رواية أرملتي العذرء الفصل الثالث 3 - بقلم ديجا

وصلت أميرة البيت عند دينا هي والولاد وأكلتهم وبيستعدوا للنوم عشان المدرسة الصبح. فريدة: أنا فرحانة إنك هتفضلي معانا هنا عشان في بيتك تيته كوثر بتزعقلنا. أميرة حضنتها: وأنا كمان فرحانة إني هكون معاكم ومتزعليش من تيته، هي بس بتبقى تعبانة. فريدة: تعبانة كل يوم، طب تروح المستشفى عشان تخف زي ماما وتعمل عملية كمان. أميرة: مينفعش نتكلم على حد مش موجود، تمام؟ ومش لازم كل التعبانين يروحوا المستشفى. فريدة: سوري يا ميرو.

وباستها من خدها. أميرة: يا خلاسي على القمر يا ناس، هاكلك أنا. يلا على العموم عشان المدرسة. فريد قاعد زعلان. راحتله أميرة: مالك يا حبيبي قاعد كده ليه؟ فريد: أنا زعلان عشان ماما شكلها تعبانة أوي وإحنا طول الوقت معاكي. أميرة: ادعي لها ربنا يشفيها. وبعدين يا سي فريد زعلان إنك معايا؟ طب أنا مخصماك وما فيش برجر الصبح. فريد: خلاص أنا آسف إلا البرجر. وقام باس راسها وحضنها. فارس: يلا بقى احكيلنا الحدوته عشان ننام يا ميرو.

أميرة بضحك: حاضر يا قلب ميرو. *** في المستشفى. خرج الدكتور: الحمد لله العملية نجحت، بس الحالة لسه مش مستقرة. لازم نفسيتها تكون كويسة الأيام الجاية عشان نعدي على خير. أحمد: كده حضرتك استأصلت الورم؟ في أي ورم تاني؟

الدكتور: للأسف في أورام في أماكن حساسة جداً واستئصالها حالياً مش في صالح الحالة. هنمشي على جلسات كيماوي وربنا ييسر. هي هتفضل يومين هنا تحت الملاحظة وبعدين تقدر تاخدها البيت. وهبعت لحضرتك ممرضة تاخد بالها منها. أحمد: ما فيش مشكلة، اللي في الصالح أعمله يا دكتور. المهم ترجع لينا. الدكتور: إن شاء الله. أهم شيء النفسية. عن إذنك. كانت أميرة على تليفون ليلى تطمن على دينا. ليلى: الحمد لله يا بنتي، العملية نجحت.

أميرة: الحمد لله والشكر لله. ليلى: الولاد ناموا؟ أميرة: آه يا طنط من بدري. هو مين اللي هيبات معاها؟ ليلى: أحمد يا بنتي مش راضي يجي هو يريح وأنا أفضل جنبها. أميرة: الولاد ناموا ومش هيصحوا إلا على معاد المدرسة. حضرتك تعالي انتي والبشمهندس وأنا هبات معاها اليومين دول. ليلى: ربنا يبارك فيكي ويحفظك يا بنتي. ثواني أقول لأحمد وأرجع أكلمك. أحمد يا ابني أميرة بتقول.... كوثر بأندفاع: وهي إيه اللي وداها الشقة وما فيش حد؟

ليلى: أنا اللي قولتلها عشان الولاد ميتأثروش بتعب مامتهم وقلقنا عليها. كوثر: ست البيت مش موجودة هي اللي يوديها. أحمد: أميرة بقت مراتي وليها فالبيت. كوثر ضربت على صدرها: اتجوزت على بنتي وهي في الحالة دي؟ وكمان مرات أخوه؟ منك لله أنتِ والعقربة. أحمد: بنت حضرتك اللي طلبت كده. لما تفوق اسأليها بنفسك. يلا ماما عشان أوصلك وأجيب أميرة. كوثر بشر بعد ما مشيوا: أنا هوريكي يا ست أميرة يا خطافة الرجالة.