رواية اسرار القلوب الفصل العاشر 10 - بقلم رانيا قنديل

ما إن دخلت فتحدثت كويس إن حمزة هنا لأن إللي هتكلم فيه بخصوص حمزة. نظر لها حمزة وهو يرفع حاجبه: نعم إيه اللي هتتكلمي فيه بخصوصي؟ نرمين: يا جدو البشمهندس حمزة عايز يشتغل مع شركة الأخوة ودي شركة صغيرة واحنا رفضنا الشغل معاهم قبل كده لأن مشاريعنا كبيرة بالنسبة لشركتهم وكمان الأستاذ عايز يدمج الشركتين مع بعض ومأخدش رأي حد على أساس إننا مش موجودين معاه ولا لينا كلمة.

فيه مجلس إدارة المفروض أنه يعمل اجتماع علشان ياخد الموافقة ومياخدش أي قرار غير بعد الاجتماع، ولا رأي حضرتك إيه يا جدو؟ الجد: خلصتي كلامك ولا لسه عندك كلام تاني؟ نرمين: آه عندي. الأستاذ غير في نظام إدارة الشغل وده ممكن يعطل سير العمل والموظفين مش عارفين ياخدوا نفسهم بسببه وافتكر كده غلط ومش كويس لصالح الشغل. الجد: امممممممممم هو ده اللي جايه تكلميني فيه يا نرمين؟ نرمين: حضرتك شايف إن الموضوع عادي؟

أنا جايه بقولك يا جدو علشان نرجع المنظومة القديمة للشركة علشان اللخبطة اللي حصلت مع الموظفين. الجد: خلصتي يا نرمين؟ نرمين: آه خلصت.

الجد: أولًا شركة الأخوة بتضم أكفأ المهندسين بمصر، هي فعلاً شركة صغيرة بس كفؤ جدًا في شغلها وكانت غلطة كبيرة إن عثمان متعاقدش معاهم. واللي عمله حمزة أنا موافق عليه لأنه رجعلي أنا وأنا صاحب القرار الأول والأخير، ولازم تعرفي إني وافقت لمصلحة الشركة والدمج أكبر مصلحة لينا يعني مصلحة عامة. الغريبة إنك كنتي بتفهمي كل حاجة من غير توضيح، ده تكاسل منك ولا إيه؟

انتي شغالة في الإدارة يعني لما حمزة ياخد الخطوة دي تبقي أكيد فاهمة إنها لمصلحة الشركة. حمزة: للأسف مش تكاسل يا جدو، لكن عدم فهم. ياريت تشغلي مخك قبل ما تيجي وتتكلمي بخصوص شغلي. نرمين: تقصد إيه بأني أشغل مخي؟ ضحك حمزة وقالها: يعني تشغلي ده (وشاور على راسها) وإلغي ده (وشاور على قلبها)

نظرت لحمزة بكل غضب وتقدمت منه تحت أنظار الجد المبتسم بخبث على هذه القطة، فهو يعرفها لا تتهاون في حقها أبدًا وسوف تلقن حمزة درسًا كبيرًا على إهانتها. نرمين: أنا مش بتكلم بعواطفي في الشغل، أنا اللي مدربني غول السوق يعني خبرة وخبرة كبيرة كمان. اللي زيك بعيد عنها لأنك مغرور. ياريت سيادتك تعرف إن الشركة إحنا بنديرها معاك ولازم نكون على علم بكل خطواتك.

قام حمزة ووقف أمامها: من بكرة تكوني جاهزة للشغل الصح علشان تتعلمي، الواضح إن اللي اتعلمتيه من الغول نسيتيه وأنا استهونت بيكي. نرمين: أنا قد أي شغل اتكلف بيه وعارفة مسؤولياتي إيه، لأني مش بتعدي على غيري في الشغل، فاهم؟ (ورفعت إصبعها في وجه حمزة) حمزة نظر لإصبع نرمين والشرر يتطاير من عينيه. نرمين بدون أن يرفع لها جفن وقفت بكل تحدي له. حمزة نظر

لجده بعد أن أغمض عينيه: بعد إذنك يا جدو أنا خارج أرتاح. وبعد أن وصل إلى باب المكتب رجع خطوة للخلف ووجه كلامه لنرمين: وانتي من الصبح تكوني في مكتبي الساعة ٩ علشان أقيم شغلك وأشوف مسؤولياتك اللي انتي قدها. سلام ياااا يا نرمين. نرمين: سلام ياااا يالا حمزة. وخرجت من مكتب جدها لوالدها. الجد:

ابتسم جامد وحدث نفسه: ربنا معاك يا حمزة، الحمل تقيل عليك وأنا اللي صدرتك لأنك الوحيد اللي واثق فيه، بس الأكيد مش هضحي بيك. بس عايز أعرف كل حاجة مخفية عني، لازم أعرف أسرار كتير أنا مش على علم بيها. وأثناء شرود الجد دخل صالح: بابا _لا رد. صالح ينادي: بااباااا. الجد: نعم يا ابني في إيه؟ صالح: حضرتك سرحان في إيه ده كله؟ أنا بنادي عليك وانت مبتردش. الجد: لا أنا سرحان في الشغل.

صالح: يا بابا الدكتور محرج عليك الانفعال وإنك تبعد عن أي توتر، فبلاش من موضوع الشغل ده. وعثمان وحمزة مع بعض في الشركة وربنا معاهم. الجد: متقلقش أنا كويس، وبعدين الشركة خلاص بقت مع أخوك وأحفادي وأنا مبسوط قوي لأن مدير الشركة حفيدي حمزة صالح محمد الهواري. صالح: هو ده اللي جيت لحضرتك بخصوصه علشان أتكلم معاك فيه. الجد: خير يا ابني في إيه؟

صالح: أنا مش معاك في إن حمزة يكون المدير للشركة وياخد مكان عمه عثمان. حضرتك مش واخد بالك إن ممكن تتخلق كراهية بين حمزة وعثمان لأنك متأكد إن عثمان بيحب مركزه وهو سعيد بمكانته في الشركة. نظر الجد لابنه: خلصت. صالح: آه.

الجد: اسمعني كويس واستوعب كلامي ده وخليه قدام عينيك. أنا اللي اتصلت بحمزة علشان ينزل يمسك مكاني لأنه الأصلح. ثانيًا عثمان كل شغله في تنسيق العمل والإدارة، صعب ياخد قرار من غير كبير المهندسين ومن غير مهندس ما يشرح له مش هيكون فاهم هو بيتكلم عن إيه، وده هيكون فيه عطل في قرارات الشركة وسير العمل. عرفت ليه دلوقتي ابنك أخد مكاني؟ صالح: طيب حضرتك تقدر تخلي عثمان في مكانه وحمزة كبير المهندسين؟

الجد: كده فيه تعطيل لسير العمل برضه. يعني لو حمزة عايز ياخد قرار لازم يرجع للمسؤول الإداري اللي هو المدير العام. انت نسيت إنها شركة هندسية ولا إيه يا صالح؟ وإن المدير العام والتنفيذي لازم يكون مهندس علشان فيه قرارات لازم تتاخد بسرعة. صالح: مش عارف بس مش عايز عثمان يزعل. ضحك الجد على صالح الذي يراعي مشاعر من حوله.

الجد: شوف يا صالح، عثمان بقاله 3 سنين مدير الشركة، مناقصات كتير ضاعت منه وبقاله سنتين بياخد مشاريع صغيرة متناسبش باسم شركة الهواري. يعني الشركة بتغرق، يعني فيه نواقص في إدارة الشركة ودي إن شاء الله حمزة هيسد الفراغات دي ويكملها وهيرجع اسم الغول تاني للسوق. صالح: قال اللي تشوفه حضرتك. الجد: المناسب أنا بعمله ومتقلقش من قراراتي، وحمزة بينفذ كلامي وبيرجعلي في كل خطواته.

صالح: تمام يا بابا، طالما شايف إن هو ده الصح أنا هستأذن هطلع أريح علشان عندي شغل الصبح. الجد: تصبح على خير. صالح: وانت من أهله. ****************** في اليوم التالي ذهب الجميع لأعمالهم في الشركة. في مكتب حمزة: هدى إذا سمحتي ابعتيلي ملف لآخر مشروع خاص بشركة عمار للإنشاء. هدى: الملف أخده عثمان بيه وقال فيه تعديلات قبل ما يتعرض على حضرتك. حمزة: طيب تستعجلي الملف بسرعة قبل الاجتماع. وأثناء حديثه مع السكرتيرة دخلت نرمين.

نرمين: أنا مبقتش السكرتيرة بره، قولت أدخل علشان متأخرش على ميعادي الساعة ٩ بالظبط. حمزة لهدى: اتفضلي على مكتبك وشوفي إذا كان في عندي مواعيد انهارده. هدى: آه عندك الساعة ١٢ معاد مع شركة الأخوة. حمزة: تمام، أنا خارج وهرجع قبل الاجتماع تكوني جهزتي كل حاجة تمام. هدى: تمام. قام حمزة ولملم أشياءه من على سطح مكتبه. نرمين: انت خارج؟ حمزة: يلا إحنا خارجين. نرمين: على فين؟

حمزة: افتكر إحنا في الشغل هنكون خارجين رايحين فين يعني. (ونظر لها من أسفل لأعلى وابتسم ابتسامة استهزاء) نرمين: انت يا حضرة بتبصلي كده ليه؟ حمزة: يلا هتأخر عندي اجتماع مش فاضي، يلا بسرعة حصليني على العربية. خرجت نرمين خلفه وهي في قمة غضبها وأخذت متعلقاتها وذهبت مع هذا الحمزة المتعجرف. ذهبوا معًا للمشروع الخاص بشركة عمار للإنشاء. بعد وصولهم لموقع العمل. نرمين: إيه ده؟ إحنا هنعمل إيه هنا؟ حمزة: إيه؟

هشرف على الشغل والموقع ولا حضرتك متعرفيش أصول الشغل؟ نرمين: لا إزاي بس المهندس مدحت كبير المهندسين هو المسؤول هنا والمشرف عليه. حمزة: تقصدي إيه؟ أمشي مثلًا وبلاش أتابع المواقع بنفسي؟ نرمين: لا لا مقصدش بس بابا مكنش بينزل الموقع لأنه واثق في مدحت، ولا أنت مش واثق فيه؟ حمزة: اوف!!

أنا بحب أباشر شغلي بنفسي ومعنديش ثقة في حد علشان أقعد في مكتبي وأكون متطمن، لأن المهنة دي أي غلطة فيها تودي أرواح ناس كتير للموت. فياريت يكون الثقة عندك لضميرك ده وده أول درس ياريت تتعلميه، تهتمي بشغلك وتباشريه بنفسك ومتعتمديش على حد وتقولي ثقة. نرمين ضيقت عينيها ونظرت لحمزة: اتفضل منك نستفيد. حمزة: أكيد هتتعلمي وتستفيدي كتير. المهم جبتي الملفات إللي طلبتها منك من عمي عثمان؟

نرمين: آه جبتها. وجبت نموذج من الرسم كان مع بابا بيدرسه مع المهندس مدحت. حمزة: امممممممم تمام. تقدم حمزة وسأل عن المهندس مدحت. العامل: لسه موصلش يا باشا. حمزة: إزاي موصلش؟ هو بييجي الموقع هنا الساعة كام كل يوم؟ العامل: لا المهندس بيتصل بينا بس وبييجي لما بنكون محتاجين من المخازن حديد وأسمنت. نظر حمزة لنرمين: أوك تمام. مين هنا من المهندسين في الموقع؟

العامل: محدش بييجي مع العمال غير البشمهندس أحمد هو اللي معانا على طول. حمزة: ممكن تقولي هو فين؟ العامل: هناك وسط العمال هو بيحب يشرف على كل حاجة بنفسه. حمزة: يلا يا نرمين. نرمين: هنروح فين؟ حمزة: يلا وهتعرفي كل حاجة دلوقتي. اتجه حمزة نحو المهندس أحمد وتقدم أمامه: السلام عليكم. المهندس أحمد: وعليكم السلام. أي خدمة؟ حمزة: أنا حمزة صالح محمد الهواري المدير العام والتنفيذي للشركة. أحمد: أهلا وسهلا بحضرتك.

حمزة: ممكن أشوف الموقع وانت معايا عايزك تشرحلي كل حاجة والمفروض هنسلم أمتى المشروع ده؟ أحمد: أنا معنديش فكرة عن موعد استلامه، لكن من ناحية سير العمل للأسف مش عاجبني وفي تعطيل كبير اليومين دول في حركة البناء. حمزة: تقصد إيه بأن اليومين دول في تعطيل للشغل؟ نظر أحمد لنرمين وسكت. حمزة: بصلي أنا وعرفني إيه الغلط في الشغل وإيه سبب التعطيل، وده عن عمد ولا تأخير في المواد؟

أحمد: للأسف مدحت المشرف الأساسي لكل المشاريع وكمان مش بييجي الموقع ولما بنحتاج منه حاجة على ما ييجي يكون عدى يومين بدون شغل والأجور مدفوعة للعمال والموضوع ده بقاله فترة بسيطة بيتعمل. ابتسم حمزة وضم إيده على صدره: وأيه كمان؟ أحمد: فيه بعض الملاحظات في التخطيط الهندسي غير مطابق للمواصفات. حمزة بانتباه: إيه التغيير ده؟ وفي أي اتجاه؟ ولا التغيير ده في المشروع كله؟

أحمد: لا القسم الغربي من المدينة السكنية اتبعتلي ليها رسم هندسي مختلف والمفروض إني هبدأ حفر بعد يومين على الرسم الجديد مع إنه غير مطابق للمواصفات. نرمين: انت بتخرف بتقول إيه؟ بابا والمهندس مدحت مسؤولين عن المشروع ده وحاليًا بقي المهندس حمزة هو المسؤول ومفيش حد غير حاجة في التخطيط الهندسي نهائي لأنها مسؤولية كبيرة على الشركة وتحول المسؤول للتحقيق. نرمين لحمزة: انت ساكت كده ليه؟

فيه لعبة مش تمام بتحصل وانت بارد كده ليه؟ ******************** سؤالنا هنا حمزة ساكت ليه. ويا ترى نرمين هتعرف بمخطط والدها وهتتأكد ولا إيه.......