابك محامية ليه وأنا معرفش؟

= لا مش محامية ولا حاجة بس شكله بيقول كده. وبعدين طريقته في الكلام برضه بتقول كده. = والله أنا ضابط هنا. شغـلتي مبتقوليش ده شكله طيب وده كلامه حلو والكلام الفاضي ده. فيه حاجة اسمها أدلة وبراهين أمشي عليها. بعدين متتخدعيش في الناس كده من أول مرة. انتي لسه متعرفيش حاجة.. يا طفلة. برقت غزل وبصت قدامها بصدمة. (هو قال لي إيه؟ طفلة؟ أنا غزل طفلة) = إيه مش عاجبك؟ طفلة.

= على فكرة أنا مش طفلة، أنا عندي 22 سنة ونص يعني مش طفلة. بصلها جاسر بابتسامة جانبية بسخرية. = لا طفلة برضه. ولو مش عاجبك اخبطي راسك في الحيطة اللي وراكي. كانت لسه غزل هترد عليه بغيظ بس...... يتبع