رواية اتحداك الفصل الخامس 5 - بقلم سولييه نصار

رجـعـلـك؟!! انت أكيد مجنون... قالتها بتريقة ولسه هتمشي شدتها من طرحتها وكتمت بوقها وأنا بقول بعنف: هترجعيلي غصب عنك... ده انتي مفروض تفرحي إنّي وافقت أرجعك ليا... كانت بتبصلي بصدمة وفجأة زقتني وصرخت في وشي: انت مريض ولازم تتعالج، لإنّ في اليوم اللي سبتني فيه وأنا رميتك من حياتي خلاص... فوق يا عصام، أنا دلوقتي مجرد مصممة ديكور لفرحك... فرحك على اختي...

أنا ليا بس أصمم الفرح مكان السلسلة اللي ضاعت، وأقسم بالله لو الهبل ده اتكرر تاني أنا همشي وأعلي ما في خيلك اركبه... وبعدين طلعت من الأوضة ومشيت بسرعة. قعدت على الأرض وأنا مصدوم، حاسس إني هتجنن، كل حاجة بتنهار... حاربت عشان أكسرها بس طلعت أنا اللي بتكسر وأنا بشوفها مش مدياني أي اهتمام... حتى في عينيها مبقتش أشوف حب زي الأول، وده كان هيجنني... هي مش مفروض بتحبني... مفروض تبين...

ده لا هي بتحبني، أنا متأكد وأنا هصبر عليها... هصبر لحد ما تركع على رجليها وتطلب مني إني أرجع لها... هذلها زي ما ذلتني. مرت الأيام وتعامل لبيدة كان مع سهيلة بس، وفيه تجاهل متبادل بيني وبينها... افتكرت إن ده هيضايقها بس حسيت إن ولا في دماغها، وبدأت ثقتي تقل... معقول محبتنيش؟ معقول؟؟! هي قالتلي إنّي حياتها... طب إزاي... كنت بتحرق من جوا...

حاسس ببراكين جوايا، الفرح بيقرب بس أنا تعيس، ولحظة اتمنيت إن الزمن يرجع ومكنتش بعدت عنها، رغم إنّي عايز أكسرها وأجرحها، إلا إن جزء مني حبها وكان عايز يمتلكها... فكرة إن حد تاني ممكن ياخدها مني كانت مجنّناني... وخصوصًا إنّي لاحظت إن ابن خالها بدأ يقرب منها... كنت براقبها لما تروح البيت، وهناك كنت بشوفه بيتردد عليهم... نار الغيرة كانت مموتاني وأنا دماغي بتروح وبتيجي...

علاء ابن خالها كان بيحبها أوي، بس هي كانت بتعتبره أخوها، وبعد لما عرفت إنها خطبت، اهوه رجع تاني... كنت متوتر وخايف ومهزوز وأنا بشوفه بيقرب وأنا ببعد... لا... لا هي بتحبني أنا، متقدرش تحب غيري... عشان كده أخدت شوية قرارات عشان ترجعلي. تاني يوم يعني إيه عايز تفسخ الخطوبة؟ هو أنا لعبة في إيديك... بصتلها ببرود وقولت: انتي عارفة إنّي مش بحبك، بلاش دراما، خلاص لعبة ولعبناها وأنا مليت. وشها بهت وعيونها دمعت وقالت:

أنا حبيتك. ابتسمت وقولت بغرور: هو انتي فاكرة إنّي هحبك يا سهيلة؟ لا بجد انتي أكيد انتي مجنونة... أنا هبص لك انتي إزاي؟ ده انتي كنتي ماشية معايا وأنا خطيب أختك، والله أعلم عملتي إيه تاني... أنا رميت لبيدة، تفتكري مش هرميكي انتي... قمت وأنا حاسس بالانتصار وقولت: صحيح، الهدايا اللي جبتها خليها معاكي تعويض ليكي. وبعدين مشيت وأنا فرحان. قعدت في عربيتي، وبعدين قررت أطلع تليفوني وأتصل بحد... لبيدة أكيد هتفرح بالمفاجأة دي...

اتصلت باللي هيطبعلي كروت الفرح وقولتله: أيوه يا أستاذ وليد، أنا عصام بقولك عايزك تغير اسم العروسة في مرت الفرح من سهيلة للبيدة، وتحتفظ بإسم الأب.