رواية بائعة الخضار الفصل التاسع 9 - بقلم محمد طه

مازن.. فين مفتاح الكلابش دا يا مجنونه. والهام من الصدمه والمفاجأه مش قادره تنطق ومش مصدقه اللي شايفاه بعنيها.. لحد ما فيه حد على الباب بدأ يخبط جامد على باب البيت.. أكن القيامه قامت بره.. في اللحظه دي الهام صحيت من النوم على صوت خبط الباب وأول ما فتحت عنيها بصت على مازن لقيته نايم جنبها بس صاحي وزي ما هوا متغيرش وإنه كان حلم. الهام تبلع ريقها.. الحمد لله إن البيت مكنش حلم وإنه حقيقه (وتنتبه لصوت الخبط اللي على الباب)

هوا مين اللي بيخبط على الباب جامد كده.. (وبصوت عالي) حاضر يا اللي على الباب جايه أهو. (وكان على الباب سيده في أوائل الاربعينات) الهام.. نعم. (تزقها الست وتدخل) الهام.. هوا حضرتك مين وعايزه إيه. الست تبصلها من فوق لتحت.. حضرتي اللي عايزه تعرف إنتي مين وبتعملي إيه هنا.. هوا أخويا أتجنن على كبر ولا إيه.. بس الشهاده لله زوقه حلو. الهام بقلق وتوتر.. أنا مش فاهمه حاجه.

الست.. مش مهم تفهمي.. المهم دلوقتي تدخلي تجيبي الورقه العرفي وتقطعيها.. وتاخديلك قرشين وترجعي للشارع اللي إنتي جايه منو. الهام وعنيها بدأت تلمع بالدموع.. ورقه عرفي إيه وقرشين إيه.. أنا مش متجوزه لا عرفي ولا رسمي. الست.. لا عرفي ولا رسمي (وتعلي صوتها) أومال إنتي قاعده هنا ف بيت أخويا بصفتك إيه يا روح أمك. الهام بدموع.. حضرتك أنا هقولك على كل حاجه.

الست.. وحضرتي مش عايزه تعرف أكتر من اللي عرفته.. يلا يا بت خدي الواد العبيط دا واطلعي بره. مازن بغضب.. مازن مش عبيط.. مازن مش عبيط. وأخدت الهام مازن وخرجت من البيت وكانت بتكلم نفسها وتنعي حظها بصوت مسموع وكله وجع. الهام بدموع.. يا فرحه ما تمت.. الظاهر يا مازن إن الشارع صعبان عليه إن إحنا نسيبه ونترقى ونعيش زي ال بني آدمين. مازن.. مازن هيجيب بيت كبير ل الهام.. عشان الهام مش تعيط.

(وهما ماشيين كان الحاج مسعود خارج من المسجد وشافهم ونادي عليهم) الحاج مسعود.. إيه رايحين فين.. وإنتي بتعيطي ليه.. إيه اللي حصل. الهام.. أخت الحاج طاهر جات وطردتنا من البيت. الحاج مسعود.. طيب بس ما تعيطيش وتعالوا معايا. (وأخدهم الحاج مسعود ورجعوا على بيت الحاج طاهر) الحاج مسعود.. السلام عليكم. أخت الحاج طاهر.. وعليكم السلام (وتبص ل الهام بقرف) إنتي رجعتي تاني ليه.

الحاج مسعود.. راجعه عشان الحاج طاهر الله يرحمه قبل ما يموت كان موصي إنهم يقعدوا في البيت. أخت الحاجه طاهر.. ومين بقي حضرتك. الحاج مسعود.. الحاج مسعود صديق الحاج طاهر. أخت الحاج طاهر ببرود.. طيب يا حاج مسعود يا صديق الحاج طاهر.. أنا مش مصدقاك.. وحتى لو كنت صادق.. على جثتي إن الكلام ده يتنفذ.. بعد إذنك. (ولسه هتقفل الباب في وشهم الحاج مسعود يمد إيده على الباب قبل ما يتقفل)

الحاج مسعود بغضب.. لأ حضرتك بقي اللي بعد إذنك أتفضلي أخرجي من البيت. أخت الحاج طاهر بضحكه سخريه.. أنته مين بقي عشان تخرجني من بيت أخويا. الهام.. خلاص يا حاج مسعود إحنا مش عايزين حاجه. أخت الحاج طاهر بغضب.. وإنتي ليكي إيه أصلا عشان تعوزي ولا ما تعوزيش. الحاج مسعود بغضب.. لا ليها ولا ليكي.. البيت ده بيتي والحاج طاهر قبل ما يموت باعلي البيت. أخت الحاج طاهر بغضب.. أنته بتقول إيه يا راجل يا مجنون أنته.

الحاج مسعود بغضب.. بقول اتفضلي أخرجي من بيتي.. وعندك الحكومه روحي أعملي اللي تقدري عليه. أخت الحاج طاهر بغضب وهي خارجه من البيت.. أنته فاكر إني هسكت.. أنا مش هسكت.. وبيت أخويا مش هسيبه. (بعد ما أخت الحاج طاهر خرجت من البيت ومشيت) الحاج مسعود.. بقولك إيه يا الهام.. بكره الصبح هاجيلك عشان نروح الشهر العقاري.. ونسجل البيت بإسمك.

الهام.. أنا مش عايزه مشاكل يا حاج مسعود.. دي باين عليا شرانيه.. ومهما كان برضوا البيت بيت أخوها. الحاج مسعود.. متخافيش.. هيا مش هتقدر تعمل حاجه.. إحنا ورقنا سليم وقانوني.. وهيا أكيد يعني مش قاعده في الشارع وعندها بيت. أسمعي يا الهام.. البيت ده من حق الواد الغلبان ده ودي وصيه موت ووصيه الموت واجبه النفاذ.. هعدي عليكي بكره الصبح عشان نروح الشهر العقاري.

الهام.. طيب ممكن نأجل مشوار الشهر العقاري ده دلوقتي.. عشان أنا مش معايا بطاقه ولسه هطلع بطاقه. الحاج مسعود.. يبقى بكره الصبح هعدي عليكي عشان نروح السجل المدني.. أنا مش هسيبك غير لما أخلصلك كل حاجه. (ويسيبهم ويمشي وقبل ما يخرج مازن يقوله برضوا مازن يكره مسعود) الحاج مسعود بعدم فهم.. هوا مازن بيقول إيه. الهام بتنهيده.. بيقولك شكرا يا حاج مسعود. (فيلا الصباغ)

نهاد.. ما تتعبيش نفسك يا مرات أبويا وتتصلي بحد ياجي يروح معاكي.. عشان اللي هيروح مش هيرجع (ويديلها التليفون عشان تشوف شهاده الوفاه) ميرفت بدموع.. جابر مات.. يعني إيه. نهاد ياخد من إيدها التليفون.. يعني أنا كده عملت اللي عليا.. والشيك اللي معايا دلوقتي هكتب فيه الرقم اللي أنا عايزه. (ويسيبها ويخرج وقبل ما يخرج ميرفت تنادي عليه وتوقفه) ميرفت.. أستنى يا نهاد.. لو جابر مات.. ف لسه فيه مراته واولاده.

نهاد.. لأ.. أنا كان إتفاقي معاكي ندور على جابر. ميرفت بغضب.. لأ يا نهاد.. أنا أتفاقي إني أوصل لأبني وعن طريق أي حد مش شرط يكون جابر الشيك اللي معاك بملايين وأنته عارف إني أقدر أوقف صرف الشيك في أي وقت. نهاد باستسلام.. مراته واولاده أساميهم إيه. ميرفت بتفكير.. مراته كان إسمها تهاني. نهاد.. تهاني إيه. ميرفت.. ما أعرفش. نهاد.. طيب ولاده أساميهم إيه.

ميرفت.. بنته كان إسمها الهام.. والولد (وتسرح وتفتكر اللي حصل زمان.........