رواية بائعة الطعام الفصل الثالث 3 - بقلم إسراء عيد

أسر بنفاذ صبر: إنتي هبلة يابت. نور بصوت عالي: لا بقولك أي هنبدأ من دلوقتي ولا أي. أنا جاية تعبانه خلينا من بكرا. أسر بغضب: إنتي بتعلي صوتك عليا؟ نور سريعا: ولا عشت ولا كونت. ده اللي يتشل لساني. إبتسم أسر بخفه. نور بعيون جاحظة: إيه ده انت بتبتسم من دلوقتي؟ هو مش المفروض في الفصل العشرين؟ ظهرت علامات الاستفهام على وجهه. : إنتي بتتكلمي كدا ليه؟ إنتي قواكِ العقليه بخير. : إيه ده إتعرفت على نور.

كان هذا صوت سليم الذي أتى من الخلف. أسر بتعجب: مين نور دي؟ سليم ببسمة: دي نور اللي بتبيع المحشي وسرقت الزباين مني. أسر بتذكر: أيوه وأنا برضو بقول شوفتها فين. سليم ببسمة: دي جت معايا وإتعرفت عليها. ونور هتشتغل في المطعم. وهتقعد في سكن الخدم عشان لسا مش إشترت بيت. أسر بلامبالاة: أوك. ثم تركهم ورحل. إبتسم سليم بإحراج من طريقة شقيقة. : معلش هو بس تلاقيه تعبان من الشغل. فغر

فاهه حينما أردفت هي بمرح: لا عادي قلة الزوق دي من صفاتهم الأساسيه. : نعم. هما مين دول؟ نور وهي تتحرك لكي تجلس على الأريكة. : تعال الموضوع عاوز قعدة. جلس بجانبها. فأخرجت هاتفها. وأردفت: أخوك شبه بتوع الروايات أوي. سليم بعدم فهم: إزي؟ نور بشرح وهي تفتح الهاتف على إحدى الروايات. : بص بطل بعض الروايات. بيكون أي طول بعرض. سليم بتأكيد: أيوه أسر طول بعرض. فأكملت: مز وذو ملامح وسيمة فتاكة وكل البنات بتجري وراه.

سليم بتركيز: حصل. نور: عصبي. وحاد الطباع. ومبيحبش حد يقوله لا أبدا. سليم بذهول: إيه ده. إنتي تعرفي أسر أخويا من قبل كدا. إبتسمت بثقة: مش بقولك أخوك بطل رواية. سليم بحماس: طب كملي. نور ببسمة: بص ياسيدي فيه أبطال الروايات كدا. ومنهم بقا اللي لما يشوف البطلة يتواقح معاها. تقوم هي تضربه بالقلم. سليم بتأيد: عندها حق. نور بنفي: عنده هو لا. دي كدا دخلت الجحيم برجليها. سليم بإستغراب: ليه. نور بزهق: إنت فهمك بطيء ليه؟

سليم سريعا: معلش أصلي والله مش بحب القراءة. تأففت نور بتعب مصطنع: ركز يابني. هو مغرور وسلطان زمانه. شكله مش هيكون حلو لما حتة بت فقيرة تيجي تتطاول عليه وتضربه. رجولته تنقح عليه. سليم بتركيز وهو يحلل حديثها: أها. : فلم تعمل كدا. هو هينتقم منها. سليم بتفكير: طب ليه مهو هو الغلطان عشان إتواقح معاها من البداية. نور ببسمة: تؤ تؤ. هو يعمل اللي هو عاوزة. محدش يقوله لا. حرك سليم رأسه دليلا على فهمه.

: بص بقا هو هيحصل حاجة من الاتنين دول. يا إما يغتصبها. أو يعذبها ويطفى سجاير تحت باطها وبشعرها يمسح بيه بلاط القصر. أصله نضيف قوي. سليم بتأييد زائف: نضيف نضيف فعلا. نور ببسمة بلهاء وهيام: وبعدها بقا يحبها وهي تحبه ويعيشوا في تبات ونبات ويخلفوا صبيان وبنات. سليم بغيظ: بعد ما إغتصبها ونضف بيها القصر. أومات له وهي مازالت في حالة هيامها. سليم بصوت عالي: فوقي يابت. إيه الجنان ده. يعني هي بعد ده كله تحبه!

أردف بالاخيره بإستنكار. نور سريعا: لا يا سليم. مهو هيركبها هليكوبتر ويشتريلها جزيرة لوحدها في المالديف عشان تروح تصيف. سليم بإنبهار مصطنع: لا ياشيخة هيشتري ليها جزيرة. نور سريعا بدون وعي: اه والله. سليم بإعجاب مصطنع: ده إيه البطل ده. ملقيش منه بناتي ليا. إنفجرت نور في الضحك. : لا لسا معملوش بطلات كدا. سليم بغيظ: قومي غوري يابت من هنا. نور بعبوس: وأنا اللي قاعدة بحكيلك عن طموحاتي وأحلامي.

سليم بضيق: لما دي أحلام. اومال الكوابيس عاملة إزاي. ضحكت نور بخفه ثم أكملت بتذكر: صح. أنا كنت زيك كدا يابني مش مصدقة الموضوع وفكرته في الروايات بس. لحد ما جيت هنا. وشوفت جدتك اللي جابتني وأخوك ده. حرك رأسه بتعجب وعدم فهم. : دخل ده في ده إيه. زفرت بضيق: هو إنت فهمك كدا بطيء طول عمرك. سليم بتضيق عينيه: مانا مش فاهمك. نور بنفاذ صبر: مش إحنا قولنا أخوك مز وبعضلات وطول بعرض. أوما سليم.

نور بتذكر: إيه ده هو أنا مقولتش على النوع التاني. نفي سليم برأسه: لا مقولتيش. نور بتعب: لا ده يطول شرحه. لأن جدة البطل بتبقى عاوزة تفرح بيه فبترمي المسكينة في طريقه. وهو يعذب فيها من ناحية. وهي تصبر فيها من الناحية التانية. بص هقولك بالتفاصيل. بكرا اليوم النهاردة طويل وتعب. سليم سريعا: إستني بس دخل أخويا أسر إيه. طب مانا مز وبعضلات برضو. نور وهي تنهض: لا انت صاحب الفرفوش اللي بيدخل المكتب من غير إستئذان.

أوما لها وهو يمثل الاقتناع. نور بنعاس: قولي بقا فين المكان اللي هبات فيه. عمال ما يكتب الكتاب. نظر لها بعدم فهم ثم تحدث: إستني هنده حد من الخدم يوديكي. أومات له. وإنتهي اليوم سريعا. في صباح اليوم التالي. إستيقظت نور. وأدت روتينها اليومي. ثم ذهبت بإتجاه الفيلا حتى تلحق بسليم. فهي بالطبع لم تعرف الطريق بعد. وبينما هي تخطو لداخل الفيلا.

أردفت لذاتها: بس برضو الفيلا مش قد كدا. يلا يابت يانور إرضي بنصيبك إنتي داخلة على معركة شرسة. بس أوعي أوعي يمد إيده عليكي. اه انتي مش عديمة كرامة عشان اللي من هب ودب يمد إيده. لما يتجوزك يمد إيده براحته بقا. قابلتها الجدة مردفة ببسمة: صباح الخير يانور. نور ببسمة: صباح النور. الجدة بحنان: تلاقيقي لسا مفطرتيش. تعالي يلا حماتك بتحبك لسا حاطين الفطار على السفرة. نور في نفسها: حماتي!

العقربة اللي عملت عقدة لقرة عيني لما خانت عمو مع صاحبه الواطي. الجدة: نور. نور إنتي سرحتي في إيه. نور سريعا: ها لا أبدا. بس مكنتش حابة اعملكم إزعاج. الجدة ببسمة وهي تجذبها: ولا إزعاج ولا حاجة البيت بيتك يابنتي. إبتسمت نور بثقة ولكنها إدعت عدم الفهم. ذهبت معها إلى طاولة الإفطار. وجلست بجانب سليم. الذي إبتسم لها مردفا بمرح: شكلك ملتزمة أوي بالمواعيد. نور بمرح وبدون وعي: لا مهو مش عشان قرة عيني إتأخر براحتي بقا.

نظر لها سليم بعدم فهم. فتحدثت سريعا: ماتخدش في بالك. سرعان ما أتى أسر. فقامت بوضع يديها تلقائيا على قلبها. ثم قالت بصوت خافت متعجب: هو مابيدقش زي قرع الطبول ليه. أسر بجدية: بتقولي حاجة. نور سريعا: لا. أخذ الجميع يتناول طعامه بصمت. بينما نور كان يدور في بالها: هو طيب خلاني أكلت معاهم ولا عشان جدته قاعدة محبش يزعلها. أيوه أيوه هي فعلا ست كبيرة. وخايف لتطُب ساكتة. بعد قليل. نهض أسر وأخذ

مفاتيح سيارته مردفا ببسمة: أنا ماشي عاوزين حاجة. إبتسمت له الجدة: سلامتك يا حبيبي. ثم رحل. سليم وهو ينهض: يلا يانور. نهضت خلفه سريعا بعدما ودعت الجدة. في سيارة سليم. نور: سليم. تحدث وهو يركز على الطريق أمامه: أيوه. : هو أسر طيب ولا شرير. سليم بضحكة: هو ساعات بيقلب لوحش ومحدش بيقدر عليه. ولما بيهدا بيكون أحن إنسان ممكن تشوفيه. إبتسمت بإتساع. سليم بضيق عينيه: بتسألي ليه.

نور بتغير الموضوع: لا عادي. المهم قولي هشتغل إيه. أخذ يشرح لها نظام العمل وكيفية التعامل في المطعم. بعد دقائق. كانت تقف نور في المطبخ الخاص بالمطعم مرتدية الزي الرسمي. طلبت من مساعد معها أن يحضر لها كل ما تحتاجه. فتأخر قليلا. فأخذت تتمشى في الحديقة الخلفية للمطعم. فسمعت صوت شجار بين أحدهم. فذهبت خلف الصوت فوجدت شاب يعنف فتاة. الشاب: You're a traitor... You told me this kid was my son, but he's Mike's son.

الفتاة بصراخ: John, you've crossed the line. تقدمت منهم نور سريعا مردفة: ياجماعة صلوا على النبي الشيطان دخل بينكم. إيه اللي حصل. الشاب بعدم فهم: Who are you? نور سريعا: I know. أحل ليكم الموضع والله جربني. الشاب بصدمة: You know she's cheating. نور بتأكيد: اه والله أعرف أحل الموضع. ده لما كانت خناقة تحصل في الحارة كنت أنا اللي بروح أصلحهم على بعض. I know, yes.

الفتاة بجنون: You're crazy. I didn't betray him. It's a lie from Mike. نور بضيق مصطنع: أهو مايك ده هو أساس المصايب. بص. لم تكمل. حتى وجدت الشاب يصفع الفتاة ويخلع دبلته ويلقيها عليها. ثم رحل. إبتلعت نور ريقها وهي تنظر للفتاة المنصدمة. : كلب ولا يسوى. أوعي تنزلي دمعة عليه. والسلام عليكم. ثم رقدت لداخل المطعم سريعا. تاركة الفتاة. دلفت إلى المطبخ. وهي تتنفس بعنف: الواطي يطلقها بالساهل كدا. إيه يعني لما مايك.

توقفت عن الحديث. ثم أكملت بعدم فهم: هو مايك عمل إيه صحيح. عبست بغيظ مرددة: وأنا مالي. : That's what you asked for. نظرت له نور وكالعادة لم تفهم شيئا ولكن عندما مد يده بالحقائب. فهمت عليه وأخذتها منه بعدما شكرته. وأنهكت في صنع الطعام. حتى وصلت لآخر خطوة في صنع تلك الطبخة. وفي هذه اللحظة دلف سليم. فوجدها تجلس على الطاولة وأمامها العديد من أواني التي تضع بها ما تحتاجه. وإذا بها تقوم بتناول ذلك الحشو الخاص بالأكلة

(المحشي) سليم بإشمئزاز: قاعدة بتاكلي حشو المحشي كدا ني. نور ببسمة بلهاء: متعرفش انت الحشو ده بيغسلني من جوا إزاي. ضحك سليم بخفه. ثم تقدم منها وأردف بتعجب: إيه ده انتي هتقعدي تلفي واحد واحد كدا. نظرت له بغرور مصطنع: أومال أفرد ورقة الكرنب وألفه كإني بلف السجاد. نظر لها بعدم فهم. : مش فاهم. زفرت بغيظ وقلة حيلة: يابني تعبتني والله. نظر لها بغيظ ولم يعقب. حتى مدت يديها وأمسكت في قبضتها القليل

من الحشو مردفة بمشاكسة: خد دوق. نظر لها بقرف: إنتي مقرفة يابت. نور بصياح: ليه يا خوي مانا لابسة جوانتي أهو. سليم بضحكة: لا كتر خيرك الصراحة. خلصي يلا عشان ساعتين وماشي. ثم تركها ورحل.