رواية اشتغاله الفصل التاسع عشر 19 - بقلم ليل أدم

المتحدث الرسمي للمزاد: بسم الله الرحمن الرحيم. نبدأ المزاد على قطعة أرض هرنوفل الساحل الشمالي. السعر المبدئي ٣٠٠ مليون. مشيرة: ٥٠٠ مليون. المتحدث الرسمي للمزاد: مشيرة هانم عزيز ٥٠٠ مليون. زين: لا مش ٢٠٠ مليون مرة واحدة يا مشيرة. خلينا نعافر مع بعض شوية. مشيرة: هات آخرك يا زين. زين: ٥٢٠ مليون. مشيرة: ٦٠٠ مليون. ريهام: زين خلاص يازين. الأرض مش هتسوى السعر ده. زين: مشيرة خلاص. انتي عارفة الأرض دي مهما عندي أد إيه.

مشيرة: تقوم تعتذر قصاد الناس دي كلها ومتكسرش كلمتي في السوق تاني وأسيبك. زين: لا بقا. خليها ٧٠٠ مليون يابني. مشيرة: ٨٠٠ مليون. زين: ٨٢٠ مليون. مشيرة: ٩٠٠ مليون. زين: وتمنين. مشيرة: مليار جنيه. الجميع في ذهول من الرقم. زين: مشموشتي فيكي من يكتم السر. مشيرة: على حسب. زين: (بيضحك) أنا مش عايز المزاد ده. أنا جاي بس علشان أخسرك. مشيرة: والقرية بتاعتك. انت فاكرني عبيطة يا زين. زين:

لا منا هقولك. أصل لما قعدت مع نفسي لقيت أن القرية دي لويه دراعي بسبب قطعة الأرض. وبيني وبينك كنت عارف إنك هتجمعي شوية البدل دي كلها عليا. فبعت القرية بقا. ريهام: زين انت بتتكلم بجد. زين: وغلوت مشموشتي. بايع من يومين وجالي رقم بعيد عنك. جودة شافه افتكره رقم تليفون. مشيرة: يا ابن الكلب. زين: الشتيمة حرام خلي بالك. انت بوقك بيتعوج وربنا. (وبصوت عالي) إسعاف بسرعه يا جدعاااااااااااااااااان. المتحدث الرسمي للمزاد:

مبروك عليكي الأرض يا استاذه مشيرة. زين: (بصوت عالي وسط الجميع) يعني يا جماعة خسرتوا بتاع ٥٠٠ مليون جنيه. إيه الموضوع؟ أما نقف جمب بعض. مشيرة: بس يا زين خلاص. زين: لا مش خلاص. منا مش هتفرج عليكي وانتي بتتجلطي. يا جماعة الخير أنا بايع القرية. يعني الجمع السعيد ده على البايظ. الست دي خيرها على الجميع وبيتها اتخرب. جودة كيس أسود كده ولم أي حاجة. جودة: جاهز أهو. كنت جايب في سندوتشات كبدة. زين:

لف لفة وسط الرجالة. بالذات سعد بيه اللي رنيت عليه امبارح مردش عليا. بدأ الجميع يقوم يخرج من القاعة بعد ما كسر زين قصاد الجميع هيمنة مشيرة على السوق. جودة: زين محدش عايز يدفع جنيه. زين: يا عم أنا طالع مني ١٥٠ مليون جنيه. مشيرة: انت فاكر هتعدي يازين. والله ما هتعدي على خير. زين: هاتي آخرك واتكي عليه مرة واتنين وتلاتة ومليون. علشان اللي هلمحه هعمل فيه إيه يا جودة. جودة: هتشلوحه. زين:

مشيرة. ريهام ليكي معاها عقود بـ ١٥٠ مليون جنيه. النهارده يكونوا عندك ومعاهم مدير الشؤون القانونية بتاعي. سوي كل حاجة علشان ريهام مش معاكي من النهارده. ريهام: (تنفست الصعداء بعد ما سمعت من زين أنه فك دينها عند مشيرة. وقفت ورا زين) زين: طلعي زين كامل من دماغك يا مشيرة. طلعي زين كامل من دماغك. قبل ما وحق لا إله إلا الله أحطك أنا في دماغي. مشيرة: هتندم يا زين. والله لتندم. زين:

وأنا جاهز. بس وعد مني ليكون هو ده لون وشك. كل ما تفكري في كابوسك زين كامل. وخد زين ريهام وجوده وخرج على عربيته. جودة: إيه ياعم ده. شيطان. يخربيت دماغك. ريهام: انت عملت كل ده إمتى؟ بايع القرية من غير ما حد يعرف؟ ومنظم ورقك؟ وعرفت موضوع ١٥٠ مليون اللي بيني وبين مشيرة منين؟ زين: مش مهم كل ده. المهم إن السوق كله اتأكد أن زين كامل صعب. حتى لو كان دراعه ملوي. وهو ده اللي أنا جاي عليه. جودة:

ما كنت رفعت فوق المليار يا زين. خليها تخرب عليها خالص. زين: يا غبي. مشيرة نفسها كانت بتقول في سرها يارب زين يقول مليار وجنيه. علشان الموضوع بقا كارثي. لا بقا عناد ولا مكسب. ريهام: يعني المليار هو اللي مش كارثة. زين: ما دماغ مشيرة كانت أنها ترفع عليا السعر مش أكتر. إنما مشيرة داخلة المزاد ومعاها نفس الورق اللي معايا. وعارفة أن قطعة الأرض لو رفع سعرها عن ٦٠٠ مليون تبقى خسرانة مائة في المائة. ريهام:

مش بقولك نفسي في دماغك دي وأنا أحتل العالم مش السوق بس. جودة: صحيح يابني والله. أنا جاي وعمال أخطط هندخل على كاميليا بـ إيه وش (وبيضحك) زين: بعد اللي حصل ده. كل الناس اللي قلبت علينا هتبدأ ترجع تطلب العفو. وتقريباً ممكن مشيرة تنزل مسرح ويطلع غيرها. لازم نركز أكتر مع بعض. جودة: طبعاً. أي حد يجي يطلب عفو مفيش منه. زين: علشان حمار. جودة: ليه. زين: سيب كل حاجة في وقتها وانت تفهم. في جانب آخر. عزيز بيه:

أنا غلطان إني سبت عيلة تمسك أعمالي. بقا حتت عيل وسيط يلعب بيكي الكورة وتخسري بسببه أكتر من ٥٠٠ مليون جنيه. مشيرة: أنا مش عبيطة. أنا كنت برفع عليه السعر. لو كان فتح بوقه بعد المليار كنت هقوله مبروك. أنا كده كده مش عايزة قطعة الأرض. أنا كنت عايزة أسيب رسالة قصاد الجميع. عزيز: وطبعاً جمعتي الكل علشان يتفرج على فضيحتك في السوق. مشيرة:

بابا. زين كامل مبقاش الوسيط اللي انت عارفه. زين بقا جبار في شغله. حتى لو مش عايزة أعترف بالحقيفة قصاد حد. يبقى لازم أعترف بيها قصاد نفسي. مش ده كلامك؟ عزيز: الوقتي افتكرتي كلامي. كان فين عقلك قبل ما تحطي اسمك في منافسة مع اسمه؟ انتي عارفة انتي غير الفلوس خسرتي إيه. انتي خسرتي كل الناس اللي شافت زين بيعلم عليكي النهارده. انتي خسرتي أهم حاجة عند رجل الأعمال. خسرتي اسمك. مشيرة:

وهو ده اللي مجنني. ولم ضربة قوية لـ زين قبل ما الأسبوع ده ينتهي. عزيز: انتي عارفة الفرق بينكم وبين زين. هو بيشتغل ويعمل كل حاجة في صمت. إنما انتوا عاملين شو ضخم حوالين نفسكم. مشيرة: أنا مش جايه علشان حضرتك تعمل فيا كده. أنا عايزة أعرف أعمل إيه مع زين كامل. عزيز: اقعدي. في جانب آخر.

كان بدأ بعض رجال الأعمال في الرجوع عن مقاطعة زين. وحصل من زين عكس المتوقع. كل واحد منهم كان شايف أن زين لا يمكن يقبل بالتصالح. ومرور الموقف إلا أن زين فاجئ الجميع بالتصالح. ومش بس كده بدأ معاهم زين في شغل من جديد. ريهام: انت ليه بتساعد الناس دي يا زين؟ الناس دي كانت عايزة تخرب بيتك. زين: ومين قال إني بساعد الناس دي. أنا بساعد نفسي وبخدم شغلي وبس. ريهام: إزاي. زين: تعالي جمبي. ريهام:

(قعدت جمب زين. حط زين إيده على كتف ريهام وضمها لحضنه) زين: شوفي ياستي. شركة زي شركة فري ستار دي ملهاش أي تعاملات. بس نازلة السوق أهو. هل حد يعرف عنها حاجة؟ ريهام: لأ. زين: أنا عارف عنها وعارف أن الشركة دي كمان سنة هتكون في حتة تانية. بس محتاجة دفقة. ريهام: وهتعمل إيه علشان تدفقة الشركة. زين:

هعمل كده. أشتري فيها أربعين في المائة من أسهم الشركة. بمجرد ما اسم زين كامل ينزل أنه اشتري من الشركة دي أسهم. هتلاقي كل رجال الأعمال حطت رجليها ورا رجلي. وبدأ الجميع يشتري. فـ طبيعي سعر الأسهم يزيد. صح كده. ريهام: صح. زين: لما سعر الأسهم يزيد يعني دخل الشركة أصبح أضعاف أضعاف. فـ معدل تصعيد المكسب مستمر. وأنا متابع الكرف عالي أد إيه ونسبته أد إيه. إنما رجال الأعمال اللي اشتروا معايا مش متابعين. ريهام: ليه مش متابعين؟

يعني دا شغلهم. زين: علشان في الوقت ده بكون روحت اشتري في مكان تاني. سعر سهمه أعلى ومكسبه مضمون أكتر من ده. يقوم الجميع يركز هنا وينسى هنا. أروح عامل حملة إعلانية بعيدة عن اسم زين كامل. وأن أد إيه الشركة دي مهما في السوق ووجودها منفعة للجميع. هوبا يفاجئ الجميع أن زين كامل باع أسهمه في شركة فري ستار القديمة. ريهام: وبعدين. زين:

هنا الجميع يشك أن كده فري ستار مبقاش فيها خير. إلا ما كانش زين كامل باع الأسهم. فـ يعملوا إيه. ريهام: يبيعوا. زين: مش بس كده. أنا كمان بخليهم يبيعوا لنفس الشركة اللي أنا بعت ليها. لأنها بتشتري الأسهم أغلى من سعر السوق. ريهام: ينهار أبيض. دا اللي اشترى الأسهم ده من حظه ومن نصيبه. زين: يابنتي ما أنا اللي اشتريت. بس عن طريق شركة تانية. ريهام: يخربيت دماغك. أنت إيه يابني. زين: أعجبك أنا أوي. ريهام:

طب ما الناس اللي بتخسر دي. ليه بتمشي وراك كل مرة. زين: هو مين اللي بيخسر. ريهام: رجال الأعمال. زين: يا هبلة افهمي. الناس دي أنا بحافظ على مكاسبهم قبل ما أكسب أنا نفسي. علشان يستمروا ورايا. ما لو خسروا أبقى أنا خسرتهم وخسرت الاستراتيجية اللي بشتغل بيها. ريهام: فـ بترمي ليهم فتافيت. زين: المهم أن في مكسب علشان يستمروا. ريهام: انت مش طبيعي يا زين.