رواية استقرار اجباري الفصل الثاني عشر 12 - بقلم رودي عبد الحميد

كانت أسماء بتطلع الفون علشان ترن على داغر، بس اتخضت لما سمعت صوت صريخ ريناد من فوق. طلعت جري على فوق، لقت ريناد واقفة قدام الأوضة وحاطة إيديها على بوقها وبتعيط. قربت منها أسماء وقالت: "فيه إيه؟ صريخك سمع الفيلا كلها." اتكلمت ريناد وهي بتعيط: "ف.. فيه بُرص جوه الأوضة." ريناد بعوجة بوق: "الصويت دا كله على بُرص؟ هزت راسها وقالت: "ب.. بخاف منهم." ضحكت أسماء وقالت: "طب تعالي." راحت أسماء وقفت على

أول السلم وقالت بصوت عالي: "يا ياسر." طلع واحد من المطبخ وقال: "أيوا يا ست هانم." قالت أسماء: "معلش يا ياسر، فيه بُرص في أوضة ريناد، تعالي موته." طلع ياسر ودخل الأوضة وقعد شوية، وبعدها طلع وقال: "مات يا ست هانم." بصت أسماء لريناد وقالت: "تمام كده؟ رجعت شعرها ورا ودنها وقالت: "أسفة على الصوت." ضحكت أسماء وقالت: "أنا افتكرت جرالك حاجة والله، بس الحمد لله إنك بخير. يلا ادخلي وأنا تحت لو احتاجتي حاجة."

ابتسمت وسابتها ودخلت الأوضة، ونزلت أسماء قعدت في الجنينة. "في الشركة" دخل محمد لداغر وقال: "مساء الخير." أول ما شافو داغر عرف هو جاي ليه وقال: "النهاردة بعد صلاة العشاء يا محمد، جهز نفسك علشان هننزل." ابتسم محمد وقال: "يعني النهاردة بإذن الله." هز داغر راسه وقال: "أيوا." قال محمد وهو طالع: "تمام، أنا هروح أقول لزهرة." شاوره له بإيديه لبره وقال: "وركز في شغلك، اتفضل." طلع محمد وراح مكتب زهرة وقال: "زهرة."

رفعت زهرة راسها وقالت: "يخربيتك، داغر هيزعق." ضحك محمد وقال: "النهاردة هننزل نجيب شبكتنا، لسه أستاذ داغر قايل." فرحت زهرة وقالت: "بجد؟ قال لها فرح على فرحتها: "جد الجد يا روحي." ابتسم بحب وقال: "خلاص هانت بإذن الله وهنكون لبعض." زهرة بحب: "ربنا يخليك ليا يا روحي." ابتسم لها وقال: "هروح أكمل شغل بقا علشان منتعلقش أنا وإنتي على باب الشركة." ضحكت زهرة وطلع محمد من المكتب. دخل

علاء لداغر المكتب وقال: "يا شايل الهم بدري، مالك فيك إيه؟ اتكلم داغر وهو متضايق: "حاسس إني مهموم جامد، فكرة إن هتجوز وبعدها بأقل من أسبوع هطلقها دي حاجة مضايقاني، وكمان أنا عاملها وحش كتير أوي." قعد علاء قدامه وقال: "وإنت عاملتها وحش ليه يعم؟ وبعدين برضوا هتطلقوا بعدها بأسبوع ليه؟ بصله

داغر بحيرة وبعدها قال: "اتفاقنا إن لو محدش فينا ارتاح، هطلقها بس قدام الناس هنفضل متجوزين عادي عشان عيلتها. وبعاملها وحش ليه، فدي معرفش إجابتها. من وإحنا صغيرين دايماً فيه ما بينا مشاكل وناقر ونقير دايماً، ولما جت عاشت معانا مفيش مرة عاملتها حلو أبداً وعيطت كتير بسببى. فمعتقدش إننا هنعمر مع بعض." ضحك علاء وقال: "ما محبة إلا بعد عداوة ياعم داغر." شوح داغر بإيديه وقال: "محبة إيه اللي بعد عداوة؟

إحنا لو قعدنا مع بعض شهر هنروح محكمة الأسرة." ضحك علاء جامد، كمل داغر كلامه وهو بيضحك وبيقول: "والله بجد يابني، بقولك مش بنطيق بعض." ضحك علاء جامد وقال: "مش قادر." فضلو يضحكو شوية، وبعدها علاء قال: "يعم سبحان ما غير الأحوال. إنت إيه ضمنك إنت؟ بس علشان متروحش محكمة الأسرة زي ما بتقول، تجنبها يا سيدي وهي معتقدش إنها ممكن تعصبك، بالعكس كمان هي ممكن تتجاهلك عشان متتخانقوش أو تعاملها وحش." اتنهد داغر وقال: "على الله بقا."

بص علاء بتضييق عين لداغر وقال: "مش دا اللي مضايقك يا صاحبي؟ عيب لما نبقي صحاب أكتر من 10 سنين وتيجي تضحك عليا." ابتسم داغر وقال: "ياعم أنا كويس." فضل علاء باصله بعوجة بوق لحد ما اتكلم داغر وقال: "هوفف خلاص. محمد وزهرة نازلين النهاردة عشان نجيب الدهب بتاعها." علاء بفهم: "إمممم، مدام متضايق وزعلان وافقت عليه ليه؟

داغر بحزن: "عشان هي بتحبه. هي مبتحبنيش ولا عمرها حبتني، دايماً شايفاني أخوها. واليوم اللي جه عشان يتقدم فيه قالتلي إنه جاي وإن مارفضوش عشانها بتحبه وهو بيحبها. مقدرتش أرفض لما شوفت نظرة الحب في عينيها ليه، بس أنا كنت مخطط حياتي كلها عليها وفي لحظة كل ده اختفى بمجرد إنها هتلبس دبلة غيري."

اتكلم علاء وقال: "اعتبرها تجربة وفشلت يا سيدي. متعلقش قلبك وحياتك على واحدة يا داغر عشان ده أسوأ قرار ممكن تاخده في حياتك. مشيت خلاص وبص لحياتك وافتح قلبك وإوعي واحدة ست ترفضك أو ترفض قربك ليها وتفضل متمسك بيها. اللي تسيبك وتمشي إديها ضهرك وسيبها وإمشي إنت كمان. لما البت تديك ضهرها إدي ضهرك للبت." ضحك داغر ضحكة خفيفة وقال: "هي مش المفروض لما الدنيا تديك ضهرها تدي ضهرك للدنيا؟

ضحك علاء وقال: "لأ، دي حكمة تيمون وبومبا. إنما اللي قولتهالك حكمة علاء الدين مختار." ضحك داغر وقال: "ربنا ابتلى بصاحب معاق والله." علاء وهو بيرمش بعينه: "بس متقدرش تستغني عني صح؟ قول قول. وبعدين محتاج واحدة ست ليه يا سي داغر وأنا في حياتك؟ داغر برفعة حاجب: "يعني معترف إنك واحدة ست؟

علاء بعوجة بوق: "لأ يا حبيبي، ده أنا راجل وراجل أوي كمان، بس أقصد أنا كصاحبك وأنتيمك أقوملك بكل الأدوار في حياتك، صاحب وأخ وحبيب وحبيبة لو عايز كمان." ضحك داغر وقال: "اطلع برا يا علاء، روح كمل شغلك." قام علاء وقف وقال: "يعم ماشي." طلع علاء وداغر مازال مبتسم وقال: "هشوف حياتي وهفتح قلبي وهبص لنص الكوباية المليان كمان." "بعد ساعات متتالية" دخل داغر الفيلا لقي ريناد وأسماء قاعدين في الجنينة. قرب منهم وقال: "مساء الخير."

بصت له أسماء وقالت: "يا مساء الفل." ما اتكلمتش ريناد ولا ادته وش. اتكلم داغر وقال: "جهزى نفسك بعد العشاء إن شاء الله عشان هنروح نجيب شبكة زهرة النهاردة." بصت على ريناد وقالت: "وشبكة ريناد؟ داغر بإستغراب: "شبكة ريناد إزاي يعني؟

اتكلمت أسماء وقالت: "حبيبي دي هتكون مراتك قدام الناس كلها، عيب لما يبقى داغر الدويري ابن مراد الدويري اللي سايب بصمة في الدنيا قبل ما يموت، مرات ابنه متبقاش لابسة أحسن وأغلى حاجة في الدنيا كلها." اتكلمت ريناد وقالت: "بس أنا مش عايزة حاجة خالص." بصت لها أسماء بعتاب وقالت: "مينفعش يا حبيبتي. الفرح ده هيكون رأي عام، فلازم تلبسي أحسن حاجة." بصت لداغر وقالت: "هنجيب لها النهاردة برضه يا حبيبي ولا يوم تاني؟

اتكلم داغر بغيظ وقال: "اللي إنتي شايفاه يا أمي." ابتسمت أسماء وقالت: "يبقى النهاردة يا قلبي." سابهم داغر ودخل الفيلا، طلع على أوضته وهو بيبرطم. بصت ريناد لأسماء وقالت: "أنا بجد مش عايزة حاجة." بصت لها أسماء وقالت: "بس يا حبيبتي." بصت في ساعة موبايلها وقالت: "فاضل يدوبك نص ساعة على صلاة العشاء." قامت وقفت وقالت: "قومي يلا ننقيلك حاجة تلبسيها شيك كده زيك." كانت ريناد هتتكلم، شدتها أسماء من إيديها وقالت: "يلا مفيش وقت."

طلعوا وفتحت دولابها ونقيت لها فستان رقيق وشكله شيك وقالت لها: "بتعرفي تحطي ميكب لنفسك؟ هزت ريناد راسها وقالت: "أرتيست." ضحكت أسماء وقالت: "على خيرة الله. هسيبك أنا تاخديلك شاور وتليطي في وشك وتلبسي، نكون إحنا خلصنا." ابتسمت ريناد وقالت: "تمام ماشي." طلعت أسماء من الأوضة وراحت تلبس، ودخلت ريناد أخدت شاور وبدأت في تجهيز نفسها. "بعد ساعة" نفخ داغر بعصبية وقال: "هو كل ده بتلبس؟

أومال لو مكانتش أول واحدة فينا بدأت باللبس كان إيه هيحصل يعني؟ أسماء وهي بتهديه: "اهدأ طيب، أكيد فيه حاجة معطلاها." فتح زراير بدلة الجاكيت وقال: "أنا هطلع ولو لاقيت حاجة مش مبرر إنها تأخرها أنا هقلبها نكد عليها." كانت أسماء هتطلع معاه، وقفه وقال: "خليكي هنا عشان بتفضلي تتحامقي عليها." فضلت أسماء وهي بتدعي ربنا يعديها على خير. طلع داغر فوق وفتح باب الأوضة وقال بزعيق: "كل ده بتل... سكت لما شاف ....