أسيرة قلبي الفصل الأربعون 40 - بقلم انجي جمال

و بعد مرور بعض الوقت يصل أيان و انجي لقصر عائلة آسر ليهبطوا من السيارة ثم يتوجهوا للداخل ليدق أيان الجرس لتفتح الخادمة الباب ثم تأذن لهم بالدخول ليتوجهوا للريسبشن ليجدوا آسر و والديه و ميرنا و ايهاب والد أيان أيضاً.....

أيان بإبتسامة: السلام عليكم..

الجميع : و عليكم السلام ..

أيان بإستغراب : انت هنا يا بابا .

أيهاب بإبتسامة: اه يا حبيبي قولت اجي اساعد محمد و اقف معاه في تجهيزات الفرح ..ثم يوجه حديثه لإنجي ازيك يا أسيل..

انجي بإبتسامة: الحمد لله تمام اخبار حضرتك يا عمو .

ايهاب : الحمد لله يا بنتي .

رقية بإبتسامة : اقعدوا يا ولاد ..

آسر بلهفة: لا بالله عليكم دا احنا يا دوب نلحق نختار البدلة بتاعتي و ميرنا عايزة فستانين فستان للحنه الليلة دي و فستان الفرح وصل بس لسه عايزة تعمل البروڤا ..

أيان بضحك: طيب يلا بعد إذنكم يا جماعة ..

محمد بمكر: عقبال ما نساعدك في فرحك انت و أسيل يا أيان .. لتبتسم انجي بخجل و تتورد خدودها..

أيان بغمزة مرحة : إن شاء الله قريب جداً.

ميرنا بتذمر و هي تمسك انجي من يدها : يلا يا أسيل احنا نمشي أُدامهم كدا كدا كل واحد هيروح في طريقه ..

أيان بضيق : ليه ما نروح مع بعض ..

آسر بسخرية : معلشي هنبعدك عن حبيبتك كام ساعة بعد اذنك..

أيان بضيق : طيب يلا يا اخويا علشان نخلص بسرعة و نروحلهم ..

آسر بعدم تصديق: شوف مين اللي بيتكلم أيان اللي كان بيتريق عليا بقا عامل إزاي..

محمد بإبتسامة: الحب بيعمل اكتر من كدا ثم يغمز لصفية و ألا انتي رأيك أي يا رقية..

رقية بإبتسامة: بس بقا يا محمد انت و ابنك علي أيان ..

ايهاب بضحك : بلاش لتحسدوهم ...

أيان بتذمر: حتي انت يا بابا ..

ايهاب : خلاص سكت اهه ..

ميرنا و هي تسحب انجي معها للخارج : يلا يا أسيل ...

ثم يتجه كل ثنائي لوجهته ميرنا مع انجي و آسر مع أيان .........

*****************************

أما في قصر السويفي..

و خصوصاً في غرفة مروة فهي تتحدث علي هاتفها

مروة بمكر : عايزة منك خدمة ..

مجهول ( دا غير اللي بيساعد انجي تمام ) : مين معايا ..

مروة : مش مهم مين اللي معاك المهم انا عايزاك في مصلحة و هديك فيها ١٠٠,٠٠٠ جنية ها قولت لي .

مجهول بطمع : اللي تؤامري بيه يا ست هانم ...

لتبدأ مروة في شرح خطتها ..........

***********************

أما في غرفة مرام فهي تحدث صفية علي الهاتف ..

مرام بخبث: ها يا انطي عملتي اللي اتفقنا عليه ..

صفية بتأكيد : أيوة عملت زي ما قولتي بالظبط .

مرام بفرح : تمام هنفذ النهاردة أو بكرة بالكتير تمام يا انطي ..

صفية بتوتر : بس بقولك أي يا مرام انا خايفة أيان يعرف باللي انا هعمله دا ..

مرام بنفي : مستحيل يكتشف يا انطي هو حضرتك متفقتيش مع الراجل اللي قولتلك عليه ..

صفية بتأكيد : أيوة و كمان جهزت الورق و كل حاجة بس برضو خايفة من رد فعل أيان و ايهاب .

مرام بمكر: بعد كدا هيعرفوا إن مصلحة أيان أنه يبقي معايا و يتجوزني انا مش أسيل..

صفية بإبتسامة: أيوة لازم يعرف إن اختياره كان غلط من الاول و انا عارفه مصلحته اكتر من نفسه .

مرام : تمام يا انطي انا هروح اجهز نفسي لان بكرة هيكون يوم طويل جداً..

صفية : تمام يا حبيبتي سلام ...

ثم تنهي الاتصال لتتطلع مرام لانعكاس صورتها في المرآة لتحدث نفسها ( أيان ليا انا و بس و مستحيل اسيبه لاي حد لو هعمل اي و أياً كان التمن )

( رواية أسيرة قلبي بقلم انجي جمال)

*

******
و أما في مكتب فريدة فتجلس فريدة السويفي بجبروتها و برفقتها عمرو ..

فريدة بتأكيد : ها يا عمرو اخبار الصفقة اي .

عمرو : كله تمام متشيليش هم ..

فريدة بسخرية: مشيلش هم ازاي انت ناسي الصفقة اللي اتبلغ عنها قبل كدا و ألا اي ..

عمرو بضيق : لا منسيتش بس انا مأمن كل حاجة .

فريدة بتأكيد : لازم تأمن من دلوقتي و بعدين لسه ٣ أيام علي معاد التسليم..

عمرو : حاضر يا ماما ..

فريدة بإستغراب : هو عمار فين .

عمرو : اكيد قاعد في الجاردن ما انتي عارفه إن النهاردة اجازة من الشغل ..

فريدة : طيب وحازم راح فين ..

عمرو : اكيد يا ماما في النادي ..

*****************************

أما عند أبطالنا فعند انجي و ميرنا فمضي أكثر من ساعتين و مازالوا يبحثون عن الفساتين حتي عثروا علي ما أرادوا و بعد ذلك توجهوا للجلوس في أحد المقاهي و التحدث قليلاً.......

انجي بمرح : الف مبروك يا عروستنا كلها النهاردة و بكرة تبقي متجوزه آسر و تبقي حرم آسر العمري ..

ميرنا بخجل : بس بقا يا أسيل..

انجي بإبتسامة: ماشي يا ستي ها هنعمل اي ..

ميرنا بإبتسامة : الساعة دلوقتي ٥ بعد العصر يا دوب نلحق نروح علشان نوصل و نجهز الميك آب ارتست زمانها وصلت الڤيلا ...

انجي و هي تقف : تمام يلا بينا .......

ثم يتجهوا للسيارة و بعد مرور بعض الوقت يصلوا للڤيلا ثم يهبطوا من السيارة و يتوجهوا للداخل و منه الي جناح ميرنا و قد وجدوا فعلاً الميك آب ارتست قد و صلت و هي يانتظارهم لتبدأ بتجهيزهم....

أما عند أيان و آسر ...

أيان بملل : ها يا آسر لسه كتير ..

آسر بإبتسامة: لا انا خلصت أصلاً هنحاسب بس ..بجد يا أيان مش عارف أقولك اي ..

أيان بصدق : انت اخويا يا آسر و إن مكنتش هقف مع اخويا في اسعد يوم في عمره مين اللي هيقف معاه ..

ليضمه آسر بقوة ليبعده أيان بمرح : ما خلاص يا عم روح حاسب و انا هكلم أسيل اشوفهم خلصوا و ألا لسه ..

آسر و هو يذهب باتجاه الكاشير : تمام مش هتأخر .

يقوم أيان بالتقاط هاتفه و الاتصال بانجي ليرن الهاتف لبضع ثوان ثم تُجيب انجي ..

أيان بحب : ها يا حبيبتي خلصتوا ..

انجي بإبتسامة: اه يا حبيبي انا في الڤيلا مع ميرنا و جهزنا و شوية كدا و السهرة هتبدأ ..

أيان بإبتسامة: تمام يا قلبي .. ليكمل بتحذير ..بس اوعي تكون جايبه فستان مكشوف هزعلك بجد .

انجي بثقة : متقلقش هتتفاجئ .

أيان بمرح : يا خوفي من مفاجأتك ..

انجي بضيق: بقا كدا يا أيان مفاجأتي مبقتش تعجبك ..

أيان بصدق : اي حاجة منك علي قلبي زي العسل يا روحي ..

انجي و قد اتخذت قرارها أنها سوف تعترف لأيان بحقيقتها و بكل شئ قبل أن يتفأجئ : أيان انا كنت عايزة اقولك علي حاجة .

أيان بإستغراب : قولي يا حبيبتي..

انجي بتوتر : بكرة بإذن الله بعد فرح ميرنا و آسر عايزة اقولك علي حاجة مهمة جداً.

أيان بإبتسامة: طيب ما تقولي دلوقتي ..

انجي بإبتسامة: لا بكرة بإذن الله.

أيان : خلاص تمام اللي يريحك يا حبيبتي.

انجي بإبتسامة: سلام لان انا و ميرنا نازلين تحت .

أيان باستغراب : نازلين تحت فين .

انجي بتوضيح: ما احنا سهرتنا في الريسبشن تحت.

أيان : تمام و انا هكون جنبك مع آسر و الشباب في الجاردن ..

انجي بإبتسامة: تمام يا حبيبي في رعاية الله وحفظه..

أيان بإبتسامة حب : في رعاية الله وحفظه يا قلبي ...لينهي الاتصال ليجد آسر قد انتهي ليتوجهوا بعد ذلك للڤيلا و يصلوا بعد بعض الوقت ..

اما بالداخل فقد ارتدت ميرنا فستان تركي بعباءة ملكية باللون الاحمر و تركت العنان لشعرها و ارتدت حذاء بكعب عالي ذو لون فضي و ميك اب يناسب لون الفستان

لتنزل الدرج برفقة انجي و التي كانت قد ارتدت هذا الطقم باللون البيج في ذهبي و حذاء بكعب عالي ذو لون ذهبي و و عقل أصابع علي شكل فراشات

لتتوجه كل العيون بصدمة من جمالهم و ملائمة الملابس لهم و لهذه الفكرة الغريبة جداً و التي كانت من تخطيط ميرنا بالطبع ليتوجه الكثير من السيدات و الفتيات لتهنئة ميرنا لتجلس انجي بجانب صفية بعد أن رأتها حاضرة و تجلس بجانب رقية

انجي بإبتسامة: ازيك يا طنط ..

صفية بإبتسامة مزيفة: الحمد لله يا بنتي انتي عاملة اي.

انجي برقة : الحمد لله تمام هو أيان وصل ..

رقية بسخرية في حديثها استغربتها انجي : انتي ادري مني بتحركات أيان ..

انجي باستغراب : ازاي مش فاهمة حضرتك تقصدي اي .

صفية و هي تتدارك الأمر : قصدي يعني أنه كان معاكي ..

انجي بإبتسامة و لكن لم ترتاح لصفية بشكل كامل بعد : لا هو كان مع آسر و انا كنت مع ميرنا و كلمته من شويه و قال إنه جاي بعد إذنك هروح اشوف ميرنا بتشاورلي ..

صفية في مكانها بضيق : انا مش عارفه عاجبه فيكي اي الجمال مش كل حاجة و لو علي الجمال طب ما مرام حلوة برضو يوه و انا هضايق نفسي ليه كلها بكرة و تغور في داهية بعيد عن ابني .

انجي بإبتسامة لميرنا: نعم يا ميرنا كنتي بتشاوريلي .

ميرنا بفرح : أيوة يلا هما هيشغلوا الاغاني دلوقتي..

انجي بعدم فهم : أيوة يعني اعمل اي ..

ميرنا بضيق: هتعملي فراخ هتعملي اي يعني اي اكيد هنرقص ..

انجي برفض : بس انا و لم تكمل حديثها بسبب مقاطعة ميرنا و جذبها لها للرقص لتحاول انجي تقليد حركات ميرنا ليظلوا علي هذا الوضع لفترة لتجد انجي سيدة ما تتجه لها و تتطلع لملامحها بتدقيق لتظر انجي لها بإستغراب..

انجي بإستغراب: في حاجة يا طنط .

السيدة بإبتسامة ( و التي تكون فاطمة خالة آسر و حماة أخته في نفس الوقت ) : لا يا حبيبتي هو انتي قريبة مين العريس و ألا العروسة ..

انجي بإبتسامة: لا انا صديقه العريس و العروسه ..

فاطمة بلهفة : طيب انتي مين ..

انجي بإستغراب : انا بابايا متوفي و مامتي كمان .

فاطمة بشفقة : طيب و انتي عايشه مع مين يا بنتي ..

انجي بإبتسامة: انا عايشة مع خالتو في لبنان و لسه نازله مصر من فترة ..

فاطمة بإبتسامة : طيب متجوزه ..

انجي بضيق: لا بس ليقاطع حديثهم تقدم رقية ..

رقية بضيق : أي يا فاطمة بقالك ساعة بتحقيقي مع البنت روحي يا أسيل يا بنتي معلشي الشباب برا لو حد منهم محتاج حاجة انتي اشرفي علي الشغل بس متعمليش حاجة ..

انجي بإبتسامة: حاضر يا طنط بعد اذنكم ..

لتتحدث فاطمة بلهفة: مين دي يا رقية ما شاء الله تبارك الرحمن جميلة و تدخل القلب انا ارتحتلها اوي و بإذن الله اخطبها لابني ..

رقية بسخرية: اهي دي بالذات متقدريش تقربي منها انتي و ابنك ..

فاطمة بسخرية مماثلة: ليه إن شاء الله بتعض و ألا بتخوف ..

رقية بضحك : لا مخطوبة و مش هتصدقي لمين..

فاطمة بضيق لأنها كانت تريد فتاة مثلها لابنها : هتكون مخطوبة لمين يعني ..

رقية بإبتسامة: لأيان ..

فاطمة بعدم فهم: أيان مين ..

رقية : أيان الجارحي صاحب آسر ..

فاطمة بدهشة : أيان مش دا الشاب اللي بيفضل هادي و مبيكلمش بنات نهائي ..

رقية بمرح : تعالي شوفيه دلوقتي و هو ماشي وراها زي خيالها مبيسيبهاش و ألا لحظة غير أنه بيموت فيها و كلنا عارفين و هو مبيهموش من حدا ..

فاطمة : سبحان مغير الاحوال بقا أيان يحب بس بصراحة الولد دا انا بعزه و بحبه زي ولادي و البنت كمان باين عليها هادية و محترمة دا غير أنها يتيمه .

رقية بحزن : علي رأيك يلا نشوف ميرنا و الناس ..

فاطمة : يلا

أما عند بطلتنا فهي تتجه للجاردن ثم تتوجه للعمال المتواجدون هناك و تتحدث معهم لبعض الوقت ثم تلتفت خلفها لتجد أيان لتشهق بخضة ..

انجي بإبتسامة و هي تضع يدها علي قلبها : حرام عليك يا أيان خضيتني ..

أيان بإبتسامة: سلامتك من الخضة يا قلب أيان ..ثم يِتابع بإستغراب و بعدين اي اللي انتي لابساه ده ..

انجي بإبتسامة: اي رأيك اصل انا و ميرنا لبسنا فساتين تركي ..

أيان بتقييم : هو جميل جداً عليكي ..

انجي بخجل: تمام انا هدخل جوا علشان شويه و هنام اه صحيح انا هنام هنا الليلة دي مع ميرنا ..

أيان باستغراب: و دا ليه إن شاء الله.

انجي بتوضيح : علشان عايزاني اساعدها في شوية حاجات كدا ..

أيان بغمزة : حاجات اي ..

انجي بضيق و خجل : ما خلاص بقا يا أيان أنا داخلة ..

أيان بتذكر: اسيل انا عملت سيرش عن صاحب الرقم ..

انجي بتوتر : ها و لقيت اي ..

أيان بتنهيدة : للاسف الرقم مش متسجل ..

انجي بهدوء مزيف: تمام متشغلش بالك يلا انا هدخل ..

أيان بإبتسامة: تمام يا حبيبتي ....

و بعد مرور حوالي ساعة ينتهي اليوم ليبدأ يوم جديد ملئ بالسعادة للبعض و ملئ بالألم للبعض الآخر ..

*****************************

يلا كله يتفاعل مع البارت و يقولي رأيه في الكومنتات ❤️❤️❤️

انا عارفه إن البارت صغير شوية

بس بإذن الله بكرة بارت طويل

بكرة بإذن الله حلقة ضرب نار بجد كله كوم و اللي جاي كوم تاني خالص 😂😂😂

بس شجعوني بتفاعلكم مع البارت ☺️☺️☺️

علشان انا بكتب في كمان واحد و بإذن الله هنزله النهاردة اخر اليوم ☺️☺️