رواية بديت أنساك يالون السعادة~للكاتبة ضاقت انفاسي الفصل السادس عشر 16 - بقلم BlackButterfly002

السلام عليكم ورحمة الله وبركاته ....اتمنى الجميع يكون بخير : )
اشكر إلي علقوا على بارت المره الماضية
وردودكم تسعدني وتوقعاتكم ^_^
اتمنى اشوفها دائما ^_*

اتركم مع البارت ....

بسم الله

16.1

جالسه بهدوء وتطالع بنات عمها وبحياتها المتقلبه
ناظرت امها للي وقفت عندها وبصوت هامس : وش فيك ؟؟
طالعت امها بعيونها المكحله : ملل
فاطمه بأمر : لا تجلسي لوحدك قومي وقفي عند بنات عمك
شوق بهدوء : الحين اروح خلاص اسبقيني
هزت فاطمه راسها : لا تتأخرين
واقتربت منها وهمست لها : ترى ام صقر موجوده
حاسبي على تصرفاتك
لوت بوزها بكشره : هذا للي عندي للي مو عاجبه الباب يوسع جمل
فاطمه زفرت بضيق : استغفر الله
وش فيك مزاجك مثل الزفت ؟؟
متضايقه على فارس ؟؟
ردت بقرف : ما بقى الا هو اتضايق علشانه
فاطمه : ما في تحليل لتصرفاتك الا كذا
قاعده وماده البوز اكيد الكل رح يفكرك متضايقه على سالفة فارس
ردت بهدوء : خلاص يمه الحين اقوم وانا ما يهمني احد
وانت تدرين اني كنت ابغى اي طريقه واتخلص منه
هزت راسها فاطمه بتفهم وغادرت المكان
تنهدت شوق واخذتها الافكار لقبل اسبوعين

xxxx
xxxx
xxxx
xxxx
xxxx

سمعت دق على بابها
وبعدها فتح الباب و
دخل بشويش
استغربت تواجده عندها بالغرفه بس ما تكلمت
دخل بخطوات هاديه وجلس على الكرسي مقابل السرير
واشر لها تجلس على السرير
زادت حيرتها ومع ذلك جلست بدون اعتراض
وناظرته وهي تنتظره يتكلم
طالعها لثواني وهو يرتب الكلمات وبصوت هادي : اسمعيني يا شوق زين
انا ادري انك ما تبغين فارس وانجبرت عليه
والظروف جبرتكم على هذا الزواج وما كان مخطط لهذا الشيء من قبل
واكبر دليل لما رحتي على المحكمه تخلعين فارس
لو كنت تبغينه ما قدمت على هذي الخطوه بدون علمي
صح كلامي ؟
ناظرت الارض وهي تحس بالتوتر وقلبها يدق
بقوه كأنها فهمت لمحه عن الفكره للي يبغى يوصلها
له بس ما حبت تستبق الاحداث
وردت بصوت منخفض على ابوها تسايره بالكلام حتى
تعرف سبب هالمقدمه : ايه صح
تنهد ناصر وهو يشبك اصابعه ببعض وبنبره هاديه كمل كلامه :علشان كذا انا فسخت زواجك من فارس
لانه كله غلط بغلط لا انت رح ترتاحين ولا هو رح يرتاح
الله يسامح للي كان السبب
انا ادري فيك الحين مبسوطه انك ارتحي من فارس
ما اقول الا الله يعوضك بالرجال للي يسعدك
رفعت راسها بتردد وللحين مصدومه
وباستغراب مع انها توقعت هالسبب : بس انا سمعت جدتي قبل شوي تتكلم
انه زواج فارس بعد اسبوعين
هز ناصر راسه بتفهم : ايوه بعد اسبوعين انا خطبت له
ابنة عمك ابو فهد خلود والاسبوع الجاي رح نملك عليها
وللي بعده رح يكون الزواج
هزت راسها وداخلها بركان من القهر
مو هامها فارس بس للي قهرها
خلود
ليه خلود بالذات خطبوها ؟؟
تكرها تكرها وما تواطنها كيف يجيبونها تعيش هنا عندها
وابوها ليه يتصرف على راسه كذا المفروض شاورها
ما تدري ليه تضايقت مع انها كانت تنتظر الساعه للي تتخلص منه بس
يمكن لو تزوج وحده ثانيه كان اهون عليها من خلود
الزفت
قاطع قهرها لما كمل ناصر كلامه : ادري انه
مو وقته كلامي الحين
اممم ابغى افاتحك بموضوع ثاني
هزت راسها بدون ما تتكلم حتى يدخل بالموضوع
اخذ نفس وبنبره هاديه : تعرفين عمة ابوي الله يرحمه ؟؟
هزت راسها بالرفض
ناظرها وهو يحاول يخليها تتذكر : حرمه كبيره بالسن
اكثر من مره زارت جدتك اكيد شفتيها عندها
طويله ونحيفه
قاطعته وهي تهز راسها بالرفض ما تبغى توجع راسها
بالتفكير وش تبغى فيها
كمل ناصر كلامه : المهم اليوم إلتقيت فيها
وجلست معها و اثناء الكلام قالت لي انها تتمنى تخطبك لواحد من احفادها
وللصدفه كان فارس مكلمني بموضوعك قبل ما اجلس
معها
علشان كذا انا قلت لها ان شاء الله خير
حبيت استشيرك بالموضوع
وفكري زين وصلي صلاة الاستخاره
وان شاء الله ربنا يكتب لك الخير
انا الرجال ما اعرفه صراحه ولا اتذكر اني قابلته
اعرف اخوه الكبير رجال ما شاء الله عليه
ورح اسأل عنهم واكلف ياسر
الحين فكري واعطيني الجواب براحتك
ولا تخلي موضوع فارس يؤثر عليك
بعدك صغيره والعمر قدامك فكري بمستقبلك
يمكن ما يعجبك تصرفي بالخطبه وخاصه انه دوبك
انفصلت عن فارس
وبنفس الوقت ما اقدر ارفض على كيفي
وبالنسبة لفارس خلاص تتغطين عنه ما عاد يحل
لك
وسكت ما يدري وش يقول
وقف وهو يردد بصوت منخفض : الله يكتب لك الخير
طلع من الغرفه وشوق كلامه يتردد بإذنها
ولفت انتباها جمله قالها ابوها بدون ما ينتبه
« وللصدفه كان فارس مكلمني بموضوعك قبل ما اجلس
معها »
قعدت تفكر بالجملة وتكررها بعقلها
فارس للي كلمه بموضوعي مو ابوي للي كلمه
اخذت نفس وهي مقهوره من داخلها
نار
تحس الموضوع مو مثل ما قال لها ابوها
عضت على شفتها بكل الحالات النتيجه
وحده كانت
الانفصال
تحس خلاص الرباط للي يجمعها بفارس
انقطع
كل شيء انتهى
وكل الكوابيس والهواجس للي كانت خايفه
منها انتهت

فتحت عيونها وهي تنفض الافكار من راسها
شافت اميره جالسه عند طاوله واشرت لها
هزت راسها دلاله انها شافتها
وقفت وهي تفكر بموضوع خطبتها مر عليه
اسبوعين وهي للحين ما اعطتهم جواب
وما زالت تفكر
خايفه يكون اختيارها غلط بس بنفس الوقت
لما تشوف كل البنات حولها متزوجات
تحس قلبها يطير تبغى تخطب وتتزوج مثلهم
لكن بداخلها تردد من خوض هالتجربه
ذبحها التفكير
ومو قادره توصل للبر
تنهدت ومشت خطوات وهي تناظر لجهة اميره
ومنال
وقع نظرها
على ثلاث ازواج عيون يناظرونها بتقييم
عفست ملامحها بكشره
اكره ما عليها نظرات التقييم وخاصه انها شاكه انها ام صقر
احساسها أكد لها انها هي
لفت وجهها عنهم وتوجهت باتجاه اميره
جلست على الطاوله للي جالسات عندها وبدون نفس : هاي
اميره بابتسامة : هلا وش فيك طاسه هناك لحالك جالسه
وكأنه معك مرض معدي
لوت بوزها شوق : يا اختي ملل
منال نغزتها بخصرها وهي تغمز لها : وش صار بعريس الغفله ؟؟
لا تقولي بعدك تفكرين !! لو انا مكانه صرت ذابحك
ابتسمت شوق لها : سايبه حتى يذبحني
ترى عندي سند يذبحه
اميره بلقافه : طيب الخلاصه موافقه ؟؟
شوق ابتسمت وهي تبغى ترفع ضغطهم : امممم
بعدني افكر
ضربتها منال على كتفها بخفه : يا شيخه طيري
حسستيني انك شيء كبير
تراك تشبهين شغالتي ما يفرقونك عنها هههههه
اميره وهي تضحك : لا والله تشبه سواق بيت خالي
ههههه مع هالغماز
لعبت شوق بحواجبها بدلع : محترات لاني احلى منكم
منال حطت يدها على صدرها : يا قلبي لوعتي كبدي
بدلعك
اميره بضحكه : انتبهي اذا جلست مع ساري تتدلعين لانه
رح يهج
حطت شوق إيدها تحت خدها بملل : اضحكي وش عليك
اميره بابتسامة : يا اختي وافقي خلينا نفرح فيك
وبعدين شوفي ام العريس وللي معها يطالعونك
بدون ما تناظر لوت بوزها : يقال رايقه لهم
ورفعت نظرها وشافتهم يناظرونها لوت بوزها وطالعت منال : يناظروني وكأنهن مضيعات شيء بوجهي
ابتسمت منال : وش عرفك يمكن مضيعات نعال
ويدورونه بوجهك هههه
شوق خزتها بعيونها : يا جعل النعال يتطرق على ظهرك
اميره بجديه وهي تناظرهم بطرف عينها : بس احس انهم مغرورات
وبتفكير
تدرين يا شوق اتوقع انه ما رح يصير نصيب
وانصحك تغدي فيهم قبل ما يتعشون فيك
وارفضي الموضوع
رفعت منال حاجب : وليه ان شاء الله ترفض ؟؟
اميره : شوفي ام العريس نظراتها باين انه مو عاجبيتها شوق
نظراتها تقول كذا
واكيد رح تقول لولدها انها مو حلوه ويرفضك
قرصتها شوق بفخذتها : مو حلوه يا زفته
اميره وهي تفرك مكان القرصه : حسبي الله على عدوك
حشى يدك ثعبان اعوذ بالله
منال طالعتهم ؛ صحيح كلام اميره
نظراتها تقول كذا انه مو عاجبها
وبعدين شوفي للي معها تجنن ما نيجي ربع جمالها
واكيد يبغون وحده بجمالها
ناظرتها شوق وتنهدت : صادقه تجنن وعيونها
تسحر
بس وش تقرب له معقول اخوها ؟؟
اميره بابتسامة : يا عيني لو كان يشبه لها
يا حظك يا شوق تتزوجين واحد بهذا الجمال
شوق فتحت عيونها باندهاش : معقول يشبه لها تدرين اذا طلع مثلها
خلاص موافقه
منال ناظرتها بتفكير ؛ تدرين انصحك ترفضين
اذا كان مزيون باكر يشوف نفسه
عليك ويقول انا بالجمال هذا ومتزوج جيكره
خزتها شوق بعيونها : تراكم زودوتها
حسستوني اني مخلوق بشع تراني احلى منك
اميره : يا الخبله انت حلوه بمقياسنا
بس اذا قارنتي نفسك بذيك الحلوه
تطلعين صفر عالشمال
لوت شفتها شوق بغيره : صحيح حلوه بس جسمها مليان
منال : اسكتي اسكتي قال جسمها مليان
اخخخخ لو انا بربع جمالها
يا حظ زوجها فيها
قاطعتهم ام مهند لما وقفت عند الطاوله للي جالسات
عليها وبانتقاد : جالسات ولا كأنكم من اهل العريس
والعروس
منال بابتسامة ؛ وش تبغينا نعمل خلينا جالسات ونحش
احسن لنا
ام مهند : جالسات مثل العجايز ومندمجات
وش هالموضوع للي مشغلكن ؟؟
شوق بابتسامة : سوالف بنات
خزتها ام مهند ؛ سوالف بنات
وبجديه لازم تشاركوا بالحفله ما يصير
كذا
اميره : ما له داعي خلاص الحين تطلع مع زوجها
خلينا مع بعض نسولف زمان عن هالجلسه
وباكر تتزوج هالدبه وزوجها يمنعها عنا ونصير نشوفها
بالقطاره
شوق بغرور : يخسى يمنعني عن احد
انا متى ما اشتقت ما تشوفيني الا فوق راسك
ام مهند بتساؤل : انت وافقت على العريس
شوق فتحت فمها بطريقه غبيه : ها
لا ما وافقت
قاطعتها ام مهند : يخلف على ام جابتك
والكلام للي غردتي فيه
اميره وهي تغمز لشوق :هذا الكلام في حال وافقت
يعني مجرد احتمال
طالعتهم ام مهند وتركتهم مو عاجبها كلامهم
شوق وهي تناظر عمتها رايحه وبجديه : عاجبني لون
الجلابيه للي لابسيتها عمتي لونها هادي
منال وهي تدق على صدرها : اعجبك اشترتها امي
على ذوقي
اميره : مع انه ما يعجبني اللون النهدي ودرجاته
بس اليوم اكتشفت انه في لون اخس منه
اللون المشمشي يقرف وطالعت شوق بطرف عينها
وهي كاتمه ضحكتها
طالعتها شوق وهي تقرص عيونها : اقول لو تحطين
لسانك بحلقك يكون احسن
منال بتأييد ؛ صحيح كلام اميره وش عاجبك باللون هذا ؟؟
شوق ناظرتها من فوق لتحت : احسن من فستانك
للي يشوفه يفكره من التراث القديم جايبيته
منال فتحت فمها بصدمه : حرام عليك
دفعت دم قلبي عليه وانت تقولين من التراث القديم
شوق وهي تحط اصبعها على راسها : انا عاجبني هذا اللون كيفي
اميره كشت عليها : مالت عليك
انا ابغى مصلحتك تراه مو مناسب لك ابد
منال باندفاع : يا غبيه عارفه انه ام صقر رح تكون موجوده
المفروض اخترتي فستان احلى من هذا وعملتي مكياج وتسريحه احلى من كذا
علشان تكونين نجمه الحفله
شوق بقلب ميت : ما ابغى لا نجمه ولا شمس
يا اختي اعتبريني كوكب الارض معتم ومحفر
منال ضحكت بخفه : كوكب الارض ؟!!
هو فعلا يشبهك وخاصه مع هالفستان وكأنك طالعه
من القبر
ما ادري كيف اخترتي هالفستان ؟؟
لو ادري كان طلعت معك وانا اخترت لك الفستان
قاطعتها شوق وهي تبتسم : ومين قال لك اني اشتريت فستان
هذا الفستان اشتريته قبل خمس سنوات
قاطعتها اميره وهي تبغى تضربها :غبيه
وقبل ما تكمل قاطعتهم ام احمد لما خبرتهم انه العروس
رح تطلع للعريس علشان يروحون يسلمون عليها
وقفت مع البنات وتوجهت للكوشه علشان تسلم
على اكره مخلوقه على وجه الارض
طالعتها خلود بنظرات انتصار وانها تزوجت فارس
طنشت نظرات خلود وتقدمت وسلمت عليها
وهمست لها بهدوء « بقايا الذئاب لا يأكلها الا الكلاب »
وابتسمت ابتسامه جانبيه اغاضت فيها خلود
ونزلت من الكوشه
وهي راسمه على ثغرها ابتسامه نصر بعد ما شافت نظرات القهر بملامح خلود

xxxx
xxxx
xxxx
xxxx
xxxx
xxxx
xxxx

ام صقر لوت بوزها : ما ادري وش عاجب جدتك فيها
عاديه واقل من عادي
ياسمين : حتى ما اتوقع تعجب اخوي ساري
ام صقر : دام جدتك موجوده رح تقنعه فيها
وانا الغبيه مخططه انه يتزوج ابنه الجيران
يكفي انها متعلمه فهمانه
قاطعتهم ام عصام وهي تسلم على ام صقر
وجلست معهم على نفس الطاوله بعد السلام
ام صقر بابتسامة : اخبارك ؟؟ واخبار العيال ؟؟
ام عصام : بخير
وانتم وش اخباركم ؟؟ زمان ما زرتونا
ام صقر : انت تدرين بالمشاغل بس ان شاء الله بأقرب فرصه
ازورك
وباستغراب اشوفك جايه للعرس ؟؟
ام عصام : اعرف ام العروس وعزمتني وما حبيت ارد
عزيمتها
وحتى ام العريس شريفه اعرفها
ام صقر : شريفه اعرفها قبل ما تتزوج ناصر
شفتها مره وكان ولدها صغير
ام عصام : نفسه العريس الحين
ام صقر بتعجب : ما شاء الله الايام تمر بسرعه
وش يشتغل ؟؟
ام عصام : يشتغل بالتجاره وقبل فتره رجع من الخارج بعد ما كمل الماجستير
وخطب ابنه عمه ابو فهد بعد ما طلق ابنه عمه
وقبل ما تكمل اشرت بعيونها شايفه ذيك للي لابسه فستان مشمشي هذي كانت خطيبته
وانفصلوا قبل اسبوعين
ام صقر وتحس القهر بداخلها اخر هالعمر تزوج ولدها
مطلقه بس ما اظهرت شيء وسألت بهدوء : وليه اتفصلوا ؟؟
ام عصام : سمعت انهم مو متفاهمين وسمعت انه هي للي طلبت الانفصال تحسه مثل اخوها وعاشت معه مثل اخوانها
بس انا ام فهد قالت لي البنت قويه كثير وما تحترم لا كبير
ولا صغير
وحطت المر بحلق زوجة ابوها واخوانها وللحين مو معترفه فيهم
وحتى فارس ما تركها من وسع يقول ما تحترم امه
ولا اخواته ولا هو تحترمه
ولما طلبت الطلاق ما تردد ولا دقيقه وكأنه الفرصه جاءت له على طبق من ذهب
وطلقها وخطب على طول
الله اعلم بالصدق
اسراء رفعت حاجب: للبيوت اسرار يمكن زوجة عمها
ما تحبها وتحاول تشوه صورتها
ام عصام هزت كتوفها ؛ يمكن الله اعلم بالحق
هذا انا للي سمعته
سكتت ام صقر وهي بداخلها تغلي تبغى ترجع
وتنهي هالمهزله
كيف ولدها يتزوج مطلقه ؟!
مستحيل تقبل بهذا الوضع مستحيل

xxxx
xxxx
xxxx
xxxx
xxxx*
xxxx*
xxxx
بعد ما انتهت الحفلة طلب من ياسر يرجع
شريفه وفاطمه وشوق للبيت
وتوجه لسيارته وهو يحس نفسه مخنوق
حرك السياره وهو يتذكر لما دخل عليه فارس
المكتب
زفر بضيق والموقف يتكرر قدام عيونه

;
;
;
منشغل بالملفات لما دخل عليه فارس عالمكتب و علامات التردد واضحه على ملامحه
رد السلام بهدوء وجلس امام المكتب
ناظره ناصر باستغراب وهو حاس انه في شيء
فسأله حتى يتأكد من حدسه : فيه شيء يا فارس ؟؟
اخذ نفس فارس وهو يرتب الكلام وتكلم بتردد : اممم بصراحه ابغى افتح معك موضوع
بس خايف تزعل علي
ناصر عقد حواجبه باستغراب : ازعل؟!!
وليه ازعل ؟؟
انت مثل عيالي ومستحيل ازعل عليك وانت تدري
بمنزلتك عندي
هز فارس راسه : لاني اعرف مكانتي عندك علشان كذا
متردد من للي ابغى اعلمك فيه
ناصر قاطعه : لا تتردد ولا تشغل بالك وخليك دوم صريح
معي
واشر له يتكلم
هز فارس راسه وبهدوء وهو يرتب الكلام : اممم بصراحه انا ما ابغى استمر مع شوق
لأني أحس انه زواج فاشل من بدايته
طالع عمه يمكن تتضايق من قراري بس انت ربيتني
واهتميت فيني وما قصرت ربي يجزاك كل خير عني
ومن باب اولى ارد لك الجميل اني احفظ شوق واراعيها ومن هذا الباب
بس انا احس ما اقدر امسك نفسي حتى اكون معك صريح
البنت ما تطيقني لا من باب ولا من طاق ولسانها
طويل
وانا ما اضمن اني اتحمل اي كلمه
منها
وما اضمن النتائج حتى
علشان كذا خلينا على البر احسن لي ولها
وانت شفت يبه يوم رجعت من السفر ما كلفت نفسها
تسلم علي
غير نظرات الكره والحقد للي تناظرني فيها
وكأني قاتل لها قتيل
وحتى..
اشر بيده ناصر وهو يحاول تكون ملامحه هاديه : لا تكمل
انا ما رح افرض البنت عليك وبما انك اخترت الانفصال
ما رح اجبرك تغير رأيك
وتقدر الحين تروح للمحكمه وتطلقها ويا دار ما دخلك
شر
هز راسه ومد ورقه بيضاء لعمه : وهذي ورقتها
تناول الورقه وهو يحس وجهه صار احمر من القهر
فتحها وهو يناظر محتواها بتمعن
وضعها على الطاوله وبصوت باين فيه الضيق : هذا انت مجهز كل شيء بنفسك ومستعجل على الطلاق
نزل فارس عيونه للارض باحراج وما قدر يرد بكلمه
كمل ناصر بعد ما زفر بضيق : ترى كلامك كله حشو
ما هو منطقي ابدا
الحرمه اذا طال لسانها الرجال يقدر يقصه لها بطريقته
بدون ما يتطرق للعنف
وما تقدر تحكم على الحياه الحين لانه الايام تغير النفوس
يمكن تقول بنفسك اني صاف مع ابنتي
وبكل صراحه اقول لك ايه صاف مع شوق
لانه الغلط راكبك من راسك لاسفل قدميك
اذا انت ما تبغى البنت ليه تربطها اكثر من ثلاث سنوات ؟؟
ليه ما تركتها تشوف حياتها ؟؟
انا ما افسر تصرفك هذا الا تصرف بزران
تبغى تقهرها وتاركها معلقه وبعد وقت ترميها
رمية كلاب
فارس باحراج وتوتر : ءء انا
ناصر كمل كلامه : لا تبرر موقفك
لو بتعزني ولي مكانه عندك كان فكرت فيني
وش تقول الناس عني ؟؟
طلق ابنته بعد سنوات !!
ما شاء الله !!
وبعصبيه وقهر : ليه ما طلقتها من البدايه او قبل ما تسافر ؟!!
فارس اخذ نفس : بس انت قلت انك ما رح تزعل
واشوفك الحين
قاطعه ناصر بعصبية : اكيد رح اتضايق هذي ابنتي
شوق وانت تعرف وش عندي شوق
تبغى اصفق لك مطلقها بعد سنوات وعلى اسباب ما تسوى تتكلم فيها
وش تبغى يكون رد فعلي ؟؟؟
تكلم !!!!
فارس بندم : انا اسف وخلاص اعتبر الموضوع ما صار
وانا مستعد ارجعها لذمتي
قاطعه ناصر بحده : مستحيل
طلقتها وكل شيء انتهى
انسى بيوم ترتبط فيها كل واحد بطريق
فارس ووجهه احمر من الفشيله : اشرط علي وانا انفذ
تكلم ناصر بصوت متضايق : اسمع ما ابغى انسان يدري
انك انت للي طلقتها فاهم
عقد فارس حواجبه مو عاجبه الكلام بس ما علق على الموضوع اكتفى بالسكوت
تابع ناصر كلامه : انا رح انشر قدام الكل انه شوق
هي للي طلبت الطلاق وما تبغاك
قاطعه فارس بانزعاج : يبه وش تقول ؟
مو حلو بحقي انها هي للي رفضتني وطلبت الطلاق
ناظره ناصر بحده : يعني حلو بحق شوق انك رفضتها وطلقتها بعد هالسنين ؟؟؟؟
اذا انت رجال مو قابلها على نفسك تبغى اني اقبلها
لابنتي
مستحيل
فارس والقهر باين بوجهه : طيب خلاص قول انك انت
للي فصلتنا عن بعض
قاطعه ناصر بحزم : انا رح اقول اني انا طلبت منك الطلاق
بس قدام شوق اما الباقي رح نقول انها شوق للي طلبت الطلاق
وغير هالكلام ما عندي
واذا تبغى تكسر كلامي بكيفك روح قول للي تبغى
وخلاص انتهينا
فارس ناظره وهو يعض على شفته وتكلم بعد تفكير : انا موافق على كلامك ومستحيل اكسر كلمتك
بس لي شرط واحد يضمن لي انك مو زعلان
ناصر بدون نفس : وش هو ؟؟
فارس بهدوء : تخطب لي ابنه عمي ابو فهد خلود
هز راسه ناصر بدون اهتمام : خلاص مثل ما تبغى
اخطب لك خلود
بس إياك اسمع انه الكلام للي صار بيننا طلع من المكتب
هز فارس راسه : لا تخاف ما رح اتكلم
زفر بضيق ناصر لما تذكر هالموقف للحين ضايق صدره
لما يتذكره
استغفر بصوت منخفض وكمل طريقه
وهو يحس الضغط عنده مرتفع

طلعت من القاعه مع امها وهي ترتب النقاب
وقفت امها لما شافت فهد وردت عليه السلام
فهد باحترام : وعليكم السلام
كيف حالك يا خالتي ؟؟؟
فاطمه بهدوء : الحمد لله بخير
وش اخبارك يا ولدي ؟؟
فهد بهدوء : الحمد لله بخير
وطالع جهة شوق : اخبارك يا شوق ؟؟
طالعته شوق نظرات حاقده وفتحت الشنطه
وتشاغلت فيها
حس فهد بالفشيله من تصرفها
وناظر فاطمه وهو يرسم الابتسامه بعد ما تفشل : علامها ما تسمع ؟؟
فاطمه منحرجه من تصرف شوق : يمكن ما سمعتك
منشغله تدور على ..

قاطعها فهد ؛ عادي مو مشكله
تعالوا للسياره ارجعكم معي
فاطمه : ربي يجزاك خير
بس ما له داعي تكلف على نفسك الحين نرجع مع ياسر
فهد : غلبتكم راحه وبعدين
ياسر راح يوصل جدتي وللي معها
ورح يطول حتى يرجع لكم
وانا ما معي الا مريم وخالتي شريفه
قبل ما ترد سبقتها شوق وهي ترد من رؤوس خشومها : اقول تيسر من هنا
ما نبغى نطلع معك
قاطعتها فاطمه بنهر : شوق وش هالكلام ؟؟
فهد يكلم فاطمه : تفضلي خالتي على السياره
ما نبغى نتأخر
فاطمه بهدوء : ان شاء الله
واشرت لشوق تلحقها
وقبل ما تعترض اعطتها نظره قويه
وتوجهت للسياره
لما شافت امها راحت ومعها فهد
وطنشوها ولا كأنها موجوده
اضطرت تلحق امها وهي معصبه
وما خلت شتيمه الا قالتها بحق فهد
xxxx
xxxx
xxxx
xxxx
xxxx
xxxx

في اليوم الثاني جالسه بغرفتها
وياسر فوق راسها يزن : اففف تراك طفشتينا
وحنا ننتظر الجواب
قولي اما يس او نو
طالعته شوق وهي رافعه حاجب : اشوف صاير تتكلم اجنبي
ياسر وهو يميل شفايفه : يا شيخه هالكلمتين
بس حافظ
احمدي ربك عليهن
والحين لا تغيري الموضوع وش ردك
ترى صار لك اسبوعين تفكرين
شوق لوت بوزها ؛ يعني كيف اعطي رأيي على موضوع بالنسبة لي مجهول
يعني ما اعرف عنه شيء كيف اوافق ؟؟
ياسر وهو يخزها بعيونه : اعطيناك موشح كامل عنه بكل شيء
وش للي تبغين تعرفين عنه ؟؟
شوق وهي تلعب بطرف البلوزه : اممم قلت لك من قبل
ياسر بتأفف : ياهوووووو على هالسؤال
بالله يعني لو طلع مو حلو بترفضين؟؟
وش تبغين بشكله الحين ؟؟
وبعدين قلت لك ما اعرف الرجال
لما جاء وخطبك كان عندي دوام
وسألت ابوي عنه كيف شكله
طالعني ورد علي بسخريه وقال رجال يعني كيف رح يكون شكله !!
زفرت بضيق شوق : بالله هذا جواب ؟!!
اشر ياسر لها على الباب : تفضلي روحي اسألي ابوي عن شكله
طالعته بتصغير : ما اسخفك
بالله انا اتكلم جد المفروض جبت لي صورته
مسكها ياسر من اذنها : يوم الشوفه الشرعيه
بتشوفينه
وغير هالكلام ما عندي
الحين اعطي موافقه اوليه وبعدين تشوفينه
اذا كنت خايفه من الشكل
وبعدين حطي في بالك الشكل مو شرط للسعاده
يعني البنات تدورون عن الرجال المزيون
اهم شيء عندكن
مع انه يمكن تعيش بتعاسه مع هالمزيون
الجمال مو شرط
والحين قولي لي رأيك !
شوق طالعته من فوق لتحت : انت وش دخلك ؟
انا اعرف الام هي للي تسأل البنت وتأخذ الموافقه
منها
قاطعهم دخول فاطمه وهي تتكلم : وهذي الام جاءت لعندك تأخذ موافقتك يا عروس
خلصينا يا شوق ترى ما صارت
شوق ابتسمت لامها واشرت على ياسر : يطلع
استحي اتكلم قدامه
وصارت تعمل حركات انها مستحيه
ياسر جكر فيها جلس على السرير وتربع : جكر فيك مو طالع
ورح تقولين رأيك غصب عنك
والا اقول لابوي عن اسئلتك البايخه
وخزها بعيونه
شوق كشت عليه : خلاص اجلس
امري لله
ابتسمت فاطمه وهي تناظر ياسر وشوق
وجلست على الكرسي
تسمع رأي شوق
xxxx
xxxx
xxxx
xxxx
xxxx
xxxx

ام صقر بعصبيه : قلت لك تتصل الحين
وتلغي الخطبه
ساري بهدوء : طيب اعطيني سبب مقنع علشان اروح
وألغي الموضوع كله
ام صقر وهي تناظره والشرار يطلع من عيونها : تدري انها البنت مطلقه من ابن عمها
ساري وهو يحط يده تحت خده بهدوء : ايه ادري
قال لي ابوها
وش المشكله بالموضوع ؟؟
لو متزوجه كان فيه نظره
ام صقر قاطعته بعصبية : قلت لك لا يعني لا
انا كل البنت مو داخله مخي
ولا عاجبيتني
ولا تنسى جمالها مو ذاك الزود
رد بهدوء : مو شرط يمكن تكون بعينك مو حلوه
بس انا تكون بعيني حلوه يعني مو مقياس
وبعدين انا اعطيت الرجال كلمه ومستحيل اتراجع
عنها الحين
اذا رفضت البنت تكون جاءت من عندها
واذا وافقت في شيء يسمونه الشوفه الشرعيه
اروح اشوفها واتكلم معها عجبتني تممنا على خير
ما عجبتني كل شيء بدار اصحابه
ليه انت معصبه لذي الدرجه مو عارف
ام صقر هدأت شوي : طيب نشوف وش رح يطولنا من هالسالفه
لو انك تسمع كلامي
جلس جنبها وابتسم : يا يمه تدرين انك غاليه
عندي واي شيء ارد عليك
بس هذا الموضوع طلع خارج عن يدي
يعني جدتي كلمت ابو البنت بدون علمنا
كيف تبغين افشلها وارفض
وبعدين انا مو حاط بنت معينه في بالي
رح اجلس معها واشوف
لا تحكمي على البنت من اول نظره
انت ما جلست معها ولا كلمتيها حتى تحكمين عليها
صح ؟
هزت راسها بعدم اقتناع
وتكلمت ياسمين : بس سمعنا انها قويه وما تحترم
لا كبير ولا صغير
زوجة عمها شاكيه منها وحتى خطي..
قاطعها ساري بضجر : تراكم وجعتوا راسي بالموضوع
خلاص
وبعدين مع ذي السالفه ؟؟!!
ام صقر بزعل وهي تناظر ياسمين ؛ شفت من الحين قلب علينا قبل
ما يتزوجها باكر اذا تزوجها ما رح نشوفه ابد
ابتسم على كلام امه ؛ يعني مو كأنكم انتم طفشتوني من اول ما جلست
احمدي ربك اني بعدني جالس
ام صقر : لا تلومني ترى هالبنت مو داخله مخي
فهد تنهد وناظر امه : والله الف حرمه ما ابديها عليك
وخلاص يوم الشوفه