رواية أصحاب الظلال السوداء الفصل الثالث عشر 13 - بقلم روزان مصطفى

"لا فائدة من إغلاق النافذة والمشهد مازال يدور في رأسك" فتح كينان الرسائل بسرعة، لقى في كذا حد باعت، فتجاهلهم وشاف الرسالة اللي لسه مبعوتة من مادلين. "مساء الخير يا جينيرال، ثمن الاشتراك الشهري ٢٠٠٠ جنيه عشان في عرض عندنا في الجيم. لو حابب تيجي تشوف المكان بنفسك والأجهزة الرياضية وكل شيء، مُرحب بيك. العنوان / ****" كينان ابتسم تلقائي وهو بيقرأ، لقى نفسه بيكتب: "أقدر أجي آخد فكرة الساعة كام؟ مادلين تكتب الآن..

ردت: "يناسبك ثلاثة العصر؟ كينان: "تمام." شافت، وقفل. خرج هو من المسجات وهو بيتفرج على فيديوهاتها وصورها في البروفايل، وعمال يعمل زوم على الصور لحد ما نام. *صباح تاني يوم* نزل كينان من أوضته وهو حاطط هاند فري في ودانه ولابس بنطلون زيتي وتيشيرت رمادي. لقى بدر واقف في المطبخ وقالع التيشيرت بتاعه وواقف قدام البوتجاز وبيتفرج على فيديو طريقة عمل البيض المقلي. أول ما بدر شاف كينان قال براحة نفسية: "أخيرًا صحيت!

تعالى ساعدني." كينان بضحكة: "إيه دا يا زعيم؟ طريقة عمل البيض المقلي؟ إنت لو كنت صحيتني وقولتلي إنك جعان كنت عملتلك." بدر بتنهيدة: "يابني مش أنا! سيا غالباً خدت برد فبجهز لها فطار." كينان بابتسامة: "الزعيم بجلالة قدره يجدعان واقف بيجهز فطار لواحدة ست." بدر حط إيده على رقبته من ورا وقال: "مراتي يعم، هو أنا كسبتها في رهان؟ شال كينان

السماعة من ودانه وقال: "بص يا زعامة، مبدئياً طالما برد ممنوع عليها البيض والسمك، اسمع مني." بدر بضيق: "يا عم متدخلش الطب في الأكل يا عم." كينان بتأكيد: "بكلمك جد، دي ممكن تشرب حاجة دافية ينسون أو أعشاب وساندوتش جبنة.. اهتم بيها في الأدوية بس، ومتخليهاش تنزل لأحسن أعدي منها وأنا رايح مشوار مهم." بدر بتساؤل: "مشوار إيه؟ كينان بثقة: "هروح الجيم وكده." بدر بتدقيق: "يابني جسمك حلو مش محتاج جيم، عضلات وبتاع."

كينان: "لا يا زعيييم أنا بجد هيطلعلي كرش عشان باكل وبقعد، وكمان تغيير مود." بدر بهمس: "خف شوية يا كينان عشان القضية مفتوحة لسه." رجع كينان كشر تاني، فـ قال بدر: "خلاص روح طالما هيغير مودك، بس متلفتش النظر ليك. عاوز فلوس؟ كينان: "هو اشتراك الشهر بس." بدر فتح إزازة المياه وهو بيقول: "معاك فل، عاوز كام؟ بدأ بدر يشرب فـ قال كينان: "٢٠٠٠ جنيه." تُف بدر المياه وهو بيقول: "نعم يخويا؟ ٢٠٠٠ جنيه في الشهر! يا ولاد الحرامية."

كينان بتوضيح: "ماهو جيم هاي كلاس وبتاع." بدر بتريقة: "هاي كلاس إيه وزفت إيه، دا لو تامر هجرس هيدربك مش هياخد المبلغ دا، بس هي شكلها عشان فلوس حرام على رأي سيا." كينان بأمل: "طب إيه يا زعيم؟ هتظبطلي الحوار ده؟ بدر: "بص خد الفيزا ومتسحبش النهاردة أكتر من ٥٠٠٠ جنيه، فاهمني؟ هنتبعتر أنا وإنت وهنخش في موال من أين لك هذا." كينان باستغراب: "أنا مش فاهم إنت بقيت تخاف ع القرش ليه بعد الجواز ومبقاش قلبك ميت زي الأول!

بدر بضيق: "عشان سيا، مبقيتش لوحدي أنا. المهم، طب ساعدني في الفطار بعدها روح اعمل اللي إنت عاوزه." كينان وهو بيسخن المياه: "هعملها ينسون وجبنة زي ما قولتلك." وقف بدر جمبه لحد ما خلص، وخد الصينية منه. طلع كينان على أوضته، وطلع بدر على أوضته مع سيا وفتح الباب بإيد وهو شايل الصينية بإيد. سيا بصداع: "إيه دا؟ بدر وهو بيقفل الباب: "إيه يا حبيبي، حاسة بإيه؟ سيا بتعب: "صداع ودايخة وبعدين... *عطست* وبعدين برد شديد."

قعد بدر جمبها وهو بيحط إيده على جبينها وقال: "وسخنة كمان. أنا السبب، بسببي مفضلتيش لابسة وخدتي برد. هكلم أحجز ميعاد في المستشفى عشان أتطمن عليكي." سيا بتعب: "لا مش قادرة أتحرك." بدر وهو بيسند بدراعه وبيقربلها: "هشيلك طيب؟ سيا وهي بتبعد وشها: "خلي في مسافة بيني وبينك عشان متاخديش برد." بيقربلها بدر ويبوس خدها. سيا بتعب: "تؤ! هتتعب بقول." *بيبوس خدها التاني* بدأت تضحك، فـ

قال بدر: "أيوة بالظبط، أنا توقفيني في المطبخ وأنا بتفرج على طريقة عمل البيض المقلي؟ سيا بضحك: "بجد عملت كده؟ بدر: "أه والله، بس طلع غلط عليكي فـ عملك كينان ينسون وجبنة." *في أوضة كينان* كان بيدور في دولابه على لبس عشان يروح بيه يدفع الاشتراك وياخد فكرة. نقى طقم أخيراً وحطه على السرير عشان لما تيجي الساعة ٣ يلبسه ويروح.

فتح الفيس بوك تاني وهو بيفتح بروفايلها بيشوف نزلت حاجة ولا لأ. كانت منزلة فيديو وهي راكبة العربية وماسكة إزازة مياه بتحركها يمين وشمال وكاتبة "to the gym". كينان بتلقائية: "جايلك أنا، اصبري لـ ٣ بس." أول ما الساعة دقت ٣ لبس كينان ونزل وركب تاكسي بما إن عربيته الشرطة متحفظ عليها. وصل للجيم وطلع فوق. وقف وهو بيبص حواليه بيدور عليها، مكانتش موجودة. كان لابس كاب أسود Nike على راسه وتيشيرت أبيض مبين عضلاته.

جاله واحد بيقوله: "حضرتك جديد هنا، حابب تشترك؟ كينان بتنهيدة: "أيوة، بس هما اللي بيدربوا هنا كلهم رجالة بس؟ الراجل برخامة: "إشمعنى؟ كينان بعصبية هادية: "يعم هو إيه اللي إشمعنا؟ أنا عندي حساسية من الرجالة، ليك فيه؟ هههههههههه صوت ضحكة أنثوية مع برفان ظهر فجأة. التفت كينان ببطء بيبص على مين بيضحك. كانت هي! وضحكتها حقيقي حاجة من النوع اللي يفتح النفس. قربت هي منه وكانت ماسكة

كوباية عصير برتقال وبتقول: "أنا بجد آسفة إني خليتك تدور عليا، بس حسيت بهبوط وسط التدريب فـ روحت أشرب حاجة فريش. معاك مادلين عامر، أدمن البيدج الرسمية للجيم ع الفيس بوك وكابتن هنا." *مدت إيديها تسلم عليه* كينان باصص لإيديها وباصصلها. مد إيده بالراحة ومسك إيديها وهو بيقول: "أهلاً وسهلاً."

مادلين بنفس الضحكة: "أكيد حضرتك كلمتني وأنا رديت عليك، عشان كده دورت عليا. بص، أنا سمعت أطراف كلامك مع كابتن سالم، اللي بيدربوا هنا ستات ورجالة.. بس أنا هنا بدرب بنات. لو احتجت مني أي مساعدة أكيد هعمل ده." كينان مش مركز في كلامها، بس ملامحها كانت مبهجة جداً ومن نوع الناس اللي تحسسك إنك تعرفهم من زمان، أو بتشيل عنك إحساس الرهبة بتاع دخول مكان جديد ده. كينان بإبتسامة

مع إن الكاب مغطي نص وشه: "هو أنا كنت محتاج حضرتك تتابعي معايا؟ مادلين بتبص لدراعاته: "مع إن ماشاء الله شكلك من الرجالة اللي بيحبوا يهتموا بصحتهم وكده." كينان بهدوء: "ده حقيقي، عشان كده جيت عشان أفضل كده متخنش." بتكمل مادلين العصير بتاعها وبتقول: "طب إيه؟ تحب تاخد فكرة عن الجيم؟ بيبصلها هو بتدقيق وبيقول بثقة: "لا أنا عاوز أدفع الاشتراك على طول." *في أوضة بدر وسيا*

سيا قاعدة على السرير وهي بتعيط بسبب الصداع ولابسة سلوبيت جينز فستان. وبدر موطي بيربطلها الكوتشي بتاعها. بدر بضيق: "يخربيت أم دا رباط، بتتعمل إزاي الفيونكة! وليه لازم فيونكة يعني! سيا بتعب: "هوف يابدر خلاص هربطه أنا، لازم فيونكة عشان كل الناس بتربطه فيونكة." بدر بعصبية: "يخربيت دول ناس يا شيخة." سيا بتعب: "خلاص يا بدر هلبس صندل ولا تقعد تتعصب على رباط." ربطه

بدر بطريقة غريبة وقال: "بصي بعد ما نرجع من الدكتور هنروح محل هدوم. كويس إني معايا كاش عشان الواد كينان خد الفيزا بتاعتي وراح الجيم." بدر بيلبس الحزام وبيقول: "وغالباً هيتأخر فـ أنا قلقان عليكي، عاوز أتطمن." سندت سيا على السرير وهي بتقول بدلع: "إنت حنين أوي بجد، بس مشكلتك عصبيتك." بدر من غير ما يبصلها: "متكلمنيش بالنبرة دي تاني وإحنا خارجين." ضحكت هي وكمل بدر لبس عشان يوديها الدكتور. *في الجيم* مادلين وهي

ماسكة الورق بتسجل لكينان: "اسمك إيه؟ كينان بهزار: "حقيقي ولا فيسبوك؟ مادلين بضحكة: "فيسبوك عشان أحاول أفتكر إنت أنهي فيهم." كينان وهو بيسند على الرخامة وبيبصلها: "مش كنتي قولتي لواحد تعالى الساعة ٣؟ مادلين بإبتسامة عريضة: "آه إنت الجينيرال، هههههه ماشي، هات بطاقتك بقى عشان نسجل البيانات." بهتت ابتسامة كينان وحس بخوف لو عرفت إنه كان متجوز ومراته وحوارات. مادلين حست إنه اتضايق فـ قال بذوق: "عندك مشكلة في البطاقة؟

دي مجرد إجراءات روتينية للاشتراك." كينان فاق من توهاته وقال: "ها؟ لا معنديش." خرج محفظته وخرج منها البطاقة وحطها ع الرخامة قدامها. مسكت هي القلم وبدأت تكتب البيانات وحطتله هو الفلوس. خلصت الورقة وقال: "طيب يا أستاذ كينان، تحب تبدأ أول يوم ليك جيم من بكرة؟ كينان: "ياريت، بس هو حضرتك هتدربيني؟ مادلين بتفكير وملامحها جد، فجأة ضحكت وقالت: "ماشي لو ده هيريحك طبعاً، بس خلي بالك لو جو لمس أو الحركات دي أنا كابتن جيم هزعلك."

كينان بيضحك: "لا أنا مش منهم صدقيني." مادلين بإبتسامة: "تمام، هنستناك بكرة في نفس الميعاد، أنا بكون موجودة عشان الصبح بوصل كارما المدرسة." كينان ملامحه بهتت وقال: "كارما ومدرسة؟ مادلين بضحكة: "أه، يلا هاف فان." سابته ومشيت وهو ساند ع الرخامة مش فاهم حاجة! بس أكيد هيفهم. *عند سيا وبدر، بعد تلات ساعات* دخلوا محل هدوم وبدر بيدور ليها على حاجة بيقول: "سمعتي الدكتور قال إيه؟ تلبسي كويس ومتناميش غير بهدوم كويسة."

سيا بسخرية: "والله؟ ما تقول لنفسك." بتوصل لبدر رسالة على فونُه من رقم غريب وهو مع سيا في محل الملابس بيختاروا الطقم. بيفتحها بدر بيكون مكتوب فيها بالنص: "بما إن قضية سونيا اتأيدت ضد مجهول لعدم كفاية الأدلة، فـ المجهول اللي إنت سايبه لوحده في البيت مش هتحلق تودعه.. ويودعك." وقعت الهدوم من إيد بدر وهو متنح. سيا اتخضت وقالت: "في إيه؟ بدر بفزع وهو بيجري وبيسحبها معاه: "كينان! فضلوا يجروا لحد ما وصلوا للعربية، ساق بدر

بسرعة وسيا مبطلتش أسئلة: "ماله كينان يا بدر؟ الرسالة اللي جاتلك تخصه؟ بدر رد عليا قلبي هيوقف. بدر بعصبية: "إسكتيي بقى إسكتتتييي." وصلوا البيت لقى بدر باب البيت مفتوح، دخل بخطوات مهزوزة وسيا وراه إيديها على بوقها كاتمة صرخة أو شهقة متعرفش. كان في رجالة حوالي ٤ واقعين على الأرض وسايحين في دمهم. وكينان مرمي في الآخر وعلى صوابع إيديه دم. سيا أول ما شافته قعدت على ركبها وهي بتعيط وبتقول: "لا!! كينان!

بدر جري عليه وهو بيرفع جسمه وبيحضنه وبيص لسيا ببوق مفتوح وملامح مش فاهمة. سيا جريت عليهم وحطت إيديها قدام وش كينان وهي بتقول بصوت متقطع: "ق.. قاطع النفس." بدر حاضنه ومبينطقش. حطت إيديها على قلبه بعدين قالت بصريخ: "عاايش! قلبه بيدق قوم نوديه المستشفى!! قوم يلحقوه! كينان فتح عينه نص عين وهو بيقول: "خليهم يلحقوني يا زعيم، محتاج نقل دم عشان معنديش." بدر بيبص لسيا بصدمة وهي بتبص لبدر مش فاهمة حاجة.

قام كينان قعد اتعدل على الأرض وهو نايم على ظهره وعمال يضحك ومغطي وشه وبيقول: "مش قادر، كتمت نفسي بالعافية." سيا بعياط: "يعني إيه؟ *فلاش باك* كينان كان بياخد شاور وخلص ولبس هدوم البيت. نزل المطبخ عشان يشوف حاجة ياكلها لحد ما بدر وسيا يرجعوا من برا. سمع صوت عربية داخلة راح يبص من الشباك بتاع الصالة لقى أربع رجالة بينزلوا منها.

معرفش يفطر فـ طلع فوق دخل أوضة بدر طلع رشاش. أول ما اتهجموا على البيت كان من فوق السلم كينان نزل عليهم بالرشاش خلص عليهم. *الوقت الحالي* سيا بصدمة: "ولما خلصت عليهم عملت نفسك ميت ليه؟

كينان بضحك: "بصراحة لما سمعت عربية تانية جاية قولت يمكن حد جاي يتأكد أنا اتقتلت ولا لأ فـ لغوصت إيدي بدم واحد من الجرابيع دول وروحت كاتم نفسي، وأول ما لقيتكم داخلين قولت ميضرش أهو مقلب والسلام، بس لما حسيتكم مرعوبين فتحت عيني وقولت عندكوا شااامبو." بدر بعصبية وهو بيخلع حزامه وبيجري ورا كينان: "دا أنا هطلع دباديب أمك، يالاااا يابن ال***." كينان بيجري يستخبى ورا سيا: "ألحقيني، إيه يا زعيم إنت سايب سوسن في البيت يعني؟

سيا واقفة بينهم: "خلاص يابدر عشان خاطري." بدر بعصبية: "الغبي إبن الغبية توفيق الكلب باعتله رجالة يقتلوه بعد ما القضية اتقفلت ودا قاعد يهزر." كينان من ورا ظهر سيا: "يديني إنتي بتهديه إزاي دا أنا صاحب عمره مبعرفش! بدر وهو بيلف الحزام على إيده: "ماشي يا كينان، حسابك معايا بعدين، أخلص بس من توفيق ال**** وأروقلك."