رواية ازاي اطفش عروسة بابا الفصل الرابع عشر 14 - بقلم اليا

غفران رفعت صباعها تشاور عليها، ملقيتهاش زي ما تكون فص ملح وداب. "ماما، ماما مشيت، افتحلي أدور عليها عايزة ماما كانت هنا." تبريرات الحارس فشلت تهدّيها، اضطر يطلعها مغصوب تدور على أمها. لحقها من محل للتاني، بتتلفت تدور على أمها في كل وش ست بتمر حدها. رجعت خايبة الأمل في نص الطريق، وقعت على ركبها. غفران حاطة راسها على المكتب، بتعيط. "عايزة ماما شفتها بس هي مشافتش.ني." المديرة بتمسح على شعرها.

"خلاص يا بنتي، اهدي يا غفران متعمليش في نفسك كده. اتصلت بالأستاذ عمر، شوية وهيوصل. متعيطيش." بمجرد ما ذكـرته، دخل من الباب ملهوف بيستفسر عن سبب انهيار بنته بالشكل. حاول يجذب انتباهها بس ظلت مكبوبة على وشها مبتردش. عمر حط شعرها ورا ودنها. "غفران حضرتك هتفضلي ساكتة؟ هي مالها؟ لسا موصلها من نص ساعة مبسوطة. في حد ضايقها أو زعلها؟ المديرة. "بتقول شافت أمها بس ملحقتش تكلمها." عمر برق. "أمها؟ المديرة اتنهدت بثقل.

"حسب معلوماتي أمها متوفية." غفران قاطعتها بزعيق. "مش متوفية، ماما عايشة أنا شفتها برا المدرسة. بابا انت مصدقني صح؟ بابا أنا شفتها انت مصدقني مصدقني يا بابا." عمر بيحاول يواكب صدمته. "غفران بابا أنا مش قلتلك ماما ماتت المفروض نبقى شاطرين وندعيلها بالرحمة." غفران زقت ايده، رجعت خطوتين لورا. بصتله مكسورة، توقعت من الكل يكذبها ما عداه. "مش عايزة أناقشك أنا تعبانة. ممكن ترجعني على البيت." المديرة بهداوة.

"الأفضل تاخدها ترتاح. لو احتجت استشارة دكتور نفسي، ممكن أقترح عليك دكاترة سبق وتعاملوا مع حالات أطفال من مدرستنا." غفران زعقت. "أنا مش مجنونة." جريت من قدامهم على العربية. اجت تطلع في الكرسي ورا لقت نسرين قاعدة، معبرتهاش. بتبص من الشباك كاتمة العياط جواتها. الأجواء في العربية بعد رجعة عمر مليانة توتر. بيسوق كل شوية يبصلها من المراية. عمر اتنهد بثقل.

"هنوصل خالتك نسرين على السوق. هاخدك معايا على الشركة مش هينفع أسيبك في البيت. عمو جابر وحشك صح؟ غفران بهمس. "مش عايزة، رجعني البيت." عمر بحنية. "غفران بنتي ممكن شفتي وحدة شبهها بس دي مش مامتك هي ماتت." غفران زعقت. "انت كداب ماما عايشة." نسرين. "أه هو كداب، أمك عايشة."