رواية أصحاب الظلال السوداء الفصل الثاني عشر 12 - بقلم روزان مصطفى

رمت المشط وبصتله وقالت: نعم! بدر بوضوح: بقولك بتعرفي ترقصي شرقي؟ سيا برخامة: مبعرفش لا. بدر بحسرة: خسارة والله، كان نفسي أعيش دور المعلم. هي بعوجة بوق: ما كفاية عليك دور الزعيم. بدر بصوت عالي: هههههه، لا عجبتني دي. سيا جاية تتحرك من قدامه راح ساحبها من دراعها وهو بيقول: أنا مش بكلمك؟ سيا بوجع: آآآي بالراحة يابدر إيدي بتوجعني. بيسحبها ليه وهو بيشم ريحتها: وأنا قلبي بيوجعني، أهون عليكي.

بتبعد نفسها وهي بتقول: مش هخليك تقربلي يابدر طول ما إنت مكمل في الشغل اللي معرض حياتك للخطر دا. حط بدر صوابع إيديه بين خصلات شعره وهو بيقول: إبتدينا نكد. سيا بعتاب: نكد عشان خايفة عليك؟ نكد عشان مش عاوزاك تقربلي وأحمل منك تاني وإيدي ع قلبي لا ابننا يتيم ولا هو ذات نفسه يموت وأتعب تاني. بدر وهو بيضغط على جسمها بين دراعه

كان هيكسرلها عضمها قال: مفيش كلب بيقربلنا بسيبه بيتنفس وعايش، مبقعدش وقت طويل عشان آخد حقي، وعلى فكرة من ساعة ما اتجوزنا شغالة نكد الله ينور مع إنك قبل الجواز إنتي اللي خلتيني أحبك بسبب حبك ليا. سيا بحزن: أنا اللي مريت بيه مش سهل عليا عشان أفضل زي ما أنا، خلاني طول الوقت خايفة ومرعوبة من فكرة أصحى ألاقي نفسي لوحدي في الدنيا دي وكمان معايا بيبي، أو ييجي يوم مصحاش وأقابل ربنا وأنا مش جاهزة.

بتكمل وهي بتبصله بعشق: بموت فيك يا بدر يا كابر بس لازم أعاندك لحد ما تتعدل وتبعد عن السكة دي. بدر اتنهد وقال: لو سيبت المافيا هشتغل إيه؟ سيا بلمعة عين: معاك فلوس تفتح بيها شركة أو مشروع كبير وتبقى إنت سيده. بدر بعصبية: مش ملاحظة إنك بتضغطي عليا؟ مش عاوزاني أقربلك مش هقربلك دي بقت عيشة تقرف. خرج من الأوضة وهو متعصب، فقعدت سيا على السرير بحزن وهي مش عارفة تتصرف إزاي.

دخل بدر على أوضة كينان لقى كينان قاعد ع الفون بيتفرج على فيلم. بدر بغيظ: خش جوا شوية. كينان بابتسامة: هتنام جمبي يا زعيم؟ تعالى. بدر وهو بيقلع جزمته وبيحدفها جامد: دي بقت عيشة نكد، أيوة هتخمد جمبك. قفل كينان فونه وطفى النور وهو باصص للسقف. بدر بهدوء: اتخمد إنت كمان عشان نصبح بكرة بدري. كينان بتساؤل: رايحين في حتة يا زعيم؟

بدر بتعب: هنقابل واحد من رجالتنا بكرة في البار، هنتفق معاه على حوار كدا يخص توفيق. الصبح عاوزك تقول للهانم تلبس وتيجي معانا، أنا مبكلمهاش بس مينفعش أسيبها لوحدها هنا من غير أمان. كينان بنعاس: حصل يا زعيم. صباح تاني يوم. قاعد بدر قدام كينان في المطبخ، نزلت سيا ودخلت وهي بتقول بتعب: صباح الخير. كينان بس اللي رد وقال: صباح النور يا سيا. بصت لبدر بعدين قالت لكينان: تشرب معايا لبن؟

كينان رفع كوباية القهوة قدامها يعني بشرب. سيا: طيب تمام. كينان: سيا بالليل خارجين رايحين بار عشان هنخلص شغل هناك، ف إنتي لازم تيجي معانا. بدر بيلعب في فونه ومش رافع راسه ولا بيبصلها. سيا كتفت إيديها وقالت: مممم، الساعة كام؟ كينان: يعني على تسعة كدا، جهزي نفسك. سندت بظهرها على الرخامة وهي بتبص لبدر بعدين قالت: بس يارب محدش يعترض على لبسي وقتها. حدف بدر فنجان القهوة بتاعه واتدلق، كينان وسيا اتخضوا.

بدر وهو مغمض عينه: لو جدع يا كينان عاوز أشوفك لابس حاجة مبينة بس طرف رجلك وشوف هعمل إيه. كينان بضحكة: بتغير عليا يا زعيم. بدر بزعيق: ولاااا متتهبلش، أنا طالع. طلع بدر أوضته وقعد كينان يضحك، فجابت سيا مناديل ومسحت القهوة المدلوقة وهي بتقول: شايف عصبي إزاي؟ هو على كدا بقى من امبارح. كينان: متستفزيهوش يا سيا، متخرجيهوش عن شعوره وترجعي تشتكي وحاولي تخففي عنه بدل ما تزودي عليه.

سيا بخبث: حاضر، هطلع أنا آخد شاور عشان نعرف نبدأ يومنا كويس. كينان بتعب: تمام. في أوضة بدر. كان بيجيب حاجات من الدولاب، قربت سيا من الدولاب وهي بتحاول تجيب حاجة من الرف اللي فوق مش عارفة، عمالة تنط وتشب برضو مش عارفة. مد بدر إيده بسهولة وجابلا اللي بتحاول توصله، ف قالت: شكراً. * بتبصله ببراءة *

قربلها بدر وكان لسه هيبوسها راح عدل نفسه وخبط باب الدولاب جامد عشان مش عارف يتحكم في نفسه معاها وقام خرج من الأوضة، ضحكت هي على كدا وبدأت تاخد شاور. قعدوا يتغدوا سوا وبدر برضو مش عاوز يبصلها أو يتكلم معاها عشان كل يوم تنكد عليه لنفس السبب، وهي عمالة تحاول تستفزه عشان يفتح كلام معاها مش عارفة وبتفشل. الساعة تسعة بالليل. بدر بيدخن وبيقول لكينان: هنقعد ساعة بقى عشان نلبس.

كينان بهدوء: بالراحة عليها يا زعيم دي مهما إن كان ست وبتحب تتزوق. مسك بدر السيجارة المولعة وكرمشها بإيده وهي مولعة وقال: نعم يخويا؟ تتزوق لمين! طب وديني لو لبست حاجة مش عجباني ما في خروج من أساسه! سمع صوت جزمتها الكعب على السلم ف رمى السيجارة وبصلها من تحت لتحت بغضب كدا. كانت لابسة فستان أسود وعليه جاكيت جينز وجزمة كعب. دقق بدر في شكل الفستان على جسمها بعدين قال بعصبية: أنا في العربية حصلوني. خرج وسابهم،

ف قالت سيا بغيظ: شايف! شايف دا حتى مقاليش كلمة فيها تحذير مثلاً أو حاجة. كينان بوشوشة: المهم أنا زي ما قولتلك حاولي إنتي بس متستفزيهوش عشان يوم اليوم دا يعدي على خير. ركب كينان جمب بدر وسيا ركبت ورا. بدأ بدر يسوق وهو بيبص من وقت للتاني في المرايا على سيا اللي قاعدة ورا، لاحظت هي دا ف قالت تثير اهتمامه راحت مخرجة روج من شنطتها وبدأت تحط فيه وهي باصة لمراية بدر.

بدر عمال يدقق على تفاصيل وشها ولون الروج عليها ومش مركز مع الطريق خالص. تييييت. كينان بخضة: كنا هنخبط يا زعيم، إنت كويس أنزل أسوق أنا؟ بدر بتكشيرة: أنا تمام خلاص قربنا نوصل أساساً. وصلوا قصاد البار ودخلوا. بدر لكينان: قعدها على ترابيزة قريبة مننا عشان متقعدش بعيد وتبقى تحت عيني.. عينينا يعني. كينان بابتسامة: حاضر يا زعيم. قعدها كينان على ترابيزة قريبة منهم، وقعدوا هما على الترابيزة مع الراجل بتاعهم.

بدأوا يتكلموا عن الشغل. الراجل: أنا أول ما عرفت إنك عاوزني يا زعيم جيت على طول مترددتش، إؤمرني بس ف أي مصلحة وهخلصهالك. بدر بيشرب من الكاس بتاعه: جدع، في راجل أنا أعرفه شخصياً اسمه توفيق اشتغلنا معاه قبل كدا لو فاكر. الراجل بتفكير: بتاع الأعضاء يا باشا؟

بدر وهو ماسك الكاسة: مظبوط، هو معروف في دايرتنا يعني، في بينا حالياً عداوة، اكتشفت إنه بيراقبني ف أنا عاوزك تروحله على أساس إني طردتك من عندي وبتاع وتستسمحه إنك تشتغل عنده. الراجل: بس إنت بتقول إنه بيراقبك يا زعيم، يعني أكيد زمانه عارف إني قاعد معاك. بدر تركيزه مع سيا اللي طلبت آيس كريم وعمالة تاكله قدام بدر وتمسح شفايفها بطرف صباعها.

بدر مركز معاها وهي بتاكله وضاغط ع الكاس اللي في إيده، وهو بيبصلها من تحت لتحت بعدين جوزة تترعش ويرجع يبص للراجل اللي قدامه. بدر بتوتر: ل لا ماهو أنا قفشت الصبح الراجل اللي كان مخليه يراقبنا ف.. جه واحد قعد قدام سيا وبدأ يتكلم، هي في الأول كانت متجاهلاه بس لما لقت بدر مركز معاها بدأت تتكلم مع الراجل. بدر بيعض شفته اللي تحت وهو باصصلهم. الراجل اللي قاعد قدام بدر: معايا يا زعيم؟

رمى بدر الكاسة ع الترابيزة ف وقعت ع الراجل بتاعه وراح قاسم لترابيزة سيا. حرك رقبته يمين وشمال وهو بيقول للواد: قوم من قدام المدام بتاعتي. الواد برخامة: وإن مقومتش! بدر بعصبية بس بيحاول يبان بارد، بيخلع حزامه وبيقول: هخليك إنت كمان مدام. الواد قام مفزوع ورجع لورا، سك بدر شنطة سيا وحدفها عليها وهو بيقول وهو على آخره: يلااا. سحبها من إيديها ف قامت معاه. الراجل لبدر: والشغل يا زعيم؟ بدر بغضب: هبقى أكلمك.

سحب سيا وكينان ماشي وراهم وركبوا العربية. طول ما بدر سايق بيحاول قدر الإمكان يبعد عينه عن سيا لحد ما وصلوا. كينان عرف إن بدر متعصب على آخره ف قال: هطلع أوضتي أنا يا زعيم، تصبح على خير. بدر ساحب سيا من إيديها وهي بتتألم وبتقول: في إيه طيب إهدى انا كنت بقوله يقوم بالذوق والله! بدر مبيردش عليها وساحبها لفوق برضو لحد ما وصلوا للأوضة. بياخد نفسه بالعافية وبيقربلها

وهي بترجع لورا وبتقول: على فكرة والله العظيم كنت بكلمه بس كنت بقوله يقوم. بدر من بين سنانه: والروج اللي بتحطيه قدام عيني! سيا ببراءة مصطنعة: كنت بظبط شكلي. بدر بتضييق عين: والأيس كريم؟ بتتعمدي تستفزيني. سحبها ناحيته جامد وبكل قسوة غير معالم الروج اللي في وشها. في فيلا توفيق. واقف قدامه الراجل

بتاعه وتوفيق بيقوله: كان لازم أحترم ذكاء بدر وأبعتله حد أحسن منك، المشكلة مش عارف أمسك عليهم حاجة بسبب إن أحسن اتنين في رجالتى ماتوا.. والبنت اللي اعتبرتها زي بنتي موتوها، إنت لو مكاني وعندك راجل خايب أوي كدا زيك هتعمل فيه إيه. الواد برعشة: يا باشا م.. مكملش كلمته لقى رصاصة في نص راسه، توفيق بيتف على الجثة وبيقول: أغبياااا، من كتر ما بصفيكم مش هيتبقالي ولا راجل! في أوضة كينان. عامل أكونت فيس بوك فيك باسم "الجنرال".

كان قاعد يشوف كلام الناس على السوشيال ف لقى فيديو لبنت شعرها كيرلي أسود ورفيعة جسمها رشيق وبتتكلم فيه عن أضرار السمنة وإزاي يكون عندك إرادة تخس، كينان مركز معاها وهي بتتكلم كلمتين تشرح وتبتسم تلقائي يعني ماسكة ضحكتها ف بيضحك معاها. البنت في آخر الفيديو: معاكم كابتن مادلين لو حد عاوز يسأل عن الاشتراك في الجيم أو عن مواعيد الكلاس بتاعي يسيب كومنت وهرد عليه بنفسي.

كينان مكنش بيتكلم إطلاقا على السوشيال ولا حتى بيعمل لايك بالغلط. لقى نفسه بيكتب كومنت "الاشتراك بكام". فضل متردد يمسح الكومنت ولا يسيبه. فات عشر دقايق وقرر يدخل يمسح الكومنت. لقى إن في حد رد على الكومنت بتاعه. فتح الإشعار لقى مكتوب من مادلين "تم الرد على الخاص".